(بطولة الحلفان) .. وأهم النقاط حتى هذه اللحظة - نادي الهلال السعودي - شبكة الزعيم

ابو طـــــلال · #1 09/01/2009, 01:54 AM

كثرة الحلفان .. والقسم .. واليمين في هالبطولة !

والحلف صاير عند البعض في هالبطولة مثل ( براد أبو اربع )

خالد جاسم في قناة الكاس كل حلقة يحلف له مرتين ثلاثة ...

اللاعب البحريني حلف وأقسم إنه ماتكلم على أي لاعب بحريني .. وإنه ماقد غلط على أي لاعب بحياته

قالوا للاعب العراق ( هوار ) إن لاعب البحرين حلف انه ماقالك شي .. قال : أنا بعد والله انه غلط علي

حتى في مداخلة ( رحيمة ) قالوله ان لاعب البحرين حلف .. قالهم وانا بعد احلف إنه غلط علي وعلى هوار !؟

هذا فيما يخص الحلف وإنه أصبح موضه في بطولات الخليج

نرجع لأهم النقاط بإختصار :

* الف مبروك للمنتخب السعودي السداسيه بس ولو ... للحين فيه مشلكة

* مباراة قطر والإمارات اليوم كانت ثاني اجمل مباراة بعد مباراة عمان والعراق

* المخرج ماهوب راضي عن جمهور السعوديه ابداً والدليل ان المنتخب السعودي كنه يلعب معاقب وبدون جمهور !! وإن جت الكاميرا ( بالغلط ) على الجمهور ... المعلقين تقول محلوف عليهم مايذكرونهم بكلمة !!

بس ودك تحط ( بنيه ) شقراء بين الجمهور السعودي وشايلة العلم .. ياشيخ ان تشوف الكاميرات كلهن على الجماهير السعوديه !!

* طالت سالفة الحقوق بين الجزيرة وقنوات الإمارات ( أبو ظبي ودبي ) حتى الجمهور صار بينه تحدي خاص .. تسبب في شحن الجمهور من الطرفين حتى وإن حاولت قناة الكاس بتغطية تصرفات الجماهير القطريه تجاة الإمارات بعد هالسالفة .. وخالد جاسم اليوم عارض تسجيل عن تهجم جمهور إماراتي على المذيع !!! وانا متأكد انه حتى لو خل مذيع في هالوقت من قناة أبو ظبي للجمهور القطري بيلقى مثل هالتصرفات وأكثر .. بس خالد جاسم وحركاته النص كم ...

* الجمهور الإماراتي اللى قام بالإعتداء على مصور ومذيع قناة الكاس والدوري على أساس انهم قطريين .. وهم المساكين مالهم دخل .. المذيع ( عماني ) والمصور ( بحريني ) واحد منهم جاه ( بوووقس ) >> وش دخلهم

* خالد جاسم معصب وكالعادة يتفلسف ويقول (أنا متأكد بأن من قام بالتعدي على مصور ومذيع قناة الكاس هم ليسو إماراتيين الأصل ) >>> هنا ظحكت وكني شايف مشهد من مسرحية لعادل إمام ..

آخر من يتكلم عن الأصووول هو خالد جاسم .. وكأنه يغلط على منتخب بلادة وهو مايدري ..

حتى النشيد الوطني مايرددة إلا ثلاثة من المنتخب

* الشريط اللى في قناة الدوري والكاس تابعتة أول البرنامج حق المجلس لقيت إماراتيين وقطريين يتهاوشون ووصل الدم للركب .. وكل واحد يسب الثاني .. والجماعة معصبين !!
قبل نهاية البرنامج نفس الأسامي غيروا الموجة بعد كلام خالد جاسم .. وصاروا يحبون بعض .. وكل واحد يقول للثاني ترى العشاء بكرا عندي ..

نفس الأسامي اللى تغلط وتسب وتلعن .. هي نفسها اللى تحب .. وتتسامح !! ياحنا شعب طيب جدا .. او ساذج جدا والكل يظحك علينا بكلمة !

* صالح الحمادي في برنامج المجلس يعطيهم كم كلمة من ( تحت الحزام ) وللي يدقق في كلامه يشوف إن ابو عبد الله مشرشح بعض الأشخاص بس من غير مااحد يدري ..
مثلا : كان خالد جاسم يقول عن الحكم القطر ي كلام جميل ويمدحة ويشيد فيه .. ودبل تبسووودنا فيه وقال صالح الحمادي .. فعلا الحكم جيد .. وإن شاء الله نشوفه على النهائي

مشت على خالد وقال إن شاء الله .. وبعدين أنتبه وقال .. المشلكة انه لو بيحكم في النهائي مابيكون منتخب قطر فيه !!

وحده ثانيه عطاها لماجد الخليفي .. وكان يتكلم عن تمثيل عطيف في اخر الشوط الثاني وحنا فايزين بسته !! وقال الحمادي مالها داعي تاخذ كرت بهالطريقة واللى مالها داعي وهالتمثيل وحنا فايزين سته !! حتى سألت الزميل ماجد الخليفي وهو من اكثر المحايدين

وقال بأنها ليست ضربة جزاء !!

فيه حرب غير واضحة بين صالح الحمادي وبعض ضيوف المجلس ومقدمة بس ( يقرص من تحت )

* فهد الهريفي إتصل في برنامج خط السته وكان الضيف محمد بن همام .. وذكر المتخلف الهريفي بأنه معجب جدا بابن همام .. وقام يرفع فيها واجد .. لكن إنصدمت كثير يوم سمعت سؤاله والله !! ( إي نعم أعرف ان الهريفي سفيه ) بس سفيه لهالدرجة ماتوقعتها !!!
كان سؤاله : ألا يعتقد بن همام ان شن الإعلام السعودي عليه شخصياً هو بسبب جائزه أفضل لاعب في آسياء واللى حصل عليها خلفان !!
الأحقر من فهد الهريفي .. هو جستنيه واللى علق وقال .. أذكر أي الإعلام تقصد !!
وطبعا واضحة أنه يبي الهريفي يقول ( الإعلام الهلالي )
وقاحة مابعدها وقاحة والله .. وحتى مصرح الهريفي بعد بأن الجوهر يجامل ياسر ومكانه الإحتياط بس أعجبني ابو سعيد والله وهو يقول : ( كلن يرى الناس بعين طبعة )

الأسخف من جستنيه .. والهريفي .. هو الشخص اللى يجعل الهريفي محلل في قناة سعوديه وهو بهذا التخلف !

* أحمد السليطي اليوم ( عاقل ) في المجلس ... وهو من يتكلم عن الأخلاق .. والعقل ..في مشكلة الإمارات وقطر الحاصلة هاليومين >> نسينا ماكلينا ياسليطي

* هل أنتم معي في ظروره البدء في اللعب الرجولي والإعتماد على القوة الجسمانية والسر عة والتسديد في مبارياتنا القادمة ... منتخب عمان مثلاً كان يعلب بكل الطرق المتاحة .. القوة الجسمانية وقوة التسديد .. والتكتيك .. والمهارة .. والسرعة .. والبحث عن المزيد من الاهداف !!

بالتوفيق للأحظر ........... وعقبال الفوز على الإمارات

أخوكم الصغير ابو طلال