جب طاري بطاقات ( عرس ) عند اهلك وشف الكشره من فوق الى تحت

على طووول يتحولون الى شلّة ( عشتاويه )

بعذرهم... انواع الوناسة وفلّة الحجاج

من الظهر يتجهزون عند دندشة ولبنى وباقي المشاغل

ويروحون للعرس الساعة 10... كل وحده منتفشه تقل طاووس

ومن يوم يدخلن الى الساعة 12 وهن فاصلات الفيش

عرض ازياء ولا في الخيال

فساتين وتصاميم وطقوم ذهب والماس ... شي شي

تعال عاد للتقديم والمعروض

شمعدانات وشوكولا ومعجنات وصياني الحلى والحركتاتات

والعصيرات ( فريش ) بجميع الانواع

والـطقاقات والـ DJ وخذ يا ( مايطلبه المهسترون ) وهز يا وز

واللي ماترقص تتفرج...

( هذا اللي شايف نفسه... ماشي ولا هو معبرني )

( يالتاكسي... خذني لها يالتاكسي )

وحتى ( سليّم سليّم ويش اسوّي بمحبوبي ) ورى ورى على قلبي ولايووووقف

والمغاتير يدهرن تصوير

وبعد 12 تجي زفة العروس... وهذا لحاله عرض سينمائي

ثم تعال عاد للعشاء اللي يجيب العافيه

بوفيه فاخر يحتوي على ما عرفت وما لم تعرف

اكلات عالمية ولبنانية وشامية وشغل نظيف

وعلى طرف قسم خاص للاكلات الشعبية... مرقوق على قفر ومصابيب وجريش وهريس

اصلا الحريم يقومن وهن فادغات من الحلى والمعجنات ولا يذوقن العشاء

ثم يكملون السهرة على نغمات الطقاقة الـ VIB

وتروح تاخذهن الساعة 4 يطلعن للشارع وهن الى الحين ( خارج التغطية )

تركب الوحده منهن السيارة وكتوفها الى الحين ( يهزّن )

آآآبوووك يالوناسه

موب حنا اللهم ياكافي... تقول بـ عزاء

ليش دايم عزيمة العرس للرجال تجيب الكدر

تلقاهم متكومين في صالة طويلة عريضة

وكل اثنين زابنين جنب بعض

وانواع المساسر والضحكات الصفراء

هم وغم ونكد وجلسة تجيب التيفوئيد

وبزران ناسفين الشمغ ومدبسينها بدباسه علشان ماتخرب التشخيصة

وماتشوف الا طوفريات الشاهي ( اصفر واحمر ) رايحه جايّه

قسما بالله مانشوف شي غير الشاهي

واللي يصبون انواع النفسيات

يصب لك بياله حمراء... ثم صفراء.. ثم حمراء.. ثم يكبّه على ثوبك

والناس جايّة تقل مغصوبة او ( تأدية واجب )

واللي يصيد له واحد يطلبه فلوس من سنتين وتوّه يشوفه

واللي يبترم واذا شاف له اثنين يسولفون جلس بينهم وفهّر وجهه

اعوذ بالله من غضب الله... وجيه مكفهرّه وتقطع الامل بالحياة

واذا وصل ( الجنب ) وازعجوا ام امنا بالبواري

ونزل المعرس وصفّينا ذاك السرى تقل عند مقصف مدرسه

ثم ( اقلطوا الله يحييكم... يالله حيّهم على عشاهم )

رز ولحم... ورز ولحم... ورز ولحم... ورز ولحم... ورز ولحم

وصحون فاكهة كل صحن فيه برتقالتين وتفاحتين وموزتين

ثم تعشّوا وقوموا غسّلوا.. واقضبوا الباب الله لايهينكم

ويقعد الشباب اللي يبي يجيبون اهلهم يطقّونها ( اربعة بلوت ) الى الفجر

بذمتكم مهوب ظلم ؟؟

وين اعلان مشاعر الفرح ؟؟

وين فرقة السامري والدفوف والعرضة ؟؟

لا وخذ عاد اذا احد المجتهدين اخذ له مايك وقام يحدّث عن عذاب القبر

عذاب القبر وقت العرس