كنت جالسا في مقاعد الانتظار في مستشفى دلّة

( المقاعد المقابلة لـ د. كيف بجانب الصراف الآلي )

وكنت سابحا في فضاء امهات الافكار التي تبحث عن ابنائها

وفجأة وبدون سابق انذار

تفاجأت بتلك الحسناء الجفول البتول التي تسلب المخيخ من قاع المخ وتزهق العقول

وإذا بها ( تنصاني ) بكل ما آتاها الله من حس ( إجرامي ) لطيف

وتقف امامي وهي ممسكة ببطاقة الصراف الآلي قائلة :

لو سمحت.. ممكن تساعدني ؟؟

انا :

ابشري تامرين امر... بس وش بغيتي ؟؟

هي :

ابيك تسحب لي فلوس... لأني ما اعرف اسحب من المكينة !!!

انا :

ماتعرفين تسحبين ؟؟!! طيب ابشري... عطيني البطاقة..

وبنظرة خاطفة الى البطاقة قرأت اسم صاحبها واذا به رجل !!!

قلت في نفسي ( يمكن ابوها او اخوها... او زوجها المريض يكون عطاها وقال روحي اسحبي وهذا اقرب الاحتمالات)

وحتى لا يأخذ الشك وظن السوء مأخذه مني سألتها بعد ان أملت علي الرقم السري :

كم تبين اسحب لك ؟؟

فأجابت :

300 ريال

فقمت بالعملية.. واعطيتها المبلغ.. ولكن الايصال لم يخرج رغم انني طلبت الايصال

قالت لي :

وين الايصال ؟؟

قلت :

والله يا اختي طلبت ايصال.. لكن المكينة ماعطتني.. يمكن البكرة مخلصة

قالت :

وشلون الحين طيب ؟؟ لازم ايصال.. ما اقدر اروح بدون ايصال

قلت لها :

عادي اختي.. اذا طلعتي وقفي عند أي مكينة بالشارع واطلبي كشف آخر خمس عمليات

قالت :

الحين انا ما اعرف اسحب.. تبيني اطلب كشف حساب ؟؟!!!

قلت لها :

أي واحد عند المكينة يخدمك اختي... مثل ما خدمتك انا

قالت :

لا يوووه صعبة.. ما اقدر ادخل بين الرجال واتكلم مع أي واحد واطلب منه !!!

قلت :

طيب هذاك طلبتي مني انا اسحب لك !!! والا انا مانيب رجال في نظرك هههههههههههههههه

قالت :

لا محشوم.. بس هنا حنا في مستشفى والوضع يختلف.. في الشارع صعبة

قلت لها :

طيب وش تامرين فيه الحين ؟؟ وش المطلوب مني ؟؟

قالت :

رح الله لا يهينك وجب لي كشف الحساب اللي تقول عنه وانا بانتظرك هنا !!!

قلت :

اختي انتي من جدّك ؟؟ تبيني آخذ بطاقة الصراف واطلع ؟؟ وش يضمن لك اني ارجع ؟؟

قالت :

يووووووه.. طيب وش اسوي انا الحين ؟؟؟

في هذا اللحظة.. قررت اني اشغّل مخّي شوي وافكّر

ثم قمت واستدعيت رجل الامن وطلبت منه ان يتصل بالجهة المسؤولة عن المكينة لوجود عطل مفاجيء

وطلبت من الفتاة ان تستريح قليلا

وخلال نصف ساعة جاءت الفرقة المختصة بصيانة اجهزة الصراف الآلي وقامت باصلاح العطل في طابعة الايصالات

ثم ناديت البنت واخذت منها بطاقة الصراف وسحبت لها كشف مختصر للعمليات الاخيرة


الشاهد من كل هالبربرة اللي مدري وش سنعها

موقف بسيط وتافه... لم تستطع الفتاة ان تقوم بنفسها في انهاء ذلك الموقف

والسبب : أنها لم تتلق أي تدريب على كيفية السحب من الصراف الآلي بواسطة ولي أمرها

وعند اول موقف صعب..... توهقت

وهذا يجرّنا للقياس في مواقف ( اشد ضراوة )

اثنين توّهم متزوجين... وكاشتين في البر او في الصمان... والزوج لدغته عقرب.. وش بتسوي الزوجة حينها ؟؟؟

هل لديها ( إلمام ) بالوضع المناسب للتصرف في المواقف الصعبة ؟؟

الاب طالع معزوم او رايح للاستراحة او أي شيء من هالقبيل... وقافل الباب الخارجي علشان البزران مايطلعون.. وفجأة صار التماس كهربائي وشبّت حريقة في البيت.. وش بتسوي الزوجة حينها ؟؟

هل لديها ( إلمام ) باستخدام اجهزة السلامة لإنقاذ مايمكن انقاذه في تلك اللحظات العصيبة ؟؟

نفس العائلة راكبين الجمس وماسكين خط الحجاز.. وفجأة الاب جته ازمة قلبية ونطل الموتر على الردمية.. والبزران صغار والخط فاضي.. وش بتسوي الزوجة حينها ؟؟

هل لديها ( إلمام ) بالقيادة حتى تقود الجمس الى اقرب نقطة تفتيش وتتصرف في هالموقف الصعب ؟؟

الاب في الدوام وحمّودي ابو ثلاث سنين بلع (بطارية) صغيرة.. وبدأ يشاهق وروحة شوي ماتطلع.. وش بتسوي الزوجة حينها ؟؟

هل لديها ( إلمام ) بالاسعافات الاولية لتتصرف بسرعة في موقف لايستحمل التأخير ؟؟


المواقف كثيرة ولاتحصى في هالعجالة... لكن اكتفي بما سبق