والله يابعض الرجاجيل عندهم حركات مقرفه

صحيح انها تطلع منهم بدون قصد.. حركات لا اراديه

لكنها بالنهايه مقرفه

يعني تخيلوا جالسين بمجلس.. وكل واحد ماسك فنجاله

الا ابو الشباب حاط اصبعه في خشمه وخذ ياتنقيب عن البترول

وبعد ان يلقي القبض على تلك الكائنات اللطيفة

يبدأ شغل ( تطيير العصافير )

ما كأن العالم اخترعوا المناديل

والا يجيك الثاني

يطلع مفتاح السيارة من مخباته... وخذ ياتسليك في اذانه

يبدأ ( ينقث ) ويغرف ويمسح بالكنب

والثالث تلقاه في مرحلة ماقبل العاصفة

يبدأ يرفع راسه وينتّع على ورى

ثم يبدا العد التنازلي >> واحد اثنين ثلاثه اربعة بوووووووم

عطسة عنقودية طالعة من مفاعل بوشهر النووي

يعطسها في وسط المجلس وبين الجالسين وعلى البيالات والفناجيل وبدون اي قيود

ياخي اذا ماودك تقوم تاخذ منديل حط شماغك على الاقل

عاد كل اللي راح يهون........ يهووووووون عند ابو تغره

يعطيك اياها وانت تاكل... معزوفة موسيقية ولا احلى

تخليك تعاف الاكل وتجيك حومة كبد غير طبيعية

وهو عاااادي عنده وماسوى شي.... مبسوط ويتنقّش

والا تكون بالسيارة وواقف عند الاشارة

ويوقف جنبك ذاك الكاشخ وشماغه جديد ونظاره شمسية كاريرا

ويفتح الباب ويتفل بكل اريحيه وانت تطالع فيه حايمه كبدك

ياناس الله يرحم والديكم شوية ذوق لوجه الله تعالى
.
.
.
.


وبعض الحريم عندهن عنصريه الجاهلية الاولى

ليش اذا الوحده منهن أضنت وجابت مولود

اذا كان المولود بنت تشوف انواع الهدايا المحرزه واللي عليها الكلام

غوايش ذهب وخماخم ( مجاول وخروص بالقصمنجي )

والبعض يحط لها في مهادها 500 ريال او 1000 ريال

هذا طبعا غير الحركتاتات وصياني الحلى الفاخر والشوكولا

وباقات الورد والبالونات الفوشي اللي معلّقه على باب الغرفة

وتستمر العطايا والهبات الييين تكمل البنيّة ست شهور

لكن اذا كان المولود ولد

مايطلع من ذمتهن غير :

الله يجعله عبد(ن) صالح ومن حفظة القرآن

الله يرزقكم بره وتذوقون نفعه

ابد لا اله الا الله الخشم خشم ابوه والجبهه على امه

وبعد كل هالفلسفه...كلّن يقضب الباب ولا تشوف منهم ريال واحد

ندري انه ولد ولا يبي ذهب ولا غوايش... لكن ادفعوا حق التمايم على الاقل

مو بس ترزّون خششكم وتتفرجون وتطلعون... وش حيث البنت
.
.
.
.


رومانسيات صخراويات


دايم اشوفك في حلم وردي

انا وانتي فوق السحاب

فارشين لنا بساط من ورود

ما احد معنا

ماغير انا وانتي متقابلين نقشّم فصفص ونشرب شاهي