بصراحة دورت بالانترنت مالقيت حل جيد واتمنى المساعدة منكم

القصة انه صارت بيني وبين واحد من اخوياي مشكلة وانتهت بزعله , المهم صديقي هذا ماتكلمت معه من عدة اشهر تقريباً 4-5 اشهر, بس سلام وكذا وتقريباً انا اشوفه بشكل شبه يومي وبصراحة اشتقت اني اسولف معه واكلمه وكذا هو كان من اعز اصدقائي واغليه بشكل كبير , بصراحة مدري كيف اصفي النية معه ,,, ساعدونا

اتمنى مايجي واحد ويقول طنشه ولا تهتم ومدري ايش لاني لو بطنشه ماكان نزلت الموضوع , انا تهمني صداقتي معه ومابي اخسرها ,,


يليت الحل

ما ازييد على الكلام الاخ سعود الفيفي..

الله يجزاكم كل خير

اتمنى المزيد من الاراء والي صارت له تجربة مشابهه اتمنى يفيدنا

إقتباس الرسالة الأصلية كتبت بواسطة abo-homood طيب يا اخوان انا عندي نفس المشكلة لكن فيه فرق بسيط ان فيه ناس يعبون راس صديقي بالكلام وقطع علاقته معي بسبب كلامهم وش الحل ؟؟

مالك الا المصارحة معاه وجها لوجه لكن لا تقول له ان الي حواليه يعبون راسه بطريقة مباشرة !!

لا بالعكس اذا كان يعزهم اذكر له محاسنهم وامدحهم وراح تلاقيه شوي شوي يرجع يميل لك !!

ووقتها تلقائيا راح يكتشف من الي كان على خطأ !!

خخخخخخ حسيت ان اخصائي اجتماعي

8
8
كلام سليم , بس أحيانا تصفية النفوس والتفاهم أهم من الهدية
اللي أبي أوصله لك يـا AL-Za3eem أهم من أنك ترجع العلاقة لازم تفهم سبب الانقطاع
يعني ياتقربون وجهات النظر وتحلون الموضوع ولا بلاش من الرجعة , لأنه اللي حصل بسببه الانقطاع والزعل ممكن يتكرر

والله يرجع كل صاحبـ لـصاحبـهـ

صدقني هو أكيد بعد متضايق من الي صآير بينكم
يعني لآزم تآخذه على جنب وتتكلم معاه
وتتفاهوا وتبين له وجه نظرك وهو بعد
وحتى لو هو كآان غلطآن هو يعز عليك
ومآينفع تخسره عشآن أشيآء ماتسوى
وأكبد هو بيتفهم وبيتجآوب معآك
والله لآيفرق بين أي صديقين

أختك : هلآآلية لعيونه

السلام عليكم


الدنيا ما تخلى من المشاكل وما في احد مرتاح ...


فالبداية اخوي كلنا او الغالبية مر بصداقات متعددة ومرت عليه مشاكل وأسبابها مختلفها لكن غالبيتها من وجهة نظري "التغلي"


يعني خويك يتغلى عليك .. انت تكرمه وتعطيه اجمل الكلام وتهديه هدايا وما تلقى منه لا شكر ولا رد جميل ولا مقابلة الاحسان بالاحسان .


وهذي غريزة سبحان الله عند البعض


ومادري وش يستفيد اذا كان بيتغلى وممكن مصير هـ " التغلي " مشكلة او لا قدر الله فراق على شي تافه !


انا واحد من أعز اصحابي .. علاقتنا ماشية تمام واهديه هدية بين فترة وفترة وارسل له رسايل وهو يدري انه غالي عندي بالحيل ,


لكن سبحان الله مع الايام لاحظت ان اسلوبه بدى يتغير وانا متأكد اني ماسويت أي شي !


يعني لدرجة انه مرة كان يتمنى يشري شي ويقول بجمع دراهمي من الحين والاجازة الصيفية باخذ "سلفة من البنك" عشان اشري اللي ببالي ..


انا عرفت وش يبي ... وخططت اني أفاجأه واهديه اياه , ومرت فترة 3 شهور او اكثر وانا حارم نفسي من اشياء كثيرة وجمعت مكافآت الجامعات ويمين ويسار والحمدلله شريته له , وغلفته واهديته الهدية مع كرت ,
تفاجات اني لحظة تقديمي للهدية ما قالي لا كلمة شكراً ولا أي شي بس اكتفى "شكلي بفتحها الحين وهو يضحك" !


وانا والله اني ما انتظر لا "شكر" ولا "رد هدية" , كل اللي ابيه يرجع علاقتي معه مثل أول ويترك أشياء هو يدري اني ما احبها فيه لكن سبحان الله مع الايام تنقص غلاته!


وانا لو بغيت اسبب مشكلة ولا شي . كان زبدت له من البداية لكني اقدره واغليه ومابي هالشي له .


انا والله ما احب اتكلم بهالامور لأني ما احب اتكلم عن نفسي اساسا واكره هالشي ..


لكن والله حبيت اوضح لك بس وش ابي اوصل له


ومثل ما قالت "الفيروسة" افضل حل تقريبا ... تجمع لك قرشين وتشري له "جوال" أو "كاميرا" ان كان من هواة التصوير أو عطر أو تورته والهدايا ما لها حد الحمدلله . واهم شي تكتب كرت وتحط فيه بيتين وانك محتاجه وهو غالي وتبي ترجع علاقتكم مثل أول .


وهذي ابيات لقيتها اعجبتني ... اختر البارت الأنسب واكتبها على كرت وارفقها مع الهدية

إقتباس أنا محتاجك أنا قلب فيه من الحزن والعناء أنا محتاجك أنا شوفك يعطيني السعد والهناء أنا محتاجك أنا محتاج قربك محتاج طيبك محتاج حبك بين الضلوع يضمنا أنا محتاجك أنا محتاج حنانك محتاج شوفك محتاج خصامك والدلع فيك والوفاء أنا محتاجك انا أبكي بين يديك تحتويني ذراعيك ومن بعدك دمع العين ياما فنى أنا محتاجك أنا أرسمك كصورة واعلق حبك كقلادة واصبح اهتف باسمك امام كل الملأ أنا محتاجك أنا تروي قلبي الضامي وتدخل السعد بوجداني فشوفك وقربك لي هو يوم المنا أنا محتاجك انا أنظر إلى عينيك واضم يديا إلى خديك ياللي احتارت في وصوفك أشعار القصايد والأفراح والغناء أنا محتاجك انا يابدر بين الكواكب ونجم ساطع في السماء أنا محتاجك أنا أنا كلي لك أنا فأنت النهر في عذوبته وانا البحر أروي عشاق الهوى أنا محتاجك انا أنام بين احضانك وارتوي الحب من وجدانك يا كل الشوق وكل الذوق وكل الغلا أنا محتاجك أنا فكل قلب إلى حبيبه يحتاجه وحاجتي في نظرت عيونك ونبرة حنانك وبسمة فؤادك وهمسة سلامك ورقة كلامك فتلك القلب لها محتاجه أنا محتاجك انا

والله يجمع بينكم بخير ...


واي مساعدة انا حاضر ولا يردك الا الخاص

إقتباس الرسالة الأصلية كتبت بواسطة abo-homood طيب يا اخوان انا عندي نفس المشكلة لكن فيه فرق بسيط ان فيه ناس يعبون راس صديقي بالكلام وقطع علاقته معي بسبب كلامهم وش الحل ؟؟

حياك الله


هذي غالباً ما تصير إذا كان للشخص عدة أصحاب ويطلع معهم لكن يميز واحد من بينهم


الباقين "تطقهم الغيرة" على ماقال ,, ويبون يسوون اي شي اهم شي ما تكون أنت كـ شخص أغلى منهم !


واكبر مثال ,, قصة يعقوب عليه السلام وابنه يوسف وابناءه الباقين


فـ افضل حل من وجهة نظري ... ترسل رسالة لصاحبك وتوضح له المواقف اللي انت بريء منها ومتأكد انها مغلوطة ومفبركة عليك وتقولها كيت وكيت وانت لولا كنت منت غالي عندي كان ما اهتميت لعلاقتنا ولا ارسلت لك ومن هالكلام


اهم شي لا تحاول تفاتح الموضوع معه وجه لوجه يعني تقابله يوم من الأيام وتفاتحه الموضوع , ممكن على ما قال تدهن السير قبل برسالة وعقبه تطلع معه لكن نصيحتي لك ونصيحة مجرب , لاتفاتحه موضوع دايركت وجه لوجه لأنه ممكن تنفتح سوالف ثانية في لحظة غضب وتنتهي علاقتكم بلحظة الله لايقوله ,
فالرسالة ممكن الشخص يفكر اكثر من مرة وش يكتب ويراجع كلامه اكثر من مرة , لكن اذا كنت تحاكيه وتطلب منه اجابه وتوضيح لأمر ما فـ هو بيعطيك اللي عنده وممكن اذا زعل من شي او ما اعجبه شي ممكن يطلع عليك اشياء ويرتفع صوته عليك


والله ييسر امرك يا صاحبي


فمان الله

الله يجمعكم ببعض وتصفى قلوبكم

يعطيكم العافية جميعاً

رحت مباشرة له واعتذرت له , على كلامه يقول انه ماكان زعلان وكذا

المهم الله يجزاكم كل خير واذا فيه نصائح لتصفية العلاقة من جديد فكثر الله خيركم ^^