مسيار أولاين .. أول موقع عربي للمسيار - نادي الهلال السعودي - شبكة الزعيم

Canada's gallant · #1 22/03/2009, 10:05 PM

بسم الله الرحمن الرحيم

السلام عليكم و رحمة الله و بركاته

صباح الخير و الورد و الكادي
مساء الانوار و الازهار و البهجة

قبل اسبوع تقريبا بغيت ابحث عن رابط مباشر لفتح إذاعة القرآن الكريم من المملكة العربية السعودية .. بالأول لقيت رابط مباشر لإذاعة القرآن الكريم بس لدولة ثانية .. ما أدري من وين البث لان الإذاعة كلها قرآن و ما فيها بريكات و لا برامج و لا شيء .. حتى التلاوات متغيرة نوعا ما علي

خلال بحثي المتواصل لقيت موقع نسائي و مكتوب على صفحة البحث .. ( رابط لإذاعة القرآن الكريم من الرياض ) .. دخلت على الموقع و طبعا مكتوب على الرابط .. ( لا يمكنك عرض الرابط .. اضغط هنا للتسجيل

)

قلت في نفسي لا حول حتى و الدعوة فيها أجر تبوني اسجل

.. مو مشكلة نسجل .. قدنا سجلنا في مليون منتدى خربوطي و اخذنا حاجتنا و طلعنا

.. جيت ( مدرعم ) أبي أسجل و طبعا أول شيء للتسجيل في أي منتدى إنك تضغط صح على ( الموافقة على شروط المنتدى

)

جيت مقلع بأحط صح و حطيت موافق ... طلع لي ( عليك وضع صح في المربعين - أو شيء زي كذا ) انتبهت للمربع الثاني .. جيت أقراه و صار وجهي

مكتوب .. اقسم بالله إني بنت و الله على ما أقول شهيد و و و الخ الخ

جلست افكر شوي .. الدعوة فيها قسم .. لحظة نفكر ( تمهل يا ابني لا تجيب العيد

)

كنت جالس في مكتبة الجامعة و قلت بس بأروح أنادي وحدة تحط صح بدالي

رحت لعجوز تشتغل في المكتبة و قلت لها ممكن خدمة بسييييييييطة بس بتفك أزمة

سألتني و قلت لها بس حطي صح على هذا المربع

..حسيت نفسي موسوس و أنا أسوي الحركة

.. قالت لي sure .. من الحماس بغيت أقولها جزاك الله خير

حطت لي صح و بعدين قلت لها حطي ( موافق ) .. عاد يوم شفت انها فله و تضحك و مبسوطة .. قلت لها كمليها و اكتبي اليوزر نيم و الباسورد و حطي ايميلك بالمره

يوم خلصت سألتي .. ليش لازم أنا اللي أسوي كذا .. قلت لها و الله ودي اشرحلتس بس و الله ما فيني

<< ترجمته سعودية صميم

بعد كل هالزحمة .. دخلت على الرابط أشوف .. و طلع الرابط ما يشتغل

.. عاد .. قلت خلني اهجول في منتداهم أشوف

طبعا الشيء الوحيد اللي اقدر اسويه هو اني افتح روابط و بس ما اقدر اشارك و لا اضيف ردود الين ما يفعلون اليوزر و هذا الشيء المطلوب

اللي جذبني في المنتدى هو إن فيه إعلان فوق مكتوب فيه ( مسيار أولاين .. أول موقع مسيار عربي

) .. عاد من اللقافة قلت خلنا ندخل نهجول فيه هو الثاني

أول ما تدخل الموقع .. تجلس تدلع إلى الليل

.. جنسيتها و طولها و عمرها و وضعها الاجتماعي و كلشي

و نص البنات حاطين نبيه رجال غني .. نعنبو بليسكم همكم الفلوس و بس

.. و كلهم حاطين رجال حنون و طيب و قلبه صافي .. تحس بعضهم تقعدوا في الماضي

المهم هذا الموقع .. وداني لبحر ثاني و هو طريقة تزويج المسلمات المغتربات و اليتيمات هنا

أنا ساكن في مدينة تورنتو و اطبق في هاليفاكس .. فيه شيخ مسجد اسمه الشيخ احمد .. رجل باكستاني مره متدين في هاليفاكس .. عرض علي مره بنت سورية تؤبر ألبي

..

بنت عمرها 19 سنة و يتيمة و مهرها ما يتعدى الألفين ريال سعودي و ما تبي الا الستر .. راحت لمركز اسلامي و قالت لهم إنها ترغب بالزواج و بحثوا لها .. عرضوها علي ثم على رجل ثلاثيني و تزوجها .. طبعا يوم عرضها علي أخذت رأي الوالد و الوالدة و قالي الوالد هذي لا تتزوجها .. خلها تصبر لي اجيب اتزوجها

.. انتوا يا شباب اليوم ما منكم زواج

فيه شياب زاحفين واجد ..منهم مثلا شايب يصلي معنا في المسجد و يشوف باكستانيين و هنود و بنغالية و طبعا هذولي ما يتكلمون عربي هنا .. يجي هالشايب و يقوله .. كيف حالك صديق .. انتا في كلام عربي هههههههههههههههه .. على باله ان هذي لغتهم

مره سأل واحد قاله .. صديق انتا هندي .. رد عليه قاله لا بنقالي .. قاله الشايب امحححق

.. و البنقالي مهندس و رجال عاقل

نرجع لمحور حديثنا .. و نقول أشوف إن ما فيها شيء لو بحثت البنت عن الزواج سواء عن طريق مركز اسلامي أو عن طريق النت إن كان عندها ظروف خاصة

بس أنا أبي آرائكم في الأسئلة التالية

1/ ما رأيكم بمن تبحث عن الرجل المناسب بنفسها؟ سواء كانت في المملكة او خارجها ؟

2/ ما هو رأيكم بزواج المسيار إن نفذ بشروطه الكاملة الموافقة للدين ؟ ثم ما هو رأيكم بتلك المواقع التي تبحث جمع المتزوجين بالمسيار ؟

3/ أخيراً .. لو كنت شاب .. هل تفضل أن تقوم انت بانتقاء الفتاة ؟ و هل ترى انه من العيب ان تطلبك فتاة للزواج؟
و لو كنتي فتاةً .. هل تتمنين أن ينتقيك الشاب بنفسه .. ام ينتقيك أهله ؟ هل ترين أنه من الحرج انتقائك للشاب بنفسك؟

شكراً جزيلاً

برايفت

افااااا شلكني حسدنا انفسنا .. انتظر 30 ثانية قبل ارسالة المشاركة .. مناااك بس