][..حب غالي مع الإيطالي البيرتو جيلاردينيو ..][ - نادي الهلال السعودي - شبكة الزعيم

فتاه هلاليه · #1 07/01/2009, 04:43 PM

السلام عليكم ورحمة الله وبركاته ,,

+

{..~ما الحب إلا للحبيب الأولي
الجرح من ايده يطيب وينجلي
لو راح عني وغاب وصد وقسى
لو عشت عمري بلاه في هالحياة
يكفيني من حبه غلاه والذكريات
بحر الهوى يا سامعين ماله دوى
مايروي قلب العاشقين مهما روى

,‘
هذا الموضوع برعاية

بما ان جهازي مخرف وبما اني مشتهيه عصير تفاح تروبيكانا
والماسنجر زحمه هالايام وسويت تصميم لي بس طلع مخيس

وعندي احساس ان جهازي مهكر لأنه صاير يتسخف دمه علي هالايام قررت اكتب لكم قصة اختطاف قلبي>>>ما العب

7

مشكله الي يخلص اشتراك دي اس ال(هم) ويتلحط كم يوم بدون نت

>>>في ناس يقولون اصرف من الي من عنده دي اس ال ابد

في احدى ايام العطله الطويله (الصيفية )

انا:يباا وين بنسافر هالصيف>>>>>مقطعتهم باريس كل صيف

يبا : مدري يمكن جده ولا الطايف
انا: وش ذا يا خي نبي نغير ما صارت ترى >>>>>بديت اموون
(لطخني بفنجاله)

يبا : احمدو ربكم طلعتكم من الرياض غيركم يتنمى يجيها
انا: طيب خلنا نروح لبنان
يباا: من زين لبنان عاد.. والله ان ابها اطلق منها

انا: تدري خلنا هنا بس اصرف

((يقطع بليس ذا الاسهم خلت العالم يخيسون في ديارهم محد سافر))

ورحت لغرفتي وادق على بنات خالتي واجمعهم
بعدين نزلت لــ اخوي

انا: اقول محيميد تبي شيبس ولا بيره هلستون ولا اي شي

اخوي طايره عيونه ومرتاع.. وش هالكرم؟
محيميد:ايه عادي؟! >>>>>ينرحم
طيب ودني التميمي اتقضى ..
خفت روعته
محيميد :أها بس
انا: الله يعافيييك بيجون بنات خالتي وابي اروح اشتري خرابيط ننبسط عليها
محيميد: طيب تعطيني بخشيش
انا: ايه الله ياخذك>>>>متحسفه
محيميد : طيب ابركب السياره خمس دقايق ان ما جيتي ابهون>>>>>يا شين ذا الحركه يعني لازم ننذل قبل ما نطلع

انا : وجع طيب

واطمر اجيب عباتي و رحت اطر من امي فلوس ولا عطتني وجه
قلت اقول وين بوكها بس ..رحت لغرفتها وافتح الشنطه وادور البوك
يوم لقيته دخلت يدي وغمضت وجلست اقول استغفر الله استغفر الله

>>>ولو عندي ضمير
واخذ المقسوم واررركض اركب السياره.
.المهم خلصنا مقاضي ورحت محل فديو ادور فلم هندي
نصيح عليه >>>>>>>من الفضوه ندور شي يصيحنا

وترى قمة الفله عندنا نجتمع على شيبس وببسي ونجلس نطالع
فلم هندي واهم شي كرتون منديل في النص

ما ناقص إلا زيت نارجيل نهضم عليه

خلصت ورجعت البيت والقى البنات باسطين في الصاله
انا : جيتو!! >>>>>((على طاري جيتو ذا السؤال المخور

..مره كنت نايمه عند جدتي وتجي عندي تسألني قايمه!! وتطق كتفي وتهزني (فلانة,فلانة) قايمه!!!..ايه طبعاً قايمه وش عقبه؟؟>>>>منقهره))

بنت خالتي: ايه من زمان وين طسيتي ؟
انا: رحت اجيب لكم فلم هندي وخرابيط تنوكل
وبعدين ترى ما صار لي نص ساعه ما صدقتو احد يناديكم!!

>>>>>ما ودك اعزم احد

بنت خالتي وهي تلفق الوضع : طيب يالله مشينا فوق عند الفديو

وطوول العطله وحنا على ذا الحال يا نروح لهم يا يجونا

..وطنت مره نروح لبنده
اول ما دخلنا بنده لقيت زول جالس على مكتب وويوزع مدري اوراق مدري لوشو
يوم شافني قالي يا بت
انا ارتعت وش يبي؟

رحت نعم؟
الزول: في مسابغه حابه تشتركي معانا

انا : كيف ؟

الزول : اديكي كرت في سوعال لما تجاوبي عليهو صح تدخلي ضمن الاسماء اللي ممكن تفوز .. ((بعدين ناظرني بنص عين )) والجايزه تسافر برررررا>>مع تخفيف الراا

انا من سمعت طاري سفر ضعت

: طيب قل قااء

الزول : قسمن واللهي..في 3 دول ممكن تسافري لها فرنسا وايطاليا

واسبانيا
انا قمت اسعبل واخذت الكرت وامحط اسمي الرباعي + رقم بيتنا

يوم شفت سؤالهم كان مخيس للغايه(متى تم افتتاح هايبر بنده ؟؟)

وكانو حاطين السنه اختيارين ..وابو الشباب الزول غششني يقالي يتميلح..
قلت له اقوول لا تحاول ترى اذا فزت لو تطير ما اخذك>>>>>تلاحظون الثقه
عاد هو خذ الكرت وحطه على جنب انا استغربت حسيت انه خق عندي
>>>>>>>>>> ع فكره دايم الزووله يخقون عندي مدري ليه حتى سواق عمتي ضايع معي

المهم خلصنا تمشي ورجعنا البيت ..
لقيت العائله متحمسين يناظرون التلفزيون ..
وطبيت معهم

وبعد يومين كنا متبطحين في الصاله الظهر نناظر الفلم المكسيكي روبي>>>>>على طاري روبي تذكرون اليخاندرو يا ان السوالف اللي مسويها تقهرني ابد رصيف

هالسالفة مب الصيف اللي فات اللي قبله ترى على أيام روبي

ماعلينا نرجع لسالفتنا الا وهي حومة الكبد في اجازة الصيف وانني معندة ابي اسافر

شوي وإلا يدق التلفيون تررررررررررن ترررررررررن
انا مالي خلق اقووم متحمسه مع الفلم قمت اناظر محيميد
:انت ورا ما تقوم ترى له ساعه يرن التليفون
محيميد:قومي انتي اشتغل عند ابوتس انا
انا : يالشين قم قبل لا ينقطع

محيميد: اكيد لتس من بيدق علينا في الظهر يا خالتي يا وحده من صديقاتتس
انا : لا صديقاتي اذا يبوني بيدقون على جوالي

محيميد: لا تحاولين منيب
: على طوط

بعدين انقطع وانا ذابحتني اللقافه وودي ادري مين الي كان يدق

انا : هين انت اطلب مني شيء ولا قلي ابي فلوس بعبي بنزين

>>>>>>انواع الاستغلال

يوم رن ثانيه مديت رجلي ابشوته واشوى قام
بعد دقيقتين جاي ويناظرني نظرات خبيثه

انا : وشو؟! "فيس يقوطر براءة "

محيميد: يعني اذا بغيتي تخربينها خربيها صح موب كذا

انا طايره بوهتي ومرتاعه
محيميد: روحي شوفي بس لتس التليفون
رحت طيرااااان اشوف ميين
انا: الو
المتصل : آآآآآآآآآلللووووووووووووو
انا: مين؟
المتصل: انتي (.........)

انا وعيوني طلعت من مكانها :خير من انت؟

المتصل: انتي متشركه معنا في مسابغه و احب اقولك فزتي معانا
انا: مسابقة بنده ما غيرها؟

الزول((عرفته المتصل اللحين

)): آآآآآآآي..اقولك يا (***) >>>>مسوي يمون
فزتي بتزاكر سفر لايطاليا

واغامه لمدة سلاس(ثلاث للي ما معهم لغه)
ايام بلياليها
انا: ايطاليا ديرت الطخمان

؟؟
الزول : شنو؟
انا: اسمع بس كيف الطريقة اللحين ؟
الزول :آآآآآآآآآآآي سألتيني كيف..اقولك دحين كيف >>>>يحبون يعفسون ويدورون في الحكي

المده محدوده اليوم الاربعا ..يوم السبت السفرررررر والتزاكر 4 اشخاص فغط
انا : بس !! نطركم إنّا عائلتنا الكريمة واجدة أمي وابوي واخواني ولا تهون ((ياتي)) >>>>اندونيسيتنا الله لا يخلينا

الزول: واللهي ما اقدررر مو بيدي
انا: طيب انت تلايط اللحين خلني اروح اعلم العائله
الزول : اشوفك غريب ان شاءالله في بنده>>> حرف الدال هنا يرن

انا: ايه هماكم بتسفرونا كل صيف عندكم ان شاءالله ..طوط طوط طوط

وصكيته قبل لا يكمل هذرته اخاف يخربها ويرقم لا سمح الله

وانزل تحت والقى اهلي الجحده يتغدون وما نادوني

انا: خييرر؟؟؟ وبس؟
ابوي : وش تبين؟
انا : ليه تتغدون وتسحبون علي؟
محد رد علي جالسين يفرمون
انا: الموووهيييم تراني شاركت في مسابقه في بنده وفزت
ابوي: وش دراك انك فزتي؟
انا: قبل شوي دق حق المسابقه و قالي
ابوي :يعني كلمتي رجال

انا: بكل قوة وجه ايه

شرق ابوي وحالته حاله من سمع اني كلمت حق المسابقه ما يدري انه زول منتهي

عاد انا ابلفق الوضع
:فزت بسفر لايطاليا وترى بس 4 اشخاص انا ابختارهم من يبي يسافر؟
ابوي من سمع طاري سفره وان عدد الاشخاص محدودين قام يتمصلح
: وانا ابوتس لو الاسهم ما طاحت كان وديتكم فيذاك تعرفيني ما اقصر
انا: احد جاب طاريك

>>>>>>اسلوب مخيس
ابوي عصب بس ما يقدر يسوي شي لازم يتملصح ولا يدري اني منيب مسفرته

امي: ترى انا حملت فيك تسع شهور همين ولدتك همن رضعتك وربيتك>>>>>اسطوانة كتاب المطالعه

محيميد: والله اوديك اللي تبينه حتى في ايطاليا امشيك
بصوه>>اختي:والله ما عاد اشلح توكس من درجس وترى ذيك المره بليس ((اخوي البزر سكني واناديه بليس)) هو الي قالي اسرقيه
انا: انتي تدرين ان الي يسرق يقطعون يده

>>>>>>>ما قد سرقت من بوك امي
بليس: بصوه تبين اعلم يوم تروحين المدرسه وانتي سارقه قلمها الازرق وهي ما عندها غيره
اخوي البزر: والله العبك بلاي ستيشن واخليك انتي اولي

ووووجع الله ياخذكم كلن قام يطلع فضايح الثاني ..اسمعو بس امي وابوي باخذهم اما انتو بسوي لكم قرعه واللي يطلع بنسفره خلاص>>>>يحيا العدل

يالله اللي يخلص يقوم يغسل يده ويروح يصف في الصاله
كلهم طمرو يغسلون وراحو يصفون ..وانا ادور عندهم وانا مصغره عيوني

>>>>مسويه شديده
يقالي ابي اخوفهم واحط قطعة منديل صغيره تحت واحد من اصابعي واحط يديني عندهم قلت يالله اختارو والي بيطلع معه بيطس معنا ..كلن اختار اصبع وانا جلست اناظرهم بنظرات مدري وش تبي حماسيه وهم خايفين اللي قام يعرق والي يدعي>>>>>يسمعون بالحماس

وافتح يدي وطلع على محيميد

حامت كبدي من ذا اللزقه ويجي طاير يمطخني والله يا (...) انس اطلق اخت وابوديك كل يوم للي تبينه وبجيب لك افلام بعد ..
انا: لا يكثر بس جهز اغراضك ترى السبت ماشين
و كل العائله راحت تجهز خرابيطها وعدتها
وامي الله يطول بعمرها قشت كل المطبخ ملاعق صحون كاسات جيك مويه وقدور تعرفون السفر يمكن نحتاج نطبخ كبسه ولا شي

يقولون حوسة الاكل في السفر شينه وامي ما تبينا نفقد اكلها الله يخليها لنا بس

دخل علينا ابوي :يالله كلن ياخذ بطانيته ووسادته ترى انا اتابع حسن كراني

كل هالايام وروما بارده يبيلنا نتلبد زين ..اشين شي المرض في السفر

!

ويجي يوم الخميس بعدين الجمعه بعدين السبت يوم السفر

قشينا عفشنا و رحنا للمطار كانت رحلتنا 12 الليل وكنا عندهم من المغرب خايفين تفوتنا الرحله

وبعد طول انتظار نادو على رحلة روما ونركض للبوابه وكنا اول من صف عند الباب..

اول ما ركبنا الطياره قالت لنا المضيفه اننا درجه اولى على طول بسطنا وجلسنا في كراسيهم والله انهم اجواد قهوونا ووزعوا ذيك الفوط الحاره حقت التمسيح

..محيميد يوم عطوه الفوطه نطلها يقول حاره!!
اما انا حللت ابوها مسحت يدي ووجهي ومديت سيقاني ومسحتها يعني تروشت الا شوي..

واخوي من شاف ذا المضيفه وهو ضايع عندها كل شوي يناديها مره مويه مره شغلي المكيف حر ..مره ابي وساده بنام!!!

ترى كل هذا قبل لا نطير حتى كان بيرقمها الله يفشله ما قد شاف خير

وبعد نص ساعه انلطعنا فيها قال الكابتن تمسكو وتجودوا زين ترى بنطير..

ربطنا الحزام ومشت الطياره وبعد ما استقرت في تسبد السما جت شغالة الطياره

<<--كلمة نشاز
تسألنا وش تبون تتغدون؟؟
دجاج ولا لحم ولا باستا ..انا تضامناً من روما

قلت ابي باستا والطعس الي معي يبي لحم وهو وابوي الله يخليه اما امي سحبتها نومه..
جلسنا شوي وجابت الطلب الله يكرم النعمه مشقصه يحلفووون لها اسبوع مقطنه في مطبخهم

بالنسبه للحم مدري بس اخوي ما قصر لحس الصحن حتى خلاص ما يحتاج يغسلون صحنه

وبعد كم ساعه اعلنو الهبوط و نزلنا اول ما وصلنا مطار روما انواع الناس الخقه

لا رجالهم ولا حريمهم لدرجة ان محيميد خق عند واحد يحسبه بنت

وحنا نمشي لقينا واحد واقف رافع مثل اللوحه مكتوب عليها Ftah hilalyah

التفت على ابوي قلت يالله هذا تبعنا امشو وراه>>>>>>>>ترى انا اللي متزعمه العائله

المهم ركبنا معه ونزلنا الفندق كان مره فخم ومليان خليجيين انا على طول نزلت في اللوبي لقيت مكان مظلم وفيه لمبات ملونه وناس يرقصون

قلت ام الفله ذولا ودخلت عندهم وهم متحمسين في الرقص ..قلت في نفسي يعني بس هم يعرفون قمت اتنكس هم استغربو من رقصي وقامو يصفقون عاد انا خقيت وانواع الاستنزال عندهم

يوم خلصت كلن قام يجي عندي وينطل علي فلوس انا استنكرت الوضع بس عادي ما استحيت خذتها>>>>>>مغسول وجهها بمرق

وبما ان معي فلوس قلت ورا ما اقلط عند الكوفي حقهم اشرب اي شي
طلبت كوب كبير فيه شي كأنه عصير تفاح ورغوه كثيره فوق بس مدري وشو

(وجه يقطر براءه)
توني باشرب واشم ريحته وععععععع خيااااس كأنك تشرب مرق زباله (وانتو بكرامه)

ناديت القرسون يجيب لي قهوه اصرف..بينما انا اقحن في الكوفي الا يجي وراي شخص ويحط يده على عيوني(يعني حزري من انا)

عاد انا ما احب حركات المصاله رجعت يدي ابقبصه وانا اقول محيميد يالماصل تبي قهوه..وتوني المس يده واستحيت صارت انعم من يدي!

استغربت ومسحت محيميد من مخي قلت من ذا!!
يوم فكني وجا وجلس قدامي ..

انا :آه جلاردينيو

!!
جيلاردينيو: لقد اشتقت اليك كثيراً

انا : انني لم اعرفك يا جلاردينو الاطخمو وانا اكثر

جلاردينيو: لم اعد اراك اين اختفيتي

انا: لا اعلم عنك ايها الزلابه من جا كاس العالم وانت ساحب علي عندي احساس انك مبلكني>>>>>>>مشبكته ماسنجر

(- الا صح هم كان معهم بكأس العالم

جلاردينيو: لالا لم ابلكك انني متأسف ولكنك تعرفين ظروفي
انا: نعم نعم الا على طاري كاس العالم مبروك الكاس

البيرتو:الله يبارك فيتس..اذن انتي هنا في ايطاليا

انا: (وش رايك يعني بلا تميلح بس) نعم
جلاردينيو: متى سترحلون من هنا
انا: بعد يومين
جلاردينيو: يا الهي ..لماذا؟!..اريد ان اوريك البلاد وامشيك فيها
انا: والله انك خطير ولن تقصرو لكن ماذا افعلو ان لنا اسبوعين هنا (لازم انصب ما في امل اقوله فايزين بها وانها بس 3 ايام والله ان يرحمني

)
جلاردينيو: حقاً.. ليتني كنت ادري او على الاقل اخبرتيني بالمسن يالجاحدة

انا: يا للحسافه

جلاردينيو:قررت بهذه المناسبه انا اعزمك في برج بيزا على طعام العشاء
انا: حسناً على حسابك طبعاً

>>>>>>اهم شي
جلاردينيو: سرينا

(ترانا نحتسي ايطالي بس حبيت اترجم لأخوانا العرب

)

وذهبنا الى المطعم المجاور وقضينا وقتاً ممتعاً واهلي كانو في عاشر نومه اما انا كنت اتسكعو في الشوارع>>>>>مسكت خط مع العربي

جا اليوم الثاني ونزلنا وفطرنا وذقنا كل شي حاطينه في البوفيه من زود الشفاحه

وجلسنا نفكر وين نروح في الليل ..قلت لأبوي امش خذ لك اي تكسي ويعلمنا الاماكن الموجوده ...
واذا ما معك فلوس اقدر ادبر لك بس اصبر لما يجي الليل

>>>>ناويه تروح تكمل ردح

شفت انهم ما طلعو بشي قلت لمحيميد خلنا نروح نتمشى بس ..

طلعنا ندور في الشوارع وشفنا جلاردينيوومعه قروسو اخوي حامت كبده
محيميد:شوفي هذولا لاعبينهم شيووون
انا : ايه مرررره شيوووووون <<-- ايه هين

قام يطالعني بنص عين وهو حاقد علي انا غيرت الطريق اخاف يشوفني
جلاردينيو وينشب..وش يفكنا عاد

جلسنا في الهايد بارك حقهم شفنا واحد راكب سيكل ومركب قدامه ثلاجه فيها عسكريمات .. رحت اجيب لي واحد وسحبت على اخوي يوم رجعت قام يسعبل ويلمح لي ساعه يبيني اباشر عليه .. بس هذي فلوسي تعبي >>>>>تذكرت الدوافير ايام الاختبارات

يأس مني وراح لراعي العسكريم وشاف وحده موووت

خق عندها ونسى العسكريم..انا لقيتها فرصه اقوله اذا وده يشبكها عادي ..واصير اشوف جلاردينيو علني

رحت عندهم ولقيت اخوي ضاااايع عندها جلست اناظرها البنت صدق حلوووووه
حتى انا خقيت عندها>>>>>ما تعوق الخقه

محيميد السبهه على طول طلع جواله يسوي نفسه اني كشخه ومهم يقالي اكلم>>>>>>طراها القراوا الي يتميلحون بالجوال

انا ما قصرت دقيت عليه وصار يرن وهو مسوي اني اكلم >>>>>>ترضع نذاله

المهم قربت من البنت واشوفها توزع بطاقات وتغني ومعها شله يغنون يوم شافتني والسبهه اللي معي عطتني بطاقه وهي شاقه الابتسامه ..من ابتسمت اغمى على اللي معي

فتحت اقراها ما فهمت شي رحت لها ثانيه قامت تخنبق وتحكي ما فهمت شي الا يوم قالت my birthday party
استوعبت انه ميلادها ..والله انها ونعم اجل تعزمنا وهي ما تعرفنا

لفيت على اخوي المصون لقيته ما زال مسطل وشرحت له ان البنت المذكوره اعلاه عازمتنا ع حفله عيد ميلادها
محيميد : تهقين امي وابوي يوافقون؟

انا: وانت من قالك اننا بنقولهم

محيميد:شلون اجل نطلع وبس؟
انا : لا نقولهم بنروح السوق نتمشى واذا قالو بنجي نقولهم بنروح ايس لاند ما يمديكم تتزحلقون>>>>>>تحسبها جده

لأن لو قلنا لهم بنروح حفله بنت عازمتنا و لا ندري وش هي من لحيه بنرجع السعوديه بدون رقبه

محيميد:وش رايك في البنت؟
انا: اها بس اركد ..خلاص خلنا على خطتنا>>>>>>داهيه
محيميد: طيب تدرين وين الحفله فيه؟
انا: تصدق مدري..يا خي اول مره احس انك ذكي

..شلون بنروح حفله ما نعرف مكانها!
محيميد: طيب بما ان معك لغه روحي اسأليها
رحنا مكانها ما لقيناها طلعنا برا البارك شفناها تمشي بلحالها ومعها وحده ورحنا وراهم ..جلسنا نلاحقها من شارع في شارع لين وصلت بيت ودعتها البنت الثانيه و حقت الحفله دخلت البيت وسكرت الباب

انا: خلنا بس نرجع ننام اتوقع هنا في بيتها
محيميد: طيب يالله
رجعنا البيت ونمنا

"في صباح اليوم الثالث والاخير"

ما قمت الا متأخره العصر لقيت محيميد نايم وماسك وسادته وضامها
بقوه وانواع السعابيل وكان يبتسم

انا خربت احلامه وجلست اقوم فيه
انا:محيميد يالله قم ترى ورانا حفله
الاخ نايم وما في امل يقوم سحبت الوساده الي بالموت انسحبت
انا:وجع قم ترى حفلاتهم بدري موب مثلنا>>>>>>>راعية محل

وبعد ما قام كشخنا ولبسنا وقابلتنا امي
امي: وين بتروحون ؟

انا: بنروح السوق
امي من سمعت طاري سوق راحت تتجهز
محيميد: اقول يمه تراك منتب رايحه فيه ايس لاند بنروح نتزلج فيذاك<<--محفظته الحكي

امي: معليش انتو تزحلقو على كيفكم وانا خلوني ادور و اشوف سوقهم كان شي جاز لي
انا: لالا يمه السوق كله تمشين وانتي تتزحلقين حتى الي يبيعون لابسين السكيتنق يعني ما يمديك تجين>>>>>>ما تعرف تنصب

امي: اجل في امان الله بس لا تطولون
انا بابتسامة خبث: مع السلامه

وانحشنا قبل لا يستلمنا ابوي عاد وشلون نلقى له تصريفه بعد مع اني ما هقيت اننا بنشوفه خاق مع النادي حقهم من يقوم من النوم وهو مسنتر تحت

مدري وش يشوف

طلعنا انا ومحيميد ونصينا بيت البنت ونشوف بلونات وانوار وزحمه برا وصوت الاغاني من برا ينسمع يوم دخلنا لقينا الدنيا ترقص انا عجبني الوضع وقلطت معهم واخوي عيا عليه حلف ما يقعد لين يسلم على الي عازمته

يوم لقاها سلم عليها وهي انبسطت ما توقعت اننا نجي ما تدري اننا على الريحه جاهزين

انا جلست ع طاوله واتفرج على العالم ومحيميد يمشي وراها وفازع معها تشك انه راعي البيت

جلسنا شوي بعدين سكروا كل شي مشغلينه ..واشوف من بعيد احد شايل كيكه كبيييره وفيها شموع واثره الفزعه اخوي

جابها وحطها على الطاوله وتجمعوا كل خلق الله الي موجودين حولها والبنت تضحك و اخوي راح يجيب السكينه عشان تقطعها والله يا اني حقدت عليه تحس انه عرف يشبكها وذا التسلبه خاقه معه لقت من يحوفت بها

يوم قاموا يغنون قلطت وشاركتهم الغناء وعشان يفلونها زياده وزعوا النبيد والعياذ بالله

انا خفت اقلط معهم واتوهق اذا بغيت ارجع لأهلي ورحت ادور محيميد عشان اقوله ترى موب مطولين شوي ونطلع لقيته ماسك المايك ويستخف دمه ويغني والي حوله فاكينها ضحك..اناظر شوي الا القى جلاردينيو

باسط معهم ..اشرت له وساعه ازاعق ابيه ينتبه لي يوم شافني ويجي عندي..يقولي يا شيخه ذا الادمي خفيف دم اول مره اشوفه انا طقتني الغيره ..قلت هذا اخوي بس تراه سبهه ما عليك منه..

الا ويجي اخوي يقول هي يا ....((ناداني بأسمي الوسخ بغى يفضحنا بالمنتدى))
وش ذا الزين اللي معك ..؟
حقدت على محيميد جالس يتغزل في جل جل <<-- دلع لجلاردينيو

قلت انطم بس وكمل اغانيك .. قال: شوفي كانتس بترجعينه للرياض معنا ترى بيصير لنا كلنا مهوب لتس بلحالتس

يوم لتس ويوم لي
أنا :

آآه يالداشر ماتستحتي تقول لأختك كذا !

محيميد : المهم علمتس لا تقولين ما علمتني

جا جلاردينيو قالي امشي نطلع برا انا ما اقدر اخربها معهم وانا وراي دوام باتسر

طلعنا نتمشى..
انا:الا انت وش جايبك عزيزي انك كثيرون

جلاردينيو: ان سيليا بنت خالي ((راعية الحفله))..وانها خاقتون مع اخوك كثيراً تقول انه ظريف وجميل>>>>معليش ظريف ابلعها بس جميل ما في امل

انا: ان سيليا تبدو لطيفه((لطيفه ولا منيره))>>>>>>>بدينا بالمصاله

البيرتو:اريد ان افاتحتس بموضوع عزيزتي (...) ..تدرين اني صرت كبير اللحين وامي كل ما شافتني قرقت فوق راسي اعرس ..وانا اتعذر اول بالمونديال و اني مشغول اللحين خلص وما عاد عندي اعذار خصوصا اني لقيت البنت الي تناسبني .. هل تقبلين بي زوجاً غاليتي

انا من الصدمه فاقه خشتي وتقطعت من الوناسه اجل باتسر بصير اترزز معه في كل عود مثل فيكتوريا حرمة بيكهام واروح لندن اصلح شعري بمدري كم الف يورو

قلت له:اقبل وبس لو بغيت اللحين يالاطخمو

>>>>>ضايعه معه
قالي اجل امشي اوديك بيتنا اوري امي الجمال العربي و زوجة المستقبل..رحنا بيتهم وقالي انتظري شوي ابدخل على امي افهمها الموضوع واجيتس..قلت تيب وانطق عند الباب وانطل اذني ابي اسمع وش يقولها

اول ما دخل امه:ولدي حبيبي لقد اصبحت كبيراً متى ستتزوج اريد ان افرح فيك يا بني..
جلاردينيو:اني جاي اخبرك انني سوف اعرسو ..
امه:هذي الساعه المباركه يا وليدي واللحي ابدق على جارتنا بقولها بنجي نخطب بنتكم لوليتا

انا برا تصفق وجهي وجتني الصيحه وحقدت على لوليتا ولو اني اشك انها سديراويه من اسمها بس ولو اجل تسرق رجلي

جلاردينيو : لا انني سوف اتزوج بــ فتاة سعوديه اعرفها منذ زمن ان لوليتا اعتبرها مثل اختي مابي اعرس عليها
امه: اها بس اركد ما عندنا عيال ياخذون خواجات>>>>الله يالدنيا صرت خواجه اجل

جلاردييننيو: امي حبيبتي انها حياتي لا تحطميني اريد ان اتزوج من احب

امه: ترى عطيتك وجه بقوه لي كم سنه وانا اقردن فوق راسك اعرس اعرس يوم جيت تعرس تاخذ وحده موب من ديرتنا وارهابيه والله لو تتقطع بتاخذ لوليتا يعني بتاخذها وانت حمار>>>>قفلت اخلاقها امه

انا في هذي اللحظات العصبيه تذكرت ولد جيرانا الي قبل اطلطل عليه وامه اذا جت تتميلح عندنا قلت اقول بس شكل مردي لشهبانا

والطخمان في الجنه ان شاءالله ورحت اركض بروح بيت بنت خالته اخذ اخوي ونطس لفندقنا لأن طيارتنا الصبح لازم نرجع بدري

وانا اركض واركض وعيوني تملأها الدموع واركض واركض وقلبي يتفطر ويتقطع الماً واركض واركض >>>>>>خلاض درينا انتس تركضين

وشوي و اوصل لبيت التسلبه واشوف اخوي ما زال يستظرف اسحبه واخذ لي اول تكسي ونروح غرفتنا ..المهم اني لقيت اهلي نايمين واخوي خمد وانا يا عميري فاكتها صياح من الجرح الي صار لي بسبب جلاردينيو عاد تعرفون أصعب شيء جرح الحبيب

وانخر بتسي وأنا أدعي على أمه وعلى لوليتا ومن كثر الصياح نمت

اسمع صوت امي تصيح وحاله وابوي معصب يقول بتفوتنا الطياره وجع وين طس الثور!!

رحت اشوف وش السالفه لقيت محيميد منحاش وحاط لي ورقه عند سريري

كاتب فيها:

عزيزتي واووختي (...)..
اني احبتس وانتي اطلق بنت في الدنيا جبتيني هنا ولقيت شريكة حياتي
وشفت ان مستقبلي معها انا ابعرس على سيليا وانتوا ارجعوا للسعوديه
انا بعد كم سنه اذا ركدت اوضاعكم ابرجع لكم .. بس انتي صرفي اهلي
قولي انه انخطفت واحتمال اني فطست فماله داعي يجلسون يدوروني
اختي يا تسبدي منيب ناسي فضلك علي وان شاءالله اشوفك بعد كم سنه

الزلابه ..محميد

أنا : ايووووووون وأقول بنفسي وجععععععععع يالمخووور اجل بتاخذ لك وحده توك شايفها وانا حووبي الازلي ما في امل اعرس عليه

واروح لأهلي ابدبر السالفه واصرفهم امي تقطعت من الصياح وابوي ما فرقت معه كثير لأنه بيخفف مصاريف البيت

بس مشكلته ما استوعب موضوع الخطف (( لو انتس قايله انه ميت معليش خاطف معليش بس مخطوف قويه يعني من هالزين اللي في خشته!! ))

يبا لا تدقق انت امش بس نروح لديرتنا ..رحنا المطار ورجعنا لأرض الوطن ..وعشنا حياتنا ونسينا ان معنا بثر في البيت وانا كل يوم اتذكر جلاردينيو واشوفه يراكض في الملاعب يضيق صدري زياده

..

بعد مرور 6 سنوات وكنا جالسين في الحوش نتقهوى الا ويطق الباب علينا..يروح اخوي الصغير يفتحه ويطلع لنا محيميد

..انهبلوا العائله من وين طلع ذا السبهه ..امي موب مصدقه الوضع مسكتها صياح و ابوي يقوله:هماك مت!!

وانا متنحه اول ما دخل الا وراه 4 بزران بنتين وولدين..جلست اناظره والله انك بطل يا التبن وش ذا الطخمان

الي جايبهم معك صاروا عياله..
و زوجته جحدته عندها صديقها وسحبت على اخوي

عاد هو ما اخذ من طبعهم مره زعل وقال ابرجع لديرتي ..

خلاصة الحكي والبربرة اللي مامنها سنع بس كتبته اروح عن نفسي مع حومة الكبد وضغط الإمتحانات

:
1-اللي موب قد الاسهم لا يتميلح ويدخلها ياما تلحطوا عالم بسببها

2-الزواج من الأجنبية دايم يكونون ضحيته الاطفال

3-بالنسبه للناس الي يسافرون اتركوا عنكم المراقص والشراب وهالاماكن..والله اغلب الدول في الصيف تشوف ما يملي هالاماكن الا الخليجيين

أترككم بحفظ الله ورعياته ,,
أختكم :فتاه هلاليه ,,

{..~

after 3 days