#1  
قديم 20/09/2008, 05:40 AM
مشرف سابق بمنتدى الجمهور الهلالي
تاريخ التسجيل: 29/03/2006
المكان: نجـــد بنـت المجــد
مشاركات: 2,344
صويلـح .. ود المكنسـة وخـل عنـك حمامـك ..!!

بســم اللــه الرحمــن الرحيــم


حيالله الجميع .. حيالله كل(ن) باسمه


(( صويلح .. صويلح وصمخ .. حوّل حالت رجولك .. كل عصرية راقي(ن) للسطح عشان هالحمام .. ولا تسن عندك أهل )) .. (( سم .. سم يبه .. ألحين نازل .. خلني بس احط لهن موية )) ..
7
7
7
ما قرأتموه أعلاه مشهد يتكرر يومياً في كل (( عصرية )) ما بين صويلح وأبوه


صويلح شاب في عمر الزهور . بخيل من الطراز الرفيع . ياهو يحب الفلوس حب الله لا يوريكم . يموت في الدراهم . ومستعد أنه يخسر اهله عشانهن . إنسان يتاجر في هالحمام وبرضوه إنسان فاهم في الحمام مهوب غشيم وتبون الصدز والله ياهو يدّخل ذهب من هالحمام ومع هذا لو تشوفون العشّة اللي حاط هالحمام فيها ان كان حامت كبودكم . عشة والله ياهي تضيق الصدر . انا شايفها << لا تحمس الله يخليك . لكن يحسب له أنه ضافن هالحمام عن الشارع ويعطيهن موية كل يوم << لا يا شيخ . المهم . هـ الصويلح يقال والعهدة على الراوي ان عنده مصادر دخل ثانية لكن وللأسف مدري وشي . حاولت اعرف وشي عجزت عنه ابن اللذينا ما طاع يعلمني . عاد أقولكم . هالـ صويلح في كل عصرية وهو عند هالحمام . يداريهن . ويشوف المريض منهن ويعالجه ... إلخ . وياليتكم تشوفون هالعشة اللي حاطها والله يا هي مليانة حمام . شي(ن) أسود وشي(ن) أحمر وشي(ن) اخضر وصويلح نفسه ما يدري كم عددهن . ذاك اليوم وبعد صلاة العصر صويلح وابوه وهم راجعين للبيت (( صويلح )) . (( سم يبه )) . (( اسمعني .. خل عنك حمامك وخذ المكنسة وانقز بها للكهربائي ذاك اللي ورا بيت عمك سليمان .. تراها طافية لها يومين .. ودها له و حرّصه لايرّكب قطع أصلية ترى الاصلي غالي على غير سنع )) . (( أبشر .. وغيره ؟ )) . (( سلامتك .. وأسألك العجوز ان كانهم يبون مقاضي )) . (( ان شالله )) . دخلوا البيت . خذ صويلح المكنسة . مر على المقلط . (( السلام عليكم .. يمة .. تبون شي من برّا قاصركم شي ؟ )) . (( وعليكم السلام . لا يا وليدي ما نبي شي )) . طلع صويلح من المقلط وهو يصارخ (( سويلم .. سويلم )) . (( هااااااااااااه )) . (( تعال أبيك )) ويطلع سويلم الاخ الاصغر لصويلح من غرفة (( الاسم المتعارف على ذيك الغرفة .. غرفة التلفزيون )) . (( نعم ... وش تبي ؟ )) . (( شف .. أبيك ترقى للسطح وتشوف الحمام تكفى وتشوف وش ناقصهن )) . (( لحووول .. وغيره ؟ )) . (( سلامتك )) ويطلع صويلح من البيت رايح للكهربائي . وسويلم رقى للسطح بطلب من أخوه . عاد سويلم هذا انسان غريب . بتقولون وشلون غريب . خلوني اقولكم سالفته يوم رقى للسطح عند حمام اخوه . رقى ابو الشباب . دخل للعشة . ولقى الحمام ألوان وأشكال ويشوف ذيك الحمامة الجديدة اللي توه شاريها اخوه لونها اسود . وتحوم كبده منها عشان لونها . ويجي ابو الشباب ويمسكها ويطلع بها برا ويطيرها طبعاً هي نحاشت لانها جديدة ولا تعودت على البيت لهـ ألحين << طيب وش دخلك يا سويلم فيها هالضعيفة .. بعدين اخوك قايل(ن) لك شف الحمام وش ناقصهن ما قالك اللي ما يجوز لك طيّره . المهم . ويحط لهن الموية . ومن هالامور . والظاهر انه في ذيك العصرية نحّش له اربع حمامات جداد بدون سبب ألا ان اللون ما جاز له طويل العمر . حوّل ألا و صويلح يدخل البيت ومعه المكنسة . (( هاه سويلم .. بشّر .. عساك رقيت للحمام )) . (( أيه )) << بدون خلق قايلها .. (( كفو .. ما قصرت )) . طبعاَ صويلح ما فيه أمل يدري عن الحمام اللي طيرهن سويلم لانه ما شاالله عنده واجد وكل صبحية في هالسوق يبيع ويشتري في هالحمام وفي نفس الوقت سويلم ما علمه .

الصفقــة المحليـة .. !!

تمر الأيام . وصويلح ماعنده ألا هالحمام . وتبون الجد . كنه بدا يمل من مقابلتهن كل يوم . ذاك اليوم قرر أنه يكلم أخوه سويلم ويعقد صفقة معه اللي هي (( أن سويلم يتابع الحمام وله نسبة من الأرباح )) طبعاً .. الفلوس على صويلح . وفعلاً صار هالكلام وصار صويلح في كل عصرية يتسدح في هالبيت وسويلم عند هالحمام . وكل يوم سويلم صاج(ن) اخوه (( يا صويلح واللي يرحم والديك زيّن هالعشة تراها رايحتن فيها .. ياخي خطر لا تطيح ويهجن حمامك )) . (( لا .. لا وش أزين .. العشة ما هنا بـ ازين منها المراد انت شف شغلك وبس ولا عليك )) . (( طيب .. لكن انا علمتك )) . ما أخفيكم أن سويلم ذكي يعني مهوب يدربي دمجته وبس وذاك اليوم قرر انه يخاوي اخوه للسوق . وفعلاً راح على انه بريء ولا يدري وش السالفة . وشاف البيع والمشترى في هالسوق وشاف الربح اللي يجي اخوه صويلح من هالحمام . رجعوا البيت . وسويلم كنه بدا يغار من أخوه وهالفلوس اللي تجيه . في ذيك العصرية وقبل المغرب بشوي خلص سويلم من شغله اللي متعود عليه . وقبل لا يطلع سرق له حمامة و وداها لـ ولد جيرانهم حمود واتفق هو وحمود على أن حمود يبيع الحمامة ذيك والربح النص بالنص . طبعاً حمود علطول وافق لانه مهوب خسران شي ألا ربحان . وفعلاً راح حمود من باتسر وباع الحمامة وتقاسم هو وسويلم الدراهم . المهم . سويلم جازت له هالسالفة وصار يسرق حمام من اخوه ويعطيها حمود وحمود يقوم بالواجب وصويلح يا غافلن لكم الله . وما أخفيكم بعد أن حمود جاز له البيع والمشترى في سوق الحمام وشاف الرزق اللي فيه . و وقتها قرر أنه يدخل فعلياً في (( المتاجرة بالحمام )) . طبعاً حمود غشيم في الحمام . وهو يدري ان صويلح إنسان فاهم وله خبرة في هالمجال .

الصفقـة الدوليـة .. !!

طبعاً سويلم استغل ثقة أخوه صويلح فيه واستمر في بيع الحمام من ورا ظهر اخوه . وتمر الايام ويتمادى سويلم وصار يبيع له حمامتين في اليوم . ذاك اليوم في اول العصر رقى صويلح للسطح ودخل عند اخوه وهو يشتغل . اول ما دخل استغرب وشاف الحمام ناقص (( سويلم .. موب كن الحمام ناقص )) . (( ايوالله انك صادق .. أنا أول ما دخلت قلت هالكلام . وتعوذت من بليس وقلت شكلي اتوهم )) << يالخبيث . (( لا .. وش تتوهم .. ياخوي أقولك أنا متأكد ان الدعوة فيها شي )) . نقز سويلم وأشر بـ اصبعه على الشبك حق العشة (( اهااااا .. أجل ما فيه ألا هالبلكاش أكيد ان الحمام ينحاش من عنده .. لان الشبك منقطع وحطيت هالخشبة اسد بها هالفتحة )) >> يابن اللذينا .. (( ورا ما علمتني يا سويلم عن ذي الفتحة )) . (( هماني كل يوم أقولك زين العشة وتطردني )) . قفلت مع صويلح وينزل تحت . وسويلم يضحك . لانه هو اللي قاص الشبك وموّلم هالتصريفة إذا درا اخوه . في هالوقت رن الجرس . راح صويلح وفتح الباب ألا وحمود عند الباب (( هلا بالجار .. أقلط )) . (( ما جيت بـ أقلط يا صويلح .. انا جايك عشان بـ اكلمك عن غرض )) . (( امر وش عندك ؟ ياخي حنا كم عندنا من حمود )) . (( الله يسلمك .. المهم يا صويلح .. انا جايك بما أنك خبير في الحمام وفي البيع والمشترى وأنا انسان قررت أني ادخل في تجارة الحمام )) . (( طيب والمطلوب ؟؟ )) . (( المطلوب يا طويل العمر .. اني ابيك كل ما جيت تشتري حمام لك .. اشتر لي معك ولك نصيب السعي )) . طبعاً .. مثل ما قلت لكم صويلح بخيل لدرجة ما توصف ويوم انه سمع هالكلام .. استانس ألا نسى سالفة حمامه اللي نقص . (( ابشر ياحمود .. ومن بكرة راح اجيب لك أول دفعة )) . (( الله يعطيك العافية .. خلاص بكرة وعدنا ؟ )) . (( ان شاء الله )) . ومن بكرة ألا وصويلح يطق الباب على حمود ومعه شبوك الحمام ويوم رقو لسطح حمود انبهر صويلح بـ عشة حمود (( وش ذا ... وش ذا يا حمود .. والله لو انك بـ تسكن عيالك في هالعشة )) . (( يابن الحلال .. هالحمام اللي انت تشوف بـ يجيب(ن) لي دبل هالعشة وش انت خايف )) .

ااااه منكــم يا مقــرمين .. !!

وتمر الايام . وسويلم حس ان اخوه بيدري عن سالفة بيع الحمام وصار يبيع حمامة وحدة كل فترة وكذا انس يدري صويلح . عموماً صويلح زين الشبك ذاك وبالحسرة زينّه هالبخيل . وفي الجهة المقابلة حمود كل يوم يستقبل الحمام من صويلح وبعد فترة يبيع وعلى هالمنوال . عموماً العلاقة بين حمود و صويلح توطدت وجا ذاك اليوم اللي فيه سويلم رايح لـ حمود ومعه ذيك الحمامة (( هلا .. سويلم )) . (( هلا حمود .. المهم هذي الحمامة ومثل العادة والوعد بكرة )) . (( لا يا سويلم .. هالشغل حرام ومايصير تسرق أخوك )) . (( أخس .. عرفت الحرام ؟ )) . (( يا سويلم .. هذا اخوك واللي تسويه ما يصير )) . قفلت مع سويلم ورجع للبيت ومعه الحمامة ورجعها للعشة . وقتها قعد يفكر وش يسوي . حمود وسحب عليه وهو ما يقدر يروح للسوق . جا في باله (( عبّيد )) اخو حمود . طلع سويلم من البيت ولقى عبيّد جالس على عتبة البيت . راح له وعلمه بالسالفة كلها . وطبعاً .. رحب بالفكرة لانه راح يربح من هالشغلة . وتمر الايام وعبّيد يروح للسوق ويبيع حمام سويلم ويتقاسمون الربح . وذاك اليوم قرر عبّيد أنه يسوي بـ أخوه مثل ما يسوي سويلم بـ اخوه صويلح . وفعلاً تم هالكلام . ومرة الحمام على سويلم ومرة الحمام على عبيّد (( و صويلح و حمود .. حمامهم يطير وهم ما يدرون وش السالفة )) .

@@ نيوتنيـــات @@

** الـ ART شبكة قوية . تملك مقومات مادية مهيب سهلة لكنها بخيلة . فهي مثل صويلح . إنسان يدّخل ذهب من التجارة بالحمام لكن (( العشّة )) اللي حاط فيها حمامه أي كلام . والـ ART وللأسف لا زلنا نطالب بالافضل منها فهي تدخل ذهب من الدوري السعودي والدليل انها تخلت عن الدواري العالمية . عموماً مثل ما قال سويلم لـ أخوه (( زيّن هالعشة تراها رايحتن فيها .. ياخي خطر لا تطيح ويهّجن حمامك )) وأنا بدوري أقول لـ ART (( عدلّي وضعك ترا وضعك لك عليه .. قبل لا ينحاشون جمهورك )) .

** الـ ART في الاونة الأخيرة بدأ معدل الرضى الجماهيري عنها بالإنخفاض ومع هذا ما زالت تملك (( قوة جذب )) للجماهير . لكن منسوبيها وللأسف هم السبب الرئيسي في (( إنخفاض المعدل )) والسبب راجع لـ تحيزهم لبعض الاندية . فـ هذا يشجع فريق يخدمه على حساب الشبكة والثاني مثله وهكذا . و وضع المنسوبين مشابه لـ وضع سويلم . فـ سويلم هو السبب الرئيسي في تهريب الحمام وطبعاً يستفيد مادياً والمنسوبين هم السبب في تهريب الجماهير ويستفيدون (( شهرة )) .

** أبو ظبي الرياضية .. قناة تفائلنا خير بمجرد دخولها كـ قناة ناقلة للدوري السعودي . فهي دخلت بـ سلاح (( الملعقين )) . و وضعها مشابه تماماً لـ وضع حمود . فـ حمود إنسان مزيّن عشته لـ إستقبال الحمام اللي يجيبه صويلح لعلمه التام ان الحمام راح يدخل له أضعاف سعر العشّة . و أبو ظبي الرياضية مزينة قناتها بـ (( معلقينها )) وهي داخلة هالتجربة لمعرفتها التامة بـ قوة الدوري السعودي ومسألة الربح مسألة حتمية . بمشيئة الله .

** نعم .. ما زلنا في بداية المشوار . لكن الملاحظ على قناة ابو ظبي أنها بدأت تتخذ طريق (( الإثارة الجماهيرية )) كـ منهج . وهذا راح يفقدها الكثير من جماهيرتها . فـ حمود إنسان يدفع فلوس عشان حمامه لكنه ما يدري عن اخوه عبّيد وسواياه . ومنسوبين ابو ظبي وضعهم مثل عبيّد . وصاروا سبب رئيسي في (( بداية )) تنحي الجماهير الهلالية عنها . وهالشيء مهوب في صالح القناء بشكل عام .

** صويلح وحمود لابد انهم يتابعون حمامهم بـ انفسهم ولا يخلون الدنيا ترعى وهم ياغافلن لكم الله . نفس الكلام ينطبق على ART وأبو ظبي .. فلابد أنهم يكثفون الرقابة على المنسوبين . لان مسألة التعصب مسألة خطيرة والتعصب تمكن من منسوبين الـ ART وبدأ الان يتوغل في ابو ظبي . لان في الاخر الضرر راح يقع على القناتين . الجامع بين (( صويلح وحمود )) و (( ART و ابوظبي )) أن (( صويلح وحمود )) اذا استمر حالهم كذا راح يفقدون كل الحمام . و (( ART وابوظبي )) اذا استمروا على حالهم راح يفقدون جماهيرهم .
.
.
.
إنتهـــى
.
.
.
نيوتن
اضافة رد مع اقتباس
  #2  
قديم 20/09/2008, 05:48 AM
زعيــم متواصــل
تاريخ التسجيل: 19/04/2008
مشاركات: 63
قصه رائعه اخي نيوتن


والأجمل ربط القصه بالأحداث


الى الأمام
اضافة رد مع اقتباس
  #3  
قديم 20/09/2008, 05:49 AM
الصورة الرمزية الخاصة بـ أبـ خالد ـــو
زعيــم مميــز
تاريخ التسجيل: 30/08/2006
المكان: نادي الهلال
مشاركات: 3,004
الله يعطيك الف عاافيه اخووووي ينيووتن وكعاادتك دااائما مبدع
اضافة رد مع اقتباس
  #4  
قديم 20/09/2008, 05:50 AM
الصورة الرمزية الخاصة بـ Ricky 8
زعيــم مميــز
تاريخ التسجيل: 19/08/2005
مشاركات: 5,816
قسم بالله افضل موضوع قريته في هالشهر



مبدع يالغالي


الله يعطيك العافيه

تشبيه في محله

وتستاهل الوسام والله


ما قصرت يالغالي
اضافة رد مع اقتباس
  #5  
قديم 20/09/2008, 05:53 AM
زعيــم جديــد
تاريخ التسجيل: 08/12/2006
مشاركات: 18
كلام جميل

000000
000000
000000
اضافة رد مع اقتباس
  #6  
قديم 20/09/2008, 05:55 AM
زعيــم فعــال
تاريخ التسجيل: 27/12/2007
مشاركات: 262
ياسلام عليك بس قسم بالله تشبيه بالصميم
اضافة رد مع اقتباس
  #7  
قديم 20/09/2008, 06:01 AM
زعيــم متألــق
تاريخ التسجيل: 08/12/2006
مشاركات: 1,486
الله الله الله

درر

يسلمو على الكلام اللي من القلب طالع

ياريت يقرون كلامك ويفهموا صويلح وحمود عشان الحمام لا يطير <<<< مصدق
اضافة رد مع اقتباس
  #8  
قديم 20/09/2008, 06:08 AM
زعيــم فعــال
تاريخ التسجيل: 02/08/2007
المكان: حايل بعد حيي ^_^
مشاركات: 217
كلام جميل والتشبيه بالصميم
الصرااحه ابداع ×ابداع
مجهود تشكر عليه يانيوتن
والى الامام ماقصررت
تحياتي
عاشقه المحبه
اضافة رد مع اقتباس
  #9  
قديم 20/09/2008, 06:12 AM
زعيــم نشيــط
تاريخ التسجيل: 12/03/2005
المكان: مملــ)(الانسانية)(ـــكة
مشاركات: 703
ابداااااااااااااااااااااااااااااااااااع يعطيك الف عافيه
اضافة رد مع اقتباس
  #10  
قديم 20/09/2008, 06:13 AM
الصورة الرمزية الخاصة بـ جنون الهلآل
مشرف منتدى الرياضة العربية والعالمية
رئيس رابطة ريال مدريد
تاريخ التسجيل: 29/09/2006
المكان: رابطة ريال مدريد :$
مشاركات: 3,148
شــكرا لك يانيــوتــن

عندي حمــام تشتري يالصــويلــح هع هع

امــزح ..
اضافة رد مع اقتباس
  #11  
قديم 20/09/2008, 06:13 AM
زعيــم متواصــل
تاريخ التسجيل: 14/02/2008
مشاركات: 59
مشكور اخــــوي ودائما متميز بقلمك الرائع

الله لا يرحرمنا من كيبوردكـ
اضافة رد مع اقتباس
  #12  
قديم 20/09/2008, 06:17 AM
زعيــم نشيــط
تاريخ التسجيل: 11/02/2008
المكان: معسكر في مـعـسـكـر الإمير هـذلـول بـن عـبـدالعـزيـز
مشاركات: 885
تصووير وااقعي للحاال

نيوتن داايما تفاجني بإبداعاتك الصااروخيه


اتمنى لكـ التوفيق بحيااتك

اخر تعديل كان بواسطة » كيفي بحب الهلال في يوم » 21/09/2008 عند الساعة » 05:49 AM
اضافة رد مع اقتباس
  #13  
قديم 20/09/2008, 06:19 AM
الصورة الرمزية الخاصة بـ ♥ N E V E S ♥
زعيــم مميــز
تاريخ التسجيل: 17/05/2007
المكان: PIN:28E6FBA7
مشاركات: 25,539
وآآآآآآآآآآآآآآآآآآو
والله موضوع خيااااااااااالي كعادتكـ....
اضافة رد مع اقتباس
  #14  
قديم 20/09/2008, 06:21 AM
زعيــم متألــق
تاريخ التسجيل: 31/07/2007
المكان: الخليـج
مشاركات: 1,168
ميــن تكلم على أحمد الصويــلح >> يـالدايخ !!

---

مـا قـصرت !!

استمرارية الجشع و زرع التعصب لـ ART

وبداية مخيبة للآمـال لقناة أبو ظبي ( وعلى قولة بعضهم ابو غبي )


ينبئ بنتائج خطيرة على الرياضة السعودية ..
اضافة رد مع اقتباس
  #15  
قديم 20/09/2008, 06:22 AM
الصورة الرمزية الخاصة بـ نايف القحص
زعيــم فعــال
تاريخ التسجيل: 10/12/2006
مشاركات: 221
يسلمووووووووووووووووووووووووووووووووووووووووووووو ...ذكرتني باللي مضى
اضافة رد مع اقتباس
   


إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 07:27 PM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2017, Jelsoft Enterprises Ltd

Google Plus   Facebook  twitter  youtube