بمناسبة كاس العالم .. قررت اني احلل بعض المباريات بنظام ( على حسب الفضاوه ) واليوم بما اني فاضي ومن ضيقة الصدر قلت خلني احلل مباراه السعوديه والمانيا



السعوديه والمانيا أو ألمانيا والسعوديه

{عشان مايزعلون الألمان}



اندبج المنتخب السعودي من ألمانيا بثمانية أهداف كل هدف يقول الزين عندي

وبدت المباراه من منتصف الملعب ( قل قسم ) من اقدام نواف التمياط ماامداه يتعدى دويرة نصف الملعب الا وجايك واحدٍ من الجلوف الالمان وقاطع الكوره من بين رجلين نواف ومن عقبها والماني لاعبه في حسبتنا



منذو البدايه واللاعبين السعوديين واضح عليهم الارتباك وبالماريه يقولون أن خميس العويران كان أكثر اللاعبين ارتباك يوم سألوه

وراك تتحقرص وتتنافض ؟

قال هذا من آثار الارتباك اللي اعيشه

قالو له وش العلاج معك؟

قال اقرب طياره على سوريا ابتفاهم مع كراسي الطياره ولا المضيفات



ونشوف الجانب الثاني اللي هم الالمان واضح عليهم الثقه ومشالله عليهم يمتازون بقوه جسماويه جلفه للغايه وهذا احد اسباب فوزهم مهوب عشان جلوف وبس التحامهم على الكره يخلي اللاعب السعودي يقمز اربعه متر جو أرض



وبدت المباراه وسيطره كامله المانيه ..

وفي الدقيقه الثامنه من الشوط الاول استطاع الطويل الجلف ينكر اللي رقمه تسعه في الماني انه ينبطح على الكوره وكان معه الدعيع وعبدالله سليمان شاتها من بينهم وقامت الكوره تمشي بالهون لين جاها ينكر مره ثانيه وشاتها في القول بس الحكم سنايدي ماحسبها هدف يقول ان مهاجم الماني ينكر منبرش غلط وحسب عليه فاول قبل لايجيب القول



هذا ابو صلعه ينكر رقم تسعه وفوقه عبدالله سليمان قبل ماصلفط على بجهته



وبعدها دار حوار خفيف بين لاعبين الماني والدعيع ملخصه :

ان الدعيع يقول ترا مامنا مزع ياويلكم ان شتو الكوره بوز ترا اببطل واطلع من المباراه قالو له الالمان مايكون خاطرك الا طيب يبو دعيع محناب جايبين عليك الا بالراس قام يضحك الدعيع ويقول اجل مشو خشومكم منتوب جايبين اهداف



مامداه الدعيع يخلص من حتسيه معهم الا والله يجيك مهاجم الماني رقم 11 اسمه كلوزه ولد مشالله عليه وسيم ومملوح وتوه ابو ثلاثه وعشرين سنه تسنه اياي ( اقول حلل وخلك ساكت ) .. المهم جاك هاللي اسمه كلوزه وحط فينا هدف يحبه قلبك بالراس في الدقيقه عشرين من الشوط الاول



تونا خالصين من الهدف الاول يالله تفسح في اجلنا تونا ريضين باقي سبع اهداف الله يعين اللي يحللون اثرهم يتعبون .. مير ابوريكم كلوزه المزيون تراه يشبهني بس انا شعري اسود



هذا كلوزه عقب ماسجل الهدف وواضح ان كنادره رخيصه لانها البصمه الثالثه


عقب ماسجل كلوزه الهدف توقع النقاد وانا منهم ان المنتخب السعودي بيقوم من نومته بس مهناش ماحولك احد قدرو الالمانيين وعن طريق ( شبيهي ) كلوزه .. تسجيل الهدف الثاني في الدقيقه خمسه وعشرين وبالراس بعد ... يعني كلها خمس دقايق وسجلو الثاني يعني كنك طالع من بيتكم تجيب خبز وراجع كلها خمس دقايق بس



وش رايكم اوريكم كلوزه مره ثانيه .. هاه هذا كلوزه رقم حدعش

كلوزه يتكنبس في الهوا مستانس يوم جاب الهدف والدعيع منبطح كنه يحل واجب رياضيات



احس ان تحليلنا طول شوي فهالشوط الماصل بنعجل بكم لاتزملون

في الدقيقه اربعين الا عشر ثواني سجل الالمان هدفهم الثالث بنفس طريقة الهدفين الاولين ومدري وش اسم اللي جاب الهدف لاني ماكنت عند التلفزيون .. طلعت وقتها احط مويه في مكيفنا الصحراوي لاني خست حر



وبعد مارجعت اكمل المباراه كان وجهي فال خير للالمان سجلو هدف في الدقيقه سته واربعين وهذا الهدف شكل ثاني لانه من قدم المهاجم العملاق والجلف يانكر رقم تسعه

والهدف عباره عن كوبري في الدعيع حارس القرن الاسيوي ياهي فشيله بس



وهذا العملاق يانكر اللي سجل كوبري في الدعيع



انتهى الشوط الاول بأربعة أهداف لألمانيا مقابل مهناش للسعوديه

رحت اصلي العصر يوم رجعت لينهم بدو من دقيقتين المهم راح الوقت والماني مغير فاتحه شوارع في الدفاع السعودي

يوم جت الدقيقه 69 موعدنا مع المملوح مره ثالثه المبدع في هالمباراه رقم حدعش اللي اسمه كلوزه سجل هدفه الشخصي الثالث والخامس للفريق الالماني .. بعد ماجته عرضيه قمز هو وعبدالله سليمان عليها بس كلوزه ضربها براسه مع انه ورا عبدالله سليمان وبعد القمزه اللي وش طولها

راس عبدالله سليمان وصل نص صدر كلوزه هذا يدل على ارتقائهم المونتاز

ضربها كلوزه براسه طقت فالارض همن دخلت واول مالمست الكوره سقف المرمى والدعيع يتفرج كعادته في هالمباراه



هذا كلوزه عقب ماسجل الهدف الثالث وواضح ان الدعيع ماكمل واجب الرياضيات





بعد مرور اربع دقايق وخمسطعشر ثانيه يعني في الدقيقه 73 قدر اللاعب الالماني لينكه رقم اثنين تسجيل الهدف السادس بالراس بعد مارفعوها ركنيه له جاب الهدف وقعد يطامر من الفرح جعله اللي منيب قايل



قبل ماينتهي الوقت الاصلي من الشوط الثاني بثلاث دقايق يعني في الدقيقه 87 قدر المخضرم الالماني بيرهوف يسجل هدف الماني السابع .. من خارج منطقة الجزاء بنظام ( تتحدوني اتزحلق واجيبها هدف ) وكان الدعيع يتحمل نسبة الهدف بنسبة تسعه وتسعين فاصله اربعه في الميه وهذي نسبه يتمناها كل طلاب الثانويه العامه الله يوفقهم واولهم ولد خالتي ناصر الحوطي مع انها بعيده على خشته بس ولو نتفائل .. يقولون ان نيوتن كان فاشل في الدراسه بس قدر يطيح التفاحه ويشوف الجاذبيه ويطلع قوانين يعني لايهمونك يبو دعيع تراك بطل بس اليوم خمباقي





انتهى الوقت الاصلي وحسب حكم المباراه ثلاث دقايق وقت ضايع يوم راح دقيقتين على نهاية الوقت الاصلي يعني في الدقيقه 92 احتسب حكم المباراه اللي داهن شعره بفقس فاول لصالح الماني خارج منطقة الثمنطعش بمترين وشبر



سددها اللاعب الالماني شنايدر اللي رقمه 19 في مقص المرمى ويذكرنا بأيام ابو يعقوب مير لو ان يوسف فيه كان لعب في هالسملق الالمان كلهم

مانقول الا ليت ابو يعقوب يعود يوما فاخبره بما لاتلحسه كله



لقطات من خارج المباراه :


ناصر الجوهر وهو يبتسي ويسمح دموعه مير ازين مافيك ساعتك كنها ساعتي



** شوهد مشجع سعودي في المدرجات معه حرمته وملبسها نقاب وكاب المنتخب السعودي اقول ياسفابكم حرام قعدتكم في هالملعب ليتكم رايحين للسوق اصرف لكم



** مشجع ياباني يلبس العلم السعودي وحاط أصبعه في خشمه ولحظه تفكير عميقه



** مدرب المانيا فولر يقول ودي اني طاب مع فريقي ومسجل هدف كعب



** سواقنا قعد يضحك علينا ويقول انتا سيم سيم منتخب مكاو .. مما جعلني امصع اذنه واخليه يمسح السياره وهو حاط الفوطه في وجهه



** وصول عدد كبير من المسجات على جوالي اخترت ثالثه منها وهي



** عفواً نعتذر لهذا الخلل الفني ويمكنكم إكمال المباراه على البلاي ستيشن .. المرسل صالح كامل



** خبر عاجل .. تم دمج الرئاسه العامه لرعايه الشباب مع الصرف الصحي



** لغز اتحداك تحله ... حارس الماني وش لون فنيلته وكم رقمه ؟



الى اللقاء مع تحليل مباريات اخرى