مشرف سابق في منتدى الرياضه السعوديه ومنتدى المنتخب السعودي
تاريخ التسجيل: 11/10/2003
المكان: العاصمة معقل فريق القرن
مشاركات: 15,935
الـــصداقـــة Friendship
بسم الله الرحمن الرحيم ..
من زمان وأنا أبغى أكتب عن هالموضوع وأبكتب هالمرة من دون تكلّف ..
أجمل شيء بالدنيا إنك تتعرف على أصدقاء تتواصل معهم وتفرح وتحزن وتحس بهمومهم وبأفراحهم والعكس بالنسبة لك ..
وما أجمل أن يكون لك صديق مقرب لك جداً ويكون هو الوحيد الذي تستطيع أن تذكر له أشياء ما تقدر تقولها للآخرين ..
أنا من طبعي أحب العلاقات الإجتماعية وأحب التواصل مع الناس وأحب بزيادة رصيدي من الأصدقاء ..
فإن قالوا هم القناعة كنز لا يفنى فأنا أقول أن الصداقة كنز لا يفنى ..
أتذكر موقفين لعلي أسردها لكم :
الموقف الأول ..
كنّا نجتمع كأصدقاء في الإستراحات مكونين من سبعة أشخاص طبعاً كنّا نجلس بالإستراحة هذي أكثر من نصف يومنا ..وما أبالغ إذا قلت إننا نشوف بعض أكثر من إننا نشوف أهالينا .. طبعاً الكلام هذا قديم أيام المراهقة طبعاً إجتماعاتنا كانت على تلفزيون وبلوت وبلاي ستيشن وكان معنا واحد مو من ديرتنا من ديرة جنبنا لكن الشخص هذا كان محبوب من الجميع سواءً أفراد الإستراحة أو الشباب اللي نعرفهم ويسيرون علينا .. وكان هالشخص راعي مزح وضحك ..
المهم هذا الرجل حصلت له ضربة براسه في مباراة من المباريات اللي كنا نلعبها مع بعض صح إنه تأثر فيها لكن تأثره كان لأقل من ساعة وراح المستشفى وإنتهى الموضوع .
المهم إفترقنا اللي تزوج واللي سافر لديرة غير ديرته يدوّر على رزقه > مثلي وصاحبنا هذا تزوج ورزقه الله من العيال ولدين وبنت وكانت حالتهم على قدهم وأقرب للفقر من الإعتدال ..
الشاهد من الحديث أن الرجل تضاعفت إصابته بالراس بعد خمس سنوات وأكتشفوا إن فيه الخبيث الله يبعدنا وإياكم عنه وصار ما غير يراجع مستشفى فلان ويروح لمستشفى فلان إلى أن لازم الفراش ومن ثم إختاره رب العالمين إلى جواره رحمه الله رحمة واسعة ..
خبر وفاته صدمنا كثييير وأجتمعنا في المقبرة لنواري جثمانه وكان المنظر في المقبرة عجيب حيث أن أغلب الحضور هم من عمر واحد وهم من زاملوا هذا الرجل رحمه الله في فترات شبابه ..
طبعاً بعد الصلاة عليه قررنا أن نعمل إجتماع عاجل كأفراد للإستراحة السابقيين وقررنا بجمع مبلغ من المال للصرف على عائلة صديقنا رحمه الله .. وبالفعل نجحنا بهذا الأمر وأستطعنا بمساعدة بعض من تكوين دخل شهري ثابت لهم يفوق حاجتهم عبر مشروع صغير بإسم عائلته وتولى الإهتمام به أحد الزملاء وكذلك من التبرع لوقف خيري بإسمه بمبلغ آخر ..
هنا لبّ الموضوع وهو أن الرجل رحمه الله كانت عائلته على مستوى قليل من الناحية المادية ولا يستطيعون أن يصرفوا على أولاده وزوجته وكنّا عارفين بالموضوع ومقدّرين هذا الأمر فمن غير توصية أجبرنا أنفسنا على عمل مثل هذا الأمر لكسب الأجر ووفاءً لزميلنا الذي لم ولن ننساه مهما حدث ..
للمعلومية فزميلنا كان ملتزم ومطلق اللحية ولا أزكي على الله أحداً ولكن إن شاء الله أنه من أهل الجنة .
فهل نعي معنا الصداقة الحقيقي .. هل نعي أن الصداقة ليست مجرد إن واحد يجي يسير علي بالبيت وأضحك معه وأعشيّه أو أقهويه علشان اكون أفضل اخوياه ..
معنى الصداقة غير كذا بكثير .. قلّ ما تجد صديق بمعنى كلمة صديق ..
الموقف الثاني وهو الموقف اللي لا زلت أتعجّب منه ولم يمر علي موقف مثله نهائياً ..
وهو :
طبعاً أنا بعد ما تخرجت من الثانوية جلست سنة بدون دراسة وبدون عمل .. وأنتقلت للرياض علشان أقضّي السنة هذي .. وكانت أغلب فتراتي مع ولد عمتي ..
في مرّة من المرات طلعت انا وولد عمتي لأحد المقاهي وقالي إن واحد من أخوياه بيجي قلت حياه الله ..
المهم جاء خوي ولد عمتي وسلمت عليه وبدأ هو بالسواليف مع ولد عمتي وأنا ساكت ..
كانت سواليفهم عن أمورهم اللي ما أعرفها علشان كذا فضلت الصمت .. ولكن يبدو إن خوينا شافني ما أتكلم وقالي عسى ما خربّت عليك انت وولد عمتك قلت لا بالعكس أصلاً أنا مليت من سواليفه
المهم بدأ يدردش ويسولف معي وكان هو نصراوي وأنا هلالي بدأ الحديث بالحوار العقلاني إلى أن وصل لرفع الصوت ..
المهم تشادينا بالكلام وقال ولد عمتي إنهوا الموضوع وأنهينا الموضوع ورجعنا مثل ما أبتدت الجلسة
إنتهت سهرتنا وقبل ما نمشي طلب رقم جوالي وعطيته ..
وأشوفه يدق علي الساعة 2 بالليل ورجع لموضوعنا الأول .. وخذ يا سب فيه وبفريقه .. وإنتهينا بدون إتفاق وبالاخير طلب مني إننا نتعشى مع بعض من بكرى ووافقت وطلعنا ..
طبعاً هذي بداية تعرفي عليه ومن بعدها سحبت على ولد عمتي وهو سحب بعد .. وصار صديقي اللي ما أسمع فيه كلام وسافرنا مع بعض وصارت سوالف كثيرة بيني وبينه مع إن تعرفي عليه جاء بمحض الصدفة ..
اللي أقولكم إني أستغربه هو إني يوم قررت أتزوج عزمته على الزواج .. وكان قبل زواجي بيوم موجود في الديرة لأنه من أهل الزلفي وأنا من أهل القصيم وجاء عندنا في البيت ونام ووقف معي وقفة ما راح أنساها ..
من ناحية إنه كان ملازمني بكل خطوة ويبعد عني الناس اللي بتستهبل ..
وأغرب شيء طبعاً إنه طلب مني إنه هو اللي يوصل شناطي للفندق ووافقت .. ويوم تزوجت وسافرت وأنا أقلّب بالشنطة حصلت ظرف وفتحته وألقى فيه رسالة مكتوب فيها :
الله يوفقك بحياتك الجديدة وأدري إني مقصّر معك .. لكن ما أقول إلا يسعدك إن شاء الله ويوفقك وسامحني على القصور .
مرفق مبلغ مالي لعدم معرفتي بنوع الهدية اللي أقدمها .
وكان المبلغ كبير ولا كنت اتوقعه ولا أبالغ إنه كان أكبر قيمة لهدية تجيني بزواجي .
عاد أنتم فسّروا شعوري في ذيك اللحظة ؟؟
خوينا تزوج بعدها وأبشركم ما قصرت معه
أدري إني طوّلت بالكلام ولكن أبغى أوصل رسالة من خلال هالموضوع البسيط بمفرداته لأنها نابعة من القلب ..
أبحثوا عن الصديق الصددوق ووقتها بتعرف معنى الصداقة الحقيقي ..
أخيراً :
تعرفت على ناس كثر بالشبكة وأفخر بالتعرف عليهم وهم وسام على صدري وتاج على رأسي ..
فأبحثوا عن أصدقائكم قبل أن يأتي الوقت الذي تكتفي فيه بالمعارف التي تعرفت إليها .
ياهلا والله متعب يقول لك :- من السهل ان تجد الف صديق ولكن من الصعب ان تجد صديق الالف سنه صح لسان من قالها ! ويقلك : من السهل ان تفارق صديق ومن الصعب ان تجد صديق ! والله شوف يامتعب , اخوياي اللي اعزهم واقدرهم ابوح لهم بأسراري كلها ولا اخفي عليهم شئ حتى والله اني معطيهم رقم بطاقة الصراف حقتي ولو ان مايوجد فيها إلا صفر ريال , لاني واثق فيهم ! ونادراً نجد الثقات في هالزمن وللأسف موقفك الال احزنني كثير , الله يرحمه ويغفر له ويسكنه فسيح جناته موقفك الثاني :- يا ما كثير تحصل هذي , صار خويك بمحوى الصدفة
اولاً جزاكم الله خير على اللي سويتوه لصاحبكم وبادره طيبه تشكرون عليه وفعلاً قمة الوفاء والصداقه انها لاتنقطع بعد الوفاة بعض الاصدقاء لافارقت الدنياء ( نساك ) !!
الصداقه امممممم وش اقول بس يابوميار يطول الكلام فيها ..!
ناس تضن انهم اصدقاء ولكن عندما تستنجد بهم لامجيب والعكس تظن انهم مجرد معارف ولكن عند الحاجه ماياقف بجنبك الا هوغريبه هي الصداقه !!
تصدق عاد دايم ادعي للي اقترح فكرة النت وسواهعاد اذا كافر ومايجوز ادعيله فاقلبوه شكرلانه عرفني على ناس افتخر فيهم واجد وماقصروا معي وماراح يقصرون
وان شاء الله يجي اليوم اللي ارد المعروف لهم من هنا ولا من مواقع اخرى .. وماظنتي راح اشوف واتعرف على ناس مثلهم بالحياة الطبيعيه
انا اشوف انه قمة الوفاء ان الصديق الحقيقي ماهو بوجودي فقط !! بس ضحك وفرفشه و و .. حتى بعد الوفاة مايبخل علي حتى بالدعاء لاني اكثر ماانا بحاجته بعد وفاتي !!
الدنياء دروس والواعي يتعلم منها .. بس ماتلاحظ يامتعب ان اغلب الصداقات قائمه على مصلحه و بعد ماتنتهي المصلحه .. تنتهي الصداقه لووول يعلم ويشهد الله اني ماحب واكره صداقة المصالح واتجنب مصادقة البعض من شان مايقال عني ( يبي حاجه منه ) رغم اني مصادقه لشخصه فقط ولا مانب بحاجته ومستغنى عنه ( المصلحه ) تراي اقول الاغلبيه ماقلت الكل ..
عندي رساله لازلت احتفظ فيها بذاكرتي وهي من احد الاحبه هنا بالمجلس ومن اللي اعتز لصداقتهم ( ابو خمسين رقم هع )
خويك خويك ولا تغيره الأيام ... وأنا عضيدك في نهار الشدايد لا جاء نهار فيه ولد الردي نام ... مانترك أسلوب العرب والعوايد رقمي مدون من سبعة أرقام ... أتصل لا ضرك عسيرن وكايد!!
متعب الله يعطيك العافيه واكيد لي عوده => بعد كل ده وبترقع تذكرت قرقاص الله يذكره بالخير => ثلاث دايم
هـلا والله بالغالي أبو ميّار
اول شيء الله يرحم صديقك ويغمّد روحه الجنة إن شاء الله ..
من ناحية الصداقة أعتقد إنك كفيت ووفيت ,,
المواقف الصعبة هي اللي تبيّن لك معدن الشخص
واللي سويته إنت واصدقائك بصراحة يدل على إن معدنكم أصيل ,,
وصدق المثل اللي قال (( الصديــق وقــت الضيـــق ))
وبعدين أنا احب اذكر نقطة مهمـة إن هناك فرق بين الزميل والصديق
يعني مو اي شخص تتعامل معه يكون صديقك
شكراً لك ابو ميار على حروفك ,,
~~~
بس ابي أعلمك عن واحد من اصدقاي كان معي امس في المـاسن ويسولف لي عن المحطات اللي عندهم يوم جت الساعة وحده الليل صرفنّي وقال بنوم المشكلة لقيته مسنتر في الشبكة إلين الفجر وجالس يرد على المواضيع تراه راد على موضوعك وأول حرف من إسمه واو
لا اجامل حين اقول اعجبني جداً روحك الشفافة في الطرح , بإستخدامك لقصص كانت تلامس قلوبنا ..!
\\
وهج الحقيقة
الصداقة ياعزيزي ليست بمفهومها الصحيح ,. اصبحت اهدافها لمصالح شخصية وغايات
سيئة , أصبحت الصداقه مجرد عباره تنساب من افواه الناس... دون فهم معناها الحقيقي
ابرهن اننا بحاجة إلى صداقة تستمر في السرّاء والضرّاء، وخاصة ما نراه من اشتداد النزعة المادية وغلبة الروح الأنانية؛ فالصداقة مشتقة من الصدق، ولابد أن يكون فيها من الصراحة والعفوية ما ترتاح إليه النفس، ومثل هذه الصداقة هي لذة روحية يدركها من يسّر الله له أن تنعقد المودة بينه وبين صديق من ذوي الأخلاق النبيلة والآداب العالية.
يا عمي بلا صداقة بلا بطيخ .. انتوا جالسين تفقدون انفسكم لذة الحياة .. بالله قلي :
وش حلاة الدنيا .. بدون ما تحش في اخوياك من وراهم .. وش حلاة الدنيا .. بدون ما تكون علاقاتك علاقات مصالح .. وش حلاة الدنيا .. بدون ما تمن على اخوياك بكل شيء سويته لهم ..
بوجود هالامور .. يكون للحياة معنى .. والاهم من كذا .. ان الواحد تكون عنده سالفة لما يفتحون سوالف الصداقة بأي جلسة ..
كان تبي الجد .. جزاكم الله خير في خويكم .. والمفروض هذا وضعنا كمجتمع مسلم مع اي شخص .. اما خويك الثاني .. فلي عندك طلب .. حاول تجمعني فيه على اني ولد عمتك .. وباقي الشروط متوفرة .. انا هلالي .. وهو ان شاء الله ما زال نصراوي .. والنقاش يجي مع الجلسة .. بس انت توكل على الله وحدد المكان والزمان .. هذي فيها هدايا بزواجي .. وكاش بعد ..
عموما .. الله يجمعكم على ما يحبه ويرضيه .. ولا يفرقكم.. ويرحم من مات ..
تبي الصدق .. انفجعت يوم عرفت انك انت مولع بالهلال .. انتوا يالمشرفين تغيرون يوزراتكم سريع سريع .. انا جلست ثلاث سنين اطلب تغيير اليوزر ..والكلاسيكي يطنش.. <<< المشكلة انه راد قبلي .. بس حلو اليوزر الجديد .. و الله يصلح لك ميار .. يا رب يا كريم ..
مشرف سابق في منتدى الرياضه السعوديه ومنتدى المنتخب السعودي
تاريخ التسجيل: 11/10/2003
المكان: العاصمة معقل فريق القرن
مشاركات: 15,935
وليد القحطاني :
ألف شكر لك والمرة الثانية حط بحسابك عشرة آلاف وناظر معدن أصدقائك .
على فكّرة يقولون إذا ودك تفتك من واحد سلّفه ..
شكراً وليد على مداخلتك ..
بريماكس :
الله يسلم عمرك على مداخلتك اللي أضافت للموضوع الكثير ..
بالنسبة للمصالح أنا أشوف إن العلاقة تبدأ بمصلحة لذا فهي مزروعة بثمرة غير صالحه ولن تجد من هذا الزرع سوى شجرة من دون ثمر >> وش رايك بالوصف
يعني يجيك واحد يشوف شخص معه بالجامعه بنفس القاعة يجيك على ذيك السيارة اللي قيمتها فوق الــ 300 ألف ومن ثم يبدأ بمحاولة التعرف عليه يعني صداقة بمصلحة ..
أعتقد أن أفضل الصداقات هي صداقات الطفولة لأنها صداقات بريئة وكذلك صداقات الصدفة .
وشكراً
ريكلمي :
شكراً لك على مداخلتك الرائعة والإضافات الجميلة من ناحية ذكر كلمات الفاروق رضي الله عنه وإضافة بيت الشعر الرائع ..
مشرف سابق في منتدى الرياضه السعوديه ومنتدى المنتخب السعودي
تاريخ التسجيل: 11/10/2003
المكان: العاصمة معقل فريق القرن
مشاركات: 15,935
المشاكس :
وآه منك ومن ردودك .. أجل تتعرف على الناس علشان تسب فيهم آه لو أشوفك بس ..
عموماً تبغاني أعرّفك على خويي علشان الكاش .. وش رايك أعرّفك على كحيلان خصوصاً وأن هناك بوادر معرفة ستكون قريبه بيني وبينه
وإلا على الدب منصور ؟؟ خصوصاً وأنه من ديرتكم وضبط علاقتك معه وخلك صديقه
بالنسبة لتغيير اليوزر ..هناك جهات رسمية لتقديم الطلب بها ويتم النظر بالموضوع ومن ثم تنفيذه .
هلا وغلا ابو ميار.. بالنسبة لموقفكم الاول صراحة بيض لله وجيهكم , وماقصرتوا , وقليل بالزمن هذا من يسوي سواتكم .. اما خويك الثاني هذا كنز لا تفرط فيه وين تلقى صديق كاش هالايام .. الله يديم المحبة بينكم .. بعض الاصدقاء ينطبق عليها المثل اللي يقول " رب اخ لك لم تلده امك " .. صديقك هو اللي لا ضاقت بك الدنيا وشفته ينشرح صدرك .. اللي اذا نخيته لقيته .. اللي اذا استشرته لقيت المشورة .. الصداقة اسمى من ان نصفها بكلمات ..
كان لي صديق من ايام الدراسة كنا اكثر من اخوان .. اعرفه واعرف عنه كل شئ اكثر من اهله ..وهو بعد .. اي شئ معنا حتى لو ريال دائما نقسمه بيننا بالتساوي .. مات الله يرحمه بصف اول ثانوي من قوة العلاقة اللي بيني وبينه كانوا المدرسين والطلاب يعزوني فيه ..
طبعاً إجتماعاتنا كانت على تلفزيون وبلوت وبلاي ستيشن وكان معنا واحد مو من ديرتنا من ديرة جنبنا لكن الشخص هذا كان محبوب من الجميع سواءً أفراد الإستراحة أو الشباب اللي نعرفهم ويسيرون علينا .. وكان هالشخص راعي مزح وضحك ..
, لاني واثق فيهم !
يطول الكلام فيها ..!
من هنا ولا من مواقع اخرى .. وماظنتي راح اشوف واتعرف على ناس مثلهم بالحياة الطبيعيه 
!! 
..
وجالس يرد على 
تراه راد على موضوعك وأول حرف من إسمه واو 
الوضع العادي
