«¤¶ LBa your heart ¶¤»

دعونا نرافقه سوية في رحلته العنكبوتيه

{ ~ رسالة من تحت الماء ~ }

السلام عليكم ورحمة الله وبركاته

والله مدري من وين ابداً يوم جتني رسالة هلالي من ارض اليمن حاولت اتذكر حياتي بالنت عجزت

ورحت اخذ لي شور وانا جالس اتروش بديت اتذكر حياتي بالنت حتى تذكرت اول حرف كتبته على الكيبورد

( ياكبرها ) وعجبني الوضع فكرت اجيب لاب توبي معي واخلص مره وحده وانا اتروش

<- لايكثر

والله جد تذكرت اشياء كثيره بوقت الشور وانا حالياً طاق السناوي عشان اعيش جو الشور واكتب لكم حياتي

بس قبل لاتكملون بقول لكم شغله .. فيه اشياء سويتها قبل,, راح تنصدمون لاعرفتوها

وتقولون سالم طلع شراني احب اقول لكم ان اللي راح اكتبه لكم شي كان بالماضي والحمدلله عقلنا

{ ~ تعلمت بفم مفتوح ~}

بدايتي بالنت مااذكر بالضبط بس اللي اذكر اني عرفت النت قبل سالفة 11 سبتمبر يعني عام 2001

أول مادخل الجهاز في بيتنا كانت مفاجأة لنا ماكنت اتوقع يوم من الايام اني راح امتلك جهاز مكتبي

جابه ابوي وجا معه خويه علشان يعلمنا الاساسيات بالجهاز وطريقة استخدامه طبعاً محدثكم وقتها كان فاتح فمه

ولا يدري شسالفه .. اقول بنفسي متى يطلع هالنشبه ( خوي ابوي ) علشان احوس بالجهاز على راحتي ..

بعد ماطلع خوي ابوي وانا الصق بالجهاز لما الساعه 12 وغصب عني طلعت بهالوقت لان بااتسر دراسة

وانا على السرير اتقلب لما قررت اغيب باتسر .. ومع وقت القومة للمدرسة سويت فلم هندي

جتني الوالده قالت قم يلا المدرسة قلت مقدر اروح بطني يعورني ? واطلع الدمعه من عيني علشان تصدق

بالاخير صدقت يوم راحوا اخواني للمدرسة قمزت من السرير وعلى طول جلست على الجهاز

من الرسام للوورد ومن الوورد للرسام .. طبعاً وقتها ماكان فيه نت لان الوالد يقول ماراح اجيب لكم النت الا لما

تتعلمون وبعد ماتعلمت شوي وصل لنا النت وكان أول موقع طلع لي هو موقع أين زمااان يافن ?

ومن موقع لموقع وقررت اغير شوي .. عزمنا ولد جارنا لانه يعرف للنت وعلمنا كل شي

وخاصة مايكروسوفت شات حبيبي زماان .. اذكرا انا واخوي الكبير متقاطين بنك واحد

والله ياهو نك راكب علينا وقتها

{ ~ خروف في الموقع ~}

وانتقلت من مايكروسوفت شات .. لشات كتابي وكانت انطلاقتي القويه منه الله لايذكره بالخير هالشات

دخلت الشات ولا كنت اعرف ولكمووو ولا يسلمووو ولا برب ولا تيت .. ومع الايام بديت اتعلم شوي شوي

وصرت اطقها صحبه مع بعض الشباب والجنس الاخر طبعاً وقتها كانت البرائة ذابحتني مااعرف كلمة خروف

ومشت الايام لما صرت معروف بالشات وشوي شوي وصرت سوبر

بصراحة والله كنت مدمن بشكل كبير بالشات من يوم اطلع من النت وانا اجلس افكر بالشات كنه شات ابوي

مالكم بالطويلة

وبعد ماعرفت للشات سجلت بنفس منتدى الشات اللي ادخلة وصرت اشارك ( ياكثر المواضيع المنقولة )

وشوي شوي صرت مشرف بقسم الضحك والفرفشة وكانت تشاركني بنت بالاشراف بنفس القسم ومثل ماقلت لكم

قبل ترى البرائة ذابحتني وقتها وجلست فتره وتركت الاشراف ..

ويوم من الايام صارت مشكلة مع احد المراقبات بالشات وراحت قالت لصاحب الموقع وقالت له اشياء ماصارت

ابو الشباب صاحب الموقع كان خروف الله يهديه صدق البنت وقلب علي .. وقتها حقدت عليه وعلى موقعه

قلت لازم اسوي شي واردها له .. قررت اسوي انقلاب عليه وعلى موقعه كلمت 8 مشرفين بالمنتدى وعرفوا

السالفة اللي صارت قالوا سالم اشر بس واحنا معك قلت كل مشرف يحذف المواضيع اللي بقسمه

وحددنا وقت معين عشان ينحذف كل شي وصار اللي صار وانحذفت كل المواضيع..

وانتهى الموقع لا زوار ولا اعضاء

( تركي لاتخاف ماراح اسوي كذا بالزعيم )

وبعدها مافكرت اسجلل بمنتديات ولا ادخل شات .. والمشكلة انا اصغر واحد فيهم

{ ~ جعلوني مجرما ~}

بعد ماتركت الشات والمنتدى قلت لازم ادور لي شغله ثانيه .. ابي شي جديد اتعلمه .. وطحت بمنتدى حق هكر

وبديت اتعلم منهم شوي شوي بس مايضبط معي شي .. وعطيت اخوي الصغير المنتدى قلت ليته يتعلم ويعلمني

بعدين .. وبعد فتره صار اخوي يعرف كل شي اختراق اجهزه اختراق مواقع .. وبدا يعلمني الشغل حبه حبه

لما تعلمت ..اول واحد طبقت عليه هالدروس خالي ههههههههههههه عطيته ملف واستقبله .. وصكيته بلوك ودخلت

على جهازه وقمت احوس فيه واخذت كل معلوماته وشلت البلوك عنه قلت هذا الباسوورد حق ايميلك وهذا اسمك

بالمنتدى الفلاني والباسوورد وانصدم خالي .. فيه خيار بالبرنامج اللي استخدمه يفتح حق السي دي ضغطت على

الخيار وفتح ومن بعدها طفى جهازه ... واتصل علي وشرشحني ومن يومها للحين صاكني بلوك .. وماخلى احد من

الجماعه الا وعلمه لدرجة كل ماحضرت مناسبة تجمعوا علي سالم ابيك تسرق ايميل خويي واللي يقول ابيك

تعلمني .. بعد ماطبقت على خالي وتأكدت من شغلي .. بديت استلم العالم .. وترى ما اذيت احد : ) وعرفت ان اللي

اسويه غلط وقلت لازم استلم هالكفار على الاقل اصحح غلطتي ومدري انا زدت الغلط بغلط !! اخوي يستلم مواقع

الكفار والشيعه وانا استلم الاجهزه ... وبعدين تركنا التهكير وسوالف التهكير .

الحين لو تسألوني كيف تخترق بالضبط بقول لكم مااعرف لاني بجد نسيت كل شي تعلمته والحمدلله اني نسيته

لاني ضيعت وقتي بهالسوالف .. انا من النوع اللي لاعرف له شغله وتركها ينساها .

{ ~ البداية قطية ~}

طبعاً شبكة الزعيم بديت ادخلها من عام 2003 على ما اظن وكنت زائر ولا كنت افكر اسجل ..

حدي قسم الجمهور ويخب ولا كنت ادخل المجلس .. تركت النت فتره طويله .. واول مارجعت له سجلت بالزعيم

كل ماحطيت نك قالوا موجود طفشوني : ( وبالاخير قلت مالي الا الرموز وسجلت بكلي هلالي

للمعلومية ببداية تسجيلي بالزعيم كان يوزري قطيه .. متقاطين فيه ثلاثه بس بالاخير غيرت الباسوورد

وقلت لهم دوروا لكم نكات لحالكم : )

ويوم من الايام دخلت المجلس وعجبني الوضع بديت ارد على مواضيع وقمت انزل مواضيع مثل وجهي

اللي خلاني احب المجلس يوم نزلت موضوع لطلعتي للبر لاني شفت فيه تفاعل بالردود وبديت اخش مع

الاعضاء ,,

{ ~ ئول للزمان ارجع يا زمان ~}

الواحد لازم تكون عنده صداقات بالنت وتتطور وتصير برى النت ( ااتكلم عن الشباب )

بالشات اللي كنت ادخله تعرفت على ثلاثه والله للحين ماشفت مثلهم وهالثلاثه صاروا مثل خوياي اللي بالحاره

كل يوم اقابلهم يمكن لمدة سنتين بس صارت ظروف وكل واحد يتكيسل يدق على الثاني .. وانا اكتب لكم هالكلام

فكرت ادق عليهم .. على فكره اثنين نصراويه وواحد شبابي

وبداية الصداقات بالزعيم مع المشاغب و هامور البورصة وصار بيننا احنا الثلاثه تعاون بالمجلة الله يذكرها بالخير وهي

اللي اعطتنا الشهره شوي <- اوت ..ولا انسى جرح يشكي و ليو ميسي و الكناري الازرق و جمال و ابو ناصر و علي

و ثامر و ماجد الخ الخ <- تورطت

{ ~ سري الصغير ~}

ايييييييييه يالماسنجر مدري كيف النت بدونه .. اذا مايفتح عندي المسن ماارتاح بجلسة النت

بوريكم صورة تكفي :

على كثر الموجودين عندي بس ما اسولف الا بقروب اللجنة و نادراً اسولف مع غيرهم ..

وافضل وقت اقضيه بالمسن يكون مع اعضاء اللجنة ..

اكيد كلن بيستغرب ويقول وين شباب المجلس انا في بداية انضمامي باللجنة انشغلت كثير بتسجيل المباريات

وماصرت ارد على احد لاني اكون بعيد عن الجهاز وقت تسجيل المباريات او ما اسولف مع احد وتعودت على هالحال

{ ~ أحب اللجنة واللجنة تحبني ~}

قبل لا اصير عضو بلجنة الفديو .. كان اجتهاد مني ومن جرح يشكي قررنا نتعلم طريقة التسجيل

وغطينا شاعر المليون الله لايعيدها من تغطية .. ويوم خلصنا من تغطيته جاني عرض من فارس الزعيم ( ما ودي اذب عليك ياخالد )

واخذوني تجربه كم اسبوع ونجحت بالتجربة .. كسبت من انضمامي باللجنة هالشباب الحلوين الله يخليهم لي

وكسبت الخبرة .. وصرت اتابع دوريات ما اكنت اتابعها مثل الايطالي والانجليزي ..

{ ~ من المواقع الى السلام عليكم ~}

حالياً المواقع اللي ادخلها اول شي قوقل ههههههههههه لاني من فتره طويله اذا جيت ادخل موقع

لازم ادخله عن طريق قوقل حتى لو كنت حافظ الرابط وتعودت على كذا

وهذي المواقع بالترتيب :

شبكة الزعيم
الاقلاع
اليوتيوب
قيمزر
سبق
الوئام
الرياض
النصر كلوب <- لاشفت نفسي طفشان ادخل واضحك

وفي الاخير أشكر اخوي طارق ومن خلف الكواليس ماجد اللي يبي نسخه من اليوميات

وكل مشرفي واستشاريي الميلس العام

بس ياليت محد ياخذ فكره شينه عني ترى انا الحين انسان مسالم مااهش ولا انشش :$

وترى كتبت لكم حياتي النتيه بوقت واحد وماراجعتها الا ثلاث مرات تقريباً

وعلى فكرة فيه احداث كثيره بعضها نسيتها وبعضها لو كتبتها راح تشوفون تحت اسمي

عضو مشبوه

اهم شي تستمتعون وانتم تقرونها وادري انكم ماراح تستفيدون منها

ونحن بدورنا نشكر قناص المجلس LBa your heart لقبوله دعوتنا

نلقاكم مع عددٍ آخر وضيفٍ جديد في ( حياة @ نت )

مشرفوا و استشاريوا
المجلس العام
يقدمون لكم أرق التحايا وأطيبها

^
^

تكفين لا تذكريني


* *

حياة نتية جميلة ورائعة , على الرغم من الماضي السيء في التهكير أجل تهكرون ع الكفار والشيعة.. بتكليف من مين ان شاءالله

بعدين وش هالمسنجر ماشاءالله اول ما شفته ما استوعبت صراحة رحت أشيك ع مسنجري .. يا حليله لقيت عدد سكانه 17



بس عندي سؤال لك أخوي لبى اذا ممكن , ورى ما نشوف لك مشاركات وحضور هنا بالمجلس ؟ ولا اللي يصير باللجنة يعتزل الكتابة هنا




**


هلالي من أرض اليمن & ماجد مقبل

شكراً على كل هذا ..

انا مدري كيف نزل الموضوع بهالوقت

بنام ولو فضيت برد
وهاردلكم

برايفت قيصر غبي : ترى نمت بعد هالرد
وخل السالفة لك

يؤ سالم

والله ما استوعبت إن سالم هو الضيف ما أدري ليش

تعليق صوغنن على بداية دخول الكمبيوتر لبيتكم

أنت تقول أول ما راح خوي أبوك تكيت عالجهاز
يعني تبي تقنعنا إن أخوانك الكبار ما كرشوك و جلسوا يلعبون قبلك ؟

والله من حياتك استنتجت إنك إذا بغيت تتعلم شيء تتعلمه حتى لو كان تحت الحراسة

ما شاء الله عليك بس
بعلمكم شي يا أعضاء المجلس
الاخ سالم له فضل كبير علي يوم دلني على المطعم اللي يسوي مزرعه جبن
والله أحس إني ابحب رأسه على ذا الخدمه


اختيار موفق شكرنس لكم ماجد مقبل & هلالي من أرض اليمن

السلام عليكم ورحمة الله وبركاته ..

ماشاء الله تبارك الله انتهينا من الكلاسيكي بدينا بسالم
مافي شك انو سالم شخصيه رائعه وترك انطباع جميل بالمنتدى
انا بصراحه ماعرف سالم معرفه شخصيه .. ويشرفني لو التقي فيه يوم من الايام > هذي عزيمه
ومجهوداته واضحه بالمنتدى .
يالله ياكثر مواقفه . وواحد اضرف من الثاني
حياة استمتعت فيها مع رغم غشامتها وبرائتها الا انها حياه حلوة

مو مثل الاخ اول مادخل منتدى الزعيم فتح موضوع نغمات


ماجد & هلالي من ارض اليمن
الف شكر لكم ( )

سالم هنا..يا مرحب يا مرحب..

ما ادري الحكومه حاقده عليك والا وش السالفه..احد ينزل الاستضافه بعد ذا الهزيمه المذله..؟؟

اذا روقت وخلصت سب في اللاعبين والمدرب رجعت...
ـــــــــــــــــــــــــــــــــــــــــــــــــــــــــــــــــــــــــــــــــــــــــــــ

باااااااااااااااك

شكلي اسمع بالروقان..الاقيها من الهلال والا الريال..

يمديني ااجل الرد لين اروق..؟؟<-----لا يكثر

سلوووم..

ترا للحين احب القيمزر واقدره مع انه الفتره الاخير حقير ودايم يبلكني
بس برضو باتم احبه..لاني تعرفت عليك بشكل اكبر فيه..

حياه نتيه مليئه باللعانه كعادتك الله يسعدك..
لكنها مختصر بشكل مو صاحي..انا متأكد ان فيه خفايا كثيره..



الحكومه..

الله يعطيكم العافيه على حسن الاختيار ..وعلى الاستضافه الرائعه..






سلاااااااااااااااااااااااااااام

المنتدى الاستشاري عرفتم تختارون بكل سراحه
سالم شخصيه خفيفه دم بماتعنيه الكلمه << متعوب عليها

بس ماشوفلك ردود كثيره ولو قرأنا لك رد لابد من رسم الأبتسامه على محيانا
لانه خفه الدم من ربي حياة نتيه استمتعت بقراءتها ..!!


بفهم ليه بالذات هالعام دخولك للنت وله قبله بعد الله يكفينا الشر
<<

ايييييييييه يالماسنجر مدري كيف النت بدونه .. اذا مايفتح عندي المسن ماارتاح بجلسة النت

نفس حالتي خرب عندي المسن كم يوم حسيت نفسي ضايعه بدونه
ومارجعت روحي الايوم زان لأني اهم شيء عندي بالنت المسن


موفق سلوووم أينما حللت وارتحلت وموفقين يامن خلف هاليوزر
فنووون .

هلا بك اخوي سالم

كان لقاء رائع
كشفت عن القليل عن شخصية لبى يور هارت
لك كل التقدير

إقتباس قلت كل مشرف يحذف المواضيع اللي بقسمه

إقتباس وحددنا وقت معين عشان ينحذف كل شي وصار اللي صار وانحذفت كل المواضيع.. وانتهى الموقع لا زوار ولا اعضاء