تبي تصير رومانسي... اعزم TURKI-15 على ورق عنب.. تفاصيل غزوة السليمانية المباركة
حيـــــــــــاكم
لم تكن ليلة التاسع من تمّوز عاديّـة كأي ليلة على تركي 
فقد كان منذ (بين العشاوين) يتنقل بدون وعي بين المكائن 
وكانت عيناه تسابق عقارب الساعة وصراصيرها بانتظار الموعد
و يـــا لــه من موعد اخيرا وجد من (يعزمه) على لقيمات يقمن صلبه وهو رغم كونه يشغل منصبا كبيرا في شركة (الكرهب)
حيث أنّه (الرئيس التنفيذي والمدير الاقليمي للقطاع الشمالي الجنوبي المتفرع من شارع منفوحة العام) 
إلا ان مشاغله الكثيره ومسؤولياته الجسيمة لم تكن حائلا بينه وبين التواصل مع واحد (داج) شروا كاتب هالسطور 
فلله درك ياترّوووك
الموهيم
عند تمام التاسعة والنصف.. استأذن تركي وانطلق الى البيت
دقّها (ترويشه).. وسوّا (ميك اب).. وشرب (سفن اب) ثم امسك بكل حنّية بهاتفه الخلوي... وكان لي شرف استقبال مكالمته
تركي : اقول يبووو.. تراي زاهب
فهد : هلا هلا.. ابشر دقايق وانا عندك
وفعلا.. بعد 13 دقيقة وسبع ثوان وستة اجزاء.. كنت هناك وخرج تركي بكل شموخ ووضوح وبدون أي تنميق
فاكتشفت أنه اطول مني.. وانحف
لكن مهوب أزين ركبنا الناقة.. وانطلقنا وانا بالطبع كنت توّي ضارب مشوار للمطار.. معي الله يرزقنا واياكم (شغالة) تبي تطس وشف روعة التباين في المقام والمجال..
قبل دقايق كان جنبي شغالة... وبعدها بدقايق صار جنبي تركي
شخصيا اسأل الله العظيم أن يعزّ الاسلام والمسلمين 
نرجع لمحور حديثنا
قعدنا نبترم في شوارع الرياض ونبربر ونهذر بسخاء
واغتبنا لنا كم واحد... مو غيبة الا تشذيب... الله يعفو عنّا 
وعندما حانت الساعة الـ 12 .... حان وقت الفدغ
فحذفنا بالدركسون الى جهة السليمانية
وغزونا ذلك المطعم اللبناني بالاسم... واللي يشتغلون كل ابوهم اتراك 
وطلبنا مشاوي مشكلة... ومقبلات... وورق عنب
وتهاوشنا عند المشروب انا اقول دايت كولا... وهو يقول دايت بيبسي (اتفق العرب على ان لا يتفقوا) 
لكن ترانا معذورين... الموضوع مهم بصراحة... وتروح فيه ارقاب
وعلشان انا طول عمري (الرجل الذي ----> قوي) صفينا على الكولا وخلال دقائق بسيطة صارت المائدة جاهزة
وكانت المفاجأة الكبرى
بينما انا آكل.... كان تركي (مدنّق) ويصيح والاغرب انه حاط صحن ورق العنب قدّامه فهد : سلامتك ترّوووك... وش فيك ؟؟
تركي : لا لا تسلم مافيني شي.. بس ورق العنب...
فهد : وش فيه ؟؟
تركي : ابد.. بس انت خابر بيتنا والزحمة اللي فيه.. وماقد تهنّيت بورق عنب.. كل ما جابوا صحن تلاقطوه بثواني وانا آخر من يعلم.. والحين انا مو مصدّق.. لحالي ومستفرد بصحن ورق عنب... صعبة والله صعبة 
فهد : ياعمري ياتركي.. خنقتني العبره معك.. وسّع صدرك ولا يضيق الخاطر وقمت انا وسوّيت نفسي (ذيب) وناديت المباشر وقلت له يجيب شمعتين وخلّيته يولّعهن بجنب ورق العنب
وبدأنا بالافتراس بعد البكاء والنعاس
وتدرون عاد وش اكثر شي رفع ضغطي وجاب لي المرض ؟؟
تركي بعد كل الصياح ماذاق ولا حبة ورق عنب 
طيب ليش تسوي زحمة وتقلبها فاتن حمامة ويونس شلبي
على كل حال..
الحمدلله تعشينا وعدّت على خير
وعقبالكم جميعا ان شاءالله
ورده
هذي صورة العشاء
<<<<< هذا انا ..>>>>>>>> 
الوضع العادي
