( الأمبـراطورية البنقـالية ) .. ( Empire of Bangladesh ) ..!!
بســم اللــه الرحمــن الرحيــم
(( في التاريخ .. يُذكر أن هناك إمبراطورية كانت عاصمتها القسطنطينية وتسمى الإمبراطورية البيزنطية التي مكثت ما يزيد عن إحدى عشر قرناً وظلت قائمة حتى عام 1453 م و عندها استولى الأتراك العثمانيون عليها .. وأيضاً يا اعزائي المشاهدين .. يذكر التاريخ أن هناك امبراطورية تسمى بـ امبراطورية المغول التي تمثل أعظم مأساة لـ أوراسيا والتي تكونت بسبب توحيد قبائل المغول . فبدأت تحت حكم جنكيز خان الذي أعلن كـ أول حاكم لها ومن ثم حكمت هذه الامبراطورية شعوب تعدادها التقريبي 100 مليون نسمة ومساحة من الأرض مقدارها 33.2 مليون كم مربع وبحسبة بسيطة تلك المساحة توازي ربع اليابسة على الكرة الأرضية . بنهاية القرن الرابع عشر انتهت هذه الامبراطورية وانتهى أمرها .. وهكذا يا أحبتي الكرام .. تأتي أقوام ومن ثم تنتهي ويبقى التاريخ هو الوحيد الذي يحتفظ بها .. واليوم .. بدأت ( امبراطورية البنقال ) بالتكوّن .. حيث أخذت ( ولاية البطحاء ) عاصمة لها .. سيأتي يوم ونقرأ في الطرقات ( خورشيد .. بلازا ) .. وسيأتي يوم سيكون فيه هؤلاء البنقال من أكابرة البلد .. وسيأتي يوم .. سنسمع في الإذاعة ( هنا البطحاء ) .. والمهم .. متى سـ تباد هذه الإمبراطورية .. الإجابة قد تكون مستحيلة )) .. (( خخخخخخخخخ ياخي طف التلفزيون .. ولا غيّر القناة .. أجل امبراطورية البنقال ؟؟ هههههههههه ياخي والله أن هالسبهة مأجّر مخه )) .. (( ليش .. ليش .. ياخي كلامه فيه شي صح .. وهو يتكلم عن العمالة البنقالية وخطرهم .. بعدين هذا إنسان مثقف ويتكلم بالتاريخ موب مثلك )) .. (( اقول يا سعود .. شارب شي ؟ ياخي اصبر شوي وأعلمك من هو المثقف )) ويجيب محمد لابتوبه ويفتح قوقل ويبحث عن كلمة (( امبراطورية )) وطلع له كلام المثقف في التلفزيون بالنص .. يعني ابو الشباب (( والحديث لـ المثقف التلفزيوني )) صار من رواد قوقل ويطلع لـ الناس على أساس أنه (( مثقف )) .. (( هاه .. شفت يا سعود .. اقرا كلام خويك هنا .. ياخي واضح أنه اي كلام من هرجه .. ياخي المثقف يوضح عليه من فكره .. من إختياره لـ الالفاظ .. من اشياء كثيره )) .. (( يا محمد .. لو تدقق في كلامه بـ تلقاه صح .. بعدين لا تقنعني انه موب مثقف .. ياخي معروف .. عموما نرجع للبنقالية .. تدري أن الكويت احتفلت قبل فترة بـ اخر عامل بنقالي طالع من ديرتهم )) .. (( بالله ؟؟ غريبة !! )) .. (( تصدق ان البطحاء صارت مهزلة في مهزلة مثل ما قال هاللي تضحك عليه )) .. (( وشلون يعني مهزلة في مهزلة ؟؟ )) .. (( يعني .. صار الفساد فيها شي طبيعي والسبب يعود للبنقالية )) .. (( لا لا لا .. هو صدق اللي تقوله ؟ )) .. (( ايه وش دعوة .. انت وين عايش .. بعدين تصدق أن سالفة تمرير المكالمات اللي أخترعها هم البنقالية )) .. (( ياهوه ... روقنا كلّش البنقالية )) .. (( ياخي أنت حبيب .. عاد تدري ان هالبنقالية هم اللي دمروا الشباب السعودي )) .. (( خخخخخخخخخخخ ياخي انت كل مالك وتتطور أول شي بديت من عامل واحد بنقالي لين صاروا هالبنقالية هم اللي دمروا الشباب السعودي .. ياخي روقنا بس )) .. (( هذي مشكلة الجاهل .. أنت وش درّاك ؟ البنقالية ذولا اللي انت تدافع عنهم .. )) .. (( ادافع عنهم ؟؟ !! ما دافعت عنهم )) .. (( المهم .. ذولا هم اللي ( أشبه ما يكون ) انهم حكموا حي البطحاء وصارت البطحاء الحين تحت حكم البنقال )) .. (( خخخخخخخ ياخي انت شارب شي ؟ ما أردى من هالدرج اللي في التلفزيون الا انت )) .. (( لاااا وازودك من الشعر بيت .. الحين مخططاتهم اتضحت )) .. (( خلاص .. خلاص يا سعود .. تكفى فكنا من خرابيطك .. ياخي العماله كلها داجة لا البنقالية ولا الهنود ولا غيرهم .. خلني أقولك سالفة أبوي ذاك اليوم )) .. (( اسلم )) .. (( يا طويل العمر .. أبوي ذاك اليوم راح لمحل غرف النوم بيشتري ( غرفة نوم ) لـ أخواني الصغار الاثنين .. طبعاً ما هي جاهزة الغرفة تفصيل .. المهم .. انه طلب من العامل ( وكان من اليمــ ....الشقيق ) << حاولت اشفر قدر المستطاع لان ما ودي أشهّر بالعالم للمصلحة العامة واذا عاد صرتو مصحصحين وعرفتوا الجنسية فـ تراني ما عممت وأنا أعني ذاك العامل بعينه بغض النظر عن جنسيته .... المهم نكمل كلام محمد .... وطلب من ذاك العامل سريرين و دولاب و تسريحة بس .. واتفقو على السعر اللي هو 6500 ريال )) .. (( طيب .. وش الغريب ؟ )) .. (( اقول اقطع واخس خلني اكمل .. المهم واتفقوا على السعر وجا ابوي للبيت وعلمنا عن الغرفة .. المهم .. ما أخفيك ان العائلة كلها استغربت من السعر المبالغ فيه .. قالت الوالدة : (( ودنا نروح ونشوفها )) .. وفعلاً .. خذت اهلي و وديتهم للمحل .. وشفنا الغرفة اللي فصلّها الوالد وصورتها وقلت لـ أهلي يركبون السيارة شوي .. المهم واروح لـ محل جنب خوينا واوريه الصورة اللي صورتها للغرفة وقلت له : (( بـ كم تفصل لي زيّها ؟ )) .. قال لي : (( بـ 5000 ريال )) .. عاد ما اخفيك أن انقهرت من نصب هالعامل لكن .. خلاص .. ما فيه حل لان الوالد اتفق معه .. المهم .. وارجع للسيارة ونزلت أهلي من السيارة ودخلنا المحل مرة ثانية .. قالت الوالدة : (( طيب ودنا نحط دروج في نفس الاسرة (( الاسرة جمع سرير )) و نكنسل التسريحة )) .. رحت انا يم العامل وقلت له عن التعديل اللي طلبته الوالدة .. قال لي : (( ياخي ما عندك مشكلة .. اي شي تبغاه يصير )) وفعلاً اتفقنا انا واياه على التعديل .. والبديهي أن السعر راح يقل لأن التسريحة كنسلناها .. سألته : (( كم السعر ألحين بعد التعديل ؟ )) قال : (( 6800 ريال وصدقني خفضت لك السعر لـ اقصى حد )) .. قلت له (( الحين انّــا كنسلنا التسريحة وطلبنا دروج في السرير بس .. كيف يزود السعر ؟ )) قال : (( هذي أسعارنا .. تبغى ولا لا ؟ )) والرجّال ما اخفيك انه استفزني .. ناصب علينا بـ سعر الغرفة و يبي ينصب علينا بـ التعديل اللي طلبناه .. وقلت له (( لا خلاص .. ما ابي تعديل لكن متى تخلص الغرفة ؟ )) .. قال : (( بعد 15 يوم )) .. قلت له : (( بعد 15 يوم اذا ما جبتوا الغرفة راح أكنسل الغرفة واخذ العربون )) وفعلاً خليت الغرفة على ما هي عليه بدون تعديل وقلت للوالدة انهم بدوا في تفصيل التسريحة ولا نقدر نعدل .. و مشت على الوالدة هالتصريفة .. وما اخفيك اني ودي أرجّع الغرفة لهم كلها بسبب نصب هالعامل .. المهم .. وفعلا مر 15 يوم ولا جت الغرفة واستانس .. وادق على العامل في اليوم الـ 16وسألته عن الغرفة ورد (( بكرة ان شاء الله .. راح تخلص وراح أجيكم .. متى تبغون أجيكم ؟ )) قلت له : (( لا خلاص .. اتفاقنا 15 يوم والحين مر 16 يوم .. خلاص اليوم بـ اجيك وبـ اخذ العربون )) .. رد : (( ياخي خلصنا الغرفة .. وفصلناها لكم .. واليوم اجيبها لكم .. ألحين نقدر نخلصها )) .. قلت له : (( اتفاقنا .. 15 يوم يالله مع السلامة )) وفعلاً واروح له .. وقعد يترجاني عشان اخذ الغرفة ويقول : (( اذا ما خذت الغرفة .. راح نبتلش بالغرفة عندنا لانها تفصيل )) .. أنا رفضت .. وهو يحاول .. لين قلت له : (( انا صورت موديل الغرفة وسألت محل ثاني عن تفصيل غرفة مثلها وقال لي بـ أفصلها لك بـ 4000 ريال .. وانت قهرتني بـ سعرك لكن ما اقدر احاجك ولانك اتفقت مع الوالد ونصبت عليه .. لذلك .. اذا بـ تعطيني الغرفة بـ أربعة راح اخذها ولا رجع لنا الغرفة )) قال : (( طيب اصبر بـ اكلم المدير )) .. وابو الشباب نصاب لا كلم مدير ولاهم يحزنون ... ويرفع سماعة التلفون .. ويتكلم كأنه يكلم واحد وهو نصاب وينزل السماعة وقال : (( المدير .. رافض وقال أقل سعر بـ 5000 ريال )) قلت له : (( طيب كلم المدير مرة ثانية وقل له ان الزبون قال بـ 4000 غير كذا ما فيه )) وفعلاً رجع للسماعة و سوا تمثلية جديدة .. وانا في هالوقت طلعت الفاتورة .. ودقيت على رقم المحل .. ألا والتلفون يرن وابو الشباب ماسك السماعة .. واتضح انه نصاب فعلاً .. عاد قلت له : (( ياخي ما تخاف الله .. يكفي نصب )) وهو طاح وجهه .. لين وافق يعطيني الغرفة بـ 4000 )) .. (( طيب يا محمد هذا شخص واحد يمنــ ... من عدد كبير من اليمنيـ.... لكن انا اتكلم عن البنقالية والفساد اللي سببوه في البطحاء وغيرها )) .. (( يا سعود أنا أقولك .. ان العمالة كلهم نصابين .. موب البنقالية لحالهم والمفروض أن الحكومة تشد على كل العمالة .. وبعدين .. البطحاء فيها من الفلبينيين والاندونوسيين وغيرهم من كل الجنسيات .. يعني الفساد مصدره كل الجنسيات )) .. << وانتهى الحوار بينهم وكل واحد مقتنع بكلامه ولا اقتنع بكلام الثاني ..
@@ ما يستفــاد @@
** كثير يطلعون لنا ناس ( يتفلسفون ) في التلفزيون وغيره ويبون يثبتون انهم مثقفين وهم من جنبها ..
** طبعاً .. ما فيه امل يطلع لنا واحد ويتكلم مثل هالخبل اللي شافوه سعود ومحمد في التلفزيون لكن انا بالغت في هالشيء لان فيه ناس مكبرين الموضوع وكأنه البنقلة فعلاً راح يستولون على البلد مع العلم أن فيه جنسيات ثانية اخطر منها لو تكلمنا بالجنسيات .. الزبدة .. ان الشعب لازم يواجه ( خطر ) العمالة ككل مو يخصص جنسية ويتجاهل الباقي ..
** الشخص المثقف ( على ما قال محمد ) يوضح عليه انه مثقف من فكره من أسلوبه .. موب كل من هب ودب وعطانا معلومة قلنا عنه مثقف وناخذ برايه على أساس انه مثقف ..
** لو تقّفل ( قوقل ) ان كان اختفى الكثير من ( فلاسفة العصر الحديث ) ..
** العمالة ( بشكل عام ) شر لابد منه ( حالياً ) ولابد ان الكل ياخذ حذره منهم ..
** ( بنو بنقال ) ألحين صاروا حديث الشارع وصار الشر كله منهم لحالهم تقريباً ولو طلعوا من السعودية ان كان صارت العمالة افضل .. واللي اعجبني ان الشعب وقف ضد ( حضارة البنقلة ) لكن .. ياليت الشعب يوقف ضد ( الدمار بشكل عام ) اللي يجينا من العمالة بكافة الجنسيات ..
** اذا بغيتوا تشترون غرفة لا تخلون شيابكم يتفقون مع المحل على السعر ** ما اخفيكم ان العمالة البنقالية تستحوذ على ( نصيب الأسد ) من الجرائم الحاصلة في ولاية البطحاء المقر الرئيسي لهم .. لكن .. موب كل شي يصير منهم .. أجل ذاك اليوم أقرا خبر ( دكتور .. يغتصب فتاة مريضة تعالج عنده ) ويطلع لي ابوي ويقول ( اكيد بنقالي .. البنقالية ذولا ملاعيـ... جدف ) ..
** صرنا نألف قصص عن ( البنقالية ) خيالية ولا يمكن أن يصدقها عقل والسبب البهرجة الإعلامية اللي صايرة ..
** من وجهة نظر شخصية .. انا اشوف أن المشاكل الحاصلة كلها بسبب ( كثرة العمالة ) بغض النظر عن الجنسية ولابد اننا نقلل منهم بأكبر قدر ممكن .. لان العلاقة بين ( كثرة العمالة ) و ( الفساد ) علاقة طردية ..
.
.
إنتهــى
.
.
ابـو راشــد