هلا الدحمي ..

إقتباس عزوز كلامك عن كريس مع المنتخب اللي ينتظر هالفرصه يقول شوفو لاعبكم اللي مستانسين عليه يختفي مع المنتخب ... يقصدون انه فقاعة صابون ... واذا جينا نتكلم عنه بالمان قالو هذا نجمكم الاول وانتو تعتمدون عليه

موضوعنا يتكلم يقول مانشستر يعتمد على كريس والا لا ..؟

مايتكلم عن مستوى كريس بشكل عام ..

.....

طيب بقولك شي .. وهذا سؤال للكل ..

لو كريستيانو رونالدو مالعب مع مانشستر يونايتد الموسم الماضي .. تتوقعون بيحصل مانشستر يونايتد عالثنائيـه ..؟؟

......

برب نوم .. مانمت عشان نقاشك يآزيزو .. لي عودة اذا قمت ..

والله مع ان لا لي لا ناقه ولا جمل في الاطروحه حقتكم لكن لعلي بي اصل لشئ معكم << كيف اللغه بس ..

طيب ..

هل كيف مانشستر ولا شئ بدون رونالدو ؟

لا لا لا جد .. انا أؤيد كلام زيزو .. لكن برضو ابصم بالأيدي والأرجل مع نظرية اليكس احد عشر .. في نقطه يجب الاتفاق عليها اولا قبل ماتتعاركو .. بأن الفريق 11 لاعب .. وان الاعلام له دور كبير في بروز شئ على اشياء عده ..

بالسابق كان فيه قسم يقول رونالدينيو هو برشلونه .. وفي قسم آخر يقول .. الشغل الا يسويه ديكو وبويول وايتو وفان بوميل وتشافي ولا شئ يعني ؟ ..

طيب هنا نوصل لشئ فاصل ..

رونالدو ولا شئ بدون العشره اللاعبين الا جنبه .. لكن العشره اللاعبين الا جنبه ممكن يكونو شئ لو اشتغلو صح وكان جنبهم لاعب حادي عشر يكملهم ..

خلينا نبسطها اكثر ..

كم مباراه كان المان فيها محرج بشكل كبير .. وخلصها له رونالدو ؟ .. سواء بتوغل .. او بحصوله على ضربة جزاء او برأسيه او او ..

لكن كم مباراه رونالدو كان موجود وكان أدائه اقل من المؤمل به ..

رونالدو ممكن يجيب هدف .. يصنع هدف .. يعمل حركه مهاريه .. يسوي لك كعب .. لكن وراه .. كم لاعب يحاول يغطي .. كم لاعب كان لازم يكونو في قمة تركيزهم علشان لايجي عليهم هدف او علشان لاتخترب التركيبه التكتيه .. او علشان يوقفو مفاتيح لعب الخصم ..

لو اخذناها من منحى .. بان في المباريات الا يتألق فيها رونالدو ( هجوميا ) يتم نسف ونسيان جميع اعمال زملائه .. لازم نسأل انفسنا .. هل يستطيع رونالدو القيام بمجهودات تيفيز البدنيه .. او بتمريرات كاريك الملمتريه .. او بطريقة هاري في قطع الكرات ..

بينما في المباريات الا يكون فيها رونالدو مكلف ببعض المهام ( التكتيكيه ) قبل الهجوم .. يقال فيها بأن رونالدو كان سئ ..

أي اننا نرى اشياء ونغفل عن اشياء واشياء عديده .. لأنها لاتجذب اعيننا ..

نرجع لمحور حديثنا .. ليش رونالدو غير ..

اولا في ميزه عند رونالدو .. عنده سرعه كبيره جدا .. السرعه هذي مايملكها ( حاليا ) .. لا قيقز ولا بارك و ناني ولا اي جناح في مانشستر ..

السرعه هذي تفيد رونالدو في اشياء .. تفيده في افتكاك الكره متى ماضغط على الخصم خصوصا في مرتدات الخصم .. وايضا تفيده في الهروب في المساحات ..

الميزه الثانيه الا عنده رونالدو .. هي مهارته العاليه الفرديه .. وهالشئ تخليه يخدع جزء كبييير من مدافعي البريمير .. اللي جزء كبير منهم عندهم ثقل نسبي ..

مانشستر احد الأنديه .. اللي الخصوم تلعب امامه بحذر كبير .. وبالتالي عادي جدا انه يعاني .. لأنه منطقيا التكتيل الدفاعي يحرج الفرق الهجوميه .. بالتالي مع تقفيل المنطقه لازم يعاني مانشستر مع غياب صاحب افضل الحلول الفرديه عنده وهو رونالدو ..

طيب .. نقول مانشستر عنده ناني وقيقز وبارك وو .. لكن فيه نقطه .. انه ولا واحد من هذولي عندهم جرأة رونالدو واندفاعيته ..

رونالدو عنده ثقه كبيره بنفسه .. ويندفع بشكل مباشر .. قيقز عامل السن يأثر عليه .. وبارك عنده امكانيات لكن ليس بنوعية رونالدو .. وناني مازال يحتاج لعمل اكثر ..

يعني خلاصة الكلام .. بأن نوعية رونالدو لايوجد حتى نسخه شبيهه بها في مانشستر .. وبالتالي صعب تعويض اعماله ..

لايوجد اي فريق .. مهما امتلك من قدرات ماليه .. ومن قدرات فنيه في الجهاز التدريبي .. ان يكون فريق احتياطه يعوض الأساسي بكل ماتعني الكلمه ..

بشكل اوضح .. فيه لاعبين تتعوض ادوارهم التكتيكيه .. لكن في لاعبين ماتقدر تعوض قميتهم الفنيه الخاصه .. ولكن تسعى وتحاول بأن تغطي جزء كبير منها ..

رونالدو مثال .. زيدان مثال .. ميسي .. بيكام وقيقز على سبيل المثال في موسم 99 .. رونالدينيو سابقا .. وكمان وكمان ..

بالسابق المان كان يمتلك الأجنحه المثاليه كما يقال عنهم .. جناح للاختراقات ( قيقز ) .. جناح لجميع انواع التمريرات ( بيكام ) ..

هل بأي شكل من الأشكال لو غاب هذا الثنائي سيحقق الفريق ثلاثيته الشهيره ..

الفريق كبير ايه نعم ماختلفنا في هالشئ .. لكن على ارضية الملعب كل شئ يختلف .. زينيت الا حتى مايوصل لربع تاريخ مانشستر حقق فوز على المان العريق .. مع انه زينيت بس العام الماضي ظهر لوجوه المتابعين ..

المنطق يفرض بانه فيه لاعبين قيمتهم صعب تعويضها .. بل تتغير طريقة اللعب وتتغير اشياء كثيره فقط للوصول للنقاط الثلاث المراد الوصول لها ..

ايضا فيه شئ .. عندما نقول رونالدو لم يتألق مع البرتغال كما تألق مع المان .. هذي حاله مختلفه تماما .. مانشستر شئ .. البرتغال شئ .. قد تكون هناك عناصر معينه غائبه عن البرتغال موجوده في المان وساعدت رونالدو بشكل عام في المباريات .. وقد يكون استخدام خاص للمدرب .. وقد يكون سوء حظ لااقل ولا اكثر .. ولكن خلونا نسأل بعض ..

هل تيفيز نجح على الصعيد الدولي بنفس الطريقه اللي نجح فيها مع مانشستر ؟ ..

هل مر مدرب على التانجو استخدم تيفيز بشكل صحيح مثل ماستخدمه السير ؟

المدرب الوحيد الا مر على التانجو واستطاع الوصول لقدرات تيفيز بشكل سليم هو مارتشيلو بيلسا .. اما الباقي فشلو معه تماما ..

في مثال آخر ..

جيوفاني ايلبر كان في وقت هداف البايرن العتيد .. وكان جلاد الحراس في التشامبيونز .. ولكن هل عوض رونالدو في فترة غيابه عن منتخب السامبا .. ماريو جارديل هداف اوروبا الكبير ومثل .. سوني اندرسون .. والعديد من المهاجمين البرازيليين الا كانوا ناجحين في اوروبا وعلى مستوى الأنديه لكن فشلوا في المنتخب ..

المنتخب شئ والنادي شئ .. النادي يتدرب يوميا على مدى شهور عديده بنفس عدد اللاعبين الذي لايتعدى 25 لاعب .. والمدرب يحاول يوصل لتشكيله تفيده في جميع النواحي .. ومستعد يسهر الليالي وهو يتعب في تصحيح اخطاء لاعبيه ويخلي الـ 11 لاعب داخل الملعب يساعدو بعض بشكل ايجابي ..

بينما المنتخبات ياتون في فتره قصيره .. يعملو معسكر سريع .. في محاوله للوصول لأسرع النتائج .. فـ بالتالي الصبر على بعض اللاعبين قد يكون صعب ..

شئ أخير .. هو تأثير اللاعب على باقي الفريق .. لنأخذ على سبيل المثال كباتن برشلونه في عهد ريكارد .. ( بويول - رونالدينيو - تشافي ) .. مع انه تشافي صار له 10 سنين في النادي .. لكن بالتصويت صار متساوي مع رونالدينيو .. بل و اصبح الكابتن الثالث في الفريق .. هذا يعني بأن تأثير رونالدينيو مختلف ..

كريستيانو رونالدو الا بعده ماطلع من بيضته صار كابتن لمنتخب البرتغال .. على حساب كارفاليو وريكارد الحارس وغيرهم من اللاعبين ..

أي أن تأثيره مختلف عن باقي اللاعبين .. وجوده يعطي ثقه لباقي الفريق .. وغيابه ممكن يدخل الشك في اللاعبين في لحظات من المباراه او حتى من الموسم ..

خلاصة كلامي .. رونالدو دوره بارز في الفريق .. لأنه يملك خواص مايملكوها لاعبي المان الآخرين .. ولأن التركيز الاعلامي عليه مختلف .. وراح يتأثر الفريق بشكل اكيد في غيابه ..

لكن هذا لايجعل مانشستر صغيرا .. فاحتياج المان لرونالدو .. هو بنفس مقدار احتياج رونالدو للمان .. أي ان الطرفين يساعدو بعض في سبيل الوصول الى نتيجه وحده .. ارضاء العملاء << شركة جوال مو نادي ..

تقبلو مروري .. واتمنى اكون وصلت لشئ معاكم .. لأني نعسان ولا ادري وش اقول

يعطيك العافية على الموضوع

رونالدو أفضل لأعب في العالم في الفتره الحاليه

و لا بد أن يكون أهم لأعب في الفريق و منتخب بلاده

تحياتي
السلطان أحمد

إقتباس بس حبيت اقولك .. أنه ليس من الغباء القول ان مانشستر = كريستيانو .. بل من الغباء القول عن رأي الطرف الآخر غباء .. رونالدو مايلعب في كل المراكز .. لكن مانشستر بدون رونالدو لن يحقق ماحقق العام الماضي ..

ياخي ياكثر ماسمعنا بالقضية هذي انا مااقولك كريستيانو مافعل شيء الموسم الماضي لكن وين راحو الاعبين (كاريك تيفيز واهم لاعب وهو سوبر سار وناني وبراون)واذا كان على رأيك ان كريسيتانو يشكل مانشستر بأكمله الدليل الموسم الماضي وهو امام البرشا من الذي قادنا للفوز اما البرشا وهو هدف اليتيم لبول سكولز ولاتنسى انه ضيعنا في الذهاب بتضييع ركلة جزاء وللمعلومية كريستيانو لم يفعل شيئا اما البرشا في الذهاب والاياب والدليل الاخر المباراة النهائية كنا نفقد الشامبيونز عندما اضاع ركلة جزائية
أخرى امام تشلسي لكن قوة واصرار سار هي من جعلتنا نفوز بالشامبيونز وفوق هذا ي(اليكس11)تقول مانشستر=رونالدو

إقتباس ختاما ً اريد ان اوضح نقطه ! قوة كريس بالمنتخب كانت غائبه بشكل كبير الجميع يتسائل عن السبب ! هو سبب وحيد ! غياب العناصر المكلمله لمجهوده وايضا ً فقدانه للتبادل بالمراكز الحاصل في الثلاثي الهجومي في مانشستر

قلت له ان باليورو وقبل كانو يقولون كريس لاعب فاشل ما يظهر بالمنتخب وحده المان ومن هالكلام يطلعوه انه فاشل ...

عزوز

لو اقول كلام من ذهب .. ابشرف الذهب بهالحاله .. < القلب للذهب

ابقول شي ما يوصف وبس

إقتباس فمن التفاهه عندما يغيب عن لقاء ما اكثر من 5 لاعبين بعضهم حضر بجسده فقط !

قلتها سابقاً لعبود .. وشيء يعني لي الكثير لما نتفق انا وياك على عبود خخ

العناصر المؤثرة الغائبة تعدّوا الخمسة بينما البعض يذكر كريس ويتجاهل
البقية ..

لو كان كريس موجود بوقت كانوا الاغلب سيئين وش بيصير ؟؟
ما اعتقد بيتغيّر اذا كانت المجموعة اللي معاك موب بيومهم

كريس له تأثير .. لكن موب لدرجة ان كريس = مانشستر

إقتباس أهنيك .. هذا كل اللي أبي أقولـه .. كل فريق لازم يكون له نجم يعتمد عليــه .. موب عيب ترا .. لأني ألاحظ ردود البعض شوي ويلعنون خيري ..

ما توصل ينلعن خيرك وانا موجود ياحياتي

الفريق يعتمد عليه وعلى غيرهـ واتفق معاك انه الابرز .. وهالشيء ما ينكرهـ
أحد وموب معنى إنه الأبرز يعني الفريق صفر بدونه ..

ميلان مثلاً الأبرز فيه كاكا .. لكن موب معناهـ إني اتجاهل نجوم ما يقلون عنه
وعن اللي يقدمه للفريق .. جاتوزو وبيرلو وبالاخص الأخير .. أشوف إنه أهميته
مثل اهمية كاكا لكن مهضوم حقه بسبب مركزه ..

ايضاً نيستا وغيرهـ .. وايضا الكلام ينطبق على اكثر الاندية ..

في مباراة زينيت ولعلها هي اقرب مثال .. مشكلة الفريق كانت ازدواجية أدوار
المحاور .. ومشكلة المحور هذي اضرت بالفريق ككل .. وأجزم إنه لو تواجد
كاريك بجانب سكولز بيختلف الوضع كثير لأن أساس اي فريق منطقة الوسط
والمقصود بالوسط المحاور موب الاجنحة .. لأن المحاور حلقة وصل بين
جميع الخطوط وقوتهم تقوي وتريِّح اللاعبين اللي قدامهم بالذات لاعبين
الوسط الهجوميين ..

يعني كاريك = مانشستر ولا يكثر < طبعاً امزح ماله داعي يفطرون علي الشباب

شفنا يوم دخل اوشي وخذ راحته سكولز مسكنا اللعب وخلقنا فرص وتحرك الفريق
وقربنا كثير للتعادل بينما قبل التغيير الكوره ما نمسكها الا بالمناسبات .. والفرصه
ماشفناها الا مرهـ وحده وبمجهود فردي فقط ..

إقتباس قلت مانشستر يعتمد على كريس .. واذا غاب كريس يغيب مستوى المان .. واذا حضر كريس حضر مستوى المان ..

عبدالله موب شرط .. ترانا الحين ببداية موسم والفريق ما بعد وصل للتوب ..

ارجع للموسم الماضي وش مستوانا قدام ريدينغ ؟؟! المستوى تصاعد شوي
قدام بورتسموث والثنتين كان رونالدو موجود .. قدام السيتي بغياب رونالدو
الفريق قدم مستوى افضل من الثنتين بالرغم من انه قابل فريق اقوى
من هالاثنين وخسر .. وخلق فرص بالجملة ومسك اللعب بدون رونالدو ..!

قل إنه يقِل معدل التهديف اقول لك اوكي .. ( يقل موب ينعدم )

أنا مانيب اقول كذا اقلل من رونالدو .. لكن حرام وموب منطق اربط مستوى
فريق كامل بلاعب واحد مهما كان حجمه ..

××

ياحبي لكم وانتم تتهاوشون

××

استمتعت بقراءة الآراء بالذات آراء الكبار .. واستمتعت اكثر بالمقال

هلا أبو حميد ..

كل كلامكم على راسي ..

لكن أبيم تعرفون أني قلت هذا الرأي بحسب المباريات الماضيــه في هذا الموسم ..

يعني ان شاء الله تكون تصاعد مستوى تدريجيا .. وماتكون سبب لغياب كريس ..

...............

كل اللي قلته في هالموضوع استنتاج من المباريات الماضيه أتمنى في الممستقبل تكون هذي الفكره غلط ..

مشكوور اخوووي

كتبت فابدعت

بصراحه كلام صحيح مئه مئه وانا اتفق معك بكل حرف كتبته

لانه هذا الكلام المنطقي المااان لايقف على رونالدو

واانا مو بس الحين قلت الكلام ذا بالعكس بكل الردود الي فيها مواضيع انتقال كريس

وانا من وجهة نظري ...
صحيح انه رونالدو كان اللاعب الاهم في تحقيق المان الدوري الانجليزي ودوري الابطال
ولكن ...
حاليا المان تلخبطت اوراقه لعدم وجوده رونالدو بالمباريات السابقه
ولكن انا اضمن انه حتى لو رونالدو مالعب الا الجوله عشره
ماراح تفرق الموسم ذا لان السير جالس يدور له بديل والدليل التشكيله اللي لعب فيها في المباريات السابقه
يعني اصبروا شوووي وتشووفوون انه كريس ماله دااعي بالفريق حتشووف فريق جماعي تماما
مثل الارسناال
وانا بذكركم الكل قال الموسم السابق مع تعثر المان بالجولات الاولى ماراح يحقق الدوري
ولكن حقق الدوري لاانكر انه كان الاهم كريس
ولكن الان نتعثر بالجوالات الاولى ولا نتعثر بالنهاايه
وارجوو اني مااكوون طوولت عليكم ولكن ذي وجة نظري
وشكراا
اختلاف الرأي لايفسد للود قضيه
وكل عام والجميع بخيـــــــر