أتقدم بإسمي وبإسم كل سعودي بالشكر والعرفان

الى مقام حكومتنا الرشيدة

وهي التي لا تدّخر جهداً في سبيل ( تدليل ) كل من يحمل جوازاً اخضر اللون

وتسعى بكل ماتستطيع ان توفر لكل مواطن مساحة واسعة من ( بحبوحة ) العيش

حكومتنا الغالية...

لها أيادي بيضاء في الذود عن مصلحة المواطنين الغلابى امام قراصنة العصر ( التجار )

فوقفت بكل بسالة وإقدام كالسد المنيع امام الهجمة الغلائية الشرسة

وردّت كيد الهوامير ( المطخطخين ) و ( المطانيخ ) و ( المبحرين ) الى نحورهم

وأصدق دليل على صحة كلامي... هو العقال

نعم العقال ياسعودي ( منّك له )

كل شيء ارتفع سعره... الا العقال

الرز... اللحم... البيض... الدجاج... المواد الغذائية جميعها بلا استثناء

الملابس... الاقمشة النسائية والرجالية... الشمغ والتنانير والتي شيرتات

الالبان ومشتقاتها ( رغم الطفرة اللي تعيشها المملكة بعدد مزارع الالبان )

السيارات... اصبح سعر الفاخرة منها لايختلف كثيراً عن سعر ( القرنبع )

الاجهزة الكهربائية والالكترونية والاتصالات وكل مايخصها

حتى الفول والعدس... خيشة الفول كانت بعشرة والحين بسبعين ريال

وحتى الحديد... هذاهم قبل يومين كافشين هلال الطويرقي حق الاتفاق

اللي اذا فاز قال اهدي هذا الفوز لروح والدتي .. راعي خطة ( طيح يا ابراهيم )

كافشينه ( مزبن ) حديد في مخازنه يكفي الشرق الاوسط بالكامل

علشان يلعب بحسبة السوق ومخباتك يامواطن ياتعيس

والله ما انساه قبل موسمين يوم فاز فريقه بكاس الخليج... ياكل كيك ويمسح خشته بطرف شماغه

الموهييييم ماعلينا.. خلونا بالعقال

كل شي زاد وارتفع سعره... الا العقال

تاج راسك ياسعودي منّك له

كل واحد يقدر يشتري عقال جديد... بـ 30 ريال فقط لاغير

الدوله الله يعزها ماقصّرت.. والسعر في متناول الجميع

الكل يقدر يلبس عقال بكل أريحيه

القصيمي والحوطي والجنوبي والشمالي والحساوي والبدوي والحضري

الهلالي والفقراوي والاتحادي والاهلاوي

المدريدي والبرشلوني والمانشستراوي والارسنالي

حتى اللي يشجع سبورتنغ خيخون يقدر يلبس عقال

شفتوا كيف حنا في ( بحبوحة )

عاد انت وذوقك وبكيفك

عقال مرعز صوف او كريستال

او هذاك القطري اللي له قرنين استشعار من ورى

او مثل اللي يلبسه الصلّال يوم يمثّل دور ( عبدالغني شربت ) .. اذا دخل البيت عفّط والديه وحطه بمخباته

عاد فيه بعض الشباب في أحياء معيّنه من الرياض ( مانيب قايلها حقناً لدماء المسلمين )

يكشخون بعقال عريض كنّه كفر تريله... مدري شلون ماتصدّع روسهم

بس أحلى مافي العقال... وهي ميزة لاتجدها في أي مكان حول العالم

أنه سلاح شخصي فتاك وغير مرخّص

واتحدى أي رجل امن يصادره منك بسبب عدم وجود الترخيص

ابد.. أي واحد يتحارش معك... سلّ عقالك وامحطه في مقتل

وترى العقال موروث تاريخي ويعطي دلالة على اصل وفصل القبايل

الشمامره يحذوفنه يمين... والعنوز يحذفونه يسار

والشباب الواعد يحذفونه ( فوق الدولاب ) ويلبسون ( قبّوع )

اقول بس

ادعوا للملك خالد بالرحمة والمغفرة وجنّات النعيم

لو انه الله يغفر له ما كسر القاعدة ولبس العقال الاسود.. كان الى الحين على المقصّب ( الشطفه )