في بيتنا كــــلـــب ,, وفي رواية تسلب !! - نادي الهلال السعودي - شبكة الزعيم

أبو ميار · #1 17/05/2009, 01:32 PM

السلام عليكم ورحمة الله وبركاته ..

طبعاً اليوم أبتكلم عن قصص طريفة صارت لي مع الكلاب أعزكم الله ..

يوم كنّا صغار طبعاً كنت من سكّان القصيم

والبكيرية بالتحديد

ولازم كل إجازة نروح أنا وأهلي للرياض >> مو سياحة

ولكن لزيارة الأهل .
حيث أن أهل الوالدة من سكّان الرياض .

المهم كنّا إذا سافرنا بالسيارة شوف الهواش والطقاق من اللي يجلس بجانب الدريشة وإذا عرف السبب بطل العجب

طبعاً السبب مو مشاهدة مناظر طريق القصيم الرياض الخلّابه ولكن لأنه في حالة الوصول ..
ننطلق في سباق 100م حواجز

للسلام على جدتي واللي يسلّم عليها الأول هو اللي أخذ الميدالية الذهبية

وكانت هذه عادة تتكرر وأولمبياد قد يتكرر بالسنة أكثر من مرّة

طبعاً قبل كذا خلوني أشرح لكم طريقة بيت خوالي :

جدي الله يطوّل بعمره متزوج ثلاث حريم >> والرابعه الله أعلم إنه متزوج لكن يمكن مسيار

والسكن طريقته ماخذ أرض كبيرة جداً وباني فيها أربع بيوت منها بيت لأكبر عياله والباقي لزوجاته وحوش مساحته نفس مساحة البيوت مجتمعه طبعاً الحوش تراب . فيه ملعب

ياما شهد إبداعاتي عوارض خشب

وفيه حوش للغنّم وعشّة حمام . وكان فيه كلب حراسه وهنا مربط الفرس آسف مربط الكلب

أعود للقصة بعد أن شرحت الواجب شرحه

في مرّة من المرات نزلت وأطلق الساقين للريح في الحوش لمحاولة الوصول كأول شخص وأحوز على الميدالية .
والمفاجأة أن أحد خوالي ( كبري في العمر ) سوى فيني مقلب وطلب من الحارس يطلق الكلب في نفس التوقيت اللي وصلت فيه .

وأنا كنت شاك إن فيه مقلب لأننا أول ما دخلنا من بوابة البيت وأنا أشوف إبتسامة الخبث بس ما عطيته وجه لأن جدتي أهم

المهم أنطلقت وأنطلقت الجياد آسف الكلاب

وأنا اللي أغيّر مساري مباشرةً للسيار ولكن ما أمداني ..
فبدينا نلعب لعبة الحبشه >> أسألوا الصخرة عنها .
أنا والمسمى بالكلب وتسمع صرخات الإستغاثة والبكاء إلى أن قبض علي الكلب وغرس نابيه في رجلي الله لا يوفقه إبن الكلب

ويصفّر الحارس بصافرة الرحمة ليعود الكلب أدراجه وأعود أنا للبيت وأنا أبكي وأقول لا عادت من جيّه .

هذا الموقف الأول . والمواقف كثيرة ..

الموقف الثاني

طبعاً مثل ما قريتوا فوق إن جدّي متزوج ثلاث حريم الثالثة تصير عمتي شقيقة أبو ي .. فبناتها كانت بنات عمتي وخالتي في نفس الوقت

أبلعوها هالمرة عشاني

المهم كان البيت أقرب البويت لي لأن اللي فيه كلهم بعمري تقريباً وفوق كذا ما أستحي من أمهم لأنها عمتي >> مع إني ما أستحي من أحد

لكن عمتي ما أستحي منها أبد بس أحترمها

المهم كلّمتني قبل فترة وقالت وينك يا متعب قلت عند جدتي قالت تعال عازمك على الغدى قلت أفتحوا الباب

ما صدّق أحد يعزمه .

وأول ما دخلت من باب حوش بيتهم الا والباب ينصك من وراي ؟

أنا أستغربت وشو اللي صك الباب ؟؟ ما فيه لا هوا ولا شيء .

المهم وأنا أهم بالدخول للبيت وأتفاجأ بأنه مسكّر وأسمع صوت واحد جاي يركض .. إلا وهو الكلب

وخذ يا ركض وخذ لك كم دوري في البيت ..
بنات عمتي اللي ما يستحن في مكان من الحوش كابين زيت وأنا اللي أزلق ذيك الزلقة اللي أنا ضحكت والكلب يلحقني .. وهن وعمتي معهم جالسين يتفرجون علي من أحد الدرايش ..

المهم صفّروا للكلب إبن الكلب كالعادة وأنا وسيع وجه رحت أبدخل وثيابي كلها وصخة

وأسأل عن الغدا قالوا ما صلحنا .
وعرفت إنه مقلب >> لا يا شيخ

وألزّم إني أبتغدى وأطلبوا من الرومانسية وما قصروا بالثنتين

.

الموقف الثالث :

مرّة من المرّات والكلب يلحقني كالعادة أتخذت قرار وهي إني بدل ما أهج من الكلب أواجهه وأركض ناحيته .
طبعاً هذي معلومة سمعت عنها يقولون الكلب يلحقك وإذا لحقته هج

وأطبق هذه المعلومة وأنا أقترب والكلب يقترب وإبن الكلب ما هج .. ويوم بقى متر إلا وأنا اللي أصلح يوتيرن بأقوى قوة وأطلق الساقين للريح .
سألت عن المعلومة وقالوا هالمعلمة لكلاب البر أما كلاب الحراسة أنتبهو >> قلت كان علمتوني .

آخر موقف :

هذا موقف لجدي الله يرحمه ( جدّي من أبوي ) جاي ينام عند بنته اللي هي عمتي >> قايلكم تحملوني

وكان جدّي رحمه الله معروف بنشاطه ولكن في آخر أيامه كأغلب الشيبان ما كان يقدر حتى يشيل كأس ماء الله يرحمه

المهم أذن الفجر وطلع يصلّي وأخطأ الله يرحمه بأنه طلع من باب الحوش الكبير ولا طلع من باب الشارع لأن التعليمات ما أحد يطلع من هالباب لأن الكلب مطلق سراحه للحراسه ..

جدّي طلع والكلب بدأ يبنبح ويلحق جدي وجدي ما أعاره أي إهتمام هذولا الرجال مو حنّا

لين قرب الكلب عنده وهو اللي يضربه بالعصا اللي معه .
الكلب بعد الضربة حقد ودزّ على جدّي اللي عرف إنه جاب العيد ووسّع خطوته وهو ما يقدر الله يرحمه

المهم لحقّه الكلب وأنقّض عليه عاد جدّي قال مابدّهاش دلع وهو اللي يمسكه مع رقبته ويمحطه بالأرض .

طبعاً الحارس يقول أستغربت كيف قدر يشيله بيد وحده وهو كبير

قلنا له الخوف يا صديق يخليك أقوى واحد

على فكرة مواقفي كثيرة وهناك مواقف أكثر .. لكن ما أبغى أكون بثر أكثر من البثارة هذي .

أخيراً كلب الحراسة ما جابوه خوالي إلا بعد السرقات اللي صارت ببيوت خوالي أثناء سفرهم وقررّوا يجيبون كلب حراسة كبر البعير .

السؤال هل صار لأحدكم موقف مع الكلب إبن الكلب ؟؟

شكراً