بدينا يامرور الرياض .. بدينا ؟! [ مواقف + ماقبل الصيف ]
بسم الله الرحمن الرحيم
السلام عليكم ورحمة الله وبركاته
احبتي في المجلس .. احببت ان اشارككم بما في خاطري قليلاً .. ونرى ماعندكم من اراء حول كتابتي , رفضاً او تأييداً .. 
الكلام المنمق لايتعدى هذا السطر 
مرور الرياض .. صار لي معه الكثير والكثير من المواقف .. سأسرد بعضاً منها .. وللمعلومية بعضها إيجابي وبعضها سلبي .. ولكن زبدة الموضوع راح يكون في آخره .. وليش كتبت هالموضوع ..
[ 1 ]
في يوم من الأيام .. كنت على مخرج 9 وكنت متوجه للبيت .. جاي من جامعة الملك سعود .. وكان الوقت حول الساعة 7 المغرب .. يعني الجو زين الزين .. مافيه ذاك الحر .. اللي نقول انه يخليك تشرب عرق جبينك ولا ذاك الجو المغبر اللي يخليك تلطم كأنك مومياء .. يعني جو عاد جداً ( تم ذكر الجو عشان نفسية العسكري ) .. وكنت ماشي بسرعة مانزلت عن 130 
.. المهم وقفني العسكري .. وقال : تراك مسرع . قلت : والله معليش توني طالع من الجامعة وانا فيها من صباح العالمين . قال : لبق لبق 
.. حسبي الله ونعم الوكيل .. لبقنا .. وانتظرت اباخذ مخالفتي .. المهم .. كان قبلي واحد يسجلون له مخالف
ويقول : والله ماتعديت الـ 120 !
وهم يقولون : الا تعديت الـ 120
قال : والله ماتعديتها !
المهم سألت العسكري ..
قلت : كم المخالفة ؟
قال : 300 ريال .
قلت : وكم السرعة المسموحة هنا ؟
قال : لاتتعدى 120 !
يوم رحت للعسكري وياخذ معلوماتي .. شفت مخالفة الرجال اللي قبلي .. توقعوا .. كم كان ماشي .. 121 ؟ مسجلين عليه 121 السرعة ! وراح وهو معصب من هاللي صار .. الله يعينه جد !
واعطاني انا مخالفة سرعة .. 127 تعليق : وقفت على 121 ! يعني إذا فعلاً الرجال ماشي 121 .. ماراح يسجلون .. إلا إذا بغوا يتبلونه ؟
[ 2 ]
على لسان اخوي .. كنت على الدائري الشمالي رايح البيت .. المهم .. والقى تفتيش قدامي ( كالعادة ! ) تفتيش في اسرع طريق في الرياض 
! المهم .. وقفني .. وقال : عطني الرخصة ! وعطيته قال : شيل التظليل اللي قدام ! قلت : ليش ؟ قال : ممنوع , شيله ! قلت : خلاص , شيله انت ! << والله ياخوي مهايطي قال : هاه ! خلاص امش امش ! تعليق : خلاص امش .. يعني الوضع عندكم FREE وقت ماتبون تخالفون تخالفون .. ووقت ماتبون ماتبون !؟
[ 3 ]
كنت في الشارع مع اخوي ذاك اليوم عند الاشارة واقفين .. وكان وقتها عند كل إشارة عسكري ( قبل يمكن 6 سنوات ؟! مدري بالظبط ) جاء العسكري عند اخوي الدب ( دب اكثر مني ) قاله : ورى ماتربط الحزام ؟ قال اخوي : والله الحزام يضايقني 
قال العسكري : خلاص بكرة رح فصل حزام في الغرابي قال : اخوي معي حبل في السيارة .. وش رايك اربط نفسي فيه قال العسكري : اللي يريحك ومشينا بعدها ..
تعليق : طبعاً الموقف إيجابي مع العسكري .. يعني وناسة وتنبيه .. وماله داعي تقرقر فوق راسي ومن هالكلام .. بصراحة من افضل المواقف اللي مرت علي [ 4 ]
على لسان ولد عمي .. كنت انا وخويي عند تفتيش .. والمشكلة اننا بنروح فيها .. تونا مظللين السيارة مررررة .. ونلقى تفتيش ثاني شارع 
المهم ويوقفهم العسكري يقول : عطني الرخصة والاستمارة , واخذها قال خويي : فيه شيء ؟ قال : ايه .. مظلل قال خويي : طيب ؟ قال : ممنوع .. شل التظليل . قال خويي : والله ما اشيله .. حرام والله توني طالع من المحل ياخي توني دافع خمسين ريال فيه .. تشيله بعد خمس دقايق 
؟ قال : والله النظام نظام ياخي .. بس اسمع .. خذ اوراقك وامش .. ولا اشوفك هنا قال خويي : لك مني ماتشوفني في الرياض ابد ومشينا
تعليق : صراحة موقف حلو .. من عسكري .. شاف الوضع من هالشباب ومشاهم .. بدل مايستقعد ويلعن خامس خامس القزاز اكتفي بهذه المواقف الأربعة .. ذكرت منها موقفين سلبيين وموقفين ايجابيين .. يعني شفتوا الفرق بينهم ؟!
الآن نجي لأساس الموضوع << طيب وهذاك وشو [ قبل الإجازة الصيفية ]
قبل الإجازة الصيفية .. يبدأ الاستقعاد والتنافس بين العساكر .. مين يخلص الدفتر حقه وياخذ اجازه هالصيف !!! على حسابنا !!
طبعاً هذا ماسمعته .. وصدقته فعلاً .. قبل كل صيفية او إجازة عموماً وغالباً الصيف والأعياد .. تشوف المرور بكثرة غير طبيعية .. تقريباً امر في الاسبوع على 4 - 5 تفتيشات !؟
واحياناً مرتين - 3 في اليوم !؟
يعني .. يوم من الايام وقبل العيد بكم يوم .. مريت على تفتيش غريب بصراحة .. اول تفتيش يجي هناك .. لا وعند حفريات ؟! وشارع يالله يالله سيارتين ! ( امتداد مخرج 9 المؤدي على طريق جابر ) المهم .. وقفوني .. وطلب الرخصة ومشاني على طول .. ما علي شيء .. لفيت يمين مع شارع ثاني .. ابي اروح البيت .. والقى تفتيش ثاني ؟! مو معقولة .. تفتيشين مرور بشارعين جنب بعض ؟!
شافني العسكري .. وقال : هدء يبوي
قلت : هذاني مهدي
قال : هدء ثاني مرة .. لأعطيك مخالفة !
قلت : معليش .. حقك علي
ومشيت من عنده .. صراحة ارتفع ضغطي H مالها داعي تفتيشين بنفس الموقع ؟!
وكلهم لجهاز المرور ؟!
واليوم .. وبعد ماتبقى على الإجازة الصيفية شهر وكم يوم .. رأيت تفتيشين لم يكونا في هذا المكان إلا ماندر !؟
الأول : في طريق الثمامة عند الدوار الثاني ؟! ماجوا هناك إلا يبون يستقعدون للشباب اللي جايين من الثمامة .. ويخلصون نص الدفتر عليهم
والتفتيش الثاني عند شرطة الروضة .. كان فيه تفتيش هناك .. وانقطع فترة طويلة يمكن 4 شهور .. ورجع اليوم .. واتوقع ماهوب رايح الين مايجلدونك اتوقع ان ارى بكرة تفتيش .. على مخرج 9 ربما .. ومخرج 10 ايضاً .. وكلهم للي جايين من الجامعة فحبيت اشوف .. ابرز مواقفكم مع المرور! .. وهل لاحظتم فعلاً فترة ماقبل الصيف ؟ وهل تتوقعون صحة ان العسكري يحصل إجازة إذا خلص الدفتر ؟!
شكراً لكم احبتي 
قفلة
هذا الموضوع .. عشان شيلت سلطان الثلاجة يوم الخميس 
![بدينا يامرور الرياض .. بدينا ؟! [ مواقف + ماقبل الصيف ]](iconimages/t772497_rtl.gif)
الوضع الشجري
