( مضــاد للصدمــات ) .. !!
بســم اللــه الرحمـن الرحيـم
يالله حيّهم .. يالله حيّ كل(ن) باسمه ..
( الشخصيات مع تعريفات بسيطة )
** ( حسن أبو ركبة ) : شاب اسمر , قصير شوي , شخص مجنون كورة , ودايم هو اللي يجمع شباب الحارة عشان يلعبون ..
** ( رضا المحش ) : شخص برضوه اسمر , طويل بالحيل , شكله يوحي بانه أقشر , شباب الحارة يخافون يلعبون معه ..
** ( محمد أبو مفك ) : شخص فنان كورة , تاريخه يشهد له بانه مبدع , لكنه ساهم في تدمير مستقبل ( عصويد ) ..
** ( عصويد ) : برضوه مبدع , الحارة كانوا يخلّونه الكابتن وهو اللي يفرّق لان الكل يحترمه . لكن للأسف الاصابات ذابحته ..
** ( شلاّح ) : شاب طويل , أول مباراة لعبها أبدع فيها .. وانهبلوا عليه عيال الحارة لكن قعد له فترة وهو مستواه سيء ..
** ( حمدي ) : هالادمي لؤطة , شخص راعي مهارات غريبة ماشاء الله , وسبحان الله ما يعرف يلعب ألا في ملعب ( سلّيم ) ..
** ( ذابح ) : شخص يعتبر كبتن فريقه , حماسي , صارت له سالفه مع ابو ركبة بـ اقولكم عنها ..
** ( أدينّي الكورة .. يا محش ) .. ( خود ) << فريق ( ابو مفك ) يتمرنون في الفجر << والله يا عليهم وقت بعد .. الفجر ؟! .. المهم ذولا ناس والله ياعندهم لياقة بعد .. فريق يكرف عمره كرف الله لا يوريكم .. ويجي ذاك اليوم .. ويجمع ابو مفك فريقه وقالهم ( عندنا مباراه مع فريق حمدي بوكره .. شدوا حيلكم ) ويمر يوم .. وفعلاً جا فريق حمدي ولعبوا مع فريق ابو مفك .. وهجمة من هنا وهجمة من هناك .. وفجأة ينبرش ( ابو مفك ) على عصويد انبراشه تكتب في التاريخ .. ويوقفون اللعب وابو مفك يقول ( قوووم يا واد .. خليّنا نكمل ) << نعنبو بليسك الرجال راح فيها وانت تقول قوووم يا واد .. و خذوا عصويد و نقلوه لـ الممرضة ( كوثر ) وهي بدورها تكشف عليه .. في الاخر اصدرت البيان الاتي : ( يمنع عصويد من اللعب .. لمدة سنة ) .. ومرت سنة ورجع عصويد لـ اللعب . لكن تبون الصدز .. عصويد مهوب عصويد اللي اعرفه .. ماش .. مستواه اندمر .. وصار .. من اصابة في اصابة لين قرر يخلي الكورة خير شر ..
** ( حسن .. حسن وصمخ .. ما تسمع الاذان .. يالله قم صل ) .. ( طيب .. قايم .. قايم ) .. ( لحووول .. هالادمي يبي من يرقى له ) ويرقى ابو حسن لـ ولده ( ألحين أنت ما تسمع وش أقولك ) ويطمر حسن كنّه مقروص وراح يغسل ويتوضا .. عشان يصلي العصر . وبعد الصلاة . دخل حسن البيت ونطل ثوبه على الكنب .. واثره مولّم ( البدلة ) .. وعلطول غيّر وطلع .. رايح للملعب .. وطبعاً دايم يكون اول واحد يوصل .. ولا عنده مشكلة .. يقعد يطقطق لحاله لين يجون باقي ( الشباب ) .. بعد ربع ساعة تقريباً وصلوا .. وحسن جمعهم وقالهم : ( يا شباب .. ترا ذابح يتحدى .. وتكفون نبي نكسر راسه هو و اخوياه ) .. الشباب وافقوا .. على انهم يبارون فريق ( ذابح ) .. وبدو لعبهم زي العادة .. مرت الايام .. ويجي ذاك اليوم اللي فيه مباراة فريق ابو ركبة مع فريق ذابح .. وفعلاً لعبوا .. وبعد خمس دقايق .. ألا وابو ركبة ( ينبرش ) على ( ذابح ) ألا وهو قاص(ن) رجله قص .. وتبون الصدز .. اللي أشوفه ان ابو ركبة ما جاب طاري الكورة وعيونه ما تشوف ألا عصاقيل ( ذابح ) ويوقفون المباراة و يودّون ( ذابح ) للمستوصف .. وكشفت الممرضة ( كوثر ) عليه .. وأصدرت البيان الاتي : ( يمنع ذابح من اللعب .. لمدة سنة ) ..
** ( ملعب سليّم ) .. هالملعب هو أكثر ملعب متطور في ذيك الحارة .. وسموه على سليم .. لان سليم ذاك حاط(ن) حدايد يقالكم انها مدرجات .. وشباب الحارة اللي ما يلعبون يحبون هالملعب عشان هالمدرجات اللي حاطها سليم .. عاد حمدي .. هالادمي اقولكم .. فنان .. لعبه غريب .. لكن والاغرب أنه ما يعرف يلعب ألا في ملعب ( سليم ) ولا احد يدري ليش .. وصاروا فريقه يتفائلون بـ ملعب سليم عشان يدّهر حمدي .. جا ذاك اليوم .. وحمدي راجع للبيت .. قابله واحد وسأله ( الحين انت ياحمدي .. ما تعرف ألا في ملعب سليم .. ليش ؟ ) .. ( هههههههههههه .. ياخوي ملعب سليم اذا شفت الناس حولي تناظر المباراة استانس واعرف ألعب مهوب مثل ملعبنا .. رايح فيها ولا احد(ن) يجيه .. ) .. ( يعني هذا السبب يا حمدي ؟ معقولة .. مدرجات سليم الله يذكره بالخير هي اللي تخليك تعرف تلعب ؟ ) .. ( يا خوي .. موب مسألة أنها تخليني اعرف ألعب .. انا الحمد لله أعرف ألعب لكن لما يجون الناس ويتابعون ويشجعون .. هنا تحس بالفرق ) .. وانتهى الحوار ..
** ( شلاّح ) هالادمي يلعب في فريق حمدي .. أول مبارياته أبدع .. وانهبلوا عليه شباب الحارة .. لكن جاه وقت مدري وش اللي جاه .. مستواه هبط بشكل غريب .. حاولوا معه .. يمين .. يسار .. ماش .. ابو الشباب ساحب ولا جاب لهم طاري .. ( وين شلاّح .. الاولاني ؟ ) مدري .. ولا كنّه شلاح اللي أعرفه .. عاد حمدي تقدرون تقولون انها قفلت معه .. وراح لـ شلاح وقاله : ( اسمعني .. يا شلاح انا بـ اعطيك فرصة أخيرة وبـ اخليك تلعب اساسي وحط في بالك أن هذي هي الفرصة الاخيرة .. ان قدمت شي ممتاز راح تبقى ولا الله يستر عليك ) وفعلاَ شلاح تأثر بـ كلام حمدي .. عاد قبل كم يوم .. صارت فيه مباراة بين فريق حمدي وفريق ابو ركبة .. ولعب شلاح أساس .. وتبون الصدز .. شلاح كنّه بدا يرجع لـ ايام زمان .. عاد ما امداها تخلص المباراة .. ألا و شباب الحارة يطيرون بـ شلاح وخلوه أحسن لاعب .. مع العلم انهم كانوا شابين عليه قبل المباراة ..
@@ بالملقــاط @@
** ( الاصابات ) في ملاعبنا السعودية من الملاحظ انها تزداد ولوحظ وجود انبراشات ( جهنمية ) يتقنها البعض وعلى رأسهم ( رضا المحش ) و ( حسن ابو ركبة ) وطبعاً من المستحيل أن نقول ( لابد .. ان نوقف هذه المهازل ) لاننا لا نستطيع إيقافها .. لكن المهم في الامر ( كيف تساهم في تفادي هذه الانبراشات عزيزي اللاعب ) هذه ثقافة لابد على لاعبينا أنه يتعلمونها .. طبعاً حديثي هذا لا يعني ان كل اللاعبين لا يحاولون ان يتفادو الانبراشات ... لا ... بالعكس .. فعلى سبيل المثال الفيلسوف يوسف الثنيان .. هذا اللاعب كان ذكي جداً .. من أكثر اللاعبين ( إستقصاد ) ولكنه بتوفيق الله ثم ثقافة ( تفادي الانبراشات ) تفادى الكثير منها .. وكان يعرف كيف يتفادى خطر ( الانبراشات ) وهذا الشي لابد من الكل أن يتفهمه .. بل لابد على ( الأجهزة ) الفنية في الفرق انها ( تثقّف ) اللاعبين على مثل هذه الامور . في الايام الماضية وخصوصاً في مباراة الاتفاق والاتحاد .. وانا اتكلم عن ( زحلطة ) رضا تكر على ( عبدالرحمن القحطاني ) في الحقيقة اعجبتني ردة فعل القحطاني مع تكر عندما ( قفز ) بحيث أن الانبراشة يكون تأثيرها أقل عندما تكون في الهواء . لان ( عندما يكون اللاعب واقف على الارض ويتلقى انبراشة موجهة لـ قدمه فالضرر أكبر ... بسبب الضغط الحاصل من الوقوف ) .. وهكذا ..
** ( العنبر ورجوع مستواه ) في الحقيقة .. اعجبني العنبر هذه الايام .. لكن لا أريد أن ( أطيّره فوق ) وأجعل منه نجم النجوم .. وان كان العنبر عاد فعلاَ لمستواه الذي كنا ننتظره فـ لابد ان ( يستمر ) و أيضاً ( يتطور ) وهكذا نستطيع ان نقول أن العنبر أصبح ( العنبر ) الذي نعرفه . وعندما أتكلم عن العنبر فلابد ان اشكر الاداراة الهلالية اولاَ لـ انها التفتت لـ هذا ( العنبر ) هذا الموسم خصوصاً .. ولسان حالها يقول ( بـ نشوف وش اخرتها معك يالعنبر ) وفعلاَ لم يخيب ظنهم العنبر وبدأ في أول مرحلة للعودة لـ زمن ( العنبر ) فكل الدعوات لك يا عنبر .. ونتمنى ( استمرار ) تألقك ..
** تطور مستوى الهلال بعودة ( روح الهلال ) شاهدناه في اخر مبارتين فقط .. وأيضاً بقي الكثير لدى الزعيم لكي يقدمه .. وعندما اتكلم عن ( روح الهلال ) فلابد أن اتطرق للجانب النفسي .. وهذا الكلام محسوب على الجهاز الفني .. لابد انه يحظّر اللاعبين ( نفسياً ) قبل أن يحظرّهم بدنياَ ..
** ( التايب و علاقته بالجمهور ) علاقة وطيدة .. والحق يقال .. ليس التايب وحده .. بل كل اللاعبين يريدون الجمهور .. وطبعاً الجمهور من الطبيعي أن يكون له مطالب . وأقل شي هو ( تقديم المستوى اللائق ) .. إذن العلاقة متبادلة و ببساطة أستطيع أن أقول ( لا زعيم بدون زعماء ولا زعماء بدون زعيم ) ..
** لا أريد أن ( اهضم ) حق الداهية الروماني .. فـ كوزمين له ( فضل ) في تطور الزعيم والفضل لله أولاً و أخيراً .. وله فضل في إعداد العنبر محمد .. وأكن له الشي الكثير هذا الانسان .. ولكن لم اتطرق له بشكل ( محوري ) لانه يقدم عطاءات بشكل ثابت وهذا ما يميزه هذا الانسان .. فـ لك جزيل الشكر يا كوزمين .
.
.
إنتهى
.
.
وتقبلوا خالص الود
.
.
نيوتن