السلام عليكم....شحالكم اخواني وخواتي
....اولا انا بتكلم عن نفسي انا وربيعتي اللي استخدمنا المعجم وانفصلنا بسببه...والبنت هذيج انا ماعرفها شخصيا....


بس بليييييييز اللي يوصله موضوعي...يحاول ينشره في كل مكان....ابا فضيحة الكليه تظهر والكل يعرفها


الموضوع ينقسم إلى قسمين...القسم الأول هو موضوع المعجم اللي استخدمته انا وربيعتي في البحث..والسالفه هي ان البحث فيه قسم اسمه جلوسري..يعني معاني كلمات موجوده في البحث...المهم هالكلمات كانت كلمات بزنس يعني تجاريه...ونحن طالبات فاونديشن يعني اول سنه...يعني بدون تخصص...يعني بدون اي شك مانعرف معنى الكلمات...فاستخدمنا معجم اوكسفورد في ايجاد معنى الكلمات...كتبناهم...وخزنناهم في فلوبي وفي الهوم مال الكليه....بعد فتره....وفي اليوم النهائي لتسليم البحث اللي هو 11/5.... ييت انا ابا اطبع صفحة الجلوسري...فتحت الهوم مال الكليه وفتحت الفايل ابا اطبعه جان يطلع لي غلط من الربنامج واللي هو الإكسل مادري ليش وعقب ضغطت اوكي...جان تنمسح الصفحه كلها....قلت اوكي ببنده قبل ما يتخزن وبرد افتحه مره ثانيه اكيد موجود...بندته مره ثالثه ورابعه..ماطاع يظهر الفايلز...تذكرت اني انا مخزنه نسخه من الفايلات مال البحث على فلوبي عند ربيعتي...قلت لها عطيني الفلوبي وقلت لها سالفة الفايل مالي اللي انمسح...المهم فتحت فايلي مال الجلوسري وحطيت اسمي ورقمي الجامعي وكل شي ورقم الصفحه وطبعته وسلمت البحث.....

واول امس اللي هو بتاريخ 28/5 اللي يصادف يوم الثلاثا...زقروني انا وربيعتي وسووا ويانا تحقيق طبعا كل وحده روحها...وبعدها يابونا نحن الثنتين وقال لنا المدير...انتوا غاشين في البحث وانتوا ناسخين نفس الفايل وبعدين اصلا الموضوع من اسااسه غلط..كيف تستخدمون معجم عشان اتظهروون معاني الكلمات.يعني ما تعرفون انه البحث لازم يكون باسلوبكم وكل كلمه فيه من كلماتكم الخاصه...

.قلناله انزين الحينه هالكلمات كلمات تجاريه ونحن ماتخصصنا بعدنا عشان انعرفها...وبعدين كل الكليه والله العظيم انها مستخدمه المعجم في ايجاد معاني الكلمات....وبعد النقاش تذكرت او اكتشفت بالأصح انه الفايل اللي انا طبعته مال ربيعتي...وانا ظهرت لي نفس الأخطاء الإملائيه اللي عندها...وهذا اللي خلاهم يقولون انه نحن ناسخين الفايل....ونحن والله العظيم ما كانت في نيتنا الغش...و انا والله العظيم كنت اعرف ومتاكده انه الفلوبي هذا مالي... والفايلات فايلاتي...بس مادري الظاهر الفلوبي تخربط ويا الفلوبي مالها....[س بعد...مهما يكون...ومهما يستوي...هذا مب معناته انه على طول فصل...ونحن علىآخر السنه الدراسيه...ويوم الاحد 2/6 الامتحانات...يعني شو مستقبلنا يضيع بسبب ورقه؟؟؟ لا ونحن مب قاصدين بعد...والله حرام وظلم.....وبغيت اوضح لكم شي بعد واذا تبون اسألوا اي حد يدرس في اي تقنيه عن هالشي...نحن انا وربيعتي..طالبات
في اعلى مستوى في الفاونديشن يعني في السنه التأسيسه....نحن في كلاس اسمه

F2A

ومعني هذا انه نحن والحمد لله لنا اعلى الدرجات واعلى المستويات في جميع المساقات والمواد الدراسيه...والحمدلله بعد اللغه الانجليزيه والمحادثه بالانجليزيه عندنا قويه...بس خلاص...شو الفايده...ضاع مستقبلنا....ضاعت أحلامنا وآمالنا كلها.....حتى سالفتنا صارت على كل لسان لكن للأسف بدون فايده....نحن بس نبا نوصل لحد من الشيوخ...وبالذات السيخ نهيان لانه هو المسؤول عن التعليم العالي...ماعليه نبا نوصل لاي حد من الشيوخ وباي طريقه

...المهم في مدرسه الله يعطيها الف الف عافيه في الكليه وهي عرفت سالفتنا انا وربيعتي وحاولت اتساعدنا بس من ورا ادارة الكليه....ونصحتنا انه انسير لرئيس كليات التقنيه العليا في بوظبي....سرناله يوم الأربعا وكلنا امل انه يرجعنا للكليه....لكن لا حياة لمن تنادي...رحنا وردينا بدون فايده...قال لنا والله انه الاسباب اللي ارسلتها الكليه اقوا من اعذاركم...وللأسف قرار الفصل استوا قرار نهائي وغير قايل للنقاش من قبلنا نحن...يعني الموضوع طلع من ايديننا...وهالابله قالت لنا لو وصلتوا للشيخ نهيان او اي شيخ في بوظبي...بتردوون للكليه وراسكم مرفووع....بتردوون وتثبتون للكل انكم مب غاشات...
يا جماعة الخير....الحين الكل عرف القصه بتفاصيلها....يا ريت حد يقدر يساعدنا ....نبا نوصل للشيخ نهيان او اي حد من الشيووووووخ...اي حد....وبسرعه قبل لا تنتهي فترة ال 14 يوم اللي عاطينا اياها...واذا قدرنا انخلص الموضوع خلال هالفتره بيردوونا لكن اذا طافت ...خلاص مافي امل...ألفتره بدأت من تاريخ الفصل وهو 28/5.....


دخيلكم ساعدونا بأي طريقه ....والله مستقبلنا ضاع ..واحلامنا كلها تحطمت بسبب بسيط وبدون اي قصد...والله حرام...تخيلوا ...طالبتين عمرهن 19..يضيع مستقبلهن....وللأسف انهن شاطرات..يعني نحن كنا شاطرات والله ولو كملنا تعليمنا كنا بنكون في الدبلوم العالي...وبأحسن التخصصات...لكن شو نسوي....نحن للأسف ما عندنا اي واسطه....

والموضوع تبون الصراحه يباله واسطه عوده.....والله اللي تبونه بنسويه لكم بس ساعدونا....ردولنا مستقبلنا حتى لو اتحاولون بأي طريقه...حاولوا اخواني واخواتي....ويزاكم الله الف الف خير والله ما يضيع تعبكم انشالله....الله يوفقكم في دراستكم ومشاغلكم ودنياكم وآخرتكم انشالله يارب...

ترا قرار الفصل يمشي في كل الكليات والجامعات في الدوله...يعني مافي اي باب جدامنا مفتوح

الله اكبر على الظالم


كتبته عني انا وربيعتي.... عذاري وأمل.... اللي ضاع مستقبلهن

===========================================================
حسبي الله عليهم يا اختي وان شاء الله توصل رسالتك للي تريدينه.

منقووووووووووووووولة من رسالة وصلتني