((يوميات رمضانيه" 7")) يـ abo_nasser انت راقل ما يصحش تخاف من الحئنه..!! - نادي الهلال السعودي - شبكة الزعيم

المنتدى الاستشاري · #1 08/09/2008, 04:05 AM

فكرة :: سندريلا الهلال
اعداد ومتابعه ::
هلالي من ارض اليمن و الهنوووف
تصميم :: عسيريه

لنا من كل عام شهر فضيل ..
أعاده الله علينا وعليكم وجميع المسلمين بالخير واليمن والبركات
وكل عام وانتم بخير
**][يوميات رمضانية 1429 هـ ♥][ **
لقد عدنا اليكم .. تحملنا الاشواق للقياكم .. ونسعد ان نعيش معكم .
. في سلسلة تحمل بين طياتها يوميات الأعضاء الرمضانية من كل عام ،،،
هذه السلسلة أنتم أهل بيتها ونحن ضيوفا في حضرتكم ،،،

أهلا وسهلا بكم أحبتنا ..
ودعونا نرحب سوية بالمضيف "السابع"
المتميز"abo_nasser"
لك يحكي لنا احداث يومه مع شهر رمضان المبارك ..

بسم الله الرحمن الرحيم
السلام عليكم ورحمة الله وبركاته

بدا يومي لما صحيت الساعه 2 فجراً توضيت وتعطرت ومشطت شعري

..واتجهت للصاله حصلت فيها الوالد والوالده

يتقهوون
..تكيت معهم وتقهويت
بعدها احتضنت لاب توبي ولسان حاله يقول(يرحم ابوك خلها اليوم اجازه)

دخلت المجلس

ثمن فتحت المسن(اوف لاين)

بعد ما رديت على كم موضوع
فتحت صفحة البلياردو وانا العب مع شنب جاء اخوي يناديني للسحور.
.ما كلفت على نفسي الا اني طلعت من اللعبه على طول
(اخوي اذا قرات يومي فاتمنى منك السموحه)

..تسحرت كبسة لحم ثم حليت واكملتها بكاس من الماء..

رجعت لجهازي العزيز حتى اذان الفجر توضيت وصليت
وقرات قران الى حدود الساعه 6 بعدها عدت لجهازي
ودخلت البلياردو وكان شعاري (البنات بالليل عشان لا اجرح صيامي)

لعبت مع التماسيح بس مليت بسرعه لعبهم جاف واغلبهم يفوزون علي

فتخليت عن مبدأي ولعبت مع سحالي وطقطقت عليهم وفزت عليهم بالراحه

عند الساعه 9 صباحاً تركت الجهاز ونمت.
.صحيت 12 الظهر اخذت شاور سريع بعدها لفيت بالبيت ما حصلت الا امي

بالمطبخ اول ما شافتني صارت عيونها كذا..

وقالت:فلاح صاحي الحين..؟؟

وانا اضحك على مزاجي الخايس قلت:والله طار النوم..

قالت:احسن

..على الاقل تصلي الظهر بوقتها..

سولفت مع الوالده شوي الى اذان الظهروصليت بعدها دخلت النت
..وانبسطت لما شفت المتواجدين بروم البلياردو48
تذكرت ايامي انا وسلوم

كنت انا واياه نفحط فيه لوحدنا..

اذن العصر رحت اصلي وجلست بالمسجد اقرا قران رجعت البيت
حصلت اختي مستقبلتني بورقة طلبات
طبعا اخذت الورقه ورحت لامي اقراها عليها
عشان اتاكد لا تكون اختي تنصب علي ببعض الاغراض

كالعاده فيه كم طلب واضح ان اختي العزيزه صرفته من عندها بس مشيتها

.
.طلعت انا واخوي الصغير اخذنا الطلبات بعدها رحنا نجيب تميس وفول للوالد

رجعت البيت وادخل النت .
.دخلت موضوع وليد وليتني ما دخلته

بعدها قفلت الجهاز وقريت قران للاذان افطرت ثلاث تمرات
واتبعتها بكاس سن كويك واخرمن الماء
ثم اكملت التمرات المتاحه لي واختتمتها بكاس اخر من الماء..

بعدها اتجهت للمسجد صليت
وجلست اتابع مسلسل عيال قريه(ما اسمجهم)

بعدها حان وقت الفطور الكبير
اهم صنفين عندي السمبوسه والشوربه والحمدلله كانت متواجده

اثناء الفطور تابعت مدحت والشيخه الفت

بعد الفطور جلست ادردش مع اخواني ذبه من هنا وذبه من هونيك

اذن العشاء وطلعت انا واخوي الكبير للمسجد
..واحنا عند باب البيت شفنا كفر سيارة اخوي مبنشر(منفقع)

كان عندي علم ان اخوي مواعد اخوياه بعد الصلاه
..فقلت لنفسي تجي مني احسن

.
.قلت لاخوي بعد الصلاه خذ سيارتي او سيارة الدشير الصغار وانا بغير الكفر ..

كنت انتظر من اخوي شكر وثناء لكن الرد كان:اصلا هذا اللي بيصير

رحت اصلي للعشاء واتبعتها ركعتين من التروايح
ورجعت البيت ابدل ثوبي
وادور لبس خفيف عشان الجو مكتوم ورطوبه وحياة بقعا

..
جاء اقتراح من اخوي الصغير ان البس سروال سنه وفانيله علاق..

قلت طس مناك ..والا قسم لاخليك انت واخوك الثاني تفكون الكفر.
.بعدها سحب نفسه وطس..

بعد تدوير وتفكير لبست فانيله كت

وطلعت للقراج اخذ العده منه

واتجهت للكفر جلست تقريبا خمس دقايق وانا اناظر الكفر ابي اتذكر
هل فك الصاموله يمين او يسار؟؟

حاولت بس خفت لاعدم الصاموله ..اتصلت على اخوي وعلمني
..بعدها فرمت ام الصواميل الا وحده ما ادري وش في امها مو راضيه تفك..

وانا داخل جو مع هالصومله المعفنه جاء جارنا اللسلوس(مباحث)

جلس يسولف معي شويتين وانا احرث بهالصومله
وفي الاخير فكت معي بعد عناء طويل..

غيرت الكفر المعفن وفي تلك اللحظه اللي بيشوفني
بيقول :نعيما يابوناصر

..على باله اني ماخذ دش سريع ..

كانت الرطوبه محتفله فيني .
.اتجهت البيت ومن غبائي رحت اوقف قدام المكيف

..
.رحت بعدها اتسبح (اتروش)

ثم رميت جسمي على سريري عزيز

ونمت لكن ما صحيت الا الحراره مرتفعه
وجسمي منهد بسبب وقفتي قدام المكيف..

(تقريبا 1 ونصف)

بعدها اخذني اخوي وعلى المستشفى
قالي الدكتور المناوب الحراره مرتفعه ولازم ابره فولتارين.
.قلت: عدل بدل يا دكتور..قال:ايه عدل بدل يا بني.؟؟

قلت:يعني ما فيه حبوب او شراب؟
قال:انت راقل يا ابني..ما يصحش تخاف من الحئنه..

قلت بيني وبين نفس:الله يجعلها بوجهك..

جت ذيك الممرضه التحيفه..الله يسعد امها

واعطت المحروسه الحئنه..

طلعت لاخوي وانا امسك الجدار..قال :وشفيك ..قلت :الله ينعن امها واليد

حسيت بدوخه غير طبيعيه..

جلس يضحك علي انا ومشيتي..

بعدها اتجهت للبيت ثم الى السرير..

والحمدلله الحين الصحه تمام..

هنا انتهى اليوم ,واتمنى لكم قراءه بدون غثيان..

والمعذره على طول اليوم ..
بس هذا اليوم الوحيد اللي فيه اكشن والا الباقي نوم ونت بث..

كل الشكر لحكومتنا العزيزه..

ورمضان كريم..

كل الشكر

للمتميز**][ "abo_nasser .♥][ **
والحمد لله على سلامتك

وانتظرونا غداَ مع
المـتميز .F I N A L

أرق التحايا وأطيبها من
مشرفيي واستشاريي
المجلس العام