رحلتي الى أم الدنيا ..((صيف2008 )) - نادي الهلال السعودي - شبكة الزعيم

بتيل · #1 10/10/2008, 06:28 AM

السلام عليكم ورحمة الله وبركاته

بما انه أول موضوع لي حبيت أشاركم برحلتي إلى مصر وما صار فيها من أحداث ( زيارة الآثار ، نصب .......... إلخ )

وراح اقسم الموضوع الى جزئين لآن الصور كثيرة

------------------------------------

وسط دندرة وإزعاج وأخذ ورد .. هذي تبي مصر وهذي تبي ماليزيا ، قرر الوالد العزيز على مصر ( وضرب بآرائنا عرض الحائط ) اللي عايز يامرحبا واللي مش عايز ( يخيس بشمس الرياض )

الإقلاع: من الرياض للقاهرة كان الساعة 8 الصباح طلعنا الساعة ، والوالد العزيز من ست ونص الصباح الله يهديه وهو على روسنا

الوالد لما شاف العفش إستغرب كثرة شنط البنات ، وأبدأ رأيه بجمع كل أغراض ( الصبايا بشنطة وحدة )

لكن محاولاته باءت بالفشل :d

كان موعد الوصول للقاهرة الساعة 12 ، والوالد مجهز الوضع من الرياض و مستأجر ( ميكرو باص بسواقه )

أحسن شي إن الشقة كانت قريبه من المطار في مصر ( القديدة )

عمائر العبور .. واصنصيرها زين مو مثل باقي العماير ( يوم يشتغل وباقي السنة حرك رجولك )

وهذي مناظر من برى الشقة.

دا( الخضرجي بتاع الحارة ) أحسن ما عندهم إن كل حارة لها خضرجي وصيدلاني وبقاله

بأول يوم طلعنا نتمشى على نهر النيل

وهذي صورة للنيل

ثاني يوم رحنا لملاهي دريم بارك في مدينة 6 أكتوبر وكان أكثر يوم إستانست فيه بالسفرة كلها

، بس للأسف انحذفت الصور كلها حقت هذاك اليوم وما بقى إلا هذي الصورة

اللي هي صورة للعبة الشواية اللي لو رزقي فيها ماركبتها

ثالث يوم طلعنا للمتحف القومي المصري اللي يعتبر من أقدم المتاحف بالعالم ، وهو المتحف الوحيد اللي بالعالم اللي يحوي آثار حضارة واحدة فقط.

الشئ اللي يرفع الضغط إن التصوير ممنوع داخل المتحف

على كلامهم ( وما يندرى صدزهم من تسذبهم ) إن التصوير يؤثر على المومياء ( قوية شوي )

نصيحة للي يبي يزور المتحف لا ياخذ ( مرشد سياحي ) لأنهم اكبر ( نصابين )

أول ما دخلنا المتحف مسكنا واحد

قال :تصورا الأسبوع اللي فات الأمير ( مشفر إسمه )

جيه هنا للمتحف خصوصي علشاني

وإداني الف وخمسمية ريال سعودي

هالأمير فيه خير ( شاري تذكرة ومتعني الجية للشخص هذا )

( مهوب عاقل سمية الخشاب )

ما علينا منهم ( إنت خذ وخل )

ويغمز لأبوي يعني ( إفهم يا فهيم )

اللي خلاني أموت من الضحك على هالمرشد السياحي ، كنا نمشي بالمتحف وقدامي ( عيني عينك ) يغمز للعامل اللي بالمتحف ويجينا ( العامل ) يمدح فينا

الله انتو مع الاستاز دا اقدع واحد بالمتحف كله

والمشكلة مو مره ولا مرتين، كل عامل يشوفه المرشد يسوي نفس الحركة.. يعني ( إفهم يا فهيم وعطنا مما أعطاك الله )

هالمرشد من النصب ما غير يبربر : دنتا محظوظ لأنك معايا

ليه مع مين حنا ( السير أليس فريقسون )

عطيناه ميتين وخمسين بعد ما لفينا بالمتحف نص ساعة !!

طلعنا بعدها نتغدى على النايل سيتي وهذي سفينة ثابته على النهر وفيها مجموعة مطاعم ، و أكلهم مره روعه

وهذا الممر اللي يدخل على السفينه

وهذي مناظرمن السفينه

وبعد ماطلعنا من النايل ركبنا مركب عالنيل

واحلى شي لما تناظر الغروب والهوا يلفحك يمين يسار

اليوم الرابع قررنا إننا نزور قلعة صلاح الدين بس للأسف قالوا لنا مايمديكم تلفون القلعة إلا وهي صاكه

فشدينا الرحال إلى الأهرامات استأجرنا كارته خذوا علينا فيها ميه وعشرين للكرته الوحده

ولا يقولون لك الكارته ما تركبش إلا اتنين وبس ( سعوديين ينلعب علينا الله يخلف بس )

يقولون ان ابو الهول وجهه على شكل ملكهم اول اسمه خفرع <<كل ماقالو اسمه تجيني هستيريا

وجسمه حاطينه جسم اسد عشان يرمز الى القوه

ركبنا مع واحد مصري شايب ويستخف دمه

قالي : سمعتي أخر خبر؟

قلت لا !!

قال : حسني مبارك غير اسمه لصاحب الهرمين تعرفي ليه ؟

ويغمز قلت : ( يا صبر الأرض ) لا ما أعرف !!

قال : عشان يسموه صاحب الهرمين (عندنا صاحب الحرمين )

من الفلسفة الزايدة علينا قلت لأختي مدري ليش أحس رجولهم كبار

الشايب صار من العائلة وذب الميانة ، لف علي

وقال : لا إلا أنا اللي بتكلم بس ومتئطعنيش فاهمه

لما اخلص ابئي اسأليني وأنا اللي أجاوبك

فيه كلمة حيرتني وما عرفت وش معناتها

كنا راكبين ( الحنطور ) وقابلنا صاحب ( حنطور ) ثاني يصارخ وقال لنا أهلا باصحاب التلفزيون ( ما أدري ليه أحس إنه يذب علينا )

باليوم الخامس رحنا لمجمع ستي ستارز بمدينة نصر

الى دخلته تحس إنك بالسعودية من كثر السعوديين اللي فيها عكس المواقع التراثية والاثريه:d
والكل يدري وش السبب من شبابنا السعودي

اللي يفقع القلب

، عندهم مطعم إسمه مؤمن وهو مطعم مشهور تقريبا مثل كودو عندنا بالضبط بس كودو أفضل من ناحية النظافة

.ولما تجي تطلب من عندهم ما يسألونك ( super size ) من راسه يحط لك الطلب ( super size ) من غير ما يسأل

هذا إهداء للعضو ( نيوتن ) اللي يتهم السعوديين بس ، الشغله هذي ( عالمية )

.وهذي صورة للمطعم

باليوم السادس زرنا حديقة الأزهر وكان يوافق يوم جمعه فكانت زحمه ، وأحسن مافيها إن رسوم الدخول فيها موحده للمصرين وللعرب والأجانب

ورسوم الدخول كانت خمسه جنيهات بس.. فتشوفون فيها كثير مصرين ، وفيها مطعمين اللي هم ( ترانينيون ) و مطعم ( القلعة )

<------- تفكيرها مطاعم

وكم من مقهى والباقي مسطحات خضرا وجلسات

تغدينا في مطعم ترانينيون واللي أنصح فيه

... وهذي صور من الطلعة

هذا هومدخل الحديقة

هذا مطعم القلعة

أما هنا شي سمعنا صوت إزعاج وصجه مو صاحيه قمنا من أماكننا وتتطايرنا من زود اللقافة

وشفنا زحمه مو طبيعية

بالأخير طلع زواج

اللي عرفناه إنه كل يوم جمعه والحديقة هذي الأيام تفتح أبوابها للزواجات

بس العرس كان فله وبسيييط يا زين زواجاتهم ، تعالي بفستانس وبس

والمعازيم كأنهم طالعين للبر

.. وكان على حظنا فيه أربع عرايس مر وحده عااد معد قمنا ابد ما غير فاقين خششنا مو ممستوعبين ...

وعقب ما ( تغرنا مناظر هالعروس ) على قولة أمي من قدكم حظرتوا أربعة عروس بيوم واحد ....

طلعنا ورجعنا للشقة عشان نبدأ صباح جديد من بكرى ....

وهذا نهاية الجزء الأول وهذي بعض المواقف اللي صارت لنا وتتعلق بالجزء الأول:

1 - أول يوم لنا في مصر بالنيل وحنا نتمشى جتنا عجوز مصريه تهلي وترحب ..

ويا هلا - يامرحبا منورينا السنة دي دي مصر نورت بوجودكم وكل عام وانتم بخير
أنا قلت على ايش !!!
قالت : الله دا رمضان قريب هتصوموه السنه دي معنا ؟
قلنا : لها إننا مو صامين معكم وإنا إحنا بنروح قبل

قالت : طيب حلوان رمضان شهر الخير وانتو ا أهل الخير والبركة ( قولي كذا من الأول إثر التهلي مولله للفز )

2 - لما كنا بدريم بارك دخلت أنا وأختي البقاله جانا العامل يناضر يناضر ومبقق عيونه

أنا بوقت طقت تسبدي وش يناضر عبايه سوداء

مادريت الا صرخ بأعلى صوته : عرفت عرفت

أ نا واختي إرتعنا وش عرف ذا؟
قال : إنتوا توأم توأم !!!!

قلت: ايه حنا توأم وش المشكلة ؟ !!!!
قال : كنت عارف من لحظة مادخلتوا دنتوا توأم ياسبحا الله

3 - باليوم اللي كنا زايرين المتحف ما فيه إلا مشي وكلن لاهي وحنا طالعين تعدينا اختي الصغيرة
عاد زنقرت وقامت تصارخ انتم وشو - كيف تخلوني انا مو بنتكم !!!
السيكيورتي لف عليها وقالها : طب ماتتجوزيني وانا مش هتركك ولا هخليكي ابداا

4-يوم كنا قاعين على النايل نستنى لما يجي الطلب

الا وذا القارب يقرب وتقعد تقول اخباركو ياستات الكل <<

كل سنه وانتو طيببين.. عاد انا قلت لها بصورك قالت : حتطليعيني بالتلفزيون بصي يازينات حنخرج بالتلفزيون

وتظبط نفسها وانا ميته من الظحك

وعقب ماصورتها وقلت لها طالعتن تهبلين

قالت امال فين الحلوان ياست الكل قلت لها اصبري وخذت علبة علك وحطيت فيها ثلاثة جنيهات ورميتها عليها يوم شافتها صرخت علي صرخه

فزعتني فزعه بس بس ثلاثه دي ماتجيب بتاع خبزة قلتلها ابد انشالله تسدس واحمدي ربتس

<<شانت الاخلاق وراحت وهي تسب وتحط عفب ماكانت تهلي وتمرحب

وهاذا كان نهاية الجزء الاول ان شالله يكون عجبكم وافادكم

....وان شالله انزل الجزء الثاني اذا شفتكم متحمسين

ترقبوا في الجزء الثاني<<<اقالي تحمس

رحلتنا الى كريزي ووتر واااااو <<كف

والى خان الخليلي والحسين وسالفة امييوم تناشبت مع بياع

والى مدينة الانتاج الاعلامي
والى القرية الفرعونيه المصريه
ومناظر عامه من مصر

تقبلوا تحياتي بتيل ورده وردهورده

mamado_mdo · #2 10/10/2008, 06:42 AM

مشاالله عليك
الحمدلله على السلامة

بالنسبة لي ماليزيا احسن بكثيررررر

مصر مادخلت مزاجي لهدرجه كل العالم يسافرون لها

مشكورة على الموضوع

LBa your heart · #3 10/10/2008, 07:10 AM

هلا والله بتيل ورده
الحمدلله على السلامه

انا ابي اعرف مصر وش فيها ؟

ليش السعوديين طايحين فيها

<- يقاله مايدري

مافيه طبيعه وانواع الطراره يعني وش يبون فيها العوائل ؟؟!!

وشعب يسمع بالتنكيت

لاشافوا الخليجي طاروا به مو حب فيه حب بفلوسه

هالمصاريه فرحانين بالاهرامات وبنهر النيل اللي يتنظفون فيه

يعني كل ماراح واحد لمصر راح يصور الاهرامات ونهر النيل يقاله صور شي جديد

مااقول الا يازين البحرين كل شي فيها طبيعه وامطار

الله يعطيك العافيه وانتظر الجزء الثاني اذا فيه ورده

الغرناطي · #4 10/10/2008, 07:18 AM

الحمد لله ع السلامة , ولو ذهبت لمصر فلن أذهب الى لإهراماتهم

Blue Sun · #5 10/10/2008, 07:43 AM

اهم شئ استانستوا بالرحله

صراحة صور رائعه والمصور اروع

احسن شئ بمصر الاهرامات وبس

لووو يعطوني مليووون ويقولولي رح مصر ما ارووووح <<<< افلقني

ننتظر الجزء الثاني

تقبل مروري ورده

زعيــ الطايف ـــم · #6 10/10/2008, 07:58 AM

الحمد لله على سلامتكم
والله انا اشوف ان ماليزيا احسن من من مصر بس اهم شي مستانسين

بانتظار الجزء الثاني تشكراتي لك

عـز الهلال · #7 10/10/2008, 08:29 AM

و عليكم السلاآآم ورحمه الله وبركاته ..,,

...

و الله هـــ المصر .. دايم يذمونها النآآآس
و المشكله أحصلهم كل سنه رآآيحين

مـا عرفنـا لهم ... هي زينه ولا شينه

..

بــ خصووص الموضوع فـ والله [ تقرير ] روعه
و مـاشـآآء الله المصاريا فيهم [ خفه ] دم كويسه

و شي ثآآني أسحبي الجزء الثااني

للأن تقرير سفرتي حــ يكسر الدنيا

<----- امزح ترا

..

يعطيك الــ ع ــآآآفيه بتوول ع الموضوع

و الله أستمعت بــ القرآآآءه .

سلاميشو ...

!!زعيم الكل!! · #8 10/10/2008, 08:55 AM

. ,

الحمد لله على السـلآمهو ..

يـآلبيه يـآأام الدنيـآا

واهم شي مستنـآاسين

زوآاج ياسر ماااهوب زي كذآا

يهبل مـآاشاء الله ..

في امـآان الله ..

Rossoneri Lover · #9 10/10/2008, 12:04 PM

,,

تـقرير خوـآرآفي

..

صـرآحـه رـحـلـه رآئعه .. ورده !

إقتباس


	2 - لما كنا بدريم بارك دخلت أنا وأختي البقاله جانا العامل يناضر يناضر ومبقق عيونه أنا بوقت طقت تسبدي وش يناضر عبايه سوداء مادريت الا صرخ بأعلى صوته : عرفت عرفت أ نا واختي إرتعنا وش عرف ذا؟ قال : إنتوا توأم توأم !!!! قلت: ايه حنا توأم وش المشكلة ؟ !!!! قال : كنت عارف من لحظة مادخلتوا دنتوا توأم ياسبحا الله

هـ ع هـ ع هـ ع .. < يمديكم عالـضـ ح ـكـهـ .. ؟

موـوقــف مضـ ح ـك .. ورده

بأنتضار تقرـير السـنـهـ الجآيـــهـ << ايي ننتضر

كان هنا · #10 10/10/2008, 01:07 PM

وعليكم الـسلام ورحمة الله وبـركاته
الحمدلله ع السلامة ^.^
تقـرير جميل وممتـع ، وبانتظار الجزء الثاني

سماي زرقا · #11 10/10/2008, 01:42 PM

مصــر أأول ماتنزلين فـ مطآآرهـم

الجمــله الاولى اللي يقولونهـا..

الللآه ..دنتو سعوديين.....>>نرد نقول أيوه

>>يردون علينآآ

ددددداااااا السعوديين أقددددددددع نااس
دي مصر منورهـ فيكم ...ألآآهـ
أيه الحلاوهـ ديه..

____
موقف صـار لنـا>>
مرهـ من المرآت وكنا رايحين لأم الدنيـا
أخوي كان سآآبقنا عشآن يجهز السيآآرهـ
المهم..لقآ مصري..
طبعاً المصري لسآنه يحكه..
قآآل لاخوي دنتآ شكلك كويتي
قاله اخووي أأي والله محسوبكـ كويتي >>>بيشوف وش أخرتها

قال المصري...دددددددنتو أأقدددع ناس وأكرم نآآآس
وأمرااء الخليق>>يعني الخليج

أيه الصعوديه وأيه البحرين وأيه الامارات عندكوو
دنتو تبيعووهم بقنيه

دا نتو فيكم طيبه ..
ياسآآآآآآآآآآآآآتر ع الصعوديين..دوول مغرورين أأأوي
وعلى أأيــه...ومايدونكش الملييم الا بعدد طلووع الرووح

قاله أخوي >>>لااااااا دا السعوديين اقدددددع نااس

قال اي والله دوول قدعآآآن أأوي >>>>عيني عينكـ

قالهـ أخوي..أجل السعوديين يالله يعطونك مليم
قال اي واللهي..بعد طلووع الروح يطلعو القنيه

قال أخوي..يآآآعم ...رد عليه قاله ..أيوه

قآل اخوي ..محسوبكـ سعودي

المصري أختبص وجهه

قآم قاال>>
دددددددنتو أقددددددددددع نااااااااااااس
واللههي كنت بهززر معااك

^^^^^

وبس

يلآ أذا خلصتي تقرير سفرتكم نزلت تقرير
عن سفرتنآ>>>بيقلب قسم سيآحه مو عام

بأنتظآآركـ..

الغدير الازرق · #12 10/10/2008, 02:09 PM

وعليكم السلااااااام

هلا ومرحبا وخيتي بتيل ورده

رحلة سعيدة يابت بصي حدرتك أتوقع إن ميزانيتكم راحت كلها

في البخاشيش والحلوااان

إقتباس


	كنا راكبين ( الحنطور ) وقابلنا صاحب ( حنطور )

آآآآه يالحنطور اسمعبه ولادري وشهو .. خاصة يوم يقول الشاعر المصري ( بركب الحنطور درقن درقن وبتحنطر درقن درقن

) بس وشهو الحنطور ترى للحين
ماعرفته

؟؟

..

رحلة موفقة ومتميزة وخيتي بتيل بصراااحه لو رايحين ماليزيا وإلا صلاله
كان أطلتز عالأقل هناك محد يطلب منكم حلوان

مصر رغم زحمتها وبساطتها لكن تظل حلووة ويكفي طيبة أهلها صح إنهم راعيين
فقش وعلوم مهيب زينه بس طيبتهم تشفع لهم

ومصر ماتصلح للعوايل ابد

الله يعطيك العافيه وخيتي بتيل .. بانتظار الجزء الثاني ورده

بريماكس · #13 10/10/2008, 02:15 PM

مصر

الحمدلله على السلامه اخوي

ورحله موفقه

لي عوده ليلاً للتعليقات

بندر الهلباني · #14 10/10/2008, 02:16 PM

ماشاء الله تبارك الله ..
بصراحه سفرة ولااحلى .
واحلى مافيها مناظر النيل والاهرامااات وابو الهووول .. وكل شي
وثاني مرررره انصحكم انكم تسافروووون للاردن
وربي فيهاااا مناظر احلى من مصر بمليون مررره
وانا من تبوك ودايم اسافر لهاااا
واذا تبون مرشد سياحي .. انا بالخدمه >>>> من كبر الخمه
بس هالمصاريه وربي مايملون من الشحده
لازم قبل ماتسافر تحط على جنب مللاليم لهم ..

وانا بانتظار الجزء الثاني
على احر من الجمر

B A R H O OM · #15 10/10/2008, 02:46 PM

مااااااااشاااء الله انا مصر مابلعته ألا ألحين كلها فقر

يازين سوريا بجوها بس الزبدااني