صباح الخير / مساء الخير ..




بدأ ملتقى ربوة الرياض الثالث بعنوان وقتك فل يوم السبت 11 / 7 , وستمتد فعالياته لثلاثة اسابيع وينتهي يوم الجمعة 2 / 8 ..


الملتقى بدأ من يومين والغريب في الامر ان ماله اي تغطية اعلامية له ما دريت الا من اخوي الصغير ..

جدول الفعاليات والمحاظرات :
(( هنــــا ))
من موضوع الاخ شيروكي ..
والله لا يحرمك الاجر ..

موقعه على الدائري الشرقي بين مخرج 10 و11 بجانب متحف صقر الجزيرة ..
طبعا كنت رايح مشوار انا واخوي الصغير لطريق الملك عبدالله وخلصنا بدري واقترح علي نشطف على ملتقى ربوة الرياض .. وانا وافقت على اقتراحه ..
طبعا مرينا الملتقى وكان رائع جدا ويحتوي العديد من الاجنحة والفعاليات والمطاعم .. واخذنا كم صورة عالطاير للفعاليات اللي فيه ..

يوجد قسم خاص للنساء وله فعاليات خاصة بهم طبعا ما معي الجدول ولا كان نزلت لكم صورة للفعاليات ..
حاولت معهم ادخل فيه واسوي تغطية للفعاليات اللي عندهم لكنهم رفضوا .. بكيفهم هم الخسرانين ..

ويوجد قسم للاطفال وفيه ملاعب كرة والملعب الصابوني و مسابقات وحاجات كثير مناسبة لاعمارهم بالملتقى ..

رغم ان بعض الاجنحة باقي يحظرون لها اتوقع بالكثير بكرة او بعده وهي خالصه ..
طبعا عتبي عليهم كما قلت بالدعاية للملتقى وكذلك بجدول المحاظرات والفعاليات سالتهم قالوا وزعنا امس واليوم ما جانا شئ نوزعه .. !!

طبعا رحت لموقعهم على النت ابي اشوف الفعاليات للاسف مالقيت الا جدول السنة الماضية .. شكلهم ما يبون احد يحظر .. !!

نبدأ بالصور ..
هذا المدخل طبعا يوجد مواقف كبيرة جدا للسيارات يعني اللي بيروح له لا يخاف بيلاقي موقف لسيارته ..





طبعا اول خيمة واجهتنا هي خيمة ارامكو ..
طبعا ما اكتمل تجهيز الخيمة لكن كانت موجودة سيارة المكتبة المتنقلة ..
طبعا استاذنت من المسؤول عن المكتبة بالتصوير واذن لى وكان اخلاقة جدا عالية ..
يالبى قلوبهم موظفين ارامكو راقين بكل شئ ..



وهذي صورة ثانية ..


طبعا الشخص اللي موجود بالصورة كان ناوي ينحاش بس قفطته بالصورة ..
كان فيه شباب كثير جالسين بس يوم دروا اني باصور انحاشوا ..
احد لاعب عليهم وقايل لهم ان القراءة للبزارين بس .. !!

هذي صورة المكتبة من الخارج ..




مقابل المكتبة كانوا حاطين الكرسي اللي تجرب فيه اهمية حزام الامان ..



طبعا فكرته انك تركب بالكرسي ويدحدر فيك بسرعة ويصدم بحديدة ما يردك منها الا حزام الامان .. << كيف الوصف ..


بعدها توجهنا لخيمة الفعاليات وكان بعض الاقسام مثل الهيئة والمرور و وزارة العمل لا زال يجهزون فيه ..

هذا جناح هيئة الامر بالمعروف والنهي عن المنكر .. .. رح يكون جاهز ان شاء الله تقريبا بعد يومين ..

لقيت شعار كبير للهيئة على الارض بغيت اخذه واعلقه على سيارتي واهجول فيه اهبل بالعالم ..
بس المشكلة كان فيه شخص ناشب هناك مو راضي يروح ..

صورة ثانية بجناح هيئة الامر بالمعروف والنهي عن المنكر ..



جناح المرور ..
فيه شخص لابس لبس المرور وواقف بالجناح ومعطينا ظهره .. !!
وكنت اكلمه وما يرد علي يوم قربت منه لقيته ..




طبعا في جناح المرور استفدت حاجات كثير ..
من ضمنها ان لوحات السيارت الجديدة مو جديدة سبق واستخدمت من زمان ..
وهذا الدليل ..




هذي صورة لموكب الملك سعود رحمه الله ..


اللي شدني بالصورة ان الموكب كله سيارتين والطريق مو مزفلت .. !!


بعدها توجهنا لخيمة المحاظرات والمسابقات ..
وكان فيه محاظرة رائعة بس مدري وش عنوانها ومنو الشيخ اللي القاها ..




طبعا الحضور لا يعكس مدى روعة المحاظرة .. اغلب الشعب متكين عند المطاعم والبوفيات وساحبين على المحاظرة ..


وانا طالع من الملتقى شد انتباهي كثرة الاجانب عند احد الخيام ولما قربت منهم لقيتها خيمة توعية الجاليات ..



يعني فرصة تجيبوا معكم السواق على الاقل يستفيد شوي بدل المشواير اللي مالها سنع ..
الله يجزاهم كل خيرعن العمل اللي يقوموا فيه ..

انتهت تغطيتي المتواضعة للملتقى ..



مع كل امنياتي لكم بقضاء اجازة سعيدة ,,

السلام عليكم ورحمة الله وبركاته

صبااااح الخير Blue Sun

ويعطيييك العاافية ع التغطية الراائعة والتعليقات الأروع ، وعساك ع القوة

ملتقى الربوة قد رحت له من قبلَ ، كانت الفعاليات النسائية حلوَة بس زححححححححححححححححححححححمة وحرررر بعذرهم لو ماحطّوا إعلان ،،

أذكر ذيك المره تضاربوا حريم وجو الشرطة والهيئة وحوووسه
بغيت أتهور وأفكّ بينهم بس خفت أروح ضحية إرهاب وعنف طاائش

إقتباس يالبى قلوبهم موظفين ارامكو راقين بكل شئ ..

اي والله يالبى قلوبهم ، مرة طلعوني بمجلتهم ومن عقبها وانا اعشقهم
بس كلمة حق تنقال ، راقين راقين منظمين إلى أبعد الحدوود

إقتباس هذي صورة لموكب الملك سعود رحمه الله ..

أحلى يالموكب الملكي
أجل سيارتين بس ، والا شوفوا اللي منغرس يدق التحية، يكسر الخاطر لحاله

إقتباس انتهت تغطيتي المتواضعة للملتقى ..

ياماااال العافيه ماقصرت تسلم لنا يمناك والله يجزاك خير
شكراً جزيلاً لك

[SIZE="4"]الله يجزاك الخير ويجزاهم كل خير ..




ليه الشباب يتنطعون ويقولون وين نروح ....هذا الملتقى فيه كل الخير والوناسة



وسعة الصدر القلوب تصدأ وذكر الله يجلو الصدأ ..


والملائكة تحف المكان الذي فيه ذكر الله ..



ننتظر تغطية كاملة عسى خطواتك في ميزان حسناتك ..[



/SIZE]

يعطيك العافية على التغطية الحلوة

.

.

مآشاءالله تبارك الله , الله يبارك فيهم ويطرح فيهم البركه منظمين هـ الملتقى

والله هـ الملتقى سمعت عنه كثير , بس للأسف ماقد رحت له , بس بإذن الله
هـ السنه أروح له لأني متحمسه شوي





عآدي احنآ نجربه أحس يونـّس


الله يعطيك العافيه blue sun ~
كل يوم روح الملتقى وجب لنآ تغطيه
مآقصرت


مع التحيه

الله يعطيك العافيه على التغطية والصوور

للرجال:

إقتباس الثلاثاء 7/14 = د.خالد الشايع *من أبواب الجنة (بر الوالدين)*

واللي يبــي الجــــدول للرجال والنساء

يدخل على هذا الموضوع لشيروكي


هنــــا

هلا وغلا Blue Sun ,
ما شاء الله عليك على التغطيه الجميلـه ,
يعطيك ألف عافيـه
بس عندي ملاحظه ,
7
7


شوفو أول لوحه من يمين ..!
بدرجاتهم << كذآآ
ولا بدراجاتهم , ترآآ أنا ماأدري للحين < راسب في الإملاء
< مالقى ولا خطأ على بعض الناس أستقعد للصور

يعطيك العافيـه مره ثانيه أخوي Blue Sun

إقتباس الرسالة الأصلية كتبت بواسطة ربطـه و شبـاصه السلام عليكم ورحمة الله وبركاته صبااااح الخير Blue Sun ويعطيييك العاافية ع التغطية الراائعة والتعليقات الأروع ، وعساك ع القوة ملتقى الربوة قد رحت له من قبلَ ، كانت الفعاليات النسائية حلوَة بس زححححححححححححححححححححححمة وحرررر بعذرهم لو ماحطّوا إعلان ،، أذكر ذيك المره تضاربوا حريم وجو الشرطة والهيئة وحوووسه بغيت أتهور وأفكّ بينهم بس خفت أروح ضحية إرهاب وعنف طاائش اي والله يالبى قلوبهم ، مرة طلعوني بمجلتهم ومن عقبها وانا اعشقهم بس كلمة حق تنقال ، راقين راقين منظمين إلى أبعد الحدوود أحلى يالموكب الملكي أجل سيارتين بس ، والا شوفوا اللي منغرس يدق التحية، يكسر الخاطر لحاله ياماااال العافيه ماقصرت تسلم لنا يمناك والله يجزاك خير شكراً جزيلاً لك

هلا وغلا ربطة وشباصة ..
الروعة هو تواجدك وردك بالموضوع ..
لا ابشرك الحين كل وحدة تجي يعطونه مكيف واذا خلصت تسلمه عند البوابة قبل ما تطلع ..
والله مالك داعي ليتك فكيتي بينهم ولو جاك شئ احتسبيه عند الله ..
الا صح باي عدد طلعتي بمجلة ارامكو ..
الله يعافيك اختي وتشرفت بتواجدك ,,

إقتباس الرسالة الأصلية كتبت بواسطة الضحى الله يجزاك الخير ويجزاهم كل خير .. ليه الشباب يتنطعون ويقولون وين نروح ....هذا الملتقى فيه كل الخير والوناسة وسعة الصدر القلوب تصدأ وذكر الله يجلو الصدأ .. والملائكة تحف المكان الذي فيه ذكر الله .. ننتظر تغطية كاملة عسى خطواتك في ميزان حسناتك ..[ /SIZE]

هلا وغلا الضحى ..
شرفني تواجد استاذتنا بموضوعي ..
وجود مثل هالملتقيات متنفس للشباب بالاجازة لكن عيبها الوحيد هو قصر مدتها ..
ونتمنى تكون طول فترة الصيف حتى تشغل الشباب باشياء تفيدهم كثير بدينهم ودنياهم ..
وان شاء الله اجيب التغطية كاملة باقرب فرصة ..
جزاك الله كل خير ولا تحرمينا تواجدك ,,

إقتباس الرسالة الأصلية كتبت بواسطة وليد القحطاني [SIZE="4"]حيا الله فهد ماشاء الله عليك حطمتني والله خلاص ما عاد بغطي لكم , بعد هالتغطية والزين وش اغطي لكم بس والله أعجبني الملتقى , وتصميه مثل تصميم ملتقى شباب الخبر يوم كان عندنا قبل كم شهر نفس خيمة الشباب اللي كانت عندنل في الخبر بالظبط . بس المكان مختلف وأحلى شئ الموكب . مافيه زحمة هههههههههههههههههه الله يرحمه ويغفر له فهد بيض الله وجهك فمان الله

هلا وغلا وليد ..
وش جاب لجاب تراك ظلمت موضوعك يوم شبهته بموضوعي ..
لو ادري انه بيحطمك مستعد احذفه الحين ..
الملتقي جميل جدا وما انسى اشيد بركن كنافة الناضج .. طبعا عليه اقبال مو صاحي ..
كان فيه تغطية من قناة ( اوطان ) اول مرة اسمع فيها ناشبين للعالم ..
كل ما رحت مكان الاقيهم بوجهي .. واحنا جالسين ناكل كنافة جو وسووا لقاء مع اللي جالسين جنبنا ..
قلت لاخوي اترك اللي بيدك وخلنا ننحاش ماله داعي باخر عمري اطلع بالتلفزيون ..
وجهك ابيض حبيبي ..
ونورت متصفحي بتواجدك ..

إقتباس الرسالة الأصلية كتبت بواسطة حزين 9 يعطيك العافية على التغطية الحلوة

هلا وغلا حزين ..
ان شاء الله ما يكون لك من يوزرك نصيب ..
الله يعافيك يالغالي وتشرفت بتواجدك ..

إقتباس الرسالة الأصلية كتبت بواسطة M!ss 7up يعطيك العافيه بلوو سن تغطيه رائعه يااا هالملعب الصابوني بكل مكان ما عندهم الا اللعب بهالصابون ما يعجبني بصراحه احسه خطير على البزارين الله يعينهم ويوفقهم ان شالله شكرا لك اخوي عالى هالتغطيه

هلا وغلا سفن اب ..
لا لا فيه التزلج على الجليد ومغامرات تسلق الجبال ..
عايشين بوسط صحرا احمدوا ربكم ان فيه ملعب صابوني ..
وبعدين اي خطير واي خرابيط بزارينا ضبان ما عليهم خوف ..
الله يعافيك اختي وتشرفت بردك ,,

إقتباس الرسالة الأصلية كتبت بواسطة عسيريه . . مآشاءالله تبارك الله , الله يبارك فيهم ويطرح فيهم البركه منظمين هـ الملتقى والله هـ الملتقى سمعت عنه كثير , بس للأسف ماقد رحت له , بس بإذن الله هـ السنه أروح له لأني متحمسه شوي عآدي احنآ نجربه أحس يونـّس الله يعطيك العافيه blue sun ~ كل يوم روح الملتقى وجب لنآ تغطيه مآقصرت مع التحيه

هلا وغلا عسيريه ..
التنظيم حلو جدا لكن الدعاية للاسف زيرو ..
وبعدين وش اللي يونس بهالكرسي .. !!
حاطين جنبه سيارة اسعاف كل واحد ينزل منه على سيارة الاسعاف اذا ما تكسر القفص الصدري تكسرت اسنانه ..
اما كل يوم والله لو انه جنب بيتنا ما رحت له كل يوم .. !!
الله يعافيك اختي وشرفني تواجدك ,,

إقتباس الرسالة الأصلية كتبت بواسطة الكلاسيكي وعليكم السلام ورحمة الله وبركاته اهلاً وسهلاً بك فهد .. تغطيه مميزه .. وشي جميل ان تجمع الشباب مثل هذا الملتقى الجميل .. الله يعطيك العافيه , وتقبل احترامي وشكري .. دمت بخير

هلا وغلا استاذ عادل ..
صراحة مكان جميل جدا لتجمع الشباب وفعاليات كثيرة ومتنوعة ..
كل شئ يحتاجه الشباب موجود حتى المطاعم ..
الله يعافيك حبيبي وتشرفت بتواجدك ,,

إقتباس الرسالة الأصلية كتبت بواسطة هلالي--911-- الله يعطيك العافيه على التغطية والصوور للرجال: واللي يبــي الجــــدول للرجال والنساء يدخل على هذا الموضوع لشيروكي هنــــا

هلا وغلا هلالي ..
يعطيك ربي الف عافية على الاضافة الرائعة ..
وما انسى اشكر شيروكي مشرف المنتدى الاسلامي ..
وان شاء اضيف الربط للموضوع حتى يستفيد اكبر عدد من الاعضاء ..
والله لا يحرمك واياه الاجر ..
شاكر لك مرورك وتواجدك ..

إقتباس الرسالة الأصلية كتبت بواسطة هتلــ الزعيم ــر هلا وغلا Blue Sun , ما شاء الله عليك على التغطيه الجميلـه , يعطيك ألف عافيـه بس عندي ملاحظه , 7 7 شوفو أول لوحه من يمين ..! بدرجاتهم << كذآآ ولا بدراجاتهم , ترآآ أنا ماأدري للحين < راسب في الإملاء < مالقى ولا خطأ على بعض الناس أستقعد للصور يعطيك العافيـه مره ثانيه أخوي Blue Sun

هلا وغلا هتلر ..
اقول غسلت المواعين قبل ترد .. !!
يلعن ابليسك كيف لقطتها .. !! ما شاء الله عليك ..
وبعدين الحكومة ابخس بلوحاتها , هو انت اعرف من الحكومة .. !!
والله ملاحظة حلوة بروح يكرة وانشب للعسكري اللي واقف هناك حتى يغير اللوحة ..
يعافيك حبيبي على ردك وتشريفك للموضوع ,,

الله يعطيك العافية ، سمعت عن الملتقى بالراديو قبل أسبوع تقريباً ،
يقولون الحضور العام الماضي تجاوز النصف مليون زائر :| !!
( ماني متأكد هو نفسه اللي قالوا عنه ولا غيره ) ،
عمومـــاً ، يبي لنا نسيّــر عليه ،
الله يعطيك العافية فهيــــدان

/،

إقتباس وكان فيه محاظرة رائعة بس مدري وش عنوانها ومنو الشيخ اللي القاها ..

ههههههه ، تصدق حتى أنا أحسها رائعة ومؤثرة ،

صراحه غريب هالملتقى !!

امس رحت له ...

كل سنه مايبدا يزين الا اخر شي

امس كثيير من المعارض مافتحت

عالعموم الجدول كان معي

اخر يومين بيجي الشيخ المغامسي والاخير العريفي "
انصحكم بالمغامسي ياشيخ يخششك جو ويجيب قصص خياليه

ومثل هالملتقيات الله يكثر منهن بس ...

ومشكور ع التغطيـه"

هلا بك أخونا الشمس الزرقاء ..

مدري ثلاث اففففات


الله يعطيك العافية على التغطية الجميلة والمعلومات المفيدة , وعلى قولتك مافي تغطية إعلامية كبيرة .. بس أظن طلعوا عنها بقناة المجد ..


يسلمو