قـِصّـةٌ ( الـمـُشَـاغِـبٌ وَالـخـَمـسُ نـِسَـاء ) ,,,!! - صفحة رقم 6 - نادي الهلال السعودي - شبكة الزعيم

الـمـشـاغـب · #1 28/08/2008, 07:33 AM

بسم الله الرحمن الرحيم

بما أن الكثير هنا ( يحاول مستميتاً ) أن يثبت لنفسه وللمتابعين هنا أنه يصلح أن يكون راو ٍ جيد .. سأثبت للجميع أنه

مهما كانت محاولاتهم جيدة نوعاً ما إلا أنها لن تصل لأسلوب ( أسطورة الرواية السعودية المشاغب )

سأتحدى رواياتهم بقصة خيالية قصيرة لا تخلو من الواقع أسميتها ( المشاغب والخمس نساء )

..

سأترك الحكم لكم ..!!

( لو أشوف أحد منكم يصدق الهياط اللي فوق , فترى أمه داعية عليه بصلاة الليل ولا يلوم إلا نفسه )

&& المشهد الأول &&

في ليلة من الليالي كنت أتمشى في أسواق حجاب كاشخ بالجينز الجديد اللي شريته قبل يومين.. حتى اتصل علي

صديقي العزيز تركي يطلب مني أجيه البيت نتقهوى قبل ما نطلع شارع التحلية نفرفر ونقضي على وقت الفراغ

دقيت سلف وعلى طول لبيت تركي اللي تركوه له اهله قبل ما يسافرون لشرم الشيخ ..!!

وصلت البيت ودقيت على تركي ..

- هلا تركي .. أنا عند البيت وينك؟

- أهلين سلطان .. أنا طلعت شوي وراجع .. ادخل البيت شغالة الجيران تنظف البيت كلمتها تفتح لك اذا جيت ..!

- أوك يا قلبي .. بس لا تتأخر ..!

- سلطان .. ترى حطيت لك شي مع الخدامة خلها تعطيك اياه ..!!

قفل السماعة تركي .. وأنا آلاف علامات الاستفهام تدور في مخيلتي

.. يا سبحان الله .. تركي أول مرة يسويها

استجمعت قواي وتوكلت على الله وضربت جرس الباب ..!!

** المرأة الأولى **

فتحت الخدامة لي الباب .. وقعدت تناظر فيني برهة من الزمن ثم سمحت لي بالدخول بعد أن ناولتني ورقة صغيرة ..!

قرأت الورقة وإذا هي بخط وتوقيع تركي

:

" سلطان يا أغلى أخ وأعز صديق .. الله لا يحرمني منك "

مباشرة دقيت على تركي ..

- تركي وش السالفة؟

تركي وهو مستحي : ما قدرت أعبر لك عن مشاعري ومواقفك معي يالغالي إلا عن طريق هالورقة

- على تبن بس .. وأنا حسبتك مشتري هدية عليها القيمة وآخرتها ورقة؟ الشرهة على اللي يرجي من ورا وجهك خير

قفلت السماعة في وجه تركي .. ودخلت المجلس برجلي اليمين

جابت لي الخدامة عصير برتقال ثم طلعت .. ثم دخلت ومعها المكنسة تكنس المجلس ..!

كانت نظرات الخدامة لي تخوّف لكني تجاهلتها

.. ثم قامت بمحاولات عشان تلفت انتباهي وبرضه تجاهلتها

بالأخير عصبت وقالت كلمة انقليزية يترجمونها بالأفلام ( تباً لك )

ولأني ما أرضى الإهانة ما سكت لها ورديت عليها

بالانقليزي بكلمة ترجمتها بالأفلام ( حقيرة )

.. لكنها بدل ما تعصب ابتسمت لهالكلمة وكأنها تنتظرها من زمان

دخلت شوي ثم رجعت ومعها مسجل

شغلت المسجل بأعلى صوت على أغنية طلال سلامة :

دخل مزاجي وعاجبني ...... من يوم شفته تملكني
حبيت روحـه وحـبـّيتـه ...... الله مـنـه لا يـحرمنـي

اما على خادمة جيرانكم يا تركي ذوق؟ يا هي راعية مزاج من جد

بدت الخدامة المسطولة تدبك وترقص رقص مثير

.. وأنا مستمر بتجاهلي وأتصبب عرق ودي الأرض تنشق وتبلعني

ثم بدت تقترب مني شوي شوي .. وأنا أتجاهلها ومنزل عيوني للأرض وخايف

.. واقتربت أكثر وأكثر وغمضت عيوني

كل شوي ترقص وتقترب .. ترقص وتقترب .. ترقص وتقترب .. وأنا أقرأ المعوذات

.. حتى حسيت بأنفاسها الحارة

ترتد في وجهي

فتحت عيوني وانخرشت من براطمها اللي قدامي وأدفها بكل قوتي حتى طاحت على الأرض

قمت من مكاني أحاول الهرب

لكنها لحقتني من رجلي مسكتها وطحت على بطني

حاولت التملص منها وأزحف على بطني لكنها مجوّدتني من رجلي

حاولت أصيح بأعلى صوتي لكن صوت طلال سلامة كان أعلى مني وهو يقول :

مـودي توافق مع مـوده ... حلـوة حياتي بوجـوده
يامر وينهى على قلبي ... مسموح يتجاوز حدوده

ترجيتها وتوسلت اليها ان تستر علي وتخليني أروح لأهلي لكنها رفضت

حاولت المقاومة لكن وحشيتها كانت أقوى

ثم قالت لي مقولة الـ F.B.I ( كل ما كنت متعاوناً كلما كان الأمر أسهل عليك )

.. استسلمت للأمر الواقع وسلمت أمري لله ولهجت بالدعاء والتضرع بأن ينقذني من هذه الذئبة البشرية

كانت هذه الخدامة المتوحشة تسحب قميصي وتقطعه من وراء وأنا أزحف على بطني أبي أوصل للباب بكل ما أوتيت من قوة

دخت وأنهك جسمي من التعب وأيقنت بالهلاك

.. حتى دخل علينا أخيراً صديقي النكبة تركي

تركي : أوووف سلطان وش قاعد تسوي مع الخدامة؟

رديت عليه وأنا أبكي : قاعد أعطيها كورس في السباحة وهي قاعدة تنقذني وتسحبني؟.. الحقني منها يا غبي

أنقذني تركي منها وطردها من البيت قبل ما يجيب لي شرشف يغطي ما انكشف من جسدي

&& المشهد الثاني &&

طلعت مع تركي وأنا مكسورة عيني أناظر تحت من الفضيحة

قلت : لازم أبلغ الهيئة على قليلة الأدب .. عيال الناس وشرفهم موب لعبة

تركي : سلطان الحمد لله على السلامة .. وبصراحة لا تلومها , أنا لو أني بنت كان خربتها معك من زمان

قلت له : ما فهمت ..وش قصدك؟

قال : يعني أنت وسيم وفتنة ومطمع للبنات وخصوصاً الذئبات البشرية

قلت : طيب وش الحل؟ راح أظل طول عمري عرضة لتحرشات البنات؟

قال : لا .. إذا تزوجت راح تستر على نفسك وتنتهي معاناتك

** المرأة الثانية **

اتفقت أنا وتركي على البحث عن عروس مناسبة لي

بعد عدة خيارات وقع اختياري على معلمة

دخلت أنا وتركي بيت العروس المنتظرة نبي نخطب.. رحب بنا أبو البنت وعشّانا على دجاجتين شواية ثم دخلنا بالموضوع

تركي : يا عم محمد حنا جايين نخطب بنتك نورة لابننا سلطان .. وش رايك يا عم محمد؟

العم محمد : والله يا ولدي ما راح نلقى أحسن من سلطان .. لكن عندنا شروط واللي أوله شرط آخره نور ..

أنا : سم يا عم محمد .. أنت تامر وحنا نطامر

العم محمد : أول شي راتب بنتي يجيني كل شهر .. وثاني شي المهر أبيه مائة ألف ريال نقداً وإذا تبيه تقسيط سنتين راح يصير المهر مائة وخمسين ألف ريال .. وباقي الشروط بنتفق عليها بعد ما توافقون على هالشرطين ..!

رديت وأنا متنرفز من هالبجاحة : طيب يا عم محمد ما قلت لنا هي أصفار والا مشت كم كيلو؟

العم محمد : يا ولد وش قاعد تقول أنت؟ احترم نفسك

أنا : أنا ادري عنك؟ كنك قاعد تبيع لي سيارة بالتقسيط .. والله لو بنتك فل كامل تانكيين ومراتب جلد على هالمبلغ

ما كملت كلمتي إلا والعم محمد طاردنا من بيته

** المرأة الثالثة **

هالمرة وقع اختياري على بنت العم الطيب صالح .. جمال ودلال ودين ومال

دخلنا نخطب والحمد لله تمت الموافقة من الأهل ومن البنت

من زود الفسقة رجعنا اليوم الثاني وطلبت أن أنظر للبنت الشوفة الشرعية

وافق العم صالح ووافقت البنت وطلبوا نأجل الشوفة ليوم ثاني حتى تتهيأ البنت نفسياً .. وافقت طبعاً على مضض

باليوم الثاني رحت لهم لحالي وسحبت على تركي

كنت طالع من حلاق تركي وضبطني أحلى تضبيطه

وصلت للبيت ودخلت المجلس وسولفت مع العم صالح شوي .. وفجأة دخلت الملاك علينا بالشاهي

<< سعوديين أكيد شاهي, أجل تنتظرونها تدخل علي بالشربات؟

ما أنكر أني يوم شفتها خقيت

.. بس قلت يا ولد اثقل ترى ما يدوّخ البنات إلا الثقل

قعدت البنت قدامي بسم الله ما شاء الله عليها

.. سويت نفسي ما أدري عنها ( لزوم الثقل )

حطيت رجل على رجل .. وتجاهلت وجودها حتى ما قلت لها وشلونك

وقمت أسولف مع العم صالح

قامت البنت وهي مستحية .. وحسيت بعلامة النصر تبرق في عيني

استاذنت من العم صالح وخرجت وأنا دايخ من جمال هالبنت

وأنا في طريقي للبيت إلا ويجيني اتصال من العم صالح .. عرفت على طول ان البنت الخاقة معي تبي تستعجل بالملكة

- هلا يا عم صالح ..!

- ألوووه .. يا ولدي وشلونك؟

- أنا الحمد لله تمام .. أنت وشلونك ؟ بشرني عنك ؟

- الحمد لله بخير .. إلا أقول يا ولدي .. بيني وبينك . البنت قررت تكمل دراستها وتحضر الماجستير ..

- أخلى شي يا عم صالح وأنا من المؤيدين لها

- لا يا ولدي .. هي تقول انها تبي تتفرغ لدراستها وشايلة فكرة الزواج من راسها بالوقت الحالي ..!

يؤ يؤ يؤ ..

يؤ يؤ يؤ

وبعد يؤ يؤ يؤ

** المرأة الرابعة **

بعد ما تحطمت من الزواج جاني تركي بالحل الأكيد على قولته .. أم راكان مطلقة وعليها ولد من زوجها السابق ..!

عارضت الفكرة في البداية لكنه أقنعني بأنها الوسيلة الوحيدة للتخلص من الذئبات البشرية

وأيضاً الزواج من مطلقة لا هو عيب ولا حرام .. بالعكس مثلها مثل غيرها لكن ما حصل نصيب ..!

توكلنا على الله ورحنا نخطبها .. وتمت الموافقة وما جبت طاري الشوفة الشرعية

تم الزواج بشكل سريع واستمريت مع أم راكان سنة كاملة وكانت كلها مليئة بالمشاكل

لو أقول لها .. طسي بس ..! قالت ودني بيت أهليييييييييي ودنيييييييييي ياللللللللله

في سنة كاملة رحت بها بيت أهلها أكثير من سبعة وستين مرة

طبعاً آخر العلاج الكي .. لذلك تم الطلاق بالتراضي بعد ان وصلت حياتنا الزوجية لطريق مسدودة

المرأة الخامسة

تعقدت من فكرة الزواج خصوصاً بعد حياة الجحيم اللي عشتها مع أم راكان

اتصل بي تركي صاحب الحلول الغبية .. وجاب لي فكرة أعجبتني لكني ترددت لأن ما عمري فكرت فيها ولا تخيلتها ..!

قال لي تركي : يا شيخ خل عنك أم الركب السود وخلنا نروح لأم الركب البيض .. خلنا نزوجك سورية تدلعك وتعيشك أحلى عيشة وتستر عليك

وافقت بعد تردد .. وحزمنا الأمتعة وركبنا على متن الخطوط السعودية المتجهة إلى دمشق الحبيبة

اخترنا من أجمل البنات .. و لأن تركي له معارف في سوريا سهل علينا الموضوع كثير وتمت الموافقة ( طبعاً بدون شوفة شرعية )

تزوجت من الفتاة الشقراء البيضاء ذات العيون الزرقاء والخدود الحمراء والشفاه الوردية

قضيت معها أجمل لحظات عمري .. ما أقوم من النوم إلا والفطور جاهز .. ولما تصحيني تصحيني بشويش : أووم حبيبي

بعد ما تكون زينت نفسها ويكون منظرها يفتح النفس على هالصبح

تذكرت أم راكان لما كانت تصحيني وجلست أقارن بين الحالتين .. قم يالله بسررررررررعة ترى منب راجعة اصحيك مرة ثانية

لا والمنظر ما شاء الله الكشة طايرة فوق والصمغ لازق بعيونها المسكرة ووجه يروّع يالله لا تبلانا

المهم ..

بعد 6 سنوات جميلة قضيتها مع زوجتي الجديدة رزقنا خلالها بمولود أسميناه " رامي "

حصلت بعض الظروف لأهلها هناك على حسب كلامها ..

حوّلت لحسابها مبلغ محترم بما أنها حبيبة القلب وتركت رامي حبيبي معها

.. كنا متفقين انها ترجع بعد

ما تطمن عليهم .. لكن للأسف عدت أربع سنوات ولا لهم طاري

بحثت عنهم في كل مكان لكن للأسف ما قدرت أحصلهم .. يا ترى هم حيين والا ميتين؟

هذا آخر صورة كانت بحوزتي لابني رامي .. يا ليت من يعرف عنه شي يبلغ الجهات الأمنية

آآآآآآآآآهـٍ يا ولدي ... آآآآآآآآآهـٍ يا فلذة كبدي

انتهت القصة بانكساري