طيب ماقلنا شي

لكن في مقوله غربيه تقول (( Ladies First))

أمـــامك ]مطب[

في مجتمعنــا الشرقي وبالأخص في (الرجل الشرقي ) صار الكثير من الرجال يعلقون أخطائهم بعلاقة يسمونها (الرجال شايل عيبه) كـلما أخطئ بشي يقول أنا رجال مايعيبني شي أغلب الرجال يسوي ويفعل وبالأخير يروح يتزوج ولا همه ..وينسون ان هالشخص كان بالماضي ...

لكن المره ياقلبي عليها من أقل شيء حتى لو كـانت ضحيه مايرحمها المجتمع .. بسبب أنها [مرأهـ] و[ضعيفه] بنظرهم
ودايمــاً الأخطاء تعلق عليها ولو تمر عشر وعشرين سنه ماتنسى فعلتها ليش؟؟! علشانها أخطأت بالماضي وبتبقى شايله هالخطأ على مر السنين ..ويمكن لحد ماتموت وهالناس مايذكرونها الا بالشين ..
طيب كلنا نخطـئ .. ومافي إنسان معصوم من الخطأ .. لكن العيب مو من مجتمعنا العيب فينا [إذا تعدلت أطباع اللي يعيشون حوالينا] ..

الرجـال (يكتشفون) أهله أنه يكلم بنت ماينقال له شيئ الا نادر..
ولو العكس (اكتشفوا) أن البنت تكلم واحد طبعا مايختلف اثنين أن هالشيء خاطئ .. لكن عندهم هالخطأ فيه قص[رقاااااب]
..وحرمان من كل شي ..هذا غير التعذيب النفسي..اللي بتلقاهـ منهم

مو كل مره يكون الضرب الحل الأمثل .. والضرب يرجع بشي سلبي على البنت تصير نتيجة (عكسيه) يمكن تعاند وتعاند ..
وهنا ماراح يستفيدون شي !!

بالعكس المفروض يجي الأخ لأخته أو الوالد لبنته ويسألها عن السبب اللي خلاها تسوي هالشي ويكون الحل
(بالتفاهم) مو بالضرب علشان ماتتعقد المواضيع [أكثر] و[أكثر] ..

مجتمعنا الخليجي عامه و [السعودي] خاصه فيه كثير من التصرفات المغلوطه .. اللي بنظر المجتمع أنها صحيحه أو لكثرتها صارت شي عادي..ماصرنا نعطيها إهتمامها نتأثر شوي منها ثم (ننساها) !

** تعرفين فلانه يقولون طلقها زوجها لأنها طويلة لسان ..
الثانيه:والله رجلها يقولوون انه ((رجال كفوو)) بس هي اللي رفست النعمه **

قسم بالله يقهروني اللي كذا ..
طيب انتوا ]شدراكم[ ؟؟!

تلاقونهااا ذاقت من الرجال الشيئ المر .. يمكن كان يعذبها .. صبرت صبرت وبالأخير
مالقت الا الطلاق الحل الأمثل لها ..
بعض الرجال يعند بسبب أن العصمة بيده .. يقول لا (بعلقكـ) وماراح أطلقكـ
ويجيب لها حرمة ثــانيه يحرق قلبها فيها يدلعها قدامها .. يجيب لها اللي ماقد جابه لحرمتة الأولى .. تدرون أن بعضهم يخلي [الأولى خدامه للثانيه]..؟؟؟؟

ياخي : الدنيااا ماتسوى

الله يهديهم ياخذون الشيء اللي شرعه الله لهم ويستخدمونه الإستخدام الخاطئ..حتى يمكن يبتدعون أشياء جديده ويحللونها على كيفهم.. ويحرمون الأشياء اللي مايبونها على كيفهم

..ويمكن يكون في قلبه رحـمة عليها ويطلقها او بالأصح (يعتقها) من عذابه ..لأن العيشه مع هـ الرجال "نـار" و"عذاب"

ما تقدر أي مرهـ تتحمله .. حتى لو تحملته الى متى راح تتحمل! .. (لكل شيئ طاقته) .. واذا صبرت أكثر من طاقتها
وش بتكون نهايتها ؟ .. غير (مستشفيات الأمراض النفسيه) .. والله بيرميها بدون إحساس ويبدلها مره ومرتين وعشر ولاهو مفتكر ..

" قسم بالله مايسوى علي أدخل مستشفى الأمراض النفسيه علشان رجال تجرد من صفات الرجوله "

وتوصل للمحاكم وقضيايا وعفسه وعاد محاكمنا مايطولون أبد بالقضايا ..يطلعون روح هالمسكينه لما يطلع قرارهم ..وبالنهايه تلاقونها هي (الخسرانه) ...

.. بالدين أن الولد اذا كان بلغ سن الرشد (يخيرونه).. والبنت عند أبوها طيب وش ذنب هالأطفال يعيشون بعيد عن امهم .. وتحت رحمة " زوجة أب" يمكن ترحم ويمكن تزيد الهم [هم] .. يعني مو كفاية أنهم بعيدين عن أمهم اللي شافوهـا وهي تتعذب وشافوا أبوهم كيف يساوم أمهم عليهم !
يعني كفايه النفسيه كيف بتكون أكيد دمار وتجي قدامهم زوجة ابوهم اللي بتكون مسؤوله قدام (ربها) يوم القيامه عن كل فعل فعلته لهـ الأطفال بدوون رحمه ..
شفتوا كيف [[المرأهـ مظلومه]] ..؟!

هذي قصة لجارتنا وهي حرمة مو كبيره ولا صغيره اممم يعني هي بـ[العقد الرابع] من عمرهـا بحسب اعتقادي..كان لها الدور الأول بالبيت والدور الثاني فيه شقتين شقه لـ ولدهـا المتزوج .. والشقه الثانيه مأجرها زوجها على ناس.. كانت حياتها مع زوجها عذاب .. وزياده على هالعذاب كان (بخييييل) يعني بالموت يطلع مصروف لـ عياله اللي يدرسون بالمدارس .. يعني ( زيادهـ على شينهـ قوة عينهـ ) والحرمة تدري أن زوجها عنده و"مقتدر ماليا" ..هي عارفه أن عنده رصيد فيه مبلغ وقدرهـ ....
سافرت الحرمة مع عيالها لمنطقتهم .. ويوم رجعت من السفر تتفاجئ أن أغراضهم وملابسهم وعفشهم مرمي بـ حوش البيت وحظرت "السي السيد" جايب حرمة ثانيه ومسكنها في بيتها .. و(ياليـــت على كذا وبس) .. والله تحلف المره أن كان ببيتها فيه غرف مو مؤثثه والمجلس كان فاضي من أي شي ..
راح وجاب اثــاث جديد لزوجتة الجديده وكان شرط زوجته الجديده أنه "يطلق الألى" وماتعيش معاهم بالبيت ..وطلقها!
وبالموت تنازل عن الشرقه اللي مأجرهــا لهم ولا بعد "ياخذ عليهم ايجار كل شهر "
" شر البليه مايضحكـ " وحتى عندهم بنت فيها إعاقه والملكـ مو مقصر يعطي لذوي الإحتياجات الخاصه مبلغ كل شهر ..
وهالمبلغ يروح بيجيبه! .. ولا يعطيهم منه ولا هلله ..
والبنت الصغيره تروح تطلب من ابوها فلوس ويرفض يعطيها .. وزوجت أبوها تسوي من وراهــا حركة زي كنها تقهرها أن ماعطاها فلوس ..[قمة القهر]

ليش ماتكون هناكـ عقوبات رادعه للرجال بهذي الحاله ؟؟؟!
حتى الرجال [المزواج] .. لو كــانت فيه عقوبات رادعه له كان ماتزوج وطلق .. وتزوج وطلق .. وبعضهم يجيبون عيال
ويهملونهم ..حتى بعضهم مايعرف عياله اذا كبروو وينسى هذا من اي (زواج جابه) !..

الحرمة هي اللي دايم تضحي وتعطي وتوفي (ومحد ينكر أن الحرمة أوفى من الرجال ) وليش هي اللي تصبر وهي اللي تتعذب .. ومتى مامل منها بدلها بحجة أن الرجال محلل له يتزوج حتى اربع حريم .. طيب مو شرط من شروط هالزواجه [العدل] ؟ !

وإذا صـار شي للولد أو البنت مثلا أكتشفو أن الولد ..(يدخن) .. يرمي كل شي على [زوجته] .. انتي ماشفتيهم وانتي ماراقبتيهم وانتي وانتي ..
طيب هي شدراها عن ولدها برى البيت .. الولد مو مثل البنت قدام عين أمها على طول .. الولد يطلع مع ربعه يعني أمه ماتكون مراقبه له على طول ..والرجال "لاهي بحياته" وبالأخير يرمي كل شي على راس زوجته ونسى أن الحياه الزوجيه مبنيه على (التعاون بين الحرمه والرجل) ..

قبل حول الشهر توفت من جماعتنا من بعيد شوي حرمة كبيره كانت تعاني من "سرطـان بالبطن" الله يبعدنا ويبعدكم عن هالامراض .. .. المهم أن زوجها من كثر مايحبها.. كـان يشكي من نفس الألم اللي فيها والمرض مو فيه لكن يشوفها تتألم ونفس التعب اللي (يجيها يجيه) .. والرجال شايب .. قدر الله وتوفت العجوز من قوة صدمته بوفاة زوجته وحبيبته دخل الرجال بالعناية المركزه بعد خمسة أيــام من وفاتها .. توفى هو .. و[لحق زوجته] ..

قلت لأمي معقوله فيه رجال بهالوقت يحب زوجته كل هالحب ؟!
قالت هذا حب رجال اول مافي الحين هالنوعيه من الرجال ..
قلت في قلبي ( الله يرزقنااا )

أغلب الرجال الحين يتزوج علشان (يكمل نصف دينه)..و(يشبع عاطفته)..وانه (يدور على الاستقرار فقط) .. يمكن يقول لها كلمات غزليه هذا ان كان رومنسي
ويبين لها أنه يحبها .. لكن لو جينا "للوفـاء" مانلقى الا القليل ..
لو أكتشف أن زوجته ماتجيب عيال راح وتزوج عليها ..
لو لاسمح الله طاحت زوجته وانشلت او تعبت وامرضت راح ودور غيرهــا من غير "مراعاة للشعور" ..

سَعِيدَهْـ بِـ مُصَافَحَتِكُمْ...:
رَعْـبُوبَه..