بنمسح غروركم وندفنه ونقفل المجلس .. وندرسكم كل يوم نظام العالمية - نادي الهلال السعودي - شبكة الزعيم

R D H · #1 08/05/2009, 03:09 AM

..][.. مدخل ..][..

بنمسح غروركم وندفنه ونقفل المجــــلس... وندرسكم كل يوم نظام العالميــــه

الزعامه للعالميه وكل شـــــي مـــــــدرس... واذا بغيتو شي هناك ديار الهاشميه

طحتو يا اهل المجلس و مالـــكم نفـــــس....ليا جيناكم سمعنا صرخات العاذريه

شفنا بمجلسكم خفاش يوطوط كما البس...ليا شاف فاره وقالــــــــهـا يالسالميه

انا هلالـــي بالعلالـي ولاني بمنــــــــدس...وكل مــــندس يفهم معنى الابجديه

أخر كلام انا هلالي ومثلي كلكم حـــــس..عاشق للزعيم واعشق الكوره هلاليه

السلام عليكم ورحمة الله وبركاته

سـلام على أنـاس كانوا ولا زالوا فوق المجـد يجلسون ..

سلامٌ على لاعبين هوايتهـم بتاريخ الخصوم يلعبـون ..

سلامٌ على رجال .. كانوا وما زالوا لمعنى الفولاذ يحملـون ..

سلامٌ لأعضاء يعرفون أن ( الهياط ) فناً ونقشاً .. ولايكون له معنى إلا إذا كنا من الفوز واثقون ..

//

لا أدري كيف تكون ( البداية ) !؟

أتسائل في نفسي .. اتكفيهم 3 ؟

هل الـ ( ثلاثه ) تكفـي لمن أستفز الأسـد ؟

أقيادة سيارتك لـ طريق ( الثمامة ) يستحق ما ذهبت من أجله ؟

كانت نتيجه ليست متوقعة .. بل هو نَصرٌ أشبه بالخسارة للعالميه ..

وخسارة أشبه بالنصر للمجلس .. فيحق لهم ان يتنفسوا الصعداء ..

أن تخرج من أمام فريق ( العالميه ) الحقيقي بـ ثلاثة فقط ؟!

فأنت هنـا قد حققت إنجازاً ليس له مثيل .. فهنيئاً للمجلس هذا الإنجاز ..

/

بطاقة المباراه :

المجلس العام x قسم الرياضه العالميه

المكان : ملاعب المحترفين

اليوم / الخميس الموافق 14 / 5 / 1430 هـ ..

البدايه مع من حضر من الأعضاء ..

( 1 )

تشكيلة الفريقين ومن حضر معهم من طاقم فني وإداري ولا ننسى الطاقم ( المهايطي ) ../

( تشكيلة العالميه )

الحارس R D H

الدفاع: Nemanja Vidic و George Best و Loranse

الوسط : M' MAN U و .. M a N U t D .. و دنيدل و zezoo00oo

والهجوم : اليكس 11 و الهلالي 11

الاحتياط : فيلسوف و Blak wolf و فـارس الـزعـيـم !! و K I N G . M I L A N و 5lo0ody_20 و ‏hmooode_4

كابتن الفريق / zezoo00oo < < شخصيه قياديه بمعنى الكلمه

المدرب / Mr.GoaL << وش يجي مورينهو عندك ؟

رئيس الفريق / أسير الزعيم

مدير الفريق : أحمد [ هلالي موووت ]

مدرب الحراس / أبو حمد

كما حضر الغالي / سليمـان ( مشرف الرياضه العالميه سابقا ) و ميلانيللو , و zammamwek

( تشكيلة المجلس )

هلالي الشماسيه .. اول العنقود .. ابو ميار .. وليد القحطاني .. المشاغب .. هلالي الثقفي ... القيصر رهيب .. قناص 20 .. كبيتانو .. ماجد مقبل

الرئيس / ماجد مقبل

نائب الرئيس \ مواصل من عام 1413 هـ << ( هياطك يا كحيلان

)

عضو الشرف الداعم | شبوط

عضو الشرف | الغدير الازرق

مدير الكرة | الكلاسيكي

كما حضر في الملعب كل من ( fff .. والصخره اللي قعد نص دقيقه ومشى .. شاف المهزله اللي تصير وماتحمل يقعد )

كما كان الغالي ../ ( أبو غــــامـــد

) من أوائل الداعمين لفريق العالميه وكان هو ( مصور اللقاء )

//

التقـرير ../

سموها ماشئتم فهي ليلة لا توصف إلا بـ ( ليلة ابتسام القدر للمجلس العام ) وأنتم تعلمون لماذا !

أبتدأ اللقاء بتحفظ من الطرفين لمحاولة جس النبض والتعرف على أسلحة الخصم ولم تمر دقائق بسيطه جداً إلا وكان فريق العالمية يسيطر بيديه ورجلينه

على وسط الملعب مما أدى إلى ارتفاع صوت مخلوق كان بجواري يصارخ ويقول ..: ( ياعيااااااااااال ناولوا )

.. وستتعرفون عن شخصيته بعد قليل ..

اتضحت معالـم وتضاريس المباراه منذ الدقائق الأولى .. فكان واضحاً أن أسلحة العالمية مدمره .. بينما أسلحة المجلس لا تكاد توصف بأنها ( مسدس مويه ) ..

كل هذه العوامل أدت إلى ارتباك لاعبي المجلس العام خاصة المدافعين .. فـ من قوة خوفهم واستسلامهم للاعبي العالميه أخطأ أحد مدافعيهم خطأ فادح أمام المرمى لم يتأخر فيها ( الهلالي 11 ) الذي كان ينتظر مثل هذه الهفوة فقطع الكره من المدافع وأخذ يركض ويركض ويركض حتى سجل أول اهداف المباراه

بعد هذا الهدف ارتفعت صرخات الجماهير المشجعة للعالميه .. ( يالله بااااقي 9 ) و ( باقي 2 يابو داحم وتجيب هاتريك )

بدأ لاعبي المجلس الهجوم لكن كراتهم لا تكاد تصل لما قبل خط الـ 18 لنصف ملعب العالميه حتى يقطعها المدافعين الأشاوس بكل بساله ..

واستمرت هجمات العالميه على مرمى المجلس وتهدد مرمى الحارس ( المشتاق 9 ) كثيرا لكن الحظ كان مبتسم له مررهـ .. حتى جاء الهدف الثاني من أقدام المهاجم الفذ والمغوار والشرس والرائع والكلش ( الهلالي 11 ) ..

لترتفع الاصوات من جديد ( يالله باقي 8 اهداف ) و ( باقيلك هدف يالدحمي وتجيب هاتريك )

بعد ذلك هدأ لعب العالميه قليلاً .. فأخلاقهم وتربيتهم قد علمتهم أنه كم هو جميل أن تسامح عند المقدرهـ

..

فبدأ المجلس يحاول أن يهاجم مرمى الحارس العملاق ( أنا

) لكن بطريقه خجولة جداً .. فوجود صخرة الدفاع ( عصام - نيمانيا فيديتش ) قد ألغى تماما شيء أسمه ( سلطان ووليد ) من هجوم المجلس .. كما أستشرس كل من الاجنحه ( جورج بيست ) و ( لورانس بالعنجليزي ) فكانوا يضغطون على حامل الكره ويلغون خطورة أجنحة فريق المجلس ..

أكثر لاعبي المجلس خطوره هو ( اول العنقود ) حيث يمتلك قدم قويه وحاول التسديد أكثر من مرة على المرمى لكن تجي خفيفه بيد الحارس .. أو برا ..

هنا عاد لاعبي العالمية للهجوم مرة أخرى .. فـوجود كابتن مثل ( زيزو - عزوز ) في وسط الملعب وبجواره ( نواف - دنيدل ) جعل من وسط الملعب بـ ( اسم العالميه ) .. تمركز وقطع كرات وبناء هجمه من أروع ما يكون .. كانوا ثنائي مذهل ..

وكذلك كل من ( M' MAN U ) و ( .. M a N U t D .. ) كانوا اجنحه رائعه من حيث الهجوم والمسانده الدفاعيه ..

حـاول فريق العالمية مضاعفة النتيجه لثلاثة اهداف لكن صافرة الحكم منعت ذلك للأسف الشديد ..

الشوط الثاني ../

اتضحت علامات الاستفهام في وجوه اداريي واعضاء شرف فريق المجلس .. فـ ( مواصل من عام 1413 هـ ) تـرك المنصه وذهب ليشم الهواء خارج الملعب وكأنه يلمح إلا انه لم يعد يرغب بهذا المنصب ( الأي كلام ) على حد تعبيره

وكذلك اعتلت صيحات الاستهجان ضد الحارس ( أنا ) حينما اتجه لمرماه في الشوط الثاني والذي كان بقرب اعضاء شرف المجلس العام الذين حاولوا أن يثبطوا من عزيمتي بكلمات كـ ( فاشل ) .. لكن الثقه منعتهم من ذلكـ ..

بدأ الشوط الثاني كما خطط له الكابتن والمدرب العملاق مستر جول .. حيث أثبت رغم قلة خبرته أنه مدرب ذو امكانيات عاليه وله القدره على فرض اسلوب لعبه وتكتيكه في الملعب .. ولقد نجح في ذلك ببراعه بمساعدة الرئيس والمدير ..

التشكيلة بقت كما هي بالفريقين باستثناء خروج القيصر رهيب ودخول ( جرح يشكي ) اللي صفط أم ( اللاب توب ) حقه

هجمات متتابعة على مرمى المجلس .. لكن لاعبي العالميه مازالوا يتبعون مقولة ( ما أجمل أن تسامح عند المقدره ) ..

وسامح .. وسامح .. وسامح .. وسامح .. وسامح .. إلى أن أنطلق ( لورانس ) من اليسار وهو يقول ..: ( سامحتكم .. لكن ذلك لا يعني أن أعطيكم تذكاراً تذكروني به )

فاستلم ( اليكس 11 ) الكره من ( الهلالي 11 ) فقام الاول برفع الكره من فوق الحارس وأتى لورانس ليكمل عليها بقووه وشاتها بأقوى شي

.. ليعلن عن هدفاً ثالثاً للعالميه ..

هنـا حس مدرب المجلس أن الوضع خطير << توه يحس

فلم يجد أمامه إلا رئيس الفريق ( ماجد مقبل ) والعضو الداعم ( ابو ميار ) ليطلب منهم تبديل اثوابهم ولبس ملابس رياضيه للدخول للملعب واصلاح مايمكن إصلاحه ..

كنت أنا انتظر دخول ( ماجد مقبل ) على احر من الجمر .. فوجودي وحيداً عند مرماي جعلني أشعر بالملل .. وسواليف ( المشاغب ) ماكانت حلوه ..

فدخل ماجد مقبل وابو ميار وكأنهم يحملون كلمة السر معهم .. لكن لا كلمة سر ولا هم يحزنون ..

العالميه تهاجم وتهاجم .. وتصل عند المرمى .. وتسامح وتسامح

إلا أنا جاءت تسديده عرضيه من احد لاعبي المجلس .. فصدها حارس العالميه ( أنا ) بكل براعه

فكان ( هلالي الشماسيه ) قريبا من الكره التي ارتدت فحاول أن يدخلها المرمى لكن اعتلى صوتي من جديد وانا اقول : ( هي سايبه ولا سايبه ولا احتمال تكون سايبه

)

وبعدها بقليل سدد احد مدافعي المجلس العام تسديده قويه كادت ان تأتي ( سقاطي ) من فوقي

لكن تمكنت من إمساكها في ظل محاولة المهاجم ( ماجد مقبل ) أن يقتلني من شدة الحقد

حتى أن قرر ( مستر جول ) وشلة العرابجة اللي معه

انهم يسووا حركه لم يسبق لاحد اساطير التاريخ أن سواها .. ورح نذكرها بعد قليل

وأحب أن اشيد بمستوى ( اليكس 11 ) لكن للأسف الشديد لم يحالفه الحظ في التسجيل ولا هو بالعاده أقل شي هاتريك بالمباراه الواحده الله لا يضره

إلى هنا وانتهت المباراه .. لتعلن نتيجتها عن حظ المجلس الفظيع ..

//

إستخفاف .. إستهزاء .. سموه ماشئتم ../

هنا سأذكر نقطتين حدثت من فريق العالميه تدل على استخفافهم واستهزاءهم بالخصم .. /

1 - قام الحارس أنا

بتبديل فانيلة الحراسه بين الشوطين وارتداء فانيلة مختلفه .. ليوصل رساله للاعبي المجلس مفادها أني ضامن الفوز وليست ذا اهميه عندي .. ولي الحق ان استغل الوقت الضائع في عرض فانيلاتي ..

2 - الحركه الثانيه حركه ( وصخخخخخخخخخخخخخه

)

حيث قـام المدرب مستر جول قبل نهاية المباراه بدقائق بسيطه .. بإخراج الحارس ( أنا ) و إرجاع ( الهلالي 11 ) للحراسه ..

وكأنه يقول بالحرف الواحد للمجلساويه ../ المباراه قبل أن تبدأ وهي بالجيب .. والأمر مايستاهل أننا نتعب حارسنا الاساسي ونخليه يوقف بالمرمى عالفاضي وانتم ماعندكم هجوم ..

أهني الشباب على الحركه ..

//

جوائز وأرقام قياسيه ../

1 - أخذ اللاعب والمهاجم الفذ والمهاري جداً سلطان ( المشاغب ) على جائزة ( أكثر اللاعبين تسدحاً بالملعب ) حيث لاحظ المتابعين والنقاد الفنيين للمباراه أن اللاعب سلطان يجب أن ينسدح 5 دقايق عند مرمى حارس العالمية أنا .. ويبقى يردد كلمات ..( ياعياااااااااااااال ناولـووووا ) .. ( ياعيااااااااااااال طلعوا الكوره قدام ) لأنه دفاعنا ومحاورنا فصل هجومهم عن وسطهم .. فانقطعت المويه والكهرباء عن سلطان ووليد .. حتى أني والله اشفقت عليهم

كان ودي أخليهم يسجلوا

أرى ياسلطان أن شآل نادي النصر اللي كنت حاطه على راسك قبل المباراه هو سبب النحس ..

2 - دخل الكابتن ( ماجد مقبل ) موسوعة جينيس للأرقام القياسيه كأكثر لاعب لمس الكرة في المباراه ..

حيث لم يلمسها إلا مرتين فقط .. المره الأولى بالغلط .. والمرة الثانيه لمسها بيده علشان يرمي رمية تماس .

ماجد سويت اللي عليك ياقلبي

ولا نلوم يوسف الثنيان فهو قد اعتزل منذ الزمن .. وهذه اول مباراه لك بعد العوده

3 - حاز نائب رئيس فريق المجلس ( مواصل من عام 1413 هـ ) على جائزة ( أكثر مهايطي يهايط على ايش .. مدري ؟

) << ترا كذا اسم الجائزه

حيث طوال الشوط الثاني وهو يحاول يثبط من عزيمتي وهو يردد عبارات تحطيم لكني كنت اقابله بنظرة ( ثقل )

//

حـاول ( مواصل من عام 1413 هـ ) أن يتلاعب بالنتائج واتفق مع اعضاء المجلس اللي في الملعب انهم لا راحوا المنتدى يعلنوا أنهم هم اللي فازوا .. ولو احنا قلنا ترا حنا اللي فايزين بيقولوا لنا : ( وش يثبت أنكم فزتوا ) ؟

لكن يخسي

التاريخ يسجل هذا الفوز ..

//

قبل الختام .. هذه ابيات بسيطه تشاركنا بها العضوه ( رائدة الزعيم ) التي اعلنت انقلابها للمجلس ..

لو حاولوا التخدير محد يمهم
العالمي ياناس والله عمهم
جاب الثلاثية وفي يده يزيد
لكن رحمهم خاف حرقة دمهم

العالمي جاب الثلاثه بكل فخر
وصقرنا إبراهيم ثابت كالحجر
شتت زلايبهم والمرمى نظيف
ولالقى منهم تحرك أو خطر

سلطان يتهايط بشماعة حكم
يقول مظلومين ولنفسه ظلم
يقارن المجلس بذاك العالمي
كنه يقارن برج بيزا بالهرم

يالعالمي مبروك مافي شي جديد
الفوز في يدكم وذا شيءً أكيد
قدمتو الغشمان والسبقة لكم
والمجلس بيحلم وللماضي يعيد

ختاما يا حبايبي .. أشكركم جميعاً .. وكانت جمعه حلوه مره .. وأحلى مافيها هو شوفتكم والسواليف معكم قبل المباراه وبعدها

تشرفت بشوفة هالوجيه الطيبه .. الله يحفظكم كلكم ..

ولا حد يزعل مما قلته ترا امزح

وكل اعضاء المجلس على عيني وراسي وحبايب قلبي والله

وجميع الاحداث التي ذكرت صحيحه مئه في المئه .

ونود نذكركم أن الصور عند أبو غامد .. ورح ينزلها ان شاء الله قريب جدا

إقتباس

الرسالة الأصلية كتبت بواسطة أبــو غــامــد


	سلام عليكم .. هذي هي الصور قبل التصوير - اعلموا ان كل احد مشوش انا عليه .. هو رافض اني اصوره تماماً وهم ( Mr.GoaL / ماجد مقبل / الـمـشـاغـب ) سبحان الله 3 رفضوا التصوير - جميع الصور فيها مشكلة .. بسبب بعض مشاكل إعدادات الكاميرا اللي واجهتني - يوجد عند اخونا أبو ميار .. مجموعة صور أخرى .. راح تنزل بإذن الله في حال أني اخذتها منه - الصور ماهي مرتبة .. معليش --- الملعب الذي تم اللعب فيه --- فريق المجلس .. مع مدربهم قبل المباراة .. وفيه واحد مشوشين علليه لابس شعار النصر من هو ياترى ؟ --- الأبطال قبل المباراة --- اللي يركض أيوب .. ولاحظوا حارسنا إبراهيم .. طفشااااااااان --- جزء من الحضور اللي كانوا مع العالمية فيما حقين المجلس .. كانوا 3 يمكن أو 3 ضرب 3 بالكثير --- طبعاً .. الصورة ذي بطلع نواف غصب .. اللي لابس احمر ورقم 9 هو نواف ياشيخ ارررررروح باشا --- سنترة بعد احد الأهداف ويظهر زيزوووووووو ( عبدالعزيز ) --- شوتة طلعت برى وبس بس مدري منهو اللي شات .. خذ قلب .. ويظهر من بعيد الهلالي 11 يالبى سيقانه بس --- دفاعنا الصلب عصام ( نيمينيا فيديتش ) بطل بمعنى الكلمة .. ليتكم تشوفوه إذا يتكلم مع الفريق وسط المباراة .. تحس انه بيشوتهم --- الحكم يبيني اصوره باللي هي .. ماكفته الـ art ؟ ع العموم الحكم كان أفضل من الحكم النرويجي حق أمس بواجد --- مواصل من 1413 صراحة أبرز مافيه نظاراته وأخيراً وجدنا من هو أرسم من مشرفنا السابق سليمان --- أبو حمد وأسير واحد مدري من هو ! هلالي موووت يراقبون الفريق عن كثب --- لبى هالخدود الناعمة اععععن ودددديه .. بس ماش منت مرسم زي العادة .. خليت ابو عابد ( مواصل ... إلخ ) يتفوق عليك --- مدير إداريي إدارة الفريق صديق البيئة ابو حمد .. لبى الرسمي بس .. مواصل تك على جنب بالله --- كنق ميلان و فارس الزعيم!! متكين بالاحتياط على الأقل خالد لعب .. بس فيه ناس مالمست الأرضية حتى --- الخائن العميل مايكل سكوفيلد أي سجن ! وليد القحطاني --- مدرب المجلس .. بس بالله وش التكتيك اللي لعبتوا به .. ويظهر في الصورة من بعيد إذا ماخاب ظني جرح يشكي و مواصل --- وبهذا نختم الصور للمباراة .. ولو جتني الصور الثانية .. نزلتها لكم سي يو ليتر .. بإعدادات كاميرا أفضل

اعذرونا عالقصور .. وربي يخليكم

تقبلوا تحياتي .. حارس العالميه الطفشان

أنا

ع ـبـووود ! · #2 08/05/2009, 03:14 AM

<<<<<<<<<- مافهم شي

خخخخخخخخخخ

ابودحه الهلالي · #3 08/05/2009, 03:16 AM

.
صـ ع بهـ قويّـه .. الـ ع ـالمية ..!

يبو ثلآثة ويبو ثلآثة .. سرآ الليل يبو ثلآثة

..!

ما شاء الله تبارك الله على السمي كل المباريات يسجل

لا وهالمره هاتريك بعد ..!

اهم شي نص الفريق براهيم

.. اعتقد انه هو سر الفوز

..!

وبعدين اوم الواسطات الي كذا بالفريق .. يعني عشانه عضو مجلس ادارة الشبكة تخلونه مدرب

.. اعتقد قدارتي التدريبية تفوقه بـ مليون مره

بس الواسطات وما تسوي

..!

اهم شي بردتوا حرتي في المجلساوية ومشرفينهم

!

وبعدين ما تلاحظون ان نص فريق العالمية منشستراوية ؟!

اعتقد لولا ظرف المسافة كان شفتوا الونسو في الثمامه

..!

المهم استانسوا وافرحوا ترا موب كل مره تفوزون على ذاك الفريق !

وبمناسبة الفوز وبما اني عضو شرف داعم

< كني اعضاء شرف النصر ما يطلعون الا في الفوز

المهم كان المقرر اني اعطي كل لاعب بسكوت ريكو ../

لكن بسبب المستوى الرائع الذي قدمه ابناء العالمية قررت اضافة قوطي تيم لكل لاعب من الفريق

../

.
.
فوق البيعه لـ نجم المباراة الدحمي

وكما وعدت مسبقاً .. أقدم علك اتحفظ عن ذكر اسمه فقط ابو داحم استمتع بالصورة

../

وبس يمكن لي عوده لـ المزيد من الهياط

..!

Hictar · #4 08/05/2009, 03:17 AM

إيه يا زمن من بعد الثلاثية والخماسية ( طلع لهم ريش )!!.
بكل صراحة - بكل صراحة ( العالمية يستاهلون الفوز ).
وفيه أسباب كثيرة لخسارة اليوم :
إعتذار 4 من لاعبين الفريق الأساسي بالفريق
حتى ماجد مقبل ( تورط ما يدري وش يسوي )!!.
والفريق المنافس إستغل النقطة هذي ولعبوا على عدم تجانس الفريق!!.
ثانياً :
ضرب متعمد للاعبين المجلس
وليد القحطاني : إنتهت المباراة والدم يسيل من ركبته!!.
أول العنقود : طلع من المباراة والفريق ناقص ، وتحامل على نفسه ورجع يكمل لأن ما فيه لاعب يغطي مكانه.
ما فيه إلا أنا أنزل بثوبي

كانت مجازر والحكم ساكت!!.
ثالثاً : مشرفين العالمية أثروا على لاعبين المجلس بالصياح على الحكم والتهديد والوعيد بالإيقافات خلال المباراه ، في تحد صارخ لأنظمة الإتحادات العالمية!!.
حتى أن أبوحمد وأبوغامد ( هددوني بإيقافي عن طريق مستر قول )!!.

تهديدات بالإيقاف وضرب متعمد ( أكيد لعبوا بنفسيات الفريق )!!.

ما نقول إلا حسبنا الله ونعم الوكيل

Hictar · #5 08/05/2009, 03:22 AM

دليل على إن فريكم فاشل ( لحد الوصول إلى الفشل الكلوي )
وما يدرون وش هي اللعبة
جماهيركم جايين بيغيرون المقاعد معنا!!.

ترا اللي كنا نلعبها ( كره قدم )

عريب عبدالله · #6 08/05/2009, 03:27 AM

بإنتظار الصور

عموما المباراة كانت مضمونه كما أن إيقافي مضمون لأن مشرفي وأستشاريي المجلس متوعديني

حللوني قبل الأعدام

شهيدة العالمية الأولى تودعكم وتطلبكم الحل

بالحب والإشراق

مَاهِينُورْ · #7 08/05/2009, 03:32 AM

’,

وعليكم السلام ورحمة الله

هلا ابراهيم

ما شاء الله تغطية مميزة بس ناقصه الفوز

جايتن أبارك لكم هنا لأني ماباركت بالمجلس

تستاهلوون , تخيلوا بس لو خسرتوا للمرة الثالثة؟ :/
يعني فريق المجلس اللي رحمكم مو أنتو اللي رحمتوهم

.,
عموما مبرووك

والهدف اجتماع أعضاء الشبكة

الله يديمها من اجتماعات ويبارك فيها

,.

جرح يشكي · #8 08/05/2009, 03:44 AM

الف مبروووك فوزكم الاول والوحيد والاخير

إقتباس

الرسالة الأصلية كتبت بواسطة مواصل من عام 1413هـ


	دليل على إن فريكم فاشل ( لحد الوصول إلى الفشل الكلوي ) وما يدرون وش هي اللعبة جماهيركم جايين بيغيرون المقاعد معنا!!. ترا اللي كنا نلعبها ( كره قدم )

ابو عابد انت ما شفت اللي جاء يبي اوقع له ع فنيلته

rdh <<< بـ small

الوعد باب المجلس

abo_nasser · #9 08/05/2009, 03:54 AM

اشوف اغلب الردود من اعضاء المجلس..

والموضوع بمنتدى الحالميه..

لا تلومون اعضاء الحالميه..تحصلوهم للحين مو مستوعبين انهم فازوا على المجلس..

لان قبل المباراه ما كان ببالهم الفوز..وكان تخطيطهم كله كيف تنتهي المباراه باقل الخساير..

بس بعد كلام مواصل..واضح ان الحكم مأثر بنتيجة المباراه
اجل اول العنقود ما قدر يكمل المباراه

ووليد ركبته انعدمت..

..منكم لله يا وحوش<----ياااااي

اعضاء الحالميه..

تراكم فزتوا على المجلس جد..يعني حاولوا تصدقون الامر الذي لم يكن في الحسبان..

ومبرووووووووووك عليكم الفوز..

سلااااااااااااااااااااااااااااااااااااام

ahmmed2050 · #10 08/05/2009, 04:01 AM

ابطاااااااااااال والله ابطااااااااااااااال
اهم شي ان الفريق يكون واثق ويهايط ويفوز

مبروك الف الف مبروك للعالميه

وخصوصاً كرستيانو >>>الدحمي 11

Madridi · #11 08/05/2009, 04:05 AM

برهومي في موضوع ثاني كان ضميت هالوصف له .. الا اذا بتضيفون صور ..

مو عن شي برهومي .. لكن تعرف احنا ناس منظمين مو مثل هالغجر ذول

اما حقين المجلس فما اقولهم الا ...

باب المجلس حقكم وينه ...

بالله سكروه وراكم

أبــو غــامــد · #12 08/05/2009, 04:41 AM

سليّم

احنا نبي نكملها ثلاث مواضيع

موضوع الدحمي وموضوعك وموضوع ابراهيم

لي عودة مع بعض الصور

Madridi · #13 08/05/2009, 04:53 AM

إقتباس


	سليّم احنا نبي نكملها ثلاث مواضيع موضوع الدحمي وموضوعك وموضوع ابراهيم لي عودة مع بعض الصور

هههههههههههه

اذا على كذا مو مشكلة ...

بانتظار الصور

MaRoUaNe · #14 08/05/2009, 05:24 AM

مبروك يالحالمية
مبروك يا إبراهيم

وهارد لكل المجلساوية الذي أتشرف بأن اكون منهم

أجل ثلاثة

كل الفرق الملكية

هزمت ثلاثة وأكثر الشهر ذا

الهلال 3/0
مدريد 6/2
المجلساويه 3/0

يعني عاتي معوضه إن شاء الله

zezoo00oo · #15 08/05/2009, 05:28 AM

1
2
3
بدأ ردي

\

يقولوون عبدالرحمن راح للخرج بعد المتش ههههههههههههههههههه

!
دحمي :$

والدحمي وينه

؟!

إقتباس


	اعجبني بصرآحه اللاعب رقم 12 في فريقنآ وبعده رقم 10 , واللآعب 11 أحس ان عنده شئ اكبر من اللي شفنآه بس كآن ضايع بالملعب كمآن الدفآع البطل رقم 5

شكرا ً :$ .. مدري بصراحه انت اي واحد

من الموجودين !
بس اتمنى نشوفك اكثر هنا .. و ياليت نعرفك بالصور :$

مستر قول

مشكوووور على جهودكـ تعبت بصراحه والفووز اذا يسجل باسم احد فهو يسجل باسمكـ ..
ومن بعدكـ اسير الزعييم

بصراااحه ماقصرتوا ابدا ً ابدا ً

إقتباس


	الحارس R D H

إقتباس


	الدفاع: Nemanja Vidic و George Best و Loranse الوسط : M' MAN U و .. M a N U t D .. و دنيدل و zezoo00oo والهجوم : اليكس 11 و الهلالي 11 الاحتياط : فيلسوف و Blak wolf و فـارس الـزعـيـم !! و K I N G . M I L A N و 5lo0ody_20 و ‏hmooode_4 كابتن الفريق / zezoo00oo < < شخصيه قياديه بمعنى الكلمه المدرب / Mr.GoaL << وش يجي مورينهو عندك ؟ رئيس الفريق / أسير الزعيم مدير الفريق : أحمد [ هلالي موووت ] مدرب الحراس / أبو حمد كما حضر الغالي / سليمـان ( مشرف الرياضه العالميه سابقا ) و ميلانيللو , و zammamwek