السلام عليكم ورحمه الله وبركاته

اترك لكم قصه حياتي مع أفضل اصدقائي تركي


أخواني هذه قصه حقيقيه من كتابتي وحصلت لي انا





قومني ابوي من النوم وكنت خايف جدا



نعم اليوم اول يوم في الدراسه



أمي تقول اكشخ يا صالح كبرت وصرت رجال وتروح للمدرسه



رحت مع ابوي الى المدرسه وخليته يقعد معي ويوم جاء يروح نزلت دموعي شلالات وانهارا

دخلنا المدرسه وانا كلي خوف من هذا العالم الجديد ... دخلت وانا شايل شنطتي ورا ظهري



كان جميع الطلاب لابسين بدل ما عدا واحد قاعد بالزاويه ولابس ثوب وما معه أحد



رحت قعدت جمبه وتعرفت عليه كان اسمه تركي وكان بصراحه مرح وانا اجتماعي فصرنا من ذاك اليوم اصدقاء

تعرفت على باقي الطلاب لكن علاقتي مع تركي طالت وطالت وكان بصراحه أفضل قارئ بحصه القرآن وكان ما يتكلم بأي شي محرم وكان يمنعنا من ذلك

واستمرت الايام وانا وتركي اصدقاء وغير اشياء كثيره في داخلي وكان ينصحني بعدم ترك الصلاه وخاصه الفجر

مرت الايام ونجحنا الى ثاني وانا وتركي لا نفترق

مرت العديد من المواقف الصعبه في ثاني وكان تركي في الواجهه دائما

نجحنا الى ثالث واذكر موقف لن انساه كنت انا وتركي وواحد معنا بالفصل قاعدين

ورأينا واحد بصف سادس وكان هذا الطالب معروف انه داشر وما احد يقربه

جاء الطالب ذا وقام بحركه تحرش بأحد الاطفال

جميع المدرسه شافته لكن ما احد قال شي

أما تركي قام وراح لمه وقاله عيب عليك

ورجع ادراجه بعد لكمه خطافيه من الطالب المؤدب ذاك

المهم استمرت علاقتي مع تركي حتى انهينا المرحله الابتدائيه



ذهبت انا وياه لنفس المدرسه في المتوسطه واستمرت صداقتنا بل قويت اكثر واكثر وكان تركي يقوم بالقاء المواعظ والخطب في المصلى

تركي لٌزم علي اني ادخل معه الحلقه وبعد ما كلمت والدي حفظه الله لم يخالف بل وصلني بنفسه للمسجد

ذهبت الى استاذ الحلقه وانا ابتسامتي تشق وجهي شقاَ

ودخلت الحلقه وحفظت بعض الاجزاء ثم خرجت لأسباب خاصه

لم تنتهي علاقتي مع تركي ذاك الشاب ذو اللحيه الخفيفه والثوب القصير واستمرت حتى الثانويه

سألته قبل تخرجنا من المتوسطه ودار بيننا الحوار التالي

انا : تركي وش تبي تصير اذا كبرت

تركي : ابي اصير مجاهد

انا : يعني وشلون <<<<<< قمه الذكاء

تركي : يعني اقتل الكفار واحمي المسلمين

انا : طيب واذا مت

تركي : اروح للجنه جنب الرسول

انا : طيب وش رايك نروح اليوم للمطعم الجديد <<<<< كلن على همه سرى



ودارت الايام ولم ندري الا بالامتحانات النهائيه للمرحله الثانويه تمر وكان تركي مثال للشاب الدافور

راحت الايام وافترقنا انا ورفيق الدرب تركي

انا دخلت الجامعه ترم واحد وطلعت وهو راح يدرس بالقصيم



كنا على اتصال ببعضنا دائما وتتكرر الزيارات حتى انقطعت فجأه لسبب لا اذكره

مرت الايام وتركي في بالي دائما واذكر اقول هل راح للعراق ولا افغانستان وفجأه تذكرت المحادثه اللي جرت بيننا ودمعت عيني ودعيت له بالتوفيق



قبل رمضان جاني اتصال من رقم غريب

رديت

انا : الو السلام عليكم

المتصل : وعليكم السلام

.... سكوت من الجانبين

قطعته انا وقلت : من معي يا اخوي

المتصل : انا حمود صديقك بالثانويه انت وتركي

( جاء في بالي تركي وهو يضحك معي )

انا : هلا والله حمود وينك يا قاطع من زمان عنك

حمود : والله الدنيا المهم انت وش اخبارك

انا : الحمدلله تمام بس انت وش ذكرك فينا الحين <<< وقح :5:

حمود : والله انت يا صالح في البال بس دقيت ابيك بموضوع مهم

انا : طيب خلاص نتقابل بأي مكان

حمود : خلاص بكرا بعد العشاء مر علي البيت

انا : خلاص تم

قفلت السماعه وانا افكر وش يبي حمود بذا الوقت

المهم قلت نصبر ونشوف بكرا

في الغد ذهبت الى الحلاق ونعمت وتزبطت

ورحت لحاره حمود ودقيت عليه

انا : هلا حمود انا جمب البقاله وين بيتكم .؟

حمود : امش لنهايه الشارع وتلقاني على اليمين الباب بيج

انا : طيب هذاني جايك

وصلت لحمود وسلمت عليه وكان سلام حار جدا

المهم قلطني في بيته وقلته له

انا : حمود وش السالفه .؟

حمود : والله ما ادري وش اقولك يا صالح لكن انت تذكر تركي

انا نزلت من عيني دمعه حاولت ما اطلعها لكن نزلت

انا : آآآآه وهو يرح من بالي

حمود : ما دريت وش اللي صار له

انا : وش صار ( تفكيري راح انه استشهد بالخارج )

حمود : مسكته الشرطه بسبب اغتصاب ورع

انا : وجهي صار كذا

وقلت له وانا معصب تخسي انت ما بقى الا انت تتكلم عن تركي

حمود : صالح هد بالك انا جيت بقولك لأنه وصاني اقولك وبكرا بروح للقسم وابيك تجي معي

انا : طيب طيب ( وانا مو مصدق ذكريات كثيره تجمعت في بالي كلمته وهو يقول جنب الرسول وكلماته في المصلى ... الخ )

رجعت البيت وان للحين مو بعقلي

دخلت غرفتي وطراااااخ على السرير نومه لين سمعت الجوال يرن رفعت الجوال من جيبي لأني ما غيرت ونمت بثيابي

حمود يتصل بك

رديت بكل تثاقل وانا اقول بنفسي اكيد اللي امس حلم والحين راح يسلم ويقفل

لحظات صمت

انا : هلا حمود آمر

حمود : هلا بك صالح بس حبيت اقولك اني بعد نص ساعه بمرك علشان نروح نزور تركي

انا : طيب طيب انتظرك

نزلت تحت وسلمت على ابوي وامي

أبوي حس ان فيه شي

أبوي : صالح فيه شي وانا ابوك

انا : لا يبه ما فيه شي

ابوي : وش فيك متغير لونك وكنك متضايق

انا : لا يبه ما فيه شي

أبوي : طيب اذا فيه شي قلي

انا : سم .. فمان الله انا بطلع

أبوي : وين يا ولدي

انا : بروح مع خويي بالثانويه

أمي دخلت بالحوار : من تقصد ... تركي .؟؟؟؟

انا والدموع نزلت : لا يمه حمود الـ...

ابوي : ونعم بس وش فيك دمعت يوم قلنا لك تركي

انا : ما فيه شي يا يبه مع السلامه



طلعت من البيت وانا متضاااايق مره ودقيت على حمود وقلت له وينك قال انا هذاني بالطريق خمس دقايق وجايك



رحت للمسجد القريب من بيتنا وصليت ركعتين ودعيت لتركي



طلعت وانا اشوف سياره حمود موقفه جنب بيتنا



رحت لمه وركبت وسلمت عليه ورد السلاد وبعدين صمت قااتل

حبيت اقطع الصمت وقلت : حمود وش سالفه تركي بالتفصيل

حمود : تركي يا صالح مو مثل اول تركي تغيير وصار شكل ثاني وما يخلي أحد في حاله وصار عاق وابوه طرده من البيت وصار يعتمد على السرقه علشان يمشي اموره

وفي يوم كنا بالاستراحه وما درينا الا الباب يطق بقوه رحت انا وفتحت الباب

لقيت كم عسكري برا انا خفت والله

العسكري قال : انت تركي الـ...

انا ( بلسان حمود ) : لا يا بوي انت آمر

العسكري : مطلوب القبض عليه لن عليه قضيه ولازم ناخذه هو موجود داخل

وما كمل كلامه الا وهو داخل وابعدني عن طريقه

راحوا للخيمه ودخلوا ومسكوا الشاب الوحيد وكان تركي

تركي باستغراب : نعم يا شباب وش فيكم وش مسوي انا

العسكري : بالقسم تعرف يا كلب

مسكوا تركي وانا لحقتهم على القسم ودخلت على الضابط وقلت له وش سالفه تركي الـ ...

قالي انت تقرب له

قلت لا بس هو صديق ومثابه أخوي

قال الضابط عليه قضيه اغتصاب

انا في ذا الوقت بكيت



خلصت السالفه ووصلنا للقسم

دخلت على الضابط وقلت له معك صالح الـ...

قالي ونعم ايش اقدر اخدمك أخ صالح

قلت له أنا جاي ازور صديق لي موقف عندكم اسمه تركي

قال الضابط : وهذا فيه أحد يزوره

انا : لو سمحت ممكن أقابله

الضابط طيب بس شوي

نادى العسكري

وقاله روح جيب تركي من الحبس

انتظرت بضع دقائق ودخل علي شخص لم اعرفه رآني وبكى

بعد بكائه عرفته ونزلت راسي حتى لا يشوف الدموع

تركي : هلا صالح تشوف الدنيا وش سوت فيني

انا : لا والله مو الدنيا هذا شيطانك اللي سوى فيك كذا

تركي : صالح انت ما صدقتهم والله انا ما سويت شي

انا : اتمنى ذلك يا تركي

تركي : ان شاء الله بكرا راح يجي اللي مبلغ عني ويقول انه مو انا واطلع

انا : يصير خير .. يا الله فمان الله

تركي : تروح يا صالح وتتركني

انا : ما عاد لي قعده بها المكان



وطلعت وهو ينادي لكن دست على قلبي حتى ما يرجع له وطلعت من القسم وقعدت ادور حتى سمعت آذان الفجر

دخلت مسجد ورحت للصف الاول ومسكت قرآن وقعدت أقرى فيه حتى جاء الامام واقام الصلاه

الامام قرا الفاتحه ثم قرأ قوله تعالى { يا ايها الذين آمنوا لا تقنطوا من رحمه الله ... الايه } انا حسيت ان الكلام هذا نزل لي انا وطلعت من المسجد وانا مرتاح نفسياَ

مر الغد بطئ جدا ولم اخرج من البيت الا للصلاه فقط وانا اتذكر ايامي مع صديقي السابق تركي وانا في ذكرياتي سمعت جوالي يرن

رحت لمه ورفعته لقيته رقم غريب ( انا بنفسي اللهم أجعله خير )

أنا : السلام عليكم

المتصل : وعليكم السلام

أنا : من معي يا بوي

المتصل : أنا تركككككككي يا صالح أفا ما عرفت صوتي

انا : تـ تـ تـ تـرررركي

تركي : ايه تركي صديقك

انا : بشر وش صار عليك

تركي : الحمدلله مو انا بس واحد انا اعرفه وكان ماخذ سيارتي ووصلتهم عليه

انا : الحمدلله على سلامتك

تركي : الله يسلمك

انا : طيب وينك انت بمرك

تركي : انا حاليا بشارع الفلاني

انا : طيب مسافه السكه وانا عندك

تركي : طيب انتظرك باي

انا : مع السلامه

تركي ( حس يخطأه ) : مع السلامه

رحت لمه وركبته وكانت ريحته دخان قويه ولم استحملها فوقفت عند اقرب مطعم وقلت له انزل ناكل شي

نزلنا وطلبنا وانا ما قعدت جمبه بل أمامه وقعدنا نسولف ونتذكر ايام زمان

انا : تركي بسألك سؤال

تركي : تفضل

انا : وش اللي غيرك

تركي : انا كنت انتظر السؤال هذا منك انت ,انا يا صالح صارت لي مشاكل كثيره ودخلت مع شله خربانه بأمل اني اصلحهم لكن هم افسدوني

وصرت مثلهم وأردى منهم بعد

انا : الله يصلحك يا تركي نسيت ايام اول يوم كنت تقول الجهاد والحين شف حالتك

تركي : صالح لا تفتح ذا الكلام خله بعدين

انا : طيب



طلعت من المطعم وقلت له نبي نروح للسوق نشتري كم غرضي لي

قال طيب بروح انا بعد

رحنا لأحد الاسواق وكنت اتابع نظراته اللتي كانت تلاحق كل شي اسود

او اي طفل حلو

انا قلت لتركي انا بروح اشتري غرض من المحل ذاك وبجيك قال لي طيب



انا طلعت من السوق ولم أعد



ارفع جوالي وارى عشرين مكالمه منه ورسائل عتب وحزن وسماح



لكن قررت أني انا صادقت تركي المطوع العاقل مو تركي الحالي فقررت افصل علاقتي معه نهائياً



كتبت بواسطه ن ا ر ...009

لا حول ولا قوة الا بالله ..
الله يهديه ويصلحه ..
وانت يا صويلح الله يثيبك سحبت عليه ورحت .. المفروض تنصحه وتوقف جنبه وتحاول ترجعه عن الطريق اللي ماشي فيه ..
ما اقووول الا الله يهديه ويتوووب ان شاءلله .

عبدالله

انا والله حاولت لكن الرجال حاله مستعصيه

كل ما مر واحد زين قال كلمته المشهووره : يالبييييييييييييييه

شكرا على مرورك العطر

سبحان مغير الأحوال
وصدق - عليه الصلاة و السلام - إذ قال : (( إن القلوب بين أصبعين من أصابع الرحمن يقلبهما كيف يشاء )) أو كما جاء في الحديث

اللهم يا مقلب القلوب ثبت قلوبنا على دينك
اللهم يا مقلب القلوب و الأبصار ثبت قلوبنا على دينك
اللهم يا مقلب القلوب و الأبصار ثبت قلوبنا على طاعتك

حسبنا الله و كفى

ثق تماما أخي بأنه في يوم من الأيام ستجد رقم غريب يتصل عليك و يبشرك بأن تركي عاد إلى رشده

الله يسمع منك يا غالي ورده

أخي الكريم



قصه تقطع نياط القلب .. حقيقةً لا أعلم ماذا يتوجب علي قوله ..



صديق العمر .. رفيق الدرب .. أنيسي ورفيقي ومناصحي ..



يصبح بهذا الشكل ..؟؟ لاحول ولاقوة الابالله ..


من خلال هذه القصه لابد علينا من الوقوف على بعض النقااط .


أولاً نقطه وهي الأهم : ليس بإمكانك وحدك بأن تهدي مجموعه من الشباب . خصوصاً وانت لست أهلاً لذلك ..؟


كما فعل اخينا تركي .. فهو شاباً ومعرض للفتن .. وليس بالكفؤ بأن يهدي شباباً على شكالت من ذكرت .


ثانياً : الإنسان مهما حاول في هذه الحياه .. ولو وصل به العلم الى أعلى الدرجات .. فلابد عليه من الدعاء بالثبت ... وكفانا مثلاً : بالنبي صلى الله عليه وسلم .. عندما يدعو ( يا مقلب القلوب والأبصار ثبت قلوبنا على دينك ) .



اخي عبدالله : قد لانضع اللومك عليك كونك تركته ورحلت .. لاتفقد الأمل .. في أعز أصدقائك .. فلا زال القلب بين إصبعين .. ولا تعلم ولانعلم .. ماذا يمكن ان تجلبه لنا الأقدار . حااول بأن تتصل به حااول بأن تذكره بذلك الماضي الجميل .


وأخيراً وليس آخراً .


{ يامقلب القلوب والأبصار ثبت قلوبنا على دينك }

والله غلطان بحركتك

صحيح مفروض تصير علاقتك محدوده بعد وضعه الجديد خوفا على نفسك

لكن مو تسحب عليه نهائي , ممكن تكون رجعته للطريق الصحيح بيدكـ

لكن اذا كنت تاركه لانك خايف على نفسك فـ ممكن معك حق

ارجو تقبل مروري

تصرفك يمكن يكون صحيح من وجهة نظري....!

لان هالتغير مو سهل..!

ومعك حق لانه ماعاد صار يوثق فيه...!

يالغالي

كيف حكمت عليه انه حالة مستعصية وانت ماجلست معه الا جلسة وحدة

سنين عمرك معه اختصرتها بجلسة وحدة

صدقني هو هالحين محتاجك اكثر من اي وقت وخصوصا انه هو الي طلب انه يقابلك

وكلمته انه انت السبب يمكن بعدك عنه

يمكن لانه مالقى احد يجلس معه

يشكي له

وعشان كذا طاح بالشلة الي تقول عليها

نصيحتي لك يالغالي

وش فائدة اخوتكم وصداقتكم وحبكم لبعض اذا تخليت عن حبيبك وقت ماهو محتاج لك

صدقني قيمة الصداقة واكبر تاثير لها يكون في الوقت الي خويك يكون محتاج لك

هنا تطلع الصداقة صح

وهنا تعرف صديقك من عدوك

فصديقك من صدقك وليس من صدقٌك

وختامي يالغالي
اذا شفت انك ماراح تقدر تؤثر عليه
او تخاف انه يؤثر عليك
ابتعد عنه ظاهريا لكن خله قريب من قلبك ولاتنساه من دعواتك

والا وش قيمة الصداقة اذا ماتجمع صديقك واخوك مع نفسك في الدعاء

وتذكر الاية الكريمة" الاخلاء يومئذ بعضهم لبعض عدو الا المتقين"

اقل شي تسويه لاخوك انك تشمله مع نفسك بالدعاء

ولاتنسانا من دعواتك يالغلا

مشكور على القصة وبالتوفيق ..

..

..

..

إقتباس الرسالة الأصلية كتبت بواسطة ابو ياسرالهلالي يالغالي كيف حكمت عليه انه حالة مستعصية وانت ماجلست معه الا جلسة وحدة سنين عمرك معه اختصرتها بجلسة وحدة صدقني هو هالحين محتاجك اكثر من اي وقت وخصوصا انه هو الي طلب انه يقابلك وكلمته انه انت السبب يمكن بعدك عنه يمكن لانه مالقى احد يجلس معه يشكي له وعشان كذا طاح بالشلة الي تقول عليها نصيحتي لك يالغالي وش فائدة اخوتكم وصداقتكم وحبكم لبعض اذا تخليت عن حبيبك وقت ماهو محتاج لك صدقني قيمة الصداقة واكبر تاثير لها يكون في الوقت الي خويك يكون محتاج لك هنا تطلع الصداقة صح وهنا تعرف صديقك من عدوك فصديقك من صدقك وليس من صدقٌك وختامي يالغالي اذا شفت انك ماراح تقدر تؤثر عليه او تخاف انه يؤثر عليك ابتعد عنه ظاهريا لكن خله قريب من قلبك ولاتنساه من دعواتك والا وش قيمة الصداقة اذا ماتجمع صديقك واخوك مع نفسك في الدعاء وتذكر الاية الكريمة" الاخلاء يومئذ بعضهم لبعض عدو الا المتقين" اقل شي تسويه لاخوك انك تشمله مع نفسك بالدعاء ولاتنسانا من دعواتك يالغلا

اخوي ابو ياسرالهلالي ما قصر

قال اللي في بالي .. واضيف نقطه .. مثل ما قلت في بداية موضوعك ان صديقك اقنعك بـ التسجيل في حلقة التحفيظ " هذا دين عليك الان " حاول تنصحه .. سو اي شي .. اذا كنت تعتبر نفسك " صديق "

الصديق وقت الضيق وهذا وقتك

اسأل الله ان يثبتنا على طاعته .. يالغالي الله يجزاك خير فـ حرصك على صديقك ما يدل الا على طيب اصلك وعلى الخير اللي فيك

اخوك محمد

تكفى لا تخليه

إقتباس الرسالة الأصلية كتبت بواسطة ابو ياسرالهلالي يالغالي كيف حكمت عليه انه حالة مستعصية وانت ماجلست معه الا جلسة وحدة سنين عمرك معه اختصرتها بجلسة وحدة صدقني هو هالحين محتاجك اكثر من اي وقت وخصوصا انه هو الي طلب انه يقابلك وكلمته انه انت السبب يمكن بعدك عنه يمكن لانه مالقى احد يجلس معه يشكي له وعشان كذا طاح بالشلة الي تقول عليها نصيحتي لك يالغالي وش فائدة اخوتكم وصداقتكم وحبكم لبعض اذا تخليت عن حبيبك وقت ماهو محتاج لك صدقني قيمة الصداقة واكبر تاثير لها يكون في الوقت الي خويك يكون محتاج لك هنا تطلع الصداقة صح وهنا تعرف صديقك من عدوك فصديقك من صدقك وليس من صدقٌك وختامي يالغالي اذا شفت انك ماراح تقدر تؤثر عليه او تخاف انه يؤثر عليك ابتعد عنه ظاهريا لكن خله قريب من قلبك ولاتنساه من دعواتك والا وش قيمة الصداقة اذا ماتجمع صديقك واخوك مع نفسك في الدعاء وتذكر الاية الكريمة" الاخلاء يومئذ بعضهم لبعض عدو الا المتقين" اقل شي تسويه لاخوك انك تشمله مع نفسك بالدعاء ولاتنسانا من دعواتك يالغلا

لا حول ولا قوة الا بالله

اللهم يا مقلب القلوب ثبت قلبنا على دينك

من جد قصتك اثرت فيني


ابو ياسر قال الي في بالي
وصديقك اكيد خلفية عقله عارف انه على خطا واكيد يتالم على هالشي ويمكن يحتاج من يعطيه دفعه يمكن محتاج احد يصير قريب منه بدل شلة هالمفسده

واذا انت يا اعز اصدقائه تركته مين بيصير معه ويعينه ؟!!

اقلها الدعااااااء
ربي قال : ( وإذا سألك عبادي عني فإني قريب أجيب دعوة الداعِ إذا دعانِ فليستجيبوا لي وليؤمنوا بي لعلهم يرشدون )

ادعي له وانت واااااثق ان الله بيجيبك ويهديه

ومثل ما قلت هو محتاج احد معااه


وان شاء الله ترجع تقول لنا قصة توبته يااااارب


.
.
.
بنت عبدالعزيز

لا حول ولا قوة الا بالله ...

قصة مؤلمة اخي الحبيب ,,,

أسأل الله ان يثبتنا على طاعته ... وادعوه عز وجل .. ان يصلح قلب تركي ...
ويرده للحق ردا جميلا ...

واتمنى ان تدعوا لمه في هذه الايام االمباركة ..
وان تحرص ان تكون سببا في ايقاظ قلبه ..

شكرا صالح ورده

يالله والله مؤثرة دمعت عيني

أخي ارجع لصاحبكـ وحاول زي ماغيركـ هو من قبل انت غيره الحين

وبعدين كنت قريب منه بالوقت الي كان على الطريق الصحيح يمكن رجعتكم سوا تذكره بهذيك الايام ولعل الله يهديه على يدكـ

الله يهديه يارب ويرجعه أحسن من الأول

اللهم يامقلب القلوب ثبت قلوبنا على دينكـ


والله تأثرت خاني التعبير بالرد