09/05/2002, 01:34 PM
|
زعيــم مميــز | | تاريخ التسجيل: 16/02/2002
مشاركات: 2,663
| |
البارح خطبت حصه البارح خطبت حصه
كالعادة بحكم عمل ابوي في الخارج
زهم ( اتصل ) علي أخوي عبادي قال يازيزوا ورى ماتزوج ، عاد انا دلخ مافكرت في العرس ابد .
قلت والله فكره انت ياعبادي ابو الافكار
من آخذ ؟
من السعيده بنت السعيد اللي بتقبل فيني ونروح لتركيا بعد العرس
قال حصـ ـه بنت رشيد اللي يسمونها ( بنت الحوطة )هي اسمها كذا لا يروح تفكيركم بعيد ..
المهم شعري وقف وكل شي وقف قلت والله فكره واحجز في الطياره وراسي اكبر مني ..
رايح اعرس على حصه من قدي تو تو تو
والله وادق البدله الرسمي السوداء حقتي اللي ماألبسها الا في المناسبات
والكرفته الحمراء قلت خل عبادي يشوفني وانا راجع اكبر في عينه ويسرع في العرس ..
والمضيفات يكلموني وانا ماارد ( بعيد عنكم شايف نفسي )
والله واصل الرياض قبل امس بالليل الفجر وانزل واخذ الشنطه الخضراء الحديد ..
واطلع ادور عبادي والا احد يستقبلني واقعد ادور في المطار انا وكرفتتي الحمراء والشعر كاده ( ممشطه ) على جنب ... طالع كني هندي مكسوره رجل اليمنى
والله واتصل ويكلمني عبادي كنه ماكل شطه توه قايم من النوم
واتهاوش انا وياه بغيت ارجع من المطار
واروح بلموزين وياخذ 45 جعله ام خمس المشكله مامعي ولا ريال سعودي
واتهاوش انا والتاكسي يالله قبل بالدولار
وانزل وارقد وانا خشتي بتنفجر من القهر
والصبح جوا البزران يسلمون علي الواحد خشته كلها جروح ومشق ( اصابات ملاعب )
ومن بكره واطق الثوب والغتره البيضاء والطاقيه الزري
واطق الجزمات الحمر واروح انا وعبادي لرشيد قصدي عمي رشيد
ونطق بابه وادخل وانا عيوني للشبابيك يقولون البنات يطالعون منها اللي يخطبون ... وانا مدعرم اطالع الشبابيك صدمت في الباب وانعفط خشمي ..
ودمعت عيوني من الضربه وعمي يسألني وش فيك قلت دموع الفرح
المهم عبادي مسوي رجال وهو اكبر مني بسنتين وحول بعد
وقال ياعمي انا وعزيز نطلب يد حصه ... وانهبل قال لكم الاثنين ... جيت ارقعها انا قلت له لا ياعم قصده لي انا عبادي ساقط بالتعبير ..
قام عمي وقال ياعيالي اذا جاء ابوكم ودرت امكم انكم جايين تخطبون تعالوا كلكم ونشوف
والله وانا ازعل
وارجع للبيت واتصل على ابوي قلت له ترى ماني متزوج حصه بنت رشيد .. قام يضحك قال يالخبل حصه اكبر منك بخمس سنين
والله وتنتهي قصة حب الخمسة ايام
عشت فيها انواع الرومنسيه والحنان
وانا بالطياره كتبت قصيده يعجز المتنبي يقول مثلها
ويعجز سيبويه يحللها
بانشرها قريب ..
انتظروها
زيزوا الحزين
ولد زينه المزايين الحجة نفيسه
الرياض
اسطنبول مستقبلاً
متقول |