سلام لأحلى أعضاء في احلى المنتديات


تذكرون يوم مباراة منتخبنا مع منخب قطر في كأس الخليج

ذاك اليوم كنت رايح انا وواحد من الشباب نحضر المباراة

يوم وصلنا الاستاد شرينا التذاكر ( القهر اننا دخلنا ببلاش )

المهم يوم رحنا لم البوابه نبي ندخل والى هاك الزحمه الله لايوريكم

وحنا مع الزحمه فجأه شفت البشريه ينحاشون من البوابه

ووراهم العساكر يلاحقونهم بالعصي

طبعا انا حطيت رجلي وجلست اراقب الوضع من بعيد وخويي مدري وين راح
اقولكم وانا جالس اراقب الوضع وياليتني ماراقبت

تدرون وش صار

واحد من العساكر وهو يضرب البشريه ضرب واحد رجال محترم معه عياله الاثنين اعمارهم تقريبا على سبع ثمان سنين


والله ياقطع قلبي تصدقون انه جلس يبكي المسيكين :sad: :sad:


الحين هذا كله صار في استاد الملك فهد الدووووووووووووووووووووولي وركزوا على كلمة دولي



نجي الحين للمطار

كنت رايح اودي ابوي للمطار قبل يومين

وصلنا للمطار وقفت السياره نزلت مع ابوي عشان اودعه

دخلنا للصاله الدوووووووووووووووليه وركزوا على الدوليه بعد

يوم دخلنا وحنا نمشي واسمع هاك الصوت اللي كنه صوت كورة الجمعان وهي تصقع العارضه

والتفت اناظر وش القصه واشوف لكم هاك العسكري يرقع هاك الهندي المسيكين برجله

انا قلت بس الشنطه اللي مع ابو هنود كلها حشيش وهروين وبلاوي

المهم بعد ماعطاه الشوته الثانيه تدرون وش قاله العسكري ؟؟؟؟؟؟

قاله : (( ليه مافيه ارجع ورا ))


هذا صار بمطار الملك خالد الدوووووووووووووووووولي في الصاله الدووووووووووووووووووليه


تدرون وانا راجع وش كنت اتخيل ؟؟؟

تخيلت لو يصير مثل الموقف هذا لكن بدال الهندي يصير امريكي !!

تتوقعون وش كان بيصير ؟؟؟





اترك لكم التعليق لأني تعبت صراحه وعندي اختبارات الاسبوع الجاي وابروح اذاكر لي كلمتين لكن ابطلب منكم انكم تدعون لي ان الله ينصرني على الزول حقنا



لكم تحياتي