غـــديـــريـــات - نادي الهلال السعودي - شبكة الزعيم

الغدير الازرق · #1 08/07/2009, 08:27 PM

السسلام عليكم ورحمة الله وبركاته

مساكم / صبحكم الله بالخير جميعاً

يالربع انا بليد بالمقدمات وهي بالنسبة لي أصعب من كتابة موضوع وكذلك الحال ينطبق على التنسيق وبما إني بليد عزمت آخذ فرة على كم من موضوع لكم من عضو عزيز وتسلفت منهم فواصل وعشان كذا اللي يشوف يوزري موجود بملفه الشخصي بيعرف إني زارف من عنده شي

[المهر .. يكسر الظهر ]

لو تسأل أي شاب سعودي وش أكثر شي شايل همه بيقولك المهر بدون تفكير

ولذلك تتغير أرقام المهور الفلكية من عائلة لأخرى ومن قبيلة لأخرى
وكذلك تتغير طرق التسديد من عائلة لأخرى ومن قبيلة لأخرى
منهم من لايرضى إلا بالكاش .. ومنهم اللي يرضى بتقسيط المهر منتهي
بالتمليك

ومنهم اللي يعامل العرسان كمعاملة البنوك لعملاءها يبي فوائد
ومنهم من يعين ويعاون ويدور الستر ... الخ

تناقشنا أنا وأحد الأصدقاء عن المهور وسألني عن المهور عندنا
فعندنا مهورنا 50 إلى 60 ألف شاملة كل شي من شبكة وذهب وهدايا
ورواتب ومكافأت

ففاجئني بحديثه إن مهورنا يابلاش .. لأني كنت متوقع إن مهورنا غالية
حبيبنا يقوول إن أسرتهم أو المنطقة اللي عايش فيها عندهم الزواج أمام الناس والمأذون بريالين ويدعون مساعدة الشباب
ويابخت من وفق رأسين بالحلال ومن هالخمبقة لكن المصيبة والكلام لصديقي
بعد عقد النكاح يطلبون منه
شبكة وذهب وهدايا للأم والخوات والعمة والخالة والشغالة

يعني يطلع مجموع هذا كله يفووق الـ 80 ألف .. طييب من الأول قولوا
إن المهر 80 ألف وبلاش لف ودوران وحييل مال أمها داعي

أقسم بالله يابعض العوايل على هالمهور المرتفعة اللي يطلبونها يحسسونك
إنك جااي تتعاقد مع لاعب ماجاي تخطب .. وللمعلومية أنا منيب ضد
المهور وأقول زوجونا ببلاش لاأبداً .. والمهر من أبسط حقوق الفتاة
لكن المهور لابد تكون بحدود المعقول .. وأمنيتي أن تتدخل الحكومة بذلك
وتضع حد أقصى للمهور فالشاب مامداه يفرح بوظيفته بعد عطالة سنين ويقول هانت خلاص أبتزوج إلا صادمينه أهل العروس بمبلغ وقدره حق مهر وينتظر سنين ثانيه
حتى يجمع حق المهر .. يسروا ولاتعسروا ,,

/
/
/

[ إستغلال .. عواطف الشعب ]

يالربع من تالي الشركات والبنوك هابين هبة مهيب صاحية صاروا يطبقون سياسة الخقخقة لامنهم بغوا منك شي هاه خلوا وحدة من هالموظفات تتصل عليك .. ولامنك بغيت منهم شي هاه رد عليك واحد من هالموظفين ونفسه براس خشمه تقل كاسرن عينك وإلا ماسك عليك شي

طبعاً هم عارفييين نقطة ضعف شعبنا المغلوب على أمره يخق مع أي صوت أنثوي

ذاك اليوم جاي من الدوام عالساعة 2 الظهر وماعندي من الشيطان طاري إلا جاني هااك الأتصال .. ألو .. سلام عليكم السيد فلان الفلاني .. (تناديني بالسيد يقال الحين تراني معطيتك أسلوب لابوتس يالتكرونيه

) معك فلانه من الـ art

طبعاً يوم سمعت الـ art دريت إن السالفة فيها تجديد إشتراك .. طبعاً ذولي مايلعبون يسحبونك
على وجهك يدرون إنك ماتغديت وبتتشابك أسلاك البطن مع المخ وبتدوخ ويمكن تميع بوسط سماعة الجوال وبغمضة عين ماتدري عن نفسك إلا أنت مجدد لـ سنتين قدام ومثل ذولي ماينفع معهم إلا واحدن متبلد إحساس يسمع بالعواطف الجياشة مهما دغدغوا مشاعره مايتأثر

لكن اللي لاحظته بحقين الـ art بما إني زبون دايم عندهم إن أطلق وحده فيهم صوتها فيه لحمية

.. اما غير ذلك يكافينا الشر .

/
/
/

[على حجاجك .....

]

إلى وقت قريب أنا من الناس اللي أعاني ويرتفع ظغطي لامنك نصيت مكان معين ومادليته وفجأة طحت بشايب وتبيه يوصف لك هالمكان .. يقولك حط الشمس على حجاجك الأيمن

عااد أنت تقعد مبلم وتدربي هالدمجة وتبي تشوف وين يبي يوصل له .. والشايب مبتل بالوصف ويقول .. لامنك وصلت عند رأس ضلع حطه على حجاجك الأيسر .. حطينااه على حجاجنا الأيسر.. وبعدين

طبعاً المشكلة مهيب بعدم معرفة معناها لاطبعاً لأن معناها معروف وواضح
لكن أنا من الناس اللي مايحب هالطريقة بالوصف ينلحس مخي ولامنك مسكت خط وطول الطريق وأنت تنطل أي شي على حجاجك .

وش المانع يمال الغنيمة بكونك تقول أول لفة يمين أو أول لفة يسار وانتهينا
لييش لازم ندخل هالحجاج بالموضوع حتى قوقل إيرث لامنه بغى يوصف
مايعترف بسالفة الحجاج

.. طبعاً الشيبان هم الخير والبركة

والمصطلحات كثيرة لكن هذا اللي يحضرني من مصطلح يقلق مندوب مخي

ختاماً .. هالموضوع كتب كتسجيل حضور بالمجلس فقط

وأتمنى أن أكون وفقت بطرح ولو جزء بسيط ينفع القارىء

كل الشكر لحبيب الشعب أبو مقبل

وتراك تتحمل عواقب الموضوع