مرحبااا ..اسمعو السالفة وبدون صوت تكفون
رؤس الاقلااام:-
1-الابتعاث..((عائلة بدون ام مثل يد بدون اصابع))
2-قرطاس اسمنت..((بداية التدخين))
3-السفارات..((هناك بدئ الضياع))
4-الايدز..((نهاية كل داشر))
القصة :-
كان يما كاان فية عائلة ضواطير ((أي براصي)) ساكنين في بيت شعبي في منفوحة ام واب وثلااثة ضواطير.. كانت العائلة ساكنة في السور الخارجي في زاوية تحت نجفة ((لمبة طويلة بيضاء)) وكان ابو الضواطير يطلع كل مغرب للعمل ((يصيد حشرات من عند كبس الجيران)) ويجيب للعيال العشاء وكانت الام تقص لعيالهاا اخطار العالم الخارجي وتخليهم يطلون يشوفون القطو يتسدح عند الزبالة مع السور.. مرت الايام وانحلت ((أي تفككت العائلة)) وذالك بعد ماسقط الاب ((ابو بريص)) من على الكبس المجاور لبيته على تندة ((أي اعلى السيارة)) جمس وانكسرت خشيراه ((أي العضم الي في اعلى الخشم)) ومشاء الجمس وابو بريص مغمى علية.. ويدز ((أي اسرع)) الجمس وعلى الدايري((شارع كبير )) وقاام ابو بريص يتلفت ويهفة الهواء ((أي دفعة دفعة قوية)) ويطيح من فوق الجمس على الزفلت وجاه رضوض في الركبة وكسر في ثلاثة اضلاااع جلس ابو بريص يون ((أي يقول اااه)) ويفكر في الاطفال ويرقاء ابو بريص فوق لمباات الدايري ((لمبات مرتفعة في الشوارع)) ويتوهق ابو بريص مافية جدار يصيد علية الحشرات ويقعد فوق اللمبة ((يعني مااستفاد شي الحشرات تحت)) قام ابو بريص وسواا فيهاا طرزان وقمز ((أي نط)) بيصيد ويكتب الله ويجي على ضروسة وتحت كفر ددسن غمارتين.. ((الله يرحمة)) جلست الام والعيال يحترون الابو ابو بريص مااش طول ((صرخ سحياان الضاطور الاصغر)) وقال يمة مشتهي ابو قباس ((حشرة تجي مع المطر لهاا اجنحة طويلة)) نزلت دموع الام وخمت عيالهاا وقالت انا ابروح اشتغل برااا ((ابتعاث في عليشة)) معروض علي نجفة مسجد ماعندهاا احد ابروح امسكهاا بس لااوصيكم ((قعدت توصيهم وتحذرهم مايطلعون براء)) ورااحت الام....جلسو الاخوة الصغار في السور يبكون ((يتاماا)) المهم سحياان الصغير مااعجبه الوضع وقاال ابطلع للكبس اصيد لكم وارجع ((خربهاا)) قال اخوة لا لا لا؟؟؟ نسيت وصيت امي سكت سحياان وتنيوم ((أي غمض عيونة بزعمة نايم)) ويقوم ويطلع بشويش يوم نامو اخوانة((ذبحة الجوع)) ويرقااء فوق الكبس بس مااش ماعرف يصيد ويلزخ على ظهرة على حافة عتبة الباب وينكتم ماعرف يتنفس ويبوبز يصيح..شوي وجاة برصي يقال لة الداشر ((ابو هادي)) وقال وشفيك وقال لة السالفة قال ابو هادي وسع صدرك وطنش الدنياا وشكلك والله فـتوة ((يريش با الضاطور سحيان)) قال ادخل مطبخ بيتكم والعن امهاا مرقة ((أي مرقة طمااط او فول ان وجد)) واترك عنك الخشااش واناا اخوك قاال لا امي تقول لاتقربون البشر ((أي حنا)) المهم ويلف قرطاسة اسمنت ابو هادي ويشبهاا ويقوم يتتن ((أي يدخن)) ويمد التتنة لسحياان قال شكر قااال يا الزلابة ((يعني منتب ضاطور))رح خذ ديدك ونم حقد سحيااان وسوا فيهاا رجال ودخن ... ومن هناا بداء الضيااع ويقعد على هاا الحالة اسبوع يطلع ويرجع الفجر ريحتة تعجعج قراطيس ويمر جمس لوحاتة خضر ((دبلوماسي)) فية ضواطير لونهم يختلف ((امريكاان)) مشغلين الغربي ويدخنون احمر ((سرابيت)) ويوقفون عند ابو هادي وسحياان قالو نطو ((أي اركبو)) ماصدقو خبر ويركبون وخذ رجة وببسي لين الفجر ((وشرب سحياان اخيرآ التتن الاحمر)) ويطيرون للحي الدبلوماسي ويشوفون الهول والهوايل ويدخلونهم في بيت كلة ابجورات قاال سحياان يالله وشلون تصيدون هناا؟؟ قال الضاطور الامريكي يا القديم ماناكل جريش ومرقوق ((يعني حشرات)) حناا اهل الاستيك
ويفتح الثلااجة حقت البيت ويجيب لحم ونعمة ((طارت عيون سحيان مستغرب)) حياة جديدة ويوم خلصو ورجعو للحارة قاام ابو هادي وطلع قارورة وفتحهااا قال سحياان وشذاا؟؟((أي ماهذا؟؟)) قال اشرب وتجي العافية..((سكار أي خمر)) ويشرب سحيااان وينحرف اكثر من اول ويرجع للبيت والريحة تعجعج ويطردة اخوة قال مالك مكاان بيناا ...ويطلع سحياان ويتجه لبو هادي ((الطيور على اشكالهاا تقع)) ويقرقعونهاا كل ليلة ((أي يسكرون)) ويرجمون القطو ويقولون لة ((اجل ميو )) وشوي شوي طاح في الحبوب ((ابو سحا)) ومن بعدهااا تعمق في المخدرات وصار يتسدح على الجدران ويتتن ونحف وغداء اسود تقول قطعة دارسين ((أي شي يشبة الديرمة يوضع في الاكل)) ويطيح في الابر في الوريد ((الهروين والعياذ بالله)) وللأسف استخدم سحياان ابرة مستعملهااا ضاطور داشر فية ايدز وانتقل المرض لسحيااان وقلب علية ابو هادي وضاقت الدنيااا بسحيان وراح قدام القطو يبي ينتحر ((بس القطو حامت كبدة وماكلة)) وماااااات االضاطور سحيان في غرة شهر رمضان الموافق 4 /9/1418هـ ولم يصلى على المذكور...فهذة نهاية كل مهمل وكل عائلة لم تحسن التربية فاياجمااااعة ربو الاجيال صح ((مااعرف اتكلم)) ويا اهل الضواطير ارضو ((يعني اقتنعو با الخشاش الي عند نجف بيتكم)) ودمتم....
با النسبة لاخواان سحياان اكملو الدراسة واشتغلو في وضائف حكومية في اسياب بيوت امراء ((على المرتبة الثالثة)) نجف السطح..والام سقطت من الكبر ووجدت في طريق العودة ميتة تحمل في يدهاا ابو قباس ((تنرحم)) للابن الغالي سحيااان..((الله يرحمهاا))
ادلووو بقدوركم...