السلام عليكم .

انا بسرد هاذي القصه والتي جميع احداثها حقيقية وجرت على ارض الواقع وليست من وحي الخيال .الحقيقة مانب قاعدن اتفلفس واسوي مقدمة ابطب سيده بالحكاية. ويمدحون فنيجيل قهوه مع سكرية عند قرايتها.منذ سنتين خلت كنت مع احد النعاج (رفيقي) داجين في آخر الليل ماعندنا شيء ندجدج ونسوع بشوارع الرياض على ام عزيز حقت الغنم (يجيبون عليها منتجات الغنم والاباعر من حليب وصميل وغبوق وصبوح وخلافه ) وهي عباره عن ددسن غماره شبك بدون انوار ماتعرف وجهها ممن مقفاها اذا وقفت طفت وماتشتغل الا بدف ونتع المهم وحنا ندوج على عماها قالي خوي ماتبي ندز للصمان .

قلت ليه قال : نروح نستكشف ونشوف الوضع هناك مطرين اماكن فيها ضبان واجد . قلت براسك نروح ونشوف وان جاز لنا المحل جيناه خميس وجمعه مع الزكرت وفلينا بهاالضببه. يالله توكلنا على الله الحين الحزه حول الفجر باقي على الاذان نص ساعه .

هاه ياولد الموتر يودي ويجيب قال: ازهل ماعليك هذا موتر بر لاطلع من القار يقلب شروكي لايغرك وضعه على الزفلت .

ونروح ونوقف عند محطة خزام اظن مافيه احد مايعرفها ونصلي الفجر ونفلل بترول اخس ياالاماراتي .بنزين وناخذ معنا جركليين مويه حياة . هي كل زادنا وعتادنا بعد الله .

واقظب الخط يالذيخ ودوس ياعدوس. ونمشي الين جينا عند لوحة الصمان 60 كيلوا وندحدر يمين ونبارى العرق ونتوسط الخبه ونتوغل الى الامام . ومشينا شي مهب بسيط . والوقت توه بدري على الضبان توها الساعه 7 الصبح والشمس توها بارده. المهم قمنا نعمج مع هاالخطوط تمشي مع واحد بعدين يطلع عشرين خط والله يوم بدت الضبان تطلع مستحيه عند جحورتها ماتعداها ويوم شفنا الارض طيبه قلنا ورى مانروح قدام بعد يكمن قدام احسن وعليها . وسألني رفيقي كم مشينا من تعدينا القار قلت انا يامحاسيكم حوالي 8او 9 كيلوا ماعليك توغل.معك ماجلان.

وفجاءه وبلا مقدمات طفى الموتر .نزلنا على العاده نبي ننتعها . ياولد ماش الموتر ماينسم ونحاول بدون فايده وش السوات ونفك الكبوت ونقوم ندنفس ونفك ونربط وحنا ماعندنا ماعند جدتي باالمواتر . تبينا بفك استبنه رجال غيره مابالحمض احد .

والله ونجلس مبرطمين انا ويا هالمهبول اللي جابني لهاالمحل وش الحل يازيد قال:ياعبيد اجلس الين يمر علينا احد ويساعدنا .قلت خلاص شكل مابتريد.

ياولد مايصير الساعه 11.30 ولا شفنا انس ولاجن .ولا حولنا عرب نشوف شيء من بعيد ماندري هم اوادم والا سيارات والا سراب . ونبدى ندب من هاالموية . الين خلصت وكل مالها وتخرب دايخيين وجوعانيين وماحولنا احد . ياحلالاه غريفه ومكيف وكبر الوساده ومالك ومال الضبان . هذا لسان حالي في هاك الموقف .

المهم قلت للبطه اللي معي مافيه الا انا نمشي وندور اقرب عرب حولنا قال: ماحولنا احد تبي نروح ونضيع محل الموتر. قلت عمرنا مالقينا هاالقرمبع . اهم شيء حنا . والله ونقوم ونسير صوب اللي نشوفه من بعيدواثر المسافه طويييله . ويوم قربنا وتاضح الاشكال ولا الشاص مصفط (برق لاح) قلت هلا هلا ابوك للجنه . ويوم جينا لمهم ولاهم اثنين عربي معه الراعي عراقي ونسلم عليهم وحياكم الله ومن هالكلام . وقلناله القصه كلها وسن الرجال ماش ماصدقنا اوجس في نفسه خيفه . قال : المهم انتم تغدوا وبعدين يصير خير ولا الغدي زاهب مايبي الا من يلعبه ويوم انبسط التفخ اللي معي قال دامن العيشه جت ان شاالله لو انا في الربع الخالي .

ويوم تغدينا وتقهوينا على بيالة شويهي وعدلنا روسنا. قال الرجال توكلنا على الله وترى الراعي اللي عندي مكانيكي قلنا تمام . هذا الغرض .

ويوم جينا للموتر قام الرجال يفحصه ويحاول يشغله ويعيي يشتغل الماخوذ وفك الكبوت ويومنه كشف عليه قال الموتر هذا ماجاء من الرياض هذا مسحوب او انه مرجوم رجم في هالمحل قلت له : يارجال اذكر الله انت تبي تشككنا في انفسنا حنا جايين عليه واليوم بعد . قال: الكلبوريتر والبليتين ومدري وش قال بعد كلهامهب موجوده وشلون تمشي السياره قلنا ماندري يمكن مواصفاتها كذا . قال الله يعينكم يمكنها طايحه وانتم تعمجون بهاالبران لازم تدورونها ونركبها قلت ايه هين دور غيره . قال روحو للرياض وتعالوا بعدين واسحبوها او جيبوا قطع الغيار وانا اركبها . قلنا هذا الحل يالله ودونا للرياض او الخط ونروح تاشيره قال الخط بعيد حوالي 40 كيلوا وانا مانب ماشي للرياض الا بكره . بس ابروح اودي الراعي واجيكم بعد نص ساعه اوديكم الين الخط قلنا خلاص حنا نحتريك ويمنه راح قال صديقي مانب مخلي الفكس آر هنا يمكن انهم ناوين اذا رحنا يشلحونه بعدين اذا جينا يجحدونا .

قلت له طف النور الله يرحم والديك واحمد ربك انك لقيت من يضفك من هنا .

ويطول الانتظارالساعه الحين 1,30 والرجال سهجنا ماجانى والشمس بدت تحتر وحنا تعابى رايحيين فيها وبدى الياس يدب في قلوبنا قلنا شكلنا بنمرح هنا.

ونتسدح في محلنا ونسلم امرنا لله سبحانه . والحمد لله مر من عندنا موتر ونقوم نشرله ويجينا ونشرح له الوضع قال انا شاد مع اهلي والحلا ل ولااقدر اخليهم بس ابوديكم لعرب هنا قريبين

غديهم يسنعونكم . وياالله ونوجه يمهم وننزل عندهم وننصاهم في بيوت الشعر ويهلون ويرحبون والغدا وياولد قلنا ابد حنا مانبي الا اللي يودينا للخط مع موترنا ويقوم هاك الشايب الله يجزاه خير ويقنصنا بالجيب الشاص . واتكي معه بالجيب وخوي بموتره .

وحنا بطريق الرجعه اشوف الضبان مفليه ماعندها احد قلت عاد هين هين يالضبان الوعد ان قاله الله الاسبوع الجاي ونصكها نومه حتى الطرمبه اللي بالددسن نايم ومخلي الموتر يهجول يمين ويسار .

ومادريت الا الشايب يقومني وحنا عند لوحة 60كيلوا. ونشكره ويتسهل عاد هو وتبداء رحلة الرجعة عبر بوابة التاشير على القار الزفلت في عز الظهيره واشوى ماخذنا دقايق الا ويوقف عندنا موتر قلنا الرياض قال : ايه قلنا معك عاد هو غماره وانحشر بالنص وخوي دبيبه شوي ونصكها نومه الين جينا الرياض .ويصحينا الرجال على مدخل الرياض والساعه حوالي 7 المغرب الظاهر انه يمشي على بيض المهم وصلنا بالسلامه.

ونروح لبيوتنا شهب لهب مصدين والفراش سيده ولا تعلمون احد .

وهاذي تكون عبره ودرس للدلوخ اللي يحسبون البر لعب بزران . و

اللي مايعرف الصقر يشويه .

اكيد كلكم تبون تعرفون وين الموتر خليناه عند اللوحه اللي يبيه يروح الاول وياخذه تراه الى الحين طايح هناك مخلينه ذكريات .

وفي الختام لكم مني السلام .