[c]بسم الله الرحمن الرحيم [/c]
[c]السلام عليكم ورحمة الله وبركاته [/c]
هذا ياطويليين الأعمار موقف حصل لي بعد مباراة المنتخب مع الكاميرون .. بعد ما أنتهت المباراة بهزيمه ( غير مستحقه أبداً ) ضاقت بي الدنيا ومادري وين أروح
قلت ياولد ( مابدهاش ) أطلع خذ لك لفه في الشوارع لعلّ وعسى أهدأ شوي .. طلعت ربع ساعه وأنا ( أدوج ) من شارع لشارع ومن سكه لسكه ألين مادخت
وأنا راجع للبيت كنت واقف عند الأشاره وكنت سرحااااااااااااان .. مادريت الا هذاك اللي يطق الدريشه علي كنه مروع !!!
نزلت القزاز وياللمفاجأه
هالحركات كلها طلعت من شايب عمره 70 سنه ..
هــو: السلام عليكم ...
أنـا: وعليكم السلام ..
هــو: وينك ياوليدي لي ساعه وأنا أزمرّ لك وأأشرّ لك وماترد علي ..
أنــا: كنت سرحان ..
هـــو: وش سرحان به <-- ملقوف
أنــا: لاأبد سرحان بشويه أمور
هــو: وش هالامور
أنـا: أمور شخصيه ياعمّ ..
هــو: ياوليدي أنا مثل أبوك أحتس لايردك الألسانك <-- والله البلشه
فتحت الأشاره خضراء وفرحت قلت جاء الفرج ... مادريت الاهو ( حادني
) ويقول لي جنب
سلمت أمري لله ووقفت على جنب ..
مادريت الاهو نازل من سيارته وجاء لسيارتي وركب وقال لي يلاااااا حرك
( قلبي طاح في ركبي وقتها
) قلت أكيد بيخطفني
هـــو: يلاااااااااا أمشششششششش ..
أنــا: سم ..
هـــو: ياحيف على المرجله أقلع هالسود اللي على عيونك ياعلك الضرر <<-- يقصد النظاره الشمسيه ..
أنـــا: قلت بس ياعمّ الشمس تعور عيوني <<--- ياليتني ماقلتها
( مادريت الا تغير لون وجهه )
هـــو: أفاااااااا وأنا ولد أبوي ,, شل هالكفرات اللي حاطها على عيونك ياعل يدك الشلل يالهيس الأربد
أنــا: هاه
أن شاء الله ياعم مايصير الا اللي يرضيك <--- خايف
هـــو: الله يخلف على أبو جابك ..
أنــا: أفا بس عليك ياعمّ ...
هــو: أها بس لايكثر هرجك
يلااااا تحرك
أنــا: وين أتحرك <<---- ميت خووووووف
هــو: للبلديه
أنــا: وشوله ياعمّ
هـــو: لايكثر هرجك
أنــا: أن شاء الله ..
هـــو: وش أسمك ..
أنــا: نواف ..
هــو: تسيف تسيف
ياحيف على المرجله ياليتك يابييي هنيا علشان تشوف شباب هاليومين
أنــا: وش حصل ياعم
هــو: لاتقول ياعم عمت عينك
أنــا: أفااااا وأنا ولد أبوي <<--- يقلد
وش حصل يالاخو
هــو: خوا جنبك بعد خوا جنبك
تقول أسمي هنوف وتقول أنا رجال ياحيف على المرجله
أنــا: أسمي نواااااااااااااااااف مهوب هنوف
هـــو: نواف يامال العافيه ياليت أمك يوم جابتك مصعت رقبتك
أنــا : أفأ ليش وش صار
هــو: مالقوا أهلك يسمونك الأ نواف
أنــا: وش فيه أسمي
هـــو: مابه شي بس مب لو سموك طراد والا هواش والا شنعاف أزين
أنــا: ياعم سموني وأنتهى الموضوع ..
هــو: ألحين هالهيس الأربد يوم أني أزمر لك بواري وأأشر لك بيديتي وأنت تسفه جعل أبر عيالك يسفهك ياثور عنيزه
أنـــا: ياعم والله أني ماسفهتك بس كنت سرحان شوي ..
هــو: وش سرحان به يامال الصلاح ..
أنــا: بأمور شخصيه ..
هــو: وش هالامور أنا مثل أبيك أحتس بس وخل عنا الخرطي ..
أنـا: أبد ياعم لاتشغل بالك أمور خاصه ..
هــو: أنت متزوج وماقدرك تغدي عيالك
أنــا: لا ياعم أنا أعزب
هــو: أيه يعني ورع
أنــا: لا رجال بس مابعد تزوجت ..
هــو: أمحق مرجله
أنــا: وش فيك ياعم من كلمتك وأنت طايح سب فيني ..
هــو: أجل يالهيس الأربد أزمر لك ألين خلصت بطاريه موتري
وأنت تسفه ..
أنــا: ههههههههههههههه
هـــو: وش يضسك ضست من سرك
أنــا: ياعم أنا مستعد أغير لك البطاريه والبواجي وأعبئ لك بنزين فلللل بعد بس خلني بحالي ..
هـــو: أتركك حب خشمك
أنــا: وش المطلوب مني ..
هـــو: وش بلاك وش اللي مضيز صدرك عسى ماشر
أنــا: أبد ماشر ..
هــو: وجيهك أصفر .. اللي فيك شي كايد بالحيل ..
أنــا: لا لا اللي فيني بسيط ..
هــو: عسى بس مهوب من الكوره ..
أنــا: هاه أي كوره <--- خاف
هــو: أخاف صديرك ضايق من هزيمه المنتخب ..
أنــا: أي والله ياعم الدنيا صغيره في عيني ..
هــو: يالهيس الأربد العنبوك قطعه حديده تسوي بك تسذا ؟؟ <<-- ( الكوره جلد وشلون صارت حديده مدري
)
أنـا: وش نسوي ياعم هذا حكم الله ..
هــو: ياحيف المرجله شباب هاليومين ماعندهم الا الطردي ورى هالكوره والعنترتن ( الانترنت ) والتزيونات ( التلفزيونات ) وهالطفشره اللي نحطها بسطوحنا ( الظاهر أنه يقصد الدش ) والى جيت تحسي معه كلمتين مايعطيك لا حق ولاباطل ولحيته الله يعافينا يحطها شكشوكه ( ههههه سكسوكه ) كنه يهودي الله يصلحهم ويهديهم أما أنحن من أعمارنا 10 سنين وبهالفجريه نروح نحرث الارض ونحلب البقره أما هالسمرمد كل حتسيهم كله عوكيك ( أوكيه ) وستزيوفني ( أكس كيوز مي ) ..
أنــا: هههههههههههههههههههههههه
هـــو: ياوليدي أنت توك شباب لاحق على شيل الهموم شفني أنا عمري 70 سنه واللي يشوفني يقول عمري أربعين ..
أنــا: الله يعطيك طوله العمر <<-- يبي الفكه
هــو: ياوليدي خل عنك منتخب سوير وعوير والمنكسر واللي مافيه خير مير أنا أسميهم منتكب مهب منتخب الله يعافينا
أنــا: لالا ياعم مهما صار هذا منتخبنا
هــو: مابه أحد غير التنياطي
( التمياط ) ..
أنــا: والدعيع وش تقول فيه ؟؟
هـــو: الطول طول نخله والعقل عقل صخله
أنــا: هذا حارس 100 سنه ياعم ..
هــو: أمحق مغير قاعد يتمطط بها الارض الخضراء ومخلي هالحمران يسرحون ويمرحون ببابه مير لو أنه عزمني وجبت قهيوتي وقعد أنا وأياه بهالارض الخضراء أبرك
أنــا: ياعم أنت وش تشجع ؟؟
هـــو: أنا أشجع زرابيل ( البرازيل ) ياوالله هالصفر أجواد عيال الـــ دو
رجاجيل وأنا أشهد خلك مع زرابيل أجود لك
وصلنا للبلديه
أنــا: هذي البلديه ياعمّ ..
هــو: ماشاء الله كل هالنخيل فيها ياوجه الله هم حّمل والا بعد
أنــا: مدري والله
هــو: أسمعني زين وحطني على بالك يانويف ( عادي يدلعني
) والله أن شفتك لابس هالكفرات ( النظاره الشمسيه ) مرة ثانيه لأكسر هالعصا من على ظهرك
أنـــا: مايصير خاطرك الا طيب تبيني أنتظرك علشان أوديك
هـــو: لا ياوليدي أنا مطول طس بحفظ الله ..
أنــا: موترك بعيد ومن اللي بيوديك له ..
هــو: أباخذ موزيل ( ليموزين ) بيوديني لموتري بريالين
أنــا: مايخالف ..
هـــو: في أمان الله ..
أنــا: مع السلامه ..
هــو: قل في أمان الكريم يالهيس الأربد ...
أنـا: في أمان الكريم ..
طرااااااااااااااااااااااااااااااااااااخ <<-- صوت الباب وهو يتسكر
هذي القصه من طقطق إلى السلام عليكم
وفي النهايه جعلكم ماتتطحون في شايب مثل هذا
واللي بيرد على موضوعي ينتبه لا يلبس ( كفرات
) ..
أخــــــــــــــــــــوكــــــم
نواف السديري ...
الوضع العادي
