والله العظيم ظلم.. ظلم.. ظلم... هم يستانسون وحنا نقشّر بصل
حيـــــــــاكم
جب طاري بطاقات ( عرس ) عند اهلك وشف الكشره من فوق الى تحت
على طووول يتحولون الى شلّة ( عشتاويه ) بعذرهم... انواع الوناسة وفلّة الحجاج من الظهر يتجهزون عند دندشة ولبنى وباقي المشاغل ويروحون للعرس الساعة 10... كل وحده منتفشه تقل طاووس ومن يوم يدخلن الى الساعة 12 وهن فاصلات الفيش عرض ازياء ولا في الخيال فساتين وتصاميم وطقوم ذهب والماس ... شي شي تعال عاد للتقديم والمعروض شمعدانات وشوكولا ومعجنات وصياني الحلى والحركتاتات والعصيرات ( فريش ) بجميع الانواع والـطقاقات والـ DJ وخذ يا ( مايطلبه المهسترون ) وهز يا وز واللي ماترقص تتفرج... ( هذا اللي شايف نفسه... ماشي ولا هو معبرني ) ( يالتاكسي... خذني لها يالتاكسي ) وحتى ( سليّم سليّم ويش اسوّي بمحبوبي ) ورى ورى على قلبي ولايووووقف والمغاتير يدهرن تصوير وبعد 12 تجي زفة العروس... وهذا لحاله عرض سينمائي ثم تعال عاد للعشاء اللي يجيب العافيه بوفيه فاخر يحتوي على ما عرفت وما لم تعرف اكلات عالمية ولبنانية وشامية وشغل نظيف وعلى طرف قسم خاص للاكلات الشعبية... مرقوق على قفر ومصابيب وجريش وهريس اصلا الحريم يقومن وهن فادغات من الحلى والمعجنات ولا يذوقن العشاء ثم يكملون السهرة على نغمات الطقاقة الـ VIB وتروح تاخذهن الساعة 4 يطلعن للشارع وهن الى الحين ( خارج التغطية ) تركب الوحده منهن السيارة وكتوفها الى الحين ( يهزّن ) آآآبوووك يالوناسه موب حنا اللهم ياكافي... تقول بـ عزاء ليش دايم عزيمة العرس للرجال تجيب الكدر تلقاهم متكومين في صالة طويلة عريضة وكل اثنين زابنين جنب بعض وانواع المساسر والضحكات الصفراء هم وغم ونكد وجلسة تجيب التيفوئيد وبزران ناسفين الشمغ ومدبسينها بدباسه علشان ماتخرب التشخيصة وماتشوف الا طوفريات الشاهي ( اصفر واحمر ) رايحه جايّه قسما بالله مانشوف شي غير الشاهي واللي يصبون انواع النفسيات يصب لك بياله حمراء... ثم صفراء.. ثم حمراء.. ثم يكبّه على ثوبك والناس جايّة تقل مغصوبة او ( تأدية واجب ) واللي يصيد له واحد يطلبه فلوس من سنتين وتوّه يشوفه واللي يبترم واذا شاف له اثنين يسولفون جلس بينهم وفهّر وجهه اعوذ بالله من غضب الله... وجيه مكفهرّه وتقطع الامل بالحياة واذا وصل ( الجنب ) وازعجوا ام امنا بالبواري ونزل المعرس وصفّينا ذاك السرى تقل عند مقصف مدرسه ثم ( اقلطوا الله يحييكم... يالله حيّهم على عشاهم ) رز ولحم... ورز ولحم... ورز ولحم... ورز ولحم... ورز ولحم وصحون فاكهة كل صحن فيه برتقالتين وتفاحتين وموزتين ثم تعشّوا وقوموا غسّلوا.. واقضبوا الباب الله لايهينكم ويقعد الشباب اللي يبي يجيبون اهلهم يطقّونها ( اربعة بلوت ) الى الفجر بذمتكم مهوب ظلم ؟؟ وين اعلان مشاعر الفرح ؟؟ وين فرقة السامري والدفوف والعرضة ؟؟ لا وخذ عاد اذا احد المجتهدين اخذ له مايك وقام يحدّث عن عذاب القبر عذاب القبر وقت العرس
رومانسيات صخراويات النهارده ماتؤلش ان انت ناسيني دنت اللي عايش في ننّ عينــي وانت اكتر واحد بايع مش شاريني حيقيلك يوم تعرف ئيمتي وتناديني ساعتها حاؤلّك دا بعدك ياكاويني لابوووك لآآبووو آآآبووووووك يالسمرمدي ياللحجي يالهجيني
خخخخخخخخخخخخخخخخخخخ <-- يضحك على الواقع المضحك المبكي .. فعلاً .. نحن يا معشر الرجال ( ماكلينها هوا ) في ظل الزخم الانثوي المتعدي على حقوقنا نحن الرجال <-- كلام كبير
من جد .. الحريم فالينها .. وما غير سهر وسعة صدر وفلة حجاج .. وحنا كننا في عزا موب عرس ( والحديث هنا يختص بالمنطقة الوسطى ) .. ولو حظرت عرس خويك بالدوام ان كان توهقت .. لإنك ما تعرف الا هو في العرس و هو في ذاك اليوم مهوب رايق لك .. وبالتالي .. تقعد لك ابو نص ساعة ( شاهي , قهوة , شاهي , قهوة , شاهي , قهوة .. إلخ ) .. لكن .. وش نقول بس .. الله يقازي اللي كان السبب
الصخرة .. ياخي انت رايح فيها <-- ترى ذا مدح انا كنت ماشي اوك في موضوعك .. وتفاعلت معه .. لإني كنت معاني منه ..
لكن .. يوم شطحت بي في الرومنسيات .. دخلتني في جو ثاني الصدز .. وكيفتني يوم قلت ( في ننّ عينــي ) .. حسيت انك قاعد في قهوة مع صعايدة وانت تكتب الموضوع ..
لا وخذ عاد اذا احد المجتهدين اخذ له مايك وقام يحدّث عن عذاب القبر
عذاب القبر وقت العرس
هههههههههههههههههه... الى مآلا نهايه
والله مدري وش يحسون به هاللي يحدثون وقت العرس ، الله يهديهم بس ماهوب وقت حديث صراحه ، مره واحد بعرس قرايب لنا قعد يحدث وكل اخواني عارفين انه لا تكلم ماسكت ويوم طولها قاموا وطفوا الكهرب ،، واول ماسكت شغلوه ، عاد هو فهمها ومشى الله يهديه
أما عليك توقيت عجييييييييييييييييييب تونا مهزومين وتتكلم عن العروس
ولا تحش في اللي يحكي عن عذاب القبر في الزواج
ما علينا شايب يالله لك الحمد
من قالك سعة صدر أنا من الناس اللي ما أحب هالمظاهر وما أروح الا للزواجات المهمه بس
واللي بيصير فيها زعل لو ماحضرت
ثم لي رجعت قعدت أسبوع مريضة صداع وظهري بينقص من الكعب
والمصيبة الكبرى أن الوحدة تدفع هاك المبلغ الصكة ومانوصل الزواج الا على 11 ونص 12
ثم ماتجي أربع الا أنا طالعين ثم على المروش ونغسل هالمبلغ وقدرة ماكمل أربع ساعات
تصدق عاد أني رفضت يحطون سامري في زواجي وقلت ترى بأكنسل العرس عاد أنا على جريف
على ماقال أخوي كنتس بتحضرين لكن أنا أشوف أن هذا زواجي وأنا المتحكمة
حتى معازيم ماكنت بأعزم لكن شكل أهلي بيصيرون أقوى مني هذا هم أجبروني على ملكة كبيرة
من جد خساير على الفاضي
بس يالصخرة سؤال هل كنت يوما أحدى المتغترات في الموضوع
حسيتك حاضر الزواج صدز
ونسيت تذكر سالفة الحش
شوفي فستانها يالله لك الحمد لوهو بريال ماشريته وع
والا شوفي ترى هذي فستانها شايفته بخمس مسه في المحل الفلاني تدور الرخيص
تصدقين ذي كل عرس بنفس الفستان <<تراها كررته للمرة الأولى بس لازم التعميم
ثم والله هذي حاستها الكوفيرة شوفي كيف مكياجها كنه مهرج
يازينها هذي كنها فلانه
وتبداء الحريم كل ما تمر بنت من وحدة خذت رقمها تخطبها لولدها
وطبعا هاك ياحش في الرقص وفي المدعوات الى أن تطلع للسيارة وتكمل الى اليوم الثاني أو الأسبوع تقريبا
بس فعلا عالم تافهه<<قالك مهيب منهم
أيه ذكرت ترى مايجوز تخطب عن الموت وهالشغلات في عرس
من المفترض لو أحد تكرم يحتسي ومن السنه الكلام عن مظاهر الفرح والبهجة
ومن الجميل لو صار فيها لعب <<بعيد عن البلوت وإبتسامه ومن هالأشياء
مع أن نظام الحريم قلق الا أن نظامكم أقلق ويجب المرض
كسرتوا لب خاطري
من جد شي يضيق الصدر
وهذا حالكم على طول
اما حنا مثل ماقالت وووناسه لابعد حد
طبعا مااروح الا عروس عارفه اهله بيحطون شي عدل وطقاقه عدله ولا مااروح
اروح اضيق صدري وشو له
والله محدنا قال لكم سوو عاقلين ولا تفلونها بعدين هذا يختلف من قبيله الى اخرى
بعدين الحريم يفلونها بعد مايقعدون شهر حايسين وش يلبسن وكسسوارات وحجز مشاغل يعني تعب شهر يستحقن بعدها فلة حجاج وانتم ماغير ثوب وشماغ معبينه مريتو عشان لاتخرب الشخصية بس بصراحه انا كثير اتمنى اني رجال ثوب وشماغ وحلاقه وبس بدل الزحمه الي مال امها داعي ابد
جبتها بالثمنيات...بالصميم....ع الجرح.. من زمان هالتساؤل يقرقع بقلبي... اشوف اهلي يتحمسون للعرس من قبل شهر..والوحده تناقز من الفرحه والحماس.. واذا جاء اليوم الموعود..يصير البيت على صفيح ساخن...الحركه المروريه دئوبه ...وابن امه اللي يمر من عند وحده منهن... واذا رجعن..ودك تبلع كرتون بنادول من لجتهن... يتهاوشن على الكلام...يصفن سرا... ووع شفتي فستانها من المجد... تسريحتها قديييييمه.. بوفيهم مب زين... قاعتهم خايسه.. بزرانهم مو ستايل.. ام المعرس عجوز
والله لو بيدي ان ينطقن ببيوتهن..اصلا الحريم مهما قدمت لهن مايعجبهن العجب والا الصيام برجب...
هلا والله هالمرة طولت علينا ماهي عاداتك انك تتأخر علينا بخصوص الزواجات والزحمة اللي صايرة عندنا في كل صيفية من الصباح والاهل عند المشغل , ومايخلصون إلا العصر . احنا يالرجال نروح العصر ويدقون الاهل ع صلاة العشاء ع وقت المفطح ويقولون تعال خذنا , اروح اخذهم واوديهم ! عد شف كم زواج في الاجازة