هلا ومرحبتين بالغالي سور الصين ,,,,

إقتباس لا يالغالي ترا ماعندك سالفة الموضوع لم يوضع للتصويت ليكون مرجعا لمن يريد التأكد !!!!

اول شيء فيه خشه مثل ذي==> بعد الجمله اللي انت اقتبستها , فيه قبلها كم خشه يعني الخشش ذي يقولون ان لها تعبير معين ومفهوم , وبعدين اشوفك ( تتهكم ) والظاهر اني بشتكي لأبو بدر واقول له , ( اربه ينتصف لي ) , والجد عاد , ما ضنتي بنحتاج لتصويت نعرف عن طريقه ان ابومحمد يؤدي واجبه او لا , لأن الدعوى باينه وواضحه ( لــ اللي يبي يعرف )

إقتباس أصلا هو فيه أحد قال لهم تعالو علشان نعرف هم استجابو ام لا ؟؟؟؟ من جاء على غير دعوة جلس من دون فراش ؟؟

وليه هم مايجون للنادي ( اللي هم اعضاء شرفه ) إلا بدعوه رسميه , وبمرسول من الرئيس , هذا ناديهم ياغالي وهم اهل الدار , والفرش فرشهم يجلسون عليها ويرقدون لو ( بغو ) ,,,

إقتباس ههههههههههههههه أجل قالو ا الناس هذا هو الأميز !!! الله يقلع شيطانك يالعوام منهم الناس اللي قالوا ؟؟؟ المصاريا !!!! يعني يالعوام ماصدقتوا صحافتنا اللي نثق بهم ؟؟!! وتبوننا نصدق نصبة المصاريا !!!!! أو بس علشان المصيبيح !!! الجماعة يالعوام طاروا باللقب المهم وعطوك لقب رضاوه وبالمشاركة علشان تنبلع هالنصبة !!! وأنتم ماصدقتوا خبر فما يهمكم هو المصيبيح وليس الهلال !!!

ليه وش فيهم المصاريا ؟؟ ترى يسمونهم ( الفراعنه ) ويقولون انهم اللي بنو الاهرامات , ياعزيزي المصاريا على قولتك هم من يملك ان ( يقول ) خصوصا في ما يخص الدول العربيه فلهم باع طويل ولهم كلمة مسموعه , اخذهم لشيء وتركم الشيء الاخر لنا ليس محور النقاش , فالنقاش يدور عن (( المصيبيح )) الان ذِكري لتصنيفه كان لتأكيد ان اداؤه لواجبه اثمر عن ان يحصل على شيئا لم يحصل عليه الاخرين ,,,,

إقتباس ترى خويك يقول علي داوود سبق أن عمل مديرا للمنتخب السعودي الأول وأيام المرحوم فيصل بن فهد !!!

ياغالي مجرد اختيار فهد في هذا الوقت وبعد ان ( جارت عليه ) بعض الناس ( الله يجيرنا منهم وبعد ماحدث للمنتخب يؤكد انه يقوم بواجب كبير يراه الاغراب وتجاهله الاحباب , وبعدين وش سالفة خويي وخويك , ليه انت ما انت خويي ؟؟

إقتباس أقول ياحبيبي شف الأسماء اللي معه وأحلب تطوير

وانا وش علي من الاسماء اللي معه ؟؟ وبعدين هذا مجلس تطوير بأمر من سمو ولي العهد ماضنتي انهم بيختارون احد ماهو كفؤ , وإلا بتشكك فيهم مادام المصيبيح حديهم ,,,

تحياتي ,,,

أتمنى من الإخوة الذين ينتقدون فهد المصيبيح ان يذكروا لنا عيوبه بشكل واضح وصريح بعيداً عن المواضيع الإنشائية التي لا تحتوي على حقائق .

لأنني اعتقد ان العيب الوحيد لفهد المصيبيح هو عدم تفرغه للفريق الاول

هلا وغلا بجدار الطين اللي كلامه زين الزين

سبحااااااااااااااان الله , ما امداني ارسل ردي على السور وإلا انت راد لكن اليوم خميس وكلنا متفرغين ,,,,

إقتباس عساكم لقيتوا مذن جديد

الحمد لله والشكر البلد مليانه وهذا من فضل ربي علينا ,,,

إقتباس ياخي افهمها وننا نتعرف

ودك تتعرف بي ليه وش انا مسوي

إقتباس أحرجتني أنت .. أنا عقلي على قدي

وليه احرجك ؟؟ انت اللي كاتب الموضوع وانت اللي قلت الكلمه , وانت اللي مفروض تفسر معناها وتامرنا نفهما زي ماتبي طال عمرك

إقتباس قلتلك عقلي على قدي وما دريت إن اللي قدامي ( فطحل ) ====> مفرد فطاحلة .. يبي يروح يعد .. أقول صب قهوة

هالحين جاء صب القهوه , يقولون الكبار ( وانشد ابوبدر ) لاتصب القهوه إلا بعد ما تقول اللي عندك وتاخذ حقك , وبعد ما تاخذ حقك ( صب قهوه لنفسك وتقهو ) وخل اللي يبي قهوه ( يصب لنفسه )

إقتباس أقول العلم اللي يجمد على الشارب .. العبرة بالكيف وليست بالكم .. ولا فيه داعي أكرر كلامي .

هههههههههههههههههههههههههههههه انا اللي بضحك هالحين , منول نقول لكم العبره في الانجاز <== تراه الكيف , وكنتم تعارضون , وهالحين يوم ( ماصملت ) بكلامك جايني تقول كيف وكم

إقتباس أقسم بالله ما أدري وش سنعها هالجملة .. وش تبي ؟؟ أقول هذا اللي يقتبس( كل الموضوع) ولازم يرد عليه يضيع شوي

ياحبي لك وانت مضيع صحيح,, لا والله ياغالي هذا عيب اللي ما يدري وش قال

إقتباس والله إن الشق أكبر من الرقعة .. ما قلت لك عطني جوالك .. والا تدري إنزل شوي بمستوى فكرك علشاني .. علشان أقدر أفهمك

اي شق واي رقعه ؟؟ وجوالي مانيب معطيكياه الين تعلمني وش انا مسوي , ومسألة انزل بمستوى تفكيري تراها صعبه لأني اخاف اتعود على كذا

إقتباس ليس من الضروري إن اللي قدامك كل كلامه خطأ .. علشان تقتبس كل شي وترد عليه ====> فعلا ( إذا وصيت وص واحد .. وقله لا تخلي شي )

هالفقره كانت ردك على كلامي هذا : (( هيه انت يالاخو , الموسم الماضي كان الرئيس هو الوحيد الموجود واللي (( يدفععععع)) وكان قايم بكل المصاريف الماديه من عقود ورواتب وغيره وهذا كلام صحيح , فلا تلخبط الامور الله يحييك ويطول لنا عمرك , والوقت اللي حنا فيه الان الرئيس ما نشوفه لا يدفع ولا يجي وهنا يكمن الفرق وعليك التمييز بين الموسم الماضي وهالحين وبالتأكيد بتشوف فوارق كثيره ( إن كنت تبي تشوف ) وبعد ما تقراه وتقرأ ردك شف وين الشق ودور له رقعه

إقتباس لا لا لا يا شيخ .. معقول !!!! ما جاء علشان كلامنا .. زعل علينا الرجال يا شيخ !!! أشوى اللي فتحت عيوننا .. أقول .. طالما إنه يتأثر بكلامنا ليش ما رجع علشان كلامنا ؟؟؟======> هذي مشكلة اللي يقول ( برمضان ) وينسى ( بربيع ثاني ) يا عوام

الله يرجك ياشيخ , وانتم تبونه يصير مسباح بيديك ؟؟ تنتقدونه وتسبونه وتبونه يسمع منكم بعد افااااااا , لو انكم مقدرينه ومثمنين انجازاته اللي ساهم فيها ودفعه للملايين كان يمممممكن يسمع كلامكم , وبعدين رمضان ما يجي لا قبل ولا بعد ربيع الاول , وعلى فكره تراي بالشهور العربيه ( مدفلجججج ما اعرف لهن ابد وكلها من ارامكو

إقتباس ههههههههههه تراي انتبهت لهالنكتة .. بس طلبتك ثاني مرة حطها بلون ثاني علشان تصير أوضح للقارىء العادي .. خبرك الناس ما هي واحد

اجل فهمتها ؟؟ زيييييييييييييييين اجل ليش تقول تفكيرك فيه شيء , هذا حنا طلعنا زي بعض وتفكيرنا واحد ,,,

إقتباس ههههههههههه أنا من الناس اللي ما يرد على كل الموضوع .. طيب ياأخي مقتنع فيهن .. تطلبني شي ؟؟؟؟ نعم مقتنع خصوصا وإن القرارات الرياضية عندنا سليمة ووفق خطط مدروسة .. فأكيد اختيار أبو محمد مدروس .. علشان كذا ما رديت

ههههههه لا ابد ,الكبار يقولون ( وانشد ابوبدر اذا تبي ) ان اللي يذكر الشين لازم يذكر الزين علشان يكون عادل ومنصف <== مالها علاقه بالاسامي لا تلخبط

إقتباس هذي قالوها جماعة مدافعون بلا حدود أولا .. علمن أكيد

افاااا شكلك ما انت متابع ابد !!!!!!!!!!!!! وين راح ابو2 ,,,

تحياتي ياجدارنا ,,,

الأخ جدار الطين...

أولاً إسمح لي أن أبدي إعجابي بإسمك الكلاسيكي الجميل...



بغض النظر عن المصيبيح... جملة شدتني ودب الرعب في صدري بعد قرائتها...

إقتباس يقول لن يكون هناك ( كبش فداء ) ....... وباطنه يقول ( إن كبش الفداء هو الهلال هذا الموسم ) أجهزوا عليه في ظل غياب كبيره واختلاف جمهوره , حتى نرضي الآخرين !!!!

الله يستر....!!!



وإن شاء الله يكون المجد لجمهور الهلال في لقاء الإياب...



تحياتي،،،،


أخوكم،

أبوسعد

هلا بعوامنا الغالي
الله يستر من الجدار لا يشوف شغلنا
طولناه بموضوعه !!

إقتباس يعني الخشش ذي يقولون ان لها تعبير معين ومفهوم ,

والله تبي الصراحة أنا ماعرف للخشاش بالمرة ولا أدري وش معانيها إلا هاللي هاج كشرته هذا فهو واضح إنه يضحك وإلا الباقي ياليت تعطينا دروس خصوصية لو عن طريق الرسايل الخاصة علشان نعرف معاني الجمل اللي يكون فيها خشش

إقتباس وبعدين اشوفك ( تتهكم ) والظاهر اني بشتكي لأبو بدر واقول له ,

صراحة أنا ما أدري وش قصك مع أب بدر ماطق عود عود قلت أبو بدر لكن صحيح كل سر جاوز العشرين شاع;)

إقتباس والجد عاد , ما ضنتي بنحتاج لتصويت نعرف عن طريقه ان ابومحمد يؤدي واجبه او لا , لأن الدعوى باينه وواضحه ( لــ اللي يبي يعرف )

بهذي معك ميه بالميه, لكن المشكلة بهاللي مهوب مقتنعين وراكبين روسهم وأظنك تعرفهم زين ;)

إقتباس وليه هم مايجون للنادي ( اللي هم اعضاء شرفه ) إلا بدعوه رسميه , وبمرسول من الرئيس , هذا ناديهم ياغالي وهم اهل الدار , والفرش فرشهم يجلسون عليها ويرقدون لو ( بغو ) ,,,

ياحبك للعناد اللي على غير سنع
أقول لك الرئيس مهوب موجودبالاضافة إلى أنه مستغني ولا يبيهم يجون يعني روحتهم للنادي مافيها فايدة !!
المقصود يالغالي نريد اجتماع موسع ومنظم داخل النادي يتم فيه دعوة جميع أعضاء الشرف ( على طريقة شركة أرامكو ) وإذا تم الترتيب لهذا الاجتماع وتأخر أعضاء الشرف عن الحضور ساعتها سنعذر الرئيس , أما أن كل عضو شرف يلقط شماغه ويروح للنادي دون تنسيق فهذي ماله فايدة !!
فهمت وش المقصود وإلا تبي تعاند بعد ؟؟

إقتباس ليه وش فيهم المصاريا ؟؟ ترى يسمونهم ( الفراعنه ) ويقولون انهم اللي بنو الاهرامات

أقول وش جاب بسم الله لعشانا
أجل ترى يقال عنهم أنهم مع من غلب !!!!
يعني ماهنا تكانة !!!

إقتباس فالنقاش يدور عن (( المصيبيح )) الان ذِكري لتصنيفه كان لتأكيد ان اداؤه لواجبه اثمر عن ان يحصل على شيئا لم يحصل عليه الاخرين ,,,,

ياخوي تراي عارف إن النقاش يدور عن المصيبيح !!
والله أنك بلشه يعني تبي تقنعن إن المصاريا يعرفون شغل المصيبيح أزين من جماعتنا !!!

إقتباس ياغالي مجرد اختيار فهد في هذا الوقت وبعد ان ( جارت عليه ) بعض الناس ( الله يجيرنا منهم وبعد ماحدث للمنتخب يؤكد انه يقوم بواجب كبير يراه الاغراب وتجاهله الاحباب

هذا الوقت وذاك الوقت مارايح يصير شيء جديد !!!
المشرف العام على المنتخب هو هو ماتغير والضحية الصغار وترى العملية نسبة وتناسب !!!!
يعني هذا من ذولا وهذا من ذولاك علشان كل يرضا !!!

إقتباس وبعدين وش سالفة خويي وخويك , ليه انت ما انت خويي ؟؟

إلا خويك
بس خوي عن خوي يفرق
قصدي خويك الشري

إقتباس وانا وش علي من الاسماء اللي معه ؟؟ وبعدين هذا مجلس تطوير بأمر من سمو ولي العهد ماضنتي انهم بيختارون احد ماهو كفؤ , وإلا بتشكك فيهم مادام المصيبيح حديهم ,,,

أفا أنا قلت شيء ؟؟
أكيد إني غلطان ؟؟
مادام الدعوى فيها سياسة فكنا

تحياتي

هلا والله بسورنا ,,,

إقتباس الله يستر من الجدار لا يشوف شغلنا طولناه بموضوعه !!

ههههههه انا ماعلي منكم , انتم تسألون وانا ارد , يعني ما اقدر اشوفكم كاتبين شيء واتجاهله وهذا من غلاكم

إقتباس والله تبي الصراحة أنا ماعرف للخشاش بالمرة ولا أدري وش معانيها إلا هاللي هاج كشرته هذا فهو واضح إنه يضحك وإلا الباقي ياليت تعطينا دروس خصوصية لو عن طريق الرسايل الخاصة علشان نعرف معاني الجمل اللي يكون فيها خشش

شف انا بشرح لك بعضهن , الاول اللي مبيسمه مرتفع فوق تقل ( محماس قهوه ) هذا معنا انه يضحك ومثل ابو كشره اللي انت جايبه , والثاني اللي مبيسمه نازل تحت تقل صاج القرصان هذا معناه انه خجلان , والثالث اللي معقدن حواجبه كنه رفيقن لي ماهوب عندي هالحين هذا يعني انه مولِّع يعني لا تقرب منه ولا تحارشه والباقي خل الجدار يعلمك ,,,

إقتباس صراحة أنا ما أدري وش قصك مع أب بدر ماطق عود عود قلت أبو بدر

ياخي هالرجال ( متمثني بالعمر ) وبصراحه له قدر ومقام , وانا شخصيا اعتبره مرجع لنا يعني لا صار ماصار مالنا إلا ابو بدر ( الله لا يخلينا منه ) قل امين , وبعدين اثرك رايح في عينها ;) ;) ,,,

إقتباس بهذي معك ميه بالميه, لكن المشكلة بهاللي مهوب مقتنعين وراكبين روسهم وأظنك تعرفهم زين

زيييييين ها يالله علِّم رفيقك وقل بلا تصحيح وتمحيص خلو المصباح يشتغل وينور لنا دربنا وادعموه وساندوه ,,,

إقتباس أقول لك الرئيس مهوب موجودبالاضافة إلى أنه مستغني ولا يبيهم يجون يعني روحتهم للنادي مافيها فايدة !!

ياخوي هم ماجو والرئيس موجود ,مسألة انه يقدم لهم دعوه فالرئيس اعلن كم مره عن هالامر لكن ردود افعال بعض الاعضاء ماكانت على ما نتمنى , يعني ماضنتي ان المطلوب من الرئيس ( يركب موتره ويمر عليهم واحد واحد ويقول لهم تمو على الاجتماع ) اعضاء الشرف ملاّك للنادي من حقهم ابداء الرأي ومن واجبهم الحظور والدعم ,,,,

إقتباس أقول وش جاب بسم الله لعشانا أجل ترى يقال عنهم أنهم مع من غلب !!!! يعني ماهنا تكانة !!!

هههههههههه ياخوي بسم الله نبدا بها عشانا وغدانا وش فيك انت ؟؟ وبعدين المصاريا لهم كلمه بهالامور , وبعدين اذا ذاكرتك زينه , تدري وين تم تنصيب رئيس الاتحاد العربي ؟؟ إلا هنا تكانه وناس لها كلمه وقاله ,,,

إقتباس ياخوي تراي عارف إن النقاش يدور عن المصيبيح !! والله أنك بلشه يعني تبي تقنعن إن المصاريا يعرفون شغل المصيبيح أزين من جماعتنا !!!

بالله اجل تدري ان المصيبيح هو محور النقاش , وبعدين المصاريا كان عندهم كم اسم ومن بين هالاسماء ابومحمد وكان لازم يختارون واحد واختاروه , في رأيك وش سبب اختيارهم ؟؟ هل هو عناد فيكم انتم او انهم شافو وسمعو عن الاشادات اللي يحصل عليها مضافا لها الانجازات اللي تحققت تحت اشرافه على الفريق , وجماعتنا منهم !!!!!!!!! ( الله يرحم الحال ) ,,,

إقتباس هذا الوقت وذاك الوقت مارايح يصير شيء جديد !!! المشرف العام على المنتخب هو هو ماتغير والضحية الصغار وترى العملية نسبة وتناسب !!!! يعني هذا من ذولا وهذا من ذولاك علشان كل يرضا !!!

ليه مايصير شيء , إلا نتوقع انضباط غير عادي في لاعبي المنتخب , ونتوقع ان مدير المنتخب راح يكون صاحب شخصيه قويه بيحترمها اللاعبين ونتوقع يتغير امور كثيره واقل شيء فيها اصابع لاعبينا ماراح يجي فيها شيء , وبعدين وش معنى المصيبيح هو اللي صار من ذولا ليه ماهو واحد ثاني ؟؟

إقتباس إلا خويك بس خوي عن خوي يفرق قصدي خويك الشري

الله يديم الخوّه , وعلى كذا اجل انت خويي الطيب

إقتباس أفا أنا قلت شيء ؟؟ أكيد إني غلطان ؟؟ مادام الدعوى فيها سياسة فكنا

:sad: <=== خق سور الصين وتراي عقب كلامك ماني بعيد عنك

إقتباس تحياتي

وانا بعد

هلا بالغالي جدار الطين (( جدار الذهب))

صراحة انا من اشد المعجين في كتاباتك ولا يفوتني شي منها

يمكن تذكر بعض المواضيع التي قمت انا في كتابتها او التعليق عليها

والتي كانت تتحدث عن الامير الانيق وموزع الحليب.. لكن

الان أقول وبكل صراحة ان فهد المصيبيح لا يلام ابدا على ما يحدث

للهلال بل انه يشكر على ما يقوم بة من اعمال (( صراحة لولا الله

ثم ابو محمد كان راح الهلال في خريطها )) مثل مايقولون. تقول ليش

واقول لك ان الهلال يوجد فيه فراغ إداري لا يوجد في اي نادي بالعالم

مع ذلك ابو محمد ظابط الامور .. ولا لو الامور وعلومها عند الأمير

الانيق والشاب الوسيم (( سعود)) كان الهلال الله يخلف على هلالنا

ولك وللجميع تحياتي (((((( السمح )))))))))))))))))))

الفيصل الهلالي ..
مساك الله بالخير ..
هناك عيوب أكيد أنها وردت تباعا في موضوعات سابقة .. لذلك أعذرني الآن وثق تماما انني احترم وجهة نظرك ..
==========
هلا والله بابو العواميم ..

إقتباس وتامرنا نفهما زي ماتبي طال عمرك

مايامر عليك عدو;)

إقتباس يقولون الكبار ( وانشد ابوبدر )

إقتباس الكبار يقولون ( وانشد ابوبدر اذا تبي

فعلا أبو بدر ( كبير ) لكن أفهم من كلامك إنك ( صغيّر ) .. عيّر بماهو عار ;)

إقتباس لاتصب القهوه إلا بعد ما تقول اللي عندك وتاخذ حقك , وبعد ما تاخذ حقك ( صب قهوه لنفسك وتقهو ) وخل اللي يبي قهوه ( يصب لنفسه )

هذا عند قبائل الهوتو والا التوتسي ؟؟؟؟ علمن أول مرة نسمعه .. تسولف وتضارب وبعدين تخلي الضيوف يصبون قهوة لانفسهم ؟؟؟ وش يقرب لك حاتم ؟؟

إقتباس منول نقول لكم العبره في الانجاز

أنت تتكلم جاد ؟؟؟ يعني المصيبيح هو سبب ما تحقق للهلال من إنجازات ؟؟ أشوف الجمعان بإيران رفض الخروج وخربت وزنية ( الانضباط ) وضاعت البطولة .. ياأخي لم نقل أن المصيبيح ليس له دور .. ولكنك تغالي .. اللا عبون لهم نصيب الأسد من الإنجاز .. ولك في نهائي آسيا وما فعله نواف مثال ..

إقتباس ياحبي لك وانت مضيع صحيح

ذكرتني بأيام ( فك وافك ) قلت لك مضيع رجعت تقولي مضيع ..أقول صب قهوة لنفسك

إقتباس ومسألة انزل بمستوى تفكيري تراها صعبه لأني اخاف اتعود على كذا

ولو مغرور وشايف نفسه !! أين أنت من ( خاطبوا الناس على قدر عقولهم )

إقتباس تنتقدونه وتسبونه

وحدة زينة وحدة لك عليها .. أجل اليمنى للنقد واليسرى للسب ؟؟؟

إقتباس مدفلجججج ما اعرف لهن ابد وكلها من ارامكو

أحــــــــلى يشتغل بأرامكو .. من قدك يا عم ؟؟؟
بالرد الجاي علمنا كم الراتب ههههههههههه

إقتباس اجل فهمتها ؟؟ زيييييييييييييييين اجل ليش تقول تفكيرك فيه شيء , هذا حنا طلعنا زي بعض وتفكيرنا واحد ,,,

ساعة حتى فهمتها والحقيقة إني اتصلت بصديق وشرحها ب 30 دقيقة بس

إقتباس افاااا شكلك ما انت متابع ابد !!!!!!!!!!!!! وين راح ابو2

أجل ما قلتوا أبو اثنين ما يعتد برأيه ولايؤخذ أبدا .. علشان كذا نطيته وجيت لكلام الفطاحلة ..

عموما ياغالي .. كل التحية لك .. بس ودي أسألك سؤال المليون :


من القائل :

( أنا أرد إذا أنا موجود ) ؟؟؟؟؟؟؟



حتى لو حذفت الاجابات الأربع واستعنت بالجمهور ما فيه فايدة مالك إلا تتصل ( بخــــوي )

&& ملاحظة ياالعوام &&
أشعر أن موضوعنا حاد عن الطريق وخرج عن المسار كثيرا .. لذا أنا سأتوقف إلى هذا الحد .. وسمها ما شئت

==========
أبو سعد ..
بالفعل الكلمة للجمهور وبحول الله البطولة هلالية ..
تحياتي ..

=========
السمــــح ..

إقتباس الان أقول وبكل صراحة ان فهد المصيبيح لا يلام ابدا على ما يحدث للهلال بل انه يشكر على ما يقوم بة من اعمال (( صراحة لولا الله ثم ابو محمد كان راح الهلال في خريطها )) مثل مايقولون. تقول ليش واقول لك ان الهلال يوجد فيه فراغ إداري لا يوجد في اي نادي بالعالم مع ذلك ابو محمد ظابط الامور

وجهة نظر احترمها وعلى عيني وراسي هذا رأيك ..
تحياتي ..

هلا بجدارنا يالله انك تحييه ,,,

إقتباس فعلا أبو بدر ( كبير ) لكن أفهم من كلامك إنك ( صغيّر ) .. عيّر بماهو عار

انا ياغالي ( يافع ) ,,,,

إقتباس هذا عند قبائل الهوتو والا التوتسي ؟؟؟؟ علمن أول مرة نسمعه .. تسولف وتضارب وبعدين تخلي الضيوف يصبون قهوة لانفسهم ؟؟؟ وش يقرب لك حاتم ؟؟

لا ياافندم هذي من خصال قبائل ( الهونولولو ) وهي لها جذور في شمال المنطقه الوسطى للملكه وتشتهر بتصدير الحنيني والخس , وبعدين من يقول اني اتضارب واتلافخ مع احد واخرتها اقوم اصب له قهوه ( امحق طبع ) ,,,

إقتباس أنت تتكلم جاد ؟؟؟ يعني المصيبيح هو سبب ما تحقق للهلال من إنجازات ؟؟ أشوف الجمعان بإيران رفض الخروج وخربت وزنية ( الانضباط ) وضاعت البطولة .. ياأخي لم نقل أن المصيبيح ليس له دور .. ولكنك تغالي .. اللا عبون لهم نصيب الأسد من الإنجاز .. ولك في نهائي آسيا وما فعله نواف مثال ..

وانت تتكلم من جدك ؟؟؟؟؟ يعني المصيبيح ماله منكم إلا الشين وإلا الزين ماهو حوله , يعني تبي تقول ان ماله في الانجاز شيء ابد , وكل اللي له هو الامر الشين وبعدين دوره كبير جدا مثله مثل اللاعبين والمدرب وانتم ماشاء الله في الشينه المصيبيح السبب وفي الزينه ماله شين ابد ( اقول قم يالله صب قهوه بس ) ,,,

إقتباس ذكرتني بأيام ( فك وافك ) قلت لك مضيع رجعت تقولي مضيع ..أقول صب قهوة لنفسك

بصراحه انا كنت ابي اقول لك ( انك داج ولا عندك سالفه ) لكن قلت الطفها شوي بس

إقتباس ولو مغرور وشايف نفسه !! أين أنت من ( خاطبوا الناس على قدر عقولهم )

مغرور لا , لكن وش هالمنطق يعني تبيني اذا تكلمت مع ( خبل ) اصير خبلن مثله !!!!

إقتباس وحدة زينة وحدة لك عليها .. أجل اليمنى للنقد واليسرى للسب ؟؟؟

ايه اذا قلت لواحد انك متشدد في عملك فهنا انت تنتقده , لكن اذا قلت له انت ( مدمر ودكتاتوري ومتسلط ) فأنت هنا قلبت لليسرى

إقتباس أحــــــــلى يشتغل بأرامكو .. من قدك يا عم ؟؟؟ بالرد الجاي علمنا كم الراتب ههههههههههه

إلا ممكن سؤال , انت امس سألتني كم جوالي واليوم ودك تعرف الراتب , ممكن تعلمني وش تبي ؟؟ وممكن تصارحني وش انا مسوي

إقتباس ساعة حتى فهمتها والحقيقة إني اتصلت بصديق وشرحها ب 30 دقيقة بس

إن ما نفعك الصديق واعانك لا خير فيه , والاهم انك اخيرا فهمت ..

إقتباس أجل ما قلتوا أبو اثنين ما يعتد برأيه ولايؤخذ أبدا .. علشان كذا نطيته وجيت لكلام الفطاحلة ..

ههههههههههه هذا ماله علاقه برأي ابو2 , هذا كلامه بس ,وهو توضيح لكلامك عن من قال حليب ,,

إقتباس ( أنا أرد إذا أنا موجود ) ؟؟؟؟؟؟؟

اللي قال هالكلام واحد لكن تراه قاله في ( قلطه ) وكانت هالجمله طرف في بيت شعري مكسور ومعووج ,,

إقتباس أشعر أن موضوعنا حاد عن الطريق وخرج عن المسار كثيرا .. لذا أنا سأتوقف إلى هذا الحد .. وسمها ما شئت

ههههههه الموضوع من ساسه ماله وجهه , لكن ماعليه ياغالي توقف متى واين شئت .

تحياتي ,,,,