(زخارف من هنا ) الشتيمة بتلف .. وتلف .. وترجع لصاحبها ( وزخارف من هنا ) - نادي الهلال السعودي - شبكة الزعيم

ابو طـــــلال · #1 16/11/2008, 09:52 PM

يـــا

يــــا

باللى حضرووا

في بداية شبابي .. يعني يوم انا كبر فيّاض

.. وكل الفن هلالي

.. ويزيد

..( بوجه لهن تحية كتير كتير قبيرة ) يعني اوجة لهم تحية كبيرة

كنت عيّار بقوة .

. امسك الكلمة على هذا .. وأعلق على ذاك ... الوكاد اني مااوفر شي ..

وكل كلمة امسكها وياويل اللى مسكت عليه كلمة .. كان أسلوبي .. تكرار الكلمة بسماجة

.. وأكركر ( وهو الضحك بقهقهه )

لين ماتدمع عيوني يقالي ميت ضحك

.. حتى اطلعها بالغصب علشان احسسه اني متشمت فيه .. عاد ربعي متعودين علي ومتعود عليهم ..

لكن المصيبة لاصارت هالتصرفات عاده .. تحس انك ( سخيف ) في بعض الأوقات

.. يعني صرت امسك على الشيبان كل كلمة ..

( اه واللهي )

أمي

لاغلطت في شي بكلامها افطس من الظحك
جدّتي والله ماسلمت من هالعاده اللى فيني ... يعني مثلا تقول أبي كتشب .. تقول عطني ( كشتب ) وهات ياكركره وظحك

ومره تبي مايونيز .. ونطقتها بشكل برضه غلط ... وقلت لا .. مانيب معطيك المايونيز ياخلفهم لين ماتقولينها خمس مرات .. وانا ميت ظحك ...

ومره جيتها مسير عليها .. قالت : أطلب لك بيزه ؟؟ قلت وش بيزتوه ؟؟ المهم ساعة انا واياها لين مادخل علينا ولد خالتي الصغير وقال تقصد ( بيتزا )

وتوها طايحة بالطلب عن طريق الجوال .. صرنا لاجيناها الصبح طلبت بيتزا

لكن صارت هالعاده تلازمني بالعمل .. ..خصوصا الأجانب نمرر كم كلمة عليهم ( غبيه ) واخرتها يقول الدكتور ( اااه صح )

مثلا أقول لدكتور مصري .. دكتور تتوقع لو ( ألفعك ) = ( يعني اعطيك كف ) تتوقع يحتاج لها تحويل للعظام ؟؟ وهو مايدري وش اقول ويرد ( إيه ؟؟ بتئول إيه ) ؟؟ أقوله اقصد اللفعة اللى بالظهر يعني الألم يادكتور .. يحتاج تحويل للعظام ؟؟ يقولي ( أيوه أكيد ) وكلام كثير .. نكون عند الدكتور عشرة مايصمل يقعد إلا اثنين وهم اللى مسكوا ارواحهم وماظحكوا ...

طلال صار ينتبه لكلامه معي .. يحاول مايغلط .. أول معقده على كلمة أخبارك يقولها ( أبخارك ) وحتى إذا جيت اسمع له سورة ( الكوثر ) ويرددها كلها كاملة .. لكن يدقّر عند ( الكوثر ) يقولها : الكوفر ... ومره الكثور ..

ومااتعدى الآيه اللى بعدها لين مايقولها .. حتى المسكين مرات يطلّع ( لوزه ) من شدة نطق حرف الثاء ..

>>> لاحد يجرب

إذا سافرنا للدول العربيه او الخليجية .. نقلب الكلام كله .. عندهم .. وأتحدى احد يفهم .. مثلا نقول ( حيف الكال ) يعني كيف الحال .. وإلا لاصرنا راكبين بتاكسي نقول ( ياصطر من زينه ) يعني يازين من صطرة .. وكنا نضحك والسواق مايدري وش نظحك عليه المسكين .. طبعا هالكلام كان قديم جدا .. يوم كنا نروح للبحرين ( سباحة )

===
يعني أذكر كنت أنا وواحد من العيال كان من ( نوعيتي ) وفاهمني في هالأمور .

. ذبات .. وكل واحد يمسك على الثاني وفيه مراجع في العمل دخل علينا بالمكتب وقال : لو سمحت مرتي في الثالث وين اروح ؟؟ قاله خويي حطها على الرابع .!! قال الرجال وشو ؟! قلت معليه اخوي وين أوراقك ودليته وانا كاتم ظحكتي .. طبعا لاأنا ولا هو نظحك قدامة.. علشان مايلعن خامسنا .. لأنه ماسمع زين

===
مره حريم في أحد أسياب المستشفى وقفونا .. وسؤلونا ميه سؤال .. وين القسم الفلاني .. والدور العلاني .. ومن وين الإشاعة وإقراء لنا هالتحويل .. و و و يوم خلصنا كنهم حسوا انهم زودوها شوي .. قلت لهم وترى نهاية السيب يمين فيه حمامات النساء .. وهي ماسألتني أصلا .. بس قلت ( إحتياطاً ) >> مابقى إلا هالسؤال ماسألونا عنه

===
ومره دخل علينا واحد يقول : ابي إستراحة !! قلت له كم متر ؟ قالي ابي إستراحة مرضية للعمل !! >> وشكله عصب

مره قلت بترك عني هالسوالف وأبجرب ..

وكانت التجربة قصيرة جدا وفي العمل
كلمني واحد .. ألو : هلا
أخبارك : تمام
( سوالف عمل . سوالف عمل .. سوالف عمل ..

)
يالله مع السلامه .. هو قالي

قلت : فمان الله
قالي عفواً من معي
قلت : فلان
قال : أبو طلال ..؟!!!!
قلت : سم
قالي : الله يقطع شيطانك وهع هع هع هع

>>> كالعاده كان ينتظر مني إستهبال وكركرة

ماضحكت انا وسكت .. وهو سكت >>> حسيت اني فشلته

قالي يالله شكلك مشغول مع السلامه

قلت : مع السلامه
طبعا هو أعرفه بس كانت اول تجربة ثقل عليه المسكين ..

من يومها وانا مانمت .. أحس بالذنب .. أحس اني مااستحي على وجهي .. ليه ماضحكت

.. وراني ماانهبلت كالعاده ! اكيد يبي يقولي وش فيه متغير !؟!؟ >> وبدت الوسوسه والهواجيس
صرت لما أفكر اني اكون طبيعي مااقدر لان الناس تتعود على حالتك اللى انت عليها .. حتى لو كان تغييرك للأفضل برضه الناس راح تستغرب التغيير ويمكن راح تفهم غلط ! >>> وهالأمور غالباً ماتحدث وتسبب جفاء بسبب سوء الفهم

طبعا كل هالسوالف أبي اقولكم ترى ربي مايطق بعصى ..

على كثر ماعلّقت على ناس .. صارت لي مواقف محرجه ( قويّه ) جدا لدرجة اني عرقت .. وأحمّر وجهي .. وتخوبلت وقدام ناس .. وناس ظحكت علي ..

===
يعني مره في مجلس لقيت بزر الله يصلحة ويخس أبوه

قرب عندي وقلت له وش إسمك حبيبي .. تعال قرب .. والمجلس ملياااااااااااااان .. قالي ( كل احم احم ) إبتسمت يعنني ( متفهم ) مادريت إلا الزلابه لافني ( بكف ) طيح شماغي وعقالي وخدي صار أحمر .. وفيني الصيحة وبغيت العن خامسه بالمجلس وأقوله كانك رجال إطلع لي يازلابه

بس إكتفيت اني اشاهد جمهور الحاضرين وهم يضحكون علي ..

>> وأشوى ان طلال مهوب فيه ويشوف أبوه يصطر

قصيت هالقصه لجدتي ولأميمتي وقالت جدتي ( قلعك

هذي حوبتي )

===
كثيره المواقف المحرجه .. اللى تحصل لي .. والأكثر زلات لساني واخطائي والناس ( تمشي .. وتفوت ) وقليل اللى يتشمت ويمسك الزلة علي .. إلا ربعي طبعاً لانه عهد ووعد ومؤدين القسم على هالشي

والعكس انا اللى ماتمر علي كلمة إلا وافصفص امن جابتها .. وامزمز عليها .. واظحك مو علشان الزله تظّحك .. لا ..علشان افشل الشخص اللى زل .. ( هنا تكمن اللذه )

===
فيه واحد من الأعضاء يوزره يدل على شخصية ( رومانسيه ) هادئه .. مثقفة جدا .. صادف أني شفته في إجتماع الأعضاء في الإستراحة .. يوم شفت وجهة ( إنصدمت )

والحمد الله اني كتمت إندهاشي وظحكتي .. ومالاحظها إلا واحد .. مازال يذكرني في يوزره وفي الموقف !! عرفت انه يوجد في هالعالم أشخاص مثلي

===
الهنوف الله يذكرها بالخير ويرجعها بالسلامة ماادري وينها فيه !! لها المسكينه سنين وهي تختم أي موضوع لها او تعليق بكلمة ( برايفت ) وكانت بعد تنسق الكلمة وتكبرها .. واخرتها طلعت فاهمه الكلمة غلط .. كان موقف حلو وبعد ماكفشناها اتوقع اكثر واحد ظحك انا .. لأنه هذي عادتي رغم ان هالأخطاء لاتنقص من ( فهم ) ولا من ( أخلاق ) العضوه أي قدر
وفي هالمناسبه احيي الهنوف على روحها الطيبه وسعة صدرها اللى تقبلت ضحك الأعضاء بصدر رحب ... يمكن لو كان غيرها يزعل ويقلبها جد ..

بعد هالخرابيط .. اترككم يالربع مع هالمقطعين ..
بس قبل كان فيه متسابق في برنامج من سيربح المليون وكان من خليجي.. وكان السؤال سهل جداً جداً حتى جورج فطس من الضحك لان الجواب قدامه ويلمح له وبرضه رافض يفهم .. بعد هالمقطع علقوا المصريين على هالخليجي واللى يقول غبي .. واللى يقول اهبل .. واللى يقول هذا هو الشعب الخليجي ( غبي ) وعبيط ..
وربي ماخلاها لهم .. ولافرحوا واجد إلا وجاء الرد وبنفس البرنامج من واحد مصري .. تقدر تقول عنه ( كمخه ) بمعنى الكلمة .. مو فيه ناس عايشه على نص كليه .. وربع كلية .. هو عايش على 1 % من مخه

.. وسبحان الله أكثر من علق على هالمصري كانوا خليجيين ..

عاد الخليجيين ماصدقوا خبر وماخلوا تعليق إلا وقالوه وعرضوا المقطع بنفس الموقع ..
أخليكم مع المقطعين .. وبصراحة من كان فيهم أكثر ( كماخة ) من وجهة نظرك .. أبو غترة .. وإلا أبو بدلة ؟! علشان نبعد عن الجنسيات

المقطع الأول

المقطع الثاني

اخوكم الصغير ابو طلال
برايفتـــ

لاتعطوني رايكم بالموضوع .. ابي رايكم بالفواصل