للعوائل فقط!! ممنوع العزاب!! يمنع منعا باتا دخول الشباب!! (على هالكلام صرنا فيروسات ما صرنا اوادم ولا شباب)


إذا كنت ساكن بالرياض مثلا وانت شاب طبعا(الله يكون بعونك), وكتبلك الله انك تقضي أجازتك هنا بالرياض او حتى غير الرياض هنا بالمملكة وين راح توسع صدرك وتستانس وتقضي اجازتك بكل بسطه ووناسه؟ على الارصفه؟ ولا بالبر؟ ولا كل يوم في بيت واحد من اخوياك؟ ولا في المقاهي اللي اذا جت الساعه -1- سكرت؟ طيب وبعدين واخرتها ؟ ما راح تمل من هالشي وهالروتين اليومي؟؟ البرامج السياحيه اللي الحين بالرياض كلها موجهه للعوائل, وياويلك لو تقرب منها. المهرجان السياحي اللي في المنطقه الشرقيه الحين شعاره( لك ولعائلتك) يعني صفعه قويه في وجوه الشباب. والمهرجانات اللي الحين في جده(جده غير) وفي ابها( الا انا ابهى)وفي المدينه المنوره ,كلها موجهة اصلا للعوائل فقط , والشباب فرصهم قليلة جدا فيها.

هالشي هذا دفع الشباب للسفر للدول المجاوره في الغالب,وصار البعض منهم يفعل المحرمات , من المسئول؟ والسفر ايضا دفع بعض الشباب لتحمل كثير من الديون , ودفع بعضهم في النهايه للسرقه, وش اسباب هالشي؟ السبب لان الشاب صعب انك تطوقه وتخليه بمكان واحد كانه طير في قفص وخاصة في هالوقت,وراح يلجاء الى السفر واشياء كثيره علشان يرفه عن نفسه ويوسع صدره وهذا من حقه.

السفر والتفحيط والدوران في الشوراع والمعاكسات ليست سبب بل نتيجة لسبب. قرار اغلاق المقاهي في الساعه الـ 12 او الـ 1 قرار له ايجابياته وله سلبياته ايضا. يوجد في الرياض تقريبا 100مقهى, وعند كل مقهى تقريبا 30 الى 50 سياره ,واحيانا يصل العدد الى اكثر من 150 سياره في ايام الاربعاء والخميس في بعض المقاهي المشهورة, في كل سياره تقريبا شخصين( احيانا واحد واحيانا اكثر من اربعة), تخيل كم شخص في المقاهي كلها, وتخيل اذا سكرت هالمقاهي بأول الليل, الشباب راح ينامون في بيوتهم؟ولا راح يستفيدون من وقتهم باعتقادك؟ نسبه بسيطه منهم تفعل هالشي, لكن الباقي وين يروحون؟ ووش راح يسوون؟انا اقولك: تفحيط, ودوران في الشوارع,واذية الناس, ومعاكسات, ومخالفات مرورية . المقاهي كلها شر, لكن الشر على من؟ على الشخص اللي بالمقهى نفسه ,ولكن بعضهم اذا طلعوا من المقاهي شرهم ما راح يكون على نفسهم بس راح يمتد الشر لغيرهم.واحيانا المقاهي فيها خير لانها تدفع الشر والبلاء عن الغير. شخص مثلا يمارس التفحيط , او يعاكس النساء بالاسواق والاماكن العامة لو جلسناه في مكان واحد وخليناه يتفرج على التلفزيون(يعني اذا كان بالمقهى) اعتقد اننا نسوي فيه خير مو شر.

نسبه من الشباب( وانا شخصيا اعرف بعضم) صاروا يستعملون التدخين مع انهم بالاول ما يدخنون ليش؟ لانهم ما يقدرون الحين يستعملون الشيشه الا بمكان محدد ووقت محدد بعد مو زي اول علشان كذا لجأو للتدخين الله يكفينا شره.

( يمكن بعضكم يحسبني من اللي يرتادون المقاهي وزعلان علشانها تسكر بدري لكن يعلم الله اني ما احب ادخل المقاهي ولاادخن ) لكن من كثر حرتي على هالشباب واللي انا منهم اذا جلسنا بالرياض ما ندري وين نروح ولا ندري وش نسوي , كل شي للعوائل,ما بقى الا يطلعوننا من بيوتنا ويقولون لنا للعوائل فقط, المسئولين هنا ورجال الاعمال ما اهتموا بالشباب ابدا, وانا خايف ان يصير شي ما تحمد عقباه في المستقبل, وعلشان كذا لو يفتحون المقاهي اربع وعشرين ساعه مثل اول يكون احسن واستر للشباب , ولاننا بين شرين ولازم نختار اهون هالشرين, شر المقاهي وشر البلاوي اللي تصير برى بسبب تسكير المقاهي.

المفروظ يكون فيه مهرجانات وبرامج سياحيه مخصصه للشباب( لانهم اهم شريحه بالمجتمع سواء رضيتوا ولا ما رضيتوا),والمفروظ بعد يهتمون بالمراكز الصيفيه ويكثفون برامجها وانشطتها بحيث تكون موجهة لجميع الشباب بكافة الاعمار ولجميع ميولهم واهتماماتهم ورغباتهم,واملنا كبير برجال الاعمال والمسئولين اللي يقدرون يحققون مثل هذه الاحتياجات والتوجهات والمشاريع حتى نحقق ولو بعض من الاهداف في سبيل اصلاح شبابنا والاهتمام بهم.

-- واسف جدا على الاطالة--والله من وراء القصد--