## جريدة المدينه او المفروض نمسيها جريدة كبسه ربع لانها معروف عنها انها من افضل انواع الجرايد اللي ينفرش عليها الغدا خاصه طبعا للناس اللي توصلهم ببلاش في اعمالهم ولا ما قد خبرت اني شفت واحد يشتريها ابد ولو اشوفه سميت عليه .. يمدحونها مره للكبسه يقولون انها تشرب الزيت ولا توصخ الفرشه وعلى ايام زمان قبل ما يمنعون الجرايد من المخابز كانوا يتطاقون عليها ويتسابقون عليها علشان يلفون بها الخبز وخاصه التميس ... اما عاد ما يكتب فيها فهو مثله مثل اهلا وسهلا اللي على السفره اللي تباع في السوق




## يوسف الثنيان وهو يمشي متجه للمنصه التفت على النزهان يا حبي له بعد وقال له تتحداني ارقى المنصه وانا مغمض ؟؟ قال له : ليه ؟ قال تعودت ارقى هالدرجه صرت ارقاها اكثر من درجة بيتي يالله لك الحمد حتى مره من المرات اذكر اني قلت لمدير ملعب الملز في وحده من البطولات ترى الدرجه العاشره منكسره ودايم اعثر فيها ياليت تصلحونها قال لي ان شاءالله ويوم جت البطوله اللي عقبها واناديه واقول له هماني قايل لك صلحوها شف بغيت اطيح فيها مره ثانيه الله يهديك قال لي معليش ان شاءالله بنصلحها ولا يكون خاطرك الا طيب

## منصات التتويج اصبحت تتلون باللون الازرق حتى لو صار لونها غير


## الهلال اخترع بدعه جديده هالموسم ان الكابتن يرتاح في المباراه النهائيه ويتسلم الكاس ... مع الخبره في المنصات اصبح الهلال صاحب سبق عجيب والا سامي الجابر يتسلم الكأس وهو المدرجات ويوسف يتسلم الكاس وهو في الاحتياط وهو طبعا يعكس متى ترابط الهلاليين مع بعض وان الكبير له حقه مهما كان .. لله درك من هلال


## بغيت ارحم واحد من الاتحاديين يوم شفته يصيح بس يوم تذكرت البلوي قلت ساد جعله يصيح الين بكره ..

## في المنتديات اللي تكتب ضد الهلال تجاوزت كثيرا في السب والشتم وللاسف ان مدينة الملك عبد العزيز لاهيه عنهم والا زي هالنوعيه من البشر المفروض يحجرون عليهم

## في مقابلة سمو الامير بندر بن محمد في صدى الملاعب بصراحه ابدع ايما ابداع وتكلم كلام حلو لكن فيه شي لفت نظري الا وهو التعامل الراقي اللي لمسناه من سموه مع سمو رئيس النادي اثناء المكالمه قمة الاخلاق والروعه عندما قال انا استاذنت من سمو رئيس النادي للحضور هنا يعني اخلاق رائعه ما بعدها اخلاق يسلم راسك والله انت وابوفهد .. بصراحه درس حلو نتعلم منهم والله ..

## دخول اداري الاتحاد مر مرور السلام ولا كأن شي كان حتى ولا صحيفه كتبت عنه للاسف لكن عاد الكشوى على الله والا يوم صالح النعيمه الله يكفينا الشر الدهام كنه يبشر الناس بالسيل منول في نفس الليله وهو يعلن خبر توقيفه .. ايه يا دنيا ناس وناس


تحياتي