السلام عليكم

والله ماردني للتعب النفسي ألا الحالة المأسوف عليها التي تمر بها كل إمرأة سعوديه حظها شين
المسيكينه مايهنى لجفنها نوم لا ليل ولا نهار
ماغير تفكر [وش ناقص عجينة اللقيمات عشان تضبط]
قسم بالله قلق الرجاجيل قـــــــلــــــــــــــق
ورا ماياكلون تمر ويشربون مويه يامال اللي مانيب قايله
ولا ما يرتاحون ألا لين يشوفون السفره على إمتداد مرأى العين
لا ومن زود الطناخه اللي فيهم يطلبون على الفطور برتقال وفواكه يقال لهم كريمين وهم من جنبها
ولا يجيهم حب المطابخ ألا برمضان
إذا دخل رجال بالمطبخ كأني شايفه جني
بسم الله معصب وحالته لله تقول يجاهد في الشيشان
ماودي ألا فالعته بالسحله اللي بيدي

المهم خلكم من مقدمتي الفاشله كالعاده

أترككم مع رمضاني اللي على كيفي< الحمد لله والشكر

بأبدأ من الفجر لأني أكون مواصله
طبعا أرقى فوق للدور الثاني وأول ما يأذن أشرب مويه بعدها أصلي ركعتين سنة وركعتين الفجر ثم أجلس في الصاله أشغل الجوال على قصيدة
يانجد ماتشكي من الهم والجور
سلمان حي وجالس بالامارة
^
مرره تجنن بصوت المنشد فهد مطر
وآخذ دقيقتين وأروح عند البنات في الغرفه ونهستر على هالصبح ضحك على غير سنع وسوالف
نفضفض وكل وحده تقول أحلامها وتتحسر على عمرها وحظها
واللي تتذكر الماضي والمواقف البايخه اللي صارت لها
نجلس على هالوضع لين تصير الساعه 5 ونص بعدها نشغل اللاب توب ونتابع أي فيلم وأنصحكم بالأفلام المصريه الكوميديه السياسيه قسم بالله تفطس ضحك من جد بايعينها بتراب
وإذا إنتهى الفيلم كل وحده تدور النوم ويخمدون إلى أن يشاء الله
وأنا أفتح لعبة [Mahjog Titans] وأحط السماعات بأذني على شيلة [يانجد]
تقريبا الساعه 9 بعدها أقفل النت وأنام على صوت السماعات بس أسمعه من بعييييد لأني حزتها في سابع نومه
ما أصحى إلا على فتحة الباب ما أعرف أنام ألا والباب مسكر أصلا ما أرتاح في أي مكان ألا والباب مسكر مدري هل هو مرض نفسي أو حالة ميأوس منها
بس على فكرة الرسول صلى الله عليه وسلم كان يقول بمعنى الحديث إن الشخص لا ينام ألا ويرد بابه عليه
أهلي يصحوني على آذان العصر بس ما أصحصح ألا على الساعه 4 ونص بعد طقاق وهواش ماله داعي بصراحه
يعني وشفيها ليا نمت ساعة زمان بتطير الدنيا مثلا!
ساعتها أصحى غصب وأتوضى وأصلي الظهر أربع ركعات وبعدها أربع ركعات العصر وبعدها ألبس نظارتي على الطاير وأنزل تحت بسرررعه
وأدخل على أمي في الصاله وأنا راسي بالأرض وخايفه من التهزيء كلها كلمتين كفيله بأنها تنزل دموعي وتذكرني بحظي الردي
وأسمعها تقول: سوي المريسه
المريسه هذي طول الله عماركم على طاعته
هي [عصيري الخاص] تتكون من: كيسة تمر صغيرة ونصف كأس تانج وحبتين كبيرة ليمون.
الطريقه: يمرس التمر باليد مع قليل من الماء ثم يصفى بالمصفاة ثم يوضع بجيك كبير ويعصر الليمون ويوضع في الجيك مع التانج ثم يعبى ماء بارد جدا مع قطع الثلج ويخلط جيدا ويوضع بالثلاجه
بعدها يصير حضر تجول في المطبخ من لدن شخصي للعيال
يروح أجر صيامي في الهواش مدري يستخفون دمهم على أيش
المهم نجهز كل أبو شيء لتقديم سفرة أفضل
وتبدأ حوسة قبل المغرب بعشر دقايق
الصراخ ذيك الحزة مصرح للجميع
طبعا الرجال يضايقونا بعجلتهم وإحنا نتحلطم وشوي ونكفخهم بس نتذكر إنا صايمين فنهون ونتعوذ من ابليس
أهم شيء ما أطلع المريسه من الثلاجه ألا إذا سمعت الأذان عشان تكون باااااااارده
أسمع الله أكبر ويالله بسرعه أفتح الثلاجه وآخذ [المريسه حصريا مع متآبعه]
وأروح عند أهلي بالدكه الجو رهيييييب
شجر والأرض مرشوشه بالماء والهواء يرد الروح والأحلى من هذا كله الأكل الشهي
أسمي بالله وأقول اللهم إني لك صمت وعلى رزقك أفطرت
وآكل فردة رطب وأصب لي كأسا من عصيري وآكل السمبوسه وفطاير الدجاج واللقيمات بالشيرة والمطبق والمكرونة
كل شيء بوقت واحد وأكره نفسي إذا شبعت لأن ماودي أشبع بس الشكوى لله
مره من المرات في رمضان لما خلصت الفطور قلت: ذهب الظمأ وأبتلت العروق و(ذهب) الأجر إن شاء الله< شيء طيب جدا
المفروض إني أقول وثبت الأجر إن شاء الله بس الله يخلف علي
بعد ما أخلص فطور أرقى للدور الثاني وأصلي المغرب ثلاث ركعات وركعتين سنة وبعدها أخمد نص ساعة< يعني أطس أنام
بس فجأة أتذكر المسلسلات اللي متابعتها وأنزل بسرررعه للصاله
عشان يمديني ألحق على الأحداث
طبعا لازم الواحد مايتابع شيء ألا وهو شبعان وأنا حزتها بصراحه أكون جوعانه
آخذ لفه في المطبخ وأشيك على كل الأكل وأنا عارفه إني بالأخير راح أشرب شوربة الخضار باللحم< يالبيه
أشرب بعدها كاس لبن أو تانج وما أكثر
بعدها أروح أتكي بالصاله ونتنح كلنا عند القنوات اللي تبي الفطين واللي تبي بيني وبينك
عاد أنا أحب أتابع كل شيء فما تفرق عندي
أهم شيء أشوف مسلسل شر النفوس والبارونات وليس سرابا السوري
إذا خلصت المسلسلات المتتالية تنفك أزمة التتنيحه عندي وأبدا أسترجع بالذاكرة أنا مين ووين جالسه
نسيت أقولكم تراني صليت العشاء قبل غلطة نوف أربع ركعات وركعتين سنة وركعة وتر
بعد التلفزيون
أنتقل لسور بيتنا وأجلس بالدكه وسوالف وفللة حجاج وأكل وعصيرات وشاهي وحليب أهم شيء الشاهي بالحليب وسكر زيادة
ماتمر ثلث ساعة ألا وأنا ناطه بالصاله وأجلس عند أحسن مكان وأتكي بالمركى وأستنى مسلسل فضه قلبها أبيض وليا بدا ناديت اللي بالدكه
وأتنح يجي ساعة بعدها تنفك الأزمة وأروح للسور الثاني عشان شبكة النت وأدخل النت ساعة من 2 إلى 3
بعدها ينادوني للسحور وأطلع عندهم بالدكه وأتسحر الكبسة اللي تبرد القلب يارب لك الحمد
طبعا مسوين جدول للسحور عشان مايتلخبط الدور
إذا خلصت حمدت ربي وصعدت فوق وصليت كم تسليمة بعدها أنزل تحت للنت بس يقهر الصفحه يبيلها ساعتين عشان تفتح
وعيوني تروح فيها وأنا أقرا كله لعيون منتدى المجلس العام لبى قلبه
بعدها أركض بسرررعه للدكه عشان أبوي يصحى على الساعه 3 ونص ويعصب على كل شيء الله يطول لي بعمره ويحسن خاتمته
وأحط سحوره وأحط لأمي سحورها
وأجلس عندهم لو يحتاجون كاس مويه ولا كاس مريسه ولا فيمتو
بعدها أدق على العيال يتسحرون لأنهم يلعبون كوره برا
وأحط لهم سحورهم
وكاس المويه بيدي طول الوقت وأنا أشرب وأتمشى في البيت أو أجلس بالصاله أتابع أي شيء لين يأذن الفجر

إلى هنا إنتهيت بحمد الله ورعايته


""""""""""""""""""""""

تهقون إن يومي طبيعي؟
بصراحه أشك في ذلك!
ما شاء الله علي أنصحكم بمتابعة الأفلام وإحنا برمضان!
والقرآن ماذكرته أبد لأني أقرا في اليوم صفحتين أو ثلاث بس!
ولا خليت مسلسل ما تابعته!
وصلواتي مهيب في وقتها!
مدري هل أنا أستنى ملك الموت ياخذني وأنا على هالحال!
ولا بيتعدل الوضع في الأيام الجايه ومن هالساعه!
نقول إن شاء الله
أتمنى من العلي القدير إنه يكفيني شر نفسي ويهديني
ويثبت قلبي على طاعته .. اللهم آمين

يا قراء وكتاب أرقى منتدى كل الشكر والتقدير لمعاليكم
دمتم في حفظ الله.