السلام عليكم
زاوية : ليه ؟
ألف مبروك فوز الـ B52 الهلالية بالدوري الممتاز لكرة الطائرة السعودية
لكن ..
ليه قناه الزعيم مانقلت مباراه الهلال والأهلي لكره الطائرة ؟ لاتقولون تكفى ان قناه الرياضيه محتكره بطولة الطائرة
كانها تبي فلوس عشان قناة الزعيم تنقل المباراة اجل مانقول الا الله يصبرنا على مصيبتنا في هالمعلق
اجل معلق حالف انه يقول كلمه ( ياسلام ) 69884749 مليون مره !
كوره جميله من أسعد ياسلام ... وأحمد يطلق قذيفه ياسلام .. والهلال يتقدم ياسلام ..وياسلام على حائط الصد .. الخ
مسكت الريموت وضغطت عليه بقوه بغيت افغص الزر عشان اروح لقناه الزعيم للأسف لقيتهم عايدين مباراه أمس
نطالب إداره النادي انها تخلي قناتنا تنقل كل المباريات في كل الألعاب من كره الطائرة إلى السله والكاراتيه وغيرها ... الحمدلله عندنا نادي مشرف ويبيض الوجه في كل المجالات
زاوية : ياسلام
ياسلام على معلق قناه الكاس أحمد الطيب المصري الجنسيه
قسم بالله انه طرب وإبداع وجو آخر غير جو المباراه
ياليت معلقينا الحربي والحربين ( بحكم انهم هم الأبرز ) يتعلمون منه .. وياليت برضو يتعلم منه فارس عوض وعامر عبدالله وإن كان عامر عبدالله يعتبر أحسن الموجودين بس عقب ماسمعت أحمد الطيب ماعاد أقتنع بأي معلق ثاني .. اما ابراهيم الجابر أستغفر الله بس ماودي اتكلم عنه أخاف الله يبلاني
معلق يثريك معلوماتيا بدون ماتضيع المباراه منه ... معلق متعصب للكره الجميله بغض النظر عن الفريق أو الجنسيه
قام يقول شعر في التايب ومحمد الدعيع .. وقام يغني في ويلهامسون ويقول فيه مواويل
وبالمقابل كان يتغنى بحسني عبدربه وأسعد سرور وماجد حقين الأهلي الاماراتي
ولكنه يتغني ويقول شعر بكلام رياضي مدروس مهوب شعارات وصراخ عاطفي بلا معنى زي بقيه المعلقين وهذا اللي اعجبني فيه
زاوية : ياسلام على الهلال
ياسلام ياسلام ياسلام ... مباراه امس شفت فيها الهلال اللي نعرفه ونحبه ونبغاه
مباراه امس من المباريات القلائل اللي ما تمنيت انها تخلص أبد .. متعه وفن وروح .. ونتيجه
كان فيه أخطاء وكان فيه قصور وثغرات .. لكن روح الهلال وشخصيته كانت هي الطاغيه على المباراه
متفائل كثير بالمدرب وخطته : 4-4-2
الهلال أحلى كذا .. الهلال أمتع وأقوى .. الهلال مرعب بهالطريقه عبر تاريخه ..
لكن هالطريقه يبيلها أظهره صح ...
الزوري ماقصر لكن وش الحل مع نامي ؟ إن قعد ورا لحاله مهوب تكانه
وان راح قدام ماقدر يرجع
مدري كان انتبهتوا لأحد الهجمات المرتده الهلاليه انقطعت ومررت الكره للجناح الأيسر الإماراتي وصارت مرتده أهلاويه .. لولا الله ثم ويلهامسون اللي جا بسرعه البرق وطلعها ركنيه والا كان علوووم
ياناس وقتها نامي مارجع الا على تثبيت الكره في نقطه الركنيه واللاعب مستعد يبي يشوت !
زاوية : ياسر مهوب ياسلام
قالها أحمد الطيب أمس : ياسر يسجل هدف لا يسجله الا الكبار ... ويضيع هدف مايضيعه الكبار
وذلك بعد الفرصه المحققه اللي ضيعها عندما ارتدت الكره من حارس المرمى نتيجه حطة سول المجنونه .. مدري كان استهتار .. او ثقه من ياسر انه يبي يسجل هدف على الطاير حتى يكون هدف فني جميل يرجع فيه ياسر ويقول لكل المنتقدين والمشككين : هذا هو ياسر ؟
طيب كان يسويها لو ثبت الكوره بصدره ثم حطها .. وبكل سهوله .. كان يقدر يسكتهم كلهم بالهدفين حتى لو كان الهدف الثاني عادي !
هذا بالإضافة إلى تصرفه الأرعن في نهايه المباراه واللي كان ماله داعي أبد
زاوية : سول .. نص ياسلام 4 أهداف في 3 مباريات صنعها سول صناعه او بالأصح خلقها لأنها صارت أهداف من لاشيء لولا تدخل سول فيها
لكن هالمسكين قدام المرمى يختبص ... وشكله هو عارف هالشي وحاس فيه والمشكله ان هالشي مسبب له عقده تراكميه .. يعني كل فرصه تضيع قدام المرمى تخلي احتمالات ضياع فرص مستقبليه أكثر لأنها تصير زي الهم على قلبه
أما الفرصه اللي ضيعها وقام يفرك شوشته وهو قاعد على ركبه .. حسيت لحظتها انه واحد دلخ منقهر على نفسه : ليه انا دلخ إلى هالدرجه
زاوية : ياسلام على الإماراتيين
حطيت على استوديو أبوظبي بين الشوطين ... ياسلام على المحللين الإماراتيين ..أجمعوا ان الحكم هو سبب كل التوتر لأنه ماطرد حسني عبدربه لدخوله العنيف على طارق التايب ... وقالوا انه بعد اللقطة هذي توترت المباراه
تكلموا بكل موضوعيه عن أفضليه الهلال وعن ضعف مستوى الحكم .. هذا وهم يتكلمون عن فريق أجنبي يقابل فريق وطني
صوره مع التحيه لمحللين خط البلده السعوديين للأسف !!
زاوية : ياسلام على ذاك اللي مدري وش اسمه
واحد شكله قطري في مجلس قناه الكاس .. شايب اسمراني لابس غترة بيضا قال ان الهلال هو الأفضل وان الأهلي فيه لمحات حماسيه لكن مافيه مستوى ولا شخصيه تأهله لكسب المباراه .. وحتى هدف الأهلي كان من غلطه .. وتوقع ان الهلال يجيب في الشوط الثاني أكثر من هدف
هذا الكلام الصحيح
بعكس رأي أكثر من معلق ومحلل يقولون ان الأهلي قدم مباراه ومستوى يأهله للفوز .. من بينهم معلق قناه ابوظبي اللي كان يقول ان الفرق الاماراتيه اللي انهزموا من الشباب والاتفاق ماقدموا شي وانهم يستاهلون الخساره بينما الأهلي قدم مستوى قوي و إنه يستحق الفوز !!
زاوية : الحكم .. مهوب ياسلام
ياسر يستحق الطرد أكيد مافيها كلام ... لكن مدافع الأهلي اللي جا يبي يضرب ياسر أيضا كان يستحق الطرد بدون نقاش وبدون تفاهم .. ياسر غلط وفيه حكم .. انت وش دخل دين أهلك تجي تبي تضارب ؟!
أيضا فيه واحد دخل دخله قويه على ويلهامسون في منصف الشوط الأول وشات رجوله الثنتين ... ومع ذلك الحكم ما أعطاه كرت أصفر .. أعتقد انه من هنا اتضح ان الحكم ضعيف وبعدها بدأ لعيبة الأهلي في التكسير على راحتهم .. وكملها دخول حسني عبدربه على التايب
زاوية : ياسلام على الهزازي ياسلام
هذا اللاعب أتمناه في الهلال جنب ياسر .. هذا لاعب للمستقبل
أتمنى إداره الهلال تشتريه باللي هو به ... إذا كنا دفعنا في ياسر 25 مليون ريال .. فأنا ( لو اني مكان إداره الهلال وأعضاء الشرف ) عندي استعداد أدفع في نايف هزازي 35 - 40 مليون ريال
لاعب صغير وفنان ويملك مقومات اللاعب الموهوب اللي إن فكه الله من الغرور والشيشه والسهر بيعطيك إلى عشر سنوات قدام .. مع التأكيد على أهمية تطوير الفكر الاحترافي عنده بحيث يركز على كرة القدم وتطوير مستواه ويعرف ان هذا هو شغله وتحقيق ذاته ومستقبله
الصفحة الأخيرة
ياسلام عليكم يالهلاليين
معليش غثني معلق مباراة الطائرة بياسلام .. وشكلي غثيتكم فيها لأني كاتب الموضوع وانا فاتح التلفزيون على المباراه ..
والف شكر للبـــــــــــــــوكــ
الوضع العادي
