!ღ!メ▓░░▒ ♥ من طلعتـــي ... الى جزيرة فرســـــان ♥ ▒░░▓メ!ღ! - نادي الهلال السعودي - شبكة الزعيم

BEST_01 · #1 11/11/2008, 08:29 PM

السلام عليكم ورحمة الله وبركاته

كيف الحال جميعا .... ان شاء الله بخير

هذا الموضوع الثاني لي هنا ... مو منقول <<< خايف من صيد النت
بعد الموضوع الاول لزيارتي لوادي لجب
اللي بصراحة اثلجتوا صدري فيه بردودكم الحلوة .... وخلاني اتحمس اليوم اكتب هذا الموضوع <<< الرجال صدق

بس اليوم ما راح تكون الصور مثل المرة اللي راحت
لان العادة حنا في طلعاتنا تكون المرة الاولة استكشافية <<<طالعين المريخ... والثانية تكون الرسمية و يكون فيها التصوير
بس اليوم بحكم ان الجزيرة بعيدة شوي صورت من اول مرة ... لذلك لكم عليها شوي

والموضوع اليوم طويل ... لاني جلست الخميس الليل في الجزيرة فاضي ... وجلست اكتب كل شي من طآ طآ الى السلام عليكم
والتعبير لكم عليه بعد ... كان معقدني في المتوسط ... بس الموهبة اللي هنا مصقولة من الكتابة على الجدران <<< امحق
اذكر مرة عطونا نعبر عن رمضان وكتبت ... شهر رمضان يذهب ثم يعود <<< مالوم المدرس يوم بغا يرسبني
لذلك اللي يبي يقرا الموضوع يقراه ..واللي يبي الصور .. يطمر ويشوف الصور
بس اهم شي لاتنسونا من ردوكم <<<هذا اللي يبي يوصل له

نخش في الموضوع

جزيرة فرسان
تبعد جزيرة فرسان عن مدينة جازان حوالى50 كيلومترا تقريباً ، وتضم مجموعة كبيرة من الجزر الأخرى والتي يصل
تعدادها إلى 84 جزيرة تقريباً ، ويصل طول شواطئها إلى حــوالــى216 كــيلــومتــراً ، وتــعــد (فرسان الكبرى) أكبر هذه الجزر مـن حيث المساحة و السكان ، إذ تصل مساحتها تصل لحوالى369 كيلومترا مربعا تقريباً ، ويبلغ طول الجزيرة من طرفها في الجنوب الشرقي إلى طرفها في الشمال الغربي حوالى70 كيلومترا تقريباً ، وتأتي السقيد (فرسان الصغرى) الثانية من حيث المساحة والسكان أيضاً إذ تبلغ مساحــتها حــوالي109 كيلــومترات مربعــة تقريبا<<< باين ان الكلام ملطوش

الطلعة :
بداية المسكة جت يوم ما لقينا حجز للرياض
اااااااااهـ ياالبي يالرياض<>!<>يازينها ويا زين حرها <<< توك تحس انها زينة
حتى العودة من الرياض الظاهر ما فيه ... ولا كان يمدينا نروح بالطيران الخاص عندنا

شوي وينط واحد من الشباب ويجيب لنا فكرة الجزيرة ... وعاد حنا شعارنا >>> معك قدااااااااام
وخوينا ذا يعرف واحد في جيزان بيزبط وضعنا ندخل بالسيارة في العبارة للجزيرة <<< يعني واسطة ... وما قصر الرجال

المهم بعد ما تاكدنا من الموضوع ... اتفقنا نمشي يوم الاربعاء لجيزان بعد العصر
ووصلنا هناك على صلاة العشاء تقريبا ... وقابلنا الرجال وعطانا التذاكر
بس المشكلة انه حاط حجز السيارة الظهر ... وحنا نبيها الصبح <<< وين راحت الواسطة

بعدها رحنا نتعشى مع ان الوقت بدري ... لأنا على فطورنا الصباح
بعدها رحنا ندور سكن ... وانا كنت شارط على الشباب يكون فيها DSL
زيكم عارفين ما اقدر اترك المنتدى <<< وش عنده المشرف

وجلسنا نلف الين طفشنا ما حصلنا ... بعدها رحمت الشباب وقلت خلنا نسكن في اي محل <<< تراهم ما كرشوك وسكنوا في اقرب محل

بعد ما سكنا طلعت لمقهى قريب ... واجلس ساعتين ... وانا طالع لمحت التلفزيون
الا فيه مباراة ريال ويوفنتوس... واناظر النتيجة الا هي 1-0 ... قلت اكمل المباراة....ومن اول هجمه جا الهدف الثاني
اللي جاب الطاري ... كنت اناظرها مع صعيدين ومصريين
وانا جالس معهم احس كاني متكي في شارع خان الخليلي في مقهى ابو هيثم <<< ابو الصرفة اللي ما سمت
وفيه ذيك العربات اللي تسحبها خيول ملبقة برا قدام المقهى ... من فلتهم ذيك الليلة

باين اني شطحت عن الموضوع ... ابشركم خلاص وصلنا

ومن بكرة الصبح نطلع للعبارة ... وعزمنا نجرب ندخل بالسيارة ما راح نخسر شي
الا وتسلك الامور ولله الحمد ... ودخلت السيارة
ومشت العبارة الساعة 07:20 ... ووصلنا تقريبا 08:45 ... وكان الجو مرررررررررة خالع ... السحاب ما شاء الله كان نازل مرة ... الساعة 9 الصباح كانها الساعة 5 قبل المغرب

^^^^^^^^^^^^^^^^^^^^^^^^^^^^^^^^^
تونا واصلين ميناء فرسان ... من داخل السفينة ... معليش النافذة مليانة حشرات ... الظاهر القبطان راعي خطوط

^^^^^^^^^^^^^^^^^^^^^^^^^^^^^^^^^
شايفين الجو كيف

^^^^^^^^^^^^^^^^^^^^^^^^^^^^^^^^^
العبارة اللي جينا عليها ... اتحداكم كيف نزلنا

استقبلنا خوي خويي ... وكان يبي يوصلنا لمكتب الحجز... عشان العودة من الجزيرة
وحنا نمشي جانا مطر يالله يالله نمشي بالسيارة

^^^^^^^^^^^^^^^^^^^^^^^^^^^^^^^^^
تونا طالعين من الميناء

^^^^^^^^^^^^^^^^^^^^^^^^^^^^^^^^^
ما قدرت افتح النافذة من المطر ... بس لعيونكم كل شي يهون <<< تراها موب سياراتك

واشوا ان خوينا هذا قدامنا بسيارته
ما قدرنا نروح للمكتب طبعا من قوة المطر ... وخوينا ما قصر خذنا لبيته ... وتقهوينا عنده

وحنا على الطريق ... حصلنا لوحة ما فيه امل تحصلها في السعودية ابد ... واللي عندهم مثلها يعلمنا نزورهم

^^^^^^^^^^^^^^^^^^^^^^^^^^^^^^^
منطقة عبور غلان <<<فيه احد عندهم مثلها

بعد ما خف المطر ... طلعنا للمكتب وحصلناه مقفل <<< ياليل النشبة.... هو شكلهم راحو يكشتون عقب المطر<<< بس وش ذنبنا نتعلق
قلنا اجل نروح نشوف شقة ... ما تشرطت ذي المرة ابي DSL ...
ما ابي اتعب الشباب<<< تراك ما خفت يكرشونك زي الاولة
وحصلنا شقة كويسة... تكينا فيها وافطرنا نواشف تصبيرة للغدا ... وغيرنا ملا بسنا ... وصلينا ظهر وعصر

وبعدها طلعنا لمحل يعرفه خوينا للفلوكات... ادري انكم اول مرة تسمعون بها <<< تراك ما كنت تنطقها اول فلوكرات
هاذي القوارب عندهم يسمونها كذا ... ليش ؟؟؟؟ انا مدري

وقبل مانطلع للفلوكة ... قال لنا صاحبها انهم ينظمون رحلات صيد وشوي داخل البحر
وعشان يحمسنا قال شوفوا وش في حوض السيارة كانوا صايدينه الصباح
انا بصراحة جا في بالي قرش ولا دولفين <<< يا غبي ذي حقت افلام بس
لا بصراحة جا في بالي هامور طوله متر ولا حاشي كنعد <<< مالك ومال السمك يابو
يوم رحنا نشوف ما صدقت اللي شفته .... ابيكم قبل لا تنزلون تحطون شي بحري في بالكم <<< مسوي انه محمسكم
^
^
^
^
^ <<< لا تواخذوني ما اعرف احط سهم تحت
^
^
^
^
^
^

طلعت سلحفاة <<< ما شاء الله .. كيف عرفت

عاد انا جا في بالي انه بيحطها في حوض عنده بالبيت ولا شي ... صار ابو الشباب يبي يذبحها وياكلها ... عقبها قلنا اصفقنا كنا رحنا معك صيد

المهم ركبنا الفلوكة <<< خلاص ازعجتنا انت والفلوكة .. قل قارب
وطلعنا نفر على الجزر ... والله روعة ... بس ما قدرت اصور يوم كنت في القارب <<< بدري ما بغيت تقوله
لان الامواج كانت تتلاطم .. وحنا ضايعين بالطوشة فيها <<< وش رايكم بالريمكس الادبي
فكان صعب اني اثبت الجوال واصور ... بس صورت بعض الصور

^^^^^^^^^^^^^^^^^^^^^^^^^^^^^^^^^
هاذي الجزيرة اللي نزلنا فيها ... وتشوفون قصر على الشاطئ

^^^^^^^^^^^^^^^^^^^^^^^^^^^^^^^^^
شكلكم تقولون وش خلاه يجيب الصورة ... جـ : ابي اعلمكم ان الطير الابيض اسمه خرابة <<< ياليتك ما قلت شي

يتـــــــبع
الرجاء عـــــــــدم الرد

BEST_01 · #2 11/11/2008, 08:31 PM

نكـــــــــــــــــمل

^^^^^^^^^^^^^^^^^^^^^^^^^^^^^^^^^
هذا هو القصر القديم <<< توك تقول قديم

^^^^^^^^^^^^^^^^^^^^^^^^^^^^^^^^^^
من الداخل ... وما تلاحظون ان الارض تلمع

^^^^^^^^^^^^^^^^^^^^^^^^^^^^^^^^^^
عرفتوا ليه ارضهم تلمع ... بس لازم يمشون عليها بصبات موب بنعال

^^^^^^^^^^^^^^^^^^^^^^^^^^^^^^^^^^^
صدف حصلناه وحنا نمشي في الجزيرة ... وصورته فوق السيارة عشان تشوفون انه كبير
وابشركم ما وفرنا .... قالو عادي خذوا منه خمينا اللي نقدر عليه
اهل الجزيرة هاذي طيبين ... كنا نسولف معهم

بعدما خلصنا الرحلة البحرية <<< اللي يسمعك يقول طالعين على يخت ... طلعنا على انا بنروح مكان هناك فيه غزلان
بس اني نكدت عليهم زي ما كرشوني في DSL <<< ما كنت تقول راحمهم
ذكرتهم ان حنا ما حجزنا للعودة ... وعندها قالو لا زم نجلس نحجز اول
وقتها كانت الساعة 03:00 ... والمكتب ما راح يفتح الا الساعة 04:30

وجلسنا نتمشى في فرسان نفسها ... بس اكتشفت انها قديمة ... تصدقون حصلنا قصور عثمانية فيها
يا هي روعة ... بس واحد من السكان هناك خذ له قصر ورممه اي كلام وسكن فيه
اتركم مع الصور لها

^^^^^^^^^^^^^^^^^^^^^^^^^^^^^^^^^
هذا المدخل ... ومنهدم شوي من الجهة اليمنى

^^^^^^^^^^^^^^^^^^^^^^^^^^^^^^^^^
من الداخل مع انه قديم بس ما زال فيه جمال

^^^^^^^^^^^^^^^^^^^^^^^^^^^^^^^^^
شعار الاتراك في البندقية .. الهلال والنجمة <<< شعار ذا ولا مباراة

^^^^^^^^^^^^^^^^^^^^^^^^^^^^^^^^^
هذا بيت باقي الى الحين من العثمانين

^^^^^^^^^^^^^^^^^^^^^^^^^^^^^^^^
من الداخل رايح فيها شوي

بعدها رحنا نتغدى ... ولا حصلنا غدا ابشركم ... وقلبناها نواشف مرة ثانية <<< يا صبر بطونا بس
ورجعنا وحصلنا المكتب فتح ... وحصلنا حجز الظهر وحنا ودنا بالصبح
طلعنا من المكتب وقتها كانت الساعة 04:54 <<< انحش يالقريتنش
وصار ما يمدينا على الغزلان .. لان الطريق مغلق بسبب السيول ... ويكفيهم اني معهم <<< ما عرفت اكتبها من ثقلها

^^^^^^^^^^^^^^^^^^^^^^^^^^^^^^^^^
السيول في مدخل الاماكن اللي تتواجد فيها الغزلان

وقلنا نطلع للمكان اللي يسوون فيه مهرجان الحريد حقهم
هذا المهرجان في شهر 3 من كل سنة يطلع السمك على الشاطئ ويصيدونه الظاهر بيديهم <<< وان طلبناك
خلاص لعيونكم يصيدون بخياش رز <<< يا زين اللي بيديهم
بعدها قبل الغروب طلعنا للجسر الوحيد هناك اللي يربط بين جزيرتين ... يعني الصور بتكون حلوة
بس للاسف ...... خلصت بطارية الجوال... بس خذت جوالل خويي 82 ... يعني الزين ما يكمل
الصور هنا بدون تعليق ... كل واحد وجوه يقول <<< ما يبي يكتب و حطها تصريفة

ويوم غابت الشمس رجعنا للشقة نريح ... من الصبح وحنا نفرفر

وحنا راجعين مسكت مع واحد من اخوياي انه يشوي سمك ... قلنا براسك ... التعبة على يدك
ورحنا لحراج السمك حقهم ... ونصقع كم هامور وسمك ثاني مدري وش اسمه

ونرجع للشقة ... عاد اخوكم ما يوفر ... على طول غفوة لين جهزوا كل شي للطلعة
صحوني الشباب وصليت العشاء والمغرب ... وبعدها طلعنا لمحل على البحر

وجلسنا جلسة ولا في قصة الف ليلة وليلة <<< تراه يسمع بها
والله كان القمر منور $$ بوجودكم $$ <<< ما يعرف يمدح
وصوت الامواج ذيك نفسها اللي كانت تتلاطم يوم كنا في البحر

وانا بصراحة خشيت جو الين صحوني <<< يعني نمت ... ابو الجو اللي تعرفه
وبعد ما تعشينا رجعنا وحنا سكارا ... من النوم طبعا
ندور وين الشقة بس ... دخلنا طار النوم

وامسك اللاب توب ...وزي مانتوا شايفين ... جلست اقطع الوقت بذا اللي فوق كله

ويوم جت الساعة 03:00 ... كبرت الوسادة وخمدت
ومن بكرة الصباح يصحوني الشباب الساعة 11:00 ... لقيتهم مجهزين الفطور

ودق يا بطل في الفول لين دخت ... طبعا انا افكر ادوخ انام على طول ... اجل اذا دخت وش بسوي ...اكيد بخمد

نمت وصحيت الساعة 01:30 ... وضفينا اغراضنا ... وعلى العبارة

رحنا هناك ولا فتحوا البوابة ... لذلك مسكنا السرا ... ومسكت مع الشباب ننزل نتقهوا جنب السيارة

بعد ما فتحوا البوابة ... دخلنا وتوجهنا للعبارة ... بس طولنا عشان تحركت

مامشت الا الساعة 04:00 ... وجلست اتامل في البحر ...زيكم عارفين مايمديني ارقد ... نايم اليوم كله

وامسك تصوير الين وصلنا

^^^^^^^^^^^^^^^^^^^^^^^^^^^^^^^^^
عرفتوا من وين ندخل للعبارة... نفس المحل اللي تدخل منه السيارات

^^^^^^^^^^^^^^^^^^^^^^^^^^^^^^^^^^
تونا متحركين من الميناء بالعبارة <<< اجل بالباص .... وتلاحظون انه نظف النوافذ

^^^^^^^^^^^^^^^^^^^^^^^^^^^^^^^^^^
وش رايكم في الشطفة ... قبطانا طارة

وصلنا الساعة 05:30 الى جيزان

وبعدها توجهنا عايدين ادراجنا<<< إلى يسوي مثقف .. الى خميس مشيط

وتوتة وتوتة ... خلصت الحتوتة

وبما انكم جيتو ... لاتحرمونا ردودكم
حتى لو تكتبون طلعتكم بايخة <<< لاتصدقون

اسف على الاطالة
ومنتظر ردودكـــــــــــــــــم الحلوة

هلاليــ ــ برشلونيــ · #3 11/11/2008, 10:42 PM

صراااحة طلعة حلوة ويا ليت كنت معاكم .......مشكوور على الصور

وعندنا مشروع رحلة قريبا (المشروع يدرس )
رحلة لفرسان

BEST_01 · #4 11/11/2008, 10:52 PM

إقتباس

الرسالة الأصلية كتبت بواسطة هلاليــ ــ برشلونيــ


	صراااحة طلعة حلوة ويا ليت كنت معاكم .......مشكوور على الصور وعندنا مشروع رحلة قريبا (المشروع يدرس ) رحلة لفرسان

مشكور اخوي على مرورك

وانصحك تحطون في بالكم تجلسون اكثر من يومين ... اذا كنتم تبون تفلونها
واول ما توصلون على مكتب الحجز عشان العودة ... تراها مشكلة وهم بعد

وليد القحطاني · #5 11/11/2008, 10:58 PM

ياخي حبيتك بعد وادي لجب

برب خلني اشوف حلقة بريزون بريك وبجيك واطقطق على الموضوع
برب

........

باك يالغلا

جزيرة فرسان رحت لها مرة وانا صغير ..

واخر مرة الاجازة اللي راحت ..

بس هي لاتُقارن بــ " وادي لجب " أو " المحتطبة "

هذي شئ فوق الخيال , شئ عجيب , مكان ولا في الأحلام
المشكلة شبابنا يروحون بره ويخلون هالأماكن الزينة

لاهنت يالذيب ع التغطية وماقصرت

اخوك

برنسيسة الهلال · #6 11/11/2008, 11:14 PM

ووواااااااااااووو هـذااا عنـدناااااا بالسعـوديـه مش مصدئه

ان شاء الله لنـا زيـارهـ لها

يعطيك العافيه أخـوي والحمدلله على سـلامتكم ....

تقبل مروري ،،

BRUNO CONTI · #7 11/11/2008, 11:30 PM

مين اللي كسر الزجاج

مشكور اخوي .. و اتمنى زيارة ذيك المناطق ...

ALMALAKY · #8 12/11/2008, 12:07 AM

يعني بالله مثل هالمناطق ليه مايصير لها تقارير في الأعلام ليه مايصير لها برامج على القناة الأولى السعودية وفوق كل هذا وين اهتمام هئية التطوير عنها ؟؟!

انا صراحة سمعت عن فرسان كثيراً وماتوقعتها بالشكل هذا ماشاء تبارك الله انت عطيتنا معلومات مصورة عن المنقطة الرائعه

يعطيك العافيه على التغطيه الحلوة والمشجعه على زيارة المنطقة والي اتنمى انها تكون في القريب بإذن الله

the blu dragon · #9 12/11/2008, 01:29 AM

شوقتنا لها .....~

ليتني كنت معكم

يعطيك العافية

امي ولدتني هلالي · #10 12/11/2008, 01:38 AM

اول شي
الحمد لله على السلامه
وتبي الصراحه ؟!
توقعت جزر الفرسان احلى من كذا بكثير
<<< خربتوا عليه كان ناوي يروحلها

الـوفـا ديـــن · #11 12/11/2008, 02:29 AM

موضوعك مبهر

لي عوده إن شاء الله ابي امخمخ فيه

بورتريه · #12 12/11/2008, 07:43 PM

والله طلعة حلووووووة مرررررة..

وانا من اهل جيزان وما قد شفت هالاماكن..

لي عوودة

FINAL10 · #13 12/11/2008, 08:52 PM

والله عندنآ امآكن تستحق انك تروح لها كسيآحه ..

مشكور اخوي , على الصور الجميله

"أجمل الذكريات" · #14 13/11/2008, 02:36 AM

تقرير رائع وتغطية جميلة

صراحة جزيرة فرسان تستحق الزيارة

أعجبتني كثير صورة الأرض وهي مغطية بالمحار

شدوي ازرق · #15 13/11/2008, 04:16 AM

إقتباس

الرسالة الأصلية كتبت بواسطة امي ولدتني هلالي


	اول شي الحمد لله على السلامه وتبي الصراحه ؟! توقعت جزر الفرسان احلى من كذا بكثير <<< خربتوا عليه كان ناوي يروحلها

والله انا كنت اتوقعها احلى من كذا بكثير
صحسح اني انصدمت لانها ماهي قد كذ لكنك تميزت في كتابة التقرير واسلوبك كان رائع جدا