إنها الريِّش يا سيدي!! - صفحة رقم 2 - نادي الهلال السعودي - شبكة الزعيم

صدى الامس · #1 18/08/2008, 09:31 AM

السلام عليكم

قبل كل شي احب اشكر كل من سأل عني وفقدني بغيابي طول المدة اللي راحت ..!!
واقولهم جعلكم ما تفقدون غالي .. وانا عاجز عن الشكر والتقدير لكم ..!
وانتم رأس المال يا جمهوري العزيز

ربي لا يخلينا بس ..!!
<< اصفقني تسان احد طق لك خبر

لا بس جد اكره ما عندي اللي يجيك يغط يومين والا ثلاثه وهمن يجيك يقول رجعت لكم وكلي شوق وتهاني و سارة و فاطمة

.. قصدي كلي شوق لكم .. وشكراً لكل من سأل في غيابي ..
وصدقوني كنت فاقد المنتدى ومشتاق له بالحيل ومشتاق اقرأ مشاركات خواتي قبل اخواني << ليدز فيرست

( خشة تغمز وتقول ما تسذبوا العنقليز )
والمشكلة بعضهم الله يهديه ينكب عمره وناسي انه مسوي تسجيل خروج بيوزره الاصلي

..!!
اجل شكراً لكل من سأل ومدري وش وهو رأس ماله 15 مشاركه وكلهن مشكور ويعطيك ربي ألف عافية

..!!
تسان احد فقدك فهو حبر المنتدى والا غيره محد طق لك خبر ..!!

الحين تشوف عند بعض البوفيهات والا المطاعم .. لوحة مكتوب عليها "نعتذر للزبائن الكرام عشاننا ما نقدر نجي نأخذ الطلبات من السيارة " ومكتوب بخط صغير تحت ازين عشان تتحركون يالسعوديين

..
على طاري الحركة صدز والله يا حنا شعب كسول بقوه .. على قولة واحد من الشبيبه يقول مهنا اكسل مننا والله يحلل الزوله عندنا .. الحين نمر على مليون صراف وما نرتاح الا اذا كان صراف سيارة عشان ما ننزل ونروح للبقالة وندق البوري لين مايجي الهندي واخرتها مانبي الا ماء بس

.. ونروح للمطعم ما ننزل نطلب لا بالسيارة .. وان جينا نبي نروح للمسجد لازم بالسيارة .. يقول اخاف باتسر اذا جيت بروح لغرفتي لازم اروح بالسيارة

..

المهم برجع لسالفة طلبات السيارة .. الحين هالقرار البعض يطبقه وما نقول شي والبعض ساحب عليه وبرضوه ياليت الكل يسحب مالها داعي كل شوي نازلين

<< ماتسنه تكلم عن الكسل قبل شوي

..
ما نقول شي دام ان فيه قرار بالشي هذا صادر من البلدية والشرطة مدري المرور مدري امن الطرق ..
اللي يقهرك انك انت يالمواطن العادي تطبق هالقرار وتنفذه وتنزل وتطلب من المطعم .. بينما تشوف العسكري بسيارة الحكومة واقف بالسيارة ويدق البوري لين ما يجون لحضرته طال عمره ويأخذون طلباته ..!!
ونفس الشي تشوفه من موظف البلدية اللي يجي بسيارة البلدية يعني بوقت الدوام الرسمي له ..!!
طيب القرار صادر من عندكم ليش ما تطبقونه انتم وتكونون انتم اول من يطبق هالشي ؟؟؟! مهوب بس هالشي على المواطن العادي اللي مهوب ماسك دوريه ولا سيارة بلدية ..! يعني اقسم بالله شي غريب .!.!
انا عارف ان القرار صحيح لان تشوف بعض المطاعم من كثر الزحمه عليه الشارع مسدود وما تقدر تمشي السيارات ..!
لكن شي يقهر ان القرار يصدر من جهات وهم آخر من يطبقه (( خشة تناظر المرور واول ماطبقوا سالفة حزام الأمان )) ..!! عقبها يجي اللوم على المواطن عشانه ما ينفذ القرار ولا يمشي عليه .!.!
وشلون تبيني انفذ قرار صادر منك وانتم آخر من يطبقه .!! عندنا مليون قرار وقرار طلع وآخر من يطبقه اللي مصدرين القرار ؟؟!! (( وجه يقول طبقه انت اول همن حاتسني << الحماس شين صح

))

والله يا بعض الخطاطين مدري وش يبون .. فيه اخطاء ساذجه وغبيه نشوفها .. وترفع الضغط ..
يعني مثل اللي فوق اجل جهاذ ؟؟ ما ادري هو يوم يكتبها يفكر في ولده اللي اسمه جهاد والا يفكر في الجهاد << اركد الله يصلحك

.. والا يفكر في الاجهاض

والا وش يفكر فيه يوم يكتبها كذا ؟؟!!
ادري بعضكم يبي يقول عادي هذي اخطاء املائية مثل ما موضوعك مليان اخطاء املائية وراك شاب(ن) عليهم وناسي نفسك ..
بأرد عليه وبأقوله انثبر الله يصلحك ولا يكثر لا اطردك من موضوعي

..
لا بس فرق بين موضوع فيه مدري كم كلمة وبين ثلاث كلمات ؟؟!! والا بعض اللوحات الخاصة بالمحلات تشوفها من جد ما ادري وش تبي ؟؟!! ودي بس وقت كتابة اللوحة اشوف الخطاط اللي كاتبها عشان اطب في بطنه ..!!
اذا لغتنا ماضبطناها اجل وش نبي نضبط ؟؟!!

قبل كم يوم قريت بالجريدة ان فيه عروس حطت زفتها موسيقى سنوات الضياع (( علينا حركات

)) ..!!
طبعاً مدري اذا العروس لاعبه على نفسها على اساس انها تبي تصير لميس وحنا ما ندري

.. لكن من هالمنبر اقولها تبطين عظم

خخخخخخخخخخ ..
وبرضوه قبل فترة قريت بالجريدة ان واحد كويتي استأجر القصر اللي يمثلون فيه مسلسل نور .. لمدة ثلاث ايام ..
على اساس انه يبي يقيم عرسه هناك .. وارسل الدعوات ومعها التذاكر لتركيا وسكن بفندق خمس نجوم (( حتى بالماريه كان كاتب تحت يمنع اصطحاب الاطفال ودخول المغاتير وجوال ابو كاميرا

)) << يازين من اخذ التذكرة وسحب عليه هو وعرسه بس

لا الجد يعني الى هذي الدرجة الشعب تحمس ودخل جو مع المسلسلات التركية ؟؟!!
ادري باتسر بشوف علك اسمه سنوات الضياع والا فشار باسم مهند ونور ..!
مثل ما شفنا باب الحارة .. طفوا العالم بالشي وادهروا به ..!!
والله يا حنا شعب طفافي يطف بالشي لين تندبل تسبدك منه ..!!

منب اقول لا تتابعون والا لا تشوفون .. ما علي منكم كل واحد حر بنفسه ..!
لكن توصل الامور للدرجة هذي ان العروس تنزف على موسيقى مسلسل ؟؟!
والا اني اروح استأجر بيت مصورين فيه مسلسل ؟؟!

اهل العقووول براحه ..

عرس كويتي في فيلا نور ومهند

زفة على أنغام "سنوات الضياع"

وتقولون لي تزوج يا صدى ؟؟!!

نصيحه لكل من عنده معاملات او امور ماقدر يمشيها .. بإختلاف الاسباب سواء كان السبب انها مخالفة او ان الموظف ما جازت له خشتك ..

من يوم وانا صغير وانا ما اصلح شي الا بمقابل

.. تبي مني شي وش لي ان جبته لك ؟؟ تبي مني مثلاً اغششك بالاختبار ؟؟ والا احل لك الواجب .. حاسب عني بالفسحه

..
من يوم اني صغير وانا حاط في بالي ان الدنيا اخذ وعطاء .. وعشان تأخذ لازم تعطي ..!!
مستحيل انك تأخذ من دون ما تعطي شي .. واتبعت هالشي في كل حياتي

.. حتى ان اهلي ماينادوني الا بالمادي

..
ومن خلال تجربتي الواسعة عرفت ان اسرع طريقة لتخليص الامور وتزبيط وضعك سواء كان بحجز على الخطوط

والا بلوحة من المرور

والا بتوقيع من المدير

والا بموافقه على مشروع من الوزير

..
انك لازم تجتمع معه على طاولة طعام وحده

..
ادري بعضكم يبي يقول وش دخل طاولة الطعام اقوله لا تصير مستعجل واصبر وتبي تعرف السالفة ..

بعض الامور ما تمشي الا بدهن السير

ومثل مانسمع دايم عن مضاريف والا تحويل بحساب بنكي والا غيره من الامور المادية اللي ما وراها الا الخساير بس .. ويمكن تنكشف كل امورك وتأكلها وتضيع كل مشاريعك .. اكتشفت طريقه سهله وما فيها ذيك الصعوية بالحيل .. اقل تكلفه واسرع نتيجة و اقل خطراً .. وانا بنشرها عشان الكل يستفيد منها بعد ما خلصت وقضيت كل اموري وما عاد احتاجها

.. فهي نصيحة لكم يا معشر الاعضاء .. استغلوا هالشي دامه ببلاش قبل لا نشفر النصايح ونتعاقد مع art

..

كلنا نسمع عن سالفة غداء والا عشاء عمل .. واقول وش هالعمل اللي ما يجي الا بغداء والا عشاء وشلون يشتغلون هالناس .. يعني ما يعرفون يجتمعون ويتناقشون الا وهم يحركون ضروسهم

؟؟
لكن اكتشفت ان هذي هي اسرع طريقة لتضبيط امورك

..
مهوب دايم يقولون ان اسرع طريق لقلب الرجل هو بطنه ؟؟ واطعم الفم تستحي العين ؟؟

كل السالفة انك تجي وتجتمع مع اللي تبي منه الشغله وتعزمه على شي يأكله ويحرك به ضرووسه وصدقني تبي تمشي كل امورك .. بس طبعاً تختلف الاوضاع يعني لكل منصب معين مطعم ..
تسان فيه معامله في موظف الصادر والا الوارد والا الارشيف .. اقرب بخاري وابشر بسعدك

..
تسان فيه معاملة عند رئيس قسم لا ضبط الوضع عند اقرب فرع لـ غوزي

وابشر بسعدك ..
تسان فيه معامله عند مدير ادارة احرص انك تأخذه لمطعم صيني

وابشر بسعدك ..
وامش على هالمنوال وصدقني تبي تخلص كل امووورك

.. كل ما كبر المنصب كبر المطعم قدراً وفاتورة(ن)

..

لكن اكتشفت ان اسهل طريقة وتنفع لكل الشخصيات وكل المناصب الإدارية صدقوني من خلال تجربه

مهما كان المنصب كبير والا صغير

اضمن لكم النجاح ..!

إنها الريِّش يا سيدي!!

واضح اني كاتب الموضوع وانا جوعان صح

؟؟