11/08/2008, 03:24 AM
|
| زعيــم متألــق | | تاريخ التسجيل: 12/09/2004 المكان: al riyadh
مشاركات: 1,450
| |
|
واحـد . اثـنيـن . ثـلاث . بـع !! .... أولـى ( أ ) لـلأمـام سـر
بسم الله الرحمن الرحيم والصلاة والسلام على اشرف المرسلين :- موضوع كتب على عجل .. مواقف طفوله بريئه  وترا lba your heart بيجي وبيقول تراك طفل للحين جالس اعلمكم ذبته عشان تقطون له بضحكه ..  // مدرسه ابتدائيه مقصفها يبيع بطاطس مقلي !! عرفتو ان الدعوه خربانه ؟! مواقف عشتها 6 سنـوات في نفس المدرسة .. بحاول اذكر السامج والمؤثر على طاري السامج كلي هلالي معك صمغ ؟! \\ مقدمة كلي هلالي انتهت ,
.
كان يامكان في قديم الزمان , في حي من الاحياء , ومدرسه من المدارس , كان طالب من الطلاب , اسمه فيصل ,
هذا الطالب من الطلاب عضو من الاعضاء , اسمه بلد الوليد احد بلد الوليدات ,
هذا العضو من الاعضا...... ( صورة بلد الوليد متجمعين عليه الاعضاء وينجلد والقاضي جالس بعيد مرتكي على عصى ويضحك)
كان الطالب الحبوب يأتي مبكراَ كل صباح ..
عشان معه اخو وبنت عم بثرين يوديهم الصبح المدرسه مع السواق .
وكان محبوب بين زملائه السبايك .. ومكروه بين الدلوعين الي عندهم اخوان في سادس ( بتدرون وش سنع ابو اخو في سادس الوسخ )
هل تدرون لماذا ؟!
لانه يجي مبكر عشان يحجز لهم الاماكن الاولى في الطابور
يوم كالعاده جاي مبكر وواقف انا في المربع الاول من مربعات طابور فصل 1 \ أ .
كان موصيني ابو نويصر و واحد الله يذكره بالخير اسمه عبدالعزيز ذاك اليوم بأماكن ..
المهم انا في المربع الاول وابو نويصر في المربع الثاني لأنه ايامها كان يعرف يلعب كوره ويخلونه كبتن عشان كذا مضبطه !
ومخلي آنف الذكر عزوز في المكان الثالث .
طبعا عشان احجز وقفت في المربع الاول وحطيت الشنطه في المربع الثاني والمقلمه في المربع الثالث ..
شوي ويجي واحد قاهرني من زمان عشان اخوه بسادس ويدافع عنه دايم !
الوسخ دايم يجي ورا اخوه ويطلع لسانه اسميه البنيه يقهرني بس موب قدام اخوه 
يقول فيصللللللل قلت هاه وش تبي
قال وخر ابي الاول
قلت والله اني حاجزه من زمان جاي قبلك , بكل بساطه صاح وراح يركض اختفى !
استانست انا ووجهي
شويات وجاي معه جدار  موب جدار جدار بس اخوه يعني جدار ( افلقوني على الوصف )
قالي وخر عن مكان اخوي قلت والله ما اوخر جاي قبله
والدمعه بعيني
هو بس رفع يده بيطقني وانا صياااااااااااااح
ويطقني طق حسبي الله عليه للحين والله ما نسيته
ويجي الدلوع وياخذ مكاني , والحسره للحين بقلبي .
اذكر مره من زود البرائه قلت له باخذ مكانك بالجنه ههههههههههههههههههههههه
انتهت السالفه وتخرج اخوه من سادس العام الي بعده .. وغيّبنا شمسه نحن فتيان الصف الأول
س \ قد طحتوا بدلّوع نكّد عليكم ؟!
//
ذكرى ..
كأني اشوفك في ذاك السيب ..
بشماغك .. بدون عقالك ..
بلحيتك .
الي اختفت يمكن مع اتيكيت الجنسيه القطريه !
سبحان الله كيف كنت قاسي !
طلاب عودهم ألين من الخيزران
تذكر شلون كنت تضربهم ؟ تذكر عذابك ؟
والله ما انسى ظلمك لي واستدعاء ابوي للمدرسه بسبب كذبه لفقت .
لو جمعت طلاب ابتدائية هارون الرشيد وقلت من اسوأ من درسكم ؟
قالو جميعاً / الله لا يذكره بالخير استاذ خليل ..
//
~ قصة خفيفه ~
اخوي الله يهديه كان بأولى . وانا كنت برابع .. جاني يوم يصيح يقول واحد طقني . طبعا بمآ أنه اخوي الاصغر لازم اعطيه شوي من حكمتي 
قلت ورني إياه وماعليك .. فيصل مو حي الله .
وراني ذاك الجدار الي لو قدم على ثانويه طردته محو اميه ويالله ينقبل خوفاَ على شرف الشياب قلت هذا اهو بسسس !؟ قال ايه . قلت مشينا للوكيل نعلمه يعني من جد مالها داعي اخوه الكبير وانجلد قدامه
//
فاصل لوزراة التعليم والتعلم .. العلم في الصغر كـ النقش على الحجر . كل اليوم الصبح واقف في الطابور ماشوف من النوم وقدامي ذا الكلمه مكتوبه في الجدار لا ومخلين مدرس الفنيه يكتبها كرهتني في الدراسه يعني اطفال في الابتدائي تعطونا ذا الحكم ليه ؟! مانبي حكم نبي تعليم .. والله طلاب معنا تركو الابتدائي ما يعرفون يكتبون ورب البيت ادري ان كلامي ماراح يوصل لأحد لكن اتمنى اني اشم امنيه ان عندنا تعليم يبرد الكبد . تعليم تتطمن تحط عيالك عنده تعليم ثوبه نظيف تعليم يفرش اسنانه كل يوم ---> ترا الحكم الي كاتبينها على الجدران فهمنا لها في الابتدائي زي فهمكم لما خط بالرصاصي !! اجل التعليم له ثوب يامخفات ؟! الشرهه عليكم الي تقرون بس تراني من جد حاقد على الوزراه لا يخرب المزح هدفي المنشود ( عند كل فيس مثل هذا اتذكر برائة مشاغبونا ) //
نعود لذكريات الدراسه المره .. مسكت معني يوم انا والشله الكريمه استهبال على واحد قاهرني استغفر الله واتوب إليه الولد كان قبيح الخلقه .. ولا اذم فيه لكن للتوضيح . المهم حنا شقاوة أطفال وشوي لعانه .. نروح له ونضحك عليه ونطقه وننحاش دائما ومادرينا ان له اخ في المدرسه الولد حليم شكله متعود المسكين وساكت ساكت ساكت قفلت معه يوم من الايام قال ذا المبزره يبيلهم من يلعنهم يمسكني اخوه الكبير انا واثنين من اخوياي تحت صورة الملك عبدالعزيز الله يرحمه الكبيره في ساحة المدرسه قال من الي طاق اخوي ؟ حنا كنا في حالة هيجان فينا هبال ثيران ذاك اليوم قلنا حنا وجلسنا نضححححك جا اخوه ومسكني وعطاني كف مع وجهي !! انا قال وجهي كذا ثم تحول لكذا  بعدين  وكذا وضحححححححححححححححك الاخو قفلت معه هههههههههههههههههههههههههه ويجينا ذاك اليوم اقوى جلد مر علي بحياتي ورب البيت مابعد ذكرت اني حسيت بألم , من الهبال الي كنا في ذاك اليوم . شطحه صغيره مره تبليت ولد وقلت لأبوي انه سوا لي حركه وسخه جا ابوي صيحه في المدرسه وراح من بكره جا ابوه صيحني وراح والى يومكم ما درا ابوي ولو درا كان راح الحين وصيّح ولده اجل يرفع لي اصبعه واسكت ؟! .
 //
من الصدف في عالم الدراسه .. ولد درس معي في الروضه والتمهيدي .. وكمل معي في كل سنوات الابتدائي وبعدها كل سنوات المتوسط وسنه من الثانوي وقابلته مره في خارج المملكه بالصدفه وليومكم والله ماعرف اسمه توه يجي على بالي يوم بديت اكتب الموضوع !
//
مر علينا مدرس في رابع ابتدائي اتوقع انه مجنون والعلم عند الله شوفو كيف يخاطب الطلاب الطالب : استاذ بروح الحمام المدرس : روح ** بالدرج مافيه طلعه ..
يوم اخر .. بيشرح وفيه ازعاج .. يقول : اسكت انت وياه يا ( مؤخرة ) العنز تخيلو في رابع ابتدائي صغيرين مانعرف شي --> احلف بقوه يابو قلق ماتعرف شي
برضو يوم اخر الموسوس للطلاب : ولا واحد يحرك ( *** ) من الكرسي عشان ما الونها له بالهذا يسمي القلم الهذا على فكره كان يرمي الشماغ في الفصل ويحط بشعره حنا وفي الاختبارات النذل يلبس نظارات شمسيه عشان يصيد الطلاب مرت علينا فتره في الابتدائي كان عندنا اختبارات ..
//
تذكرون هذي اللحظات ؟! تجي وعيونك كلها غمص يستقبلك عند المايك مدرس غثيث ! مدري ليه دايم مدرسين الطابور غثه
على فكره انا اضمن لكلي هلالي مدرس طابور متميز جدا في عمله
ذكرتو اشكالكم في الطابور ؟! والمدرس يقول ..
واحد .. ثنين .. ثلاث .. بع .!
ما اذكرهم قد قالو اربع دام بع بع
//
مع البع تنتهي المسيره .. مع ان نص الفضايح مابعد قلتها تبقى لنا الذكرى .
كتبته على عجل وبدون اي مراجعه للإملاء ومراجعه واحده للتنسيق .. من الراس للكراس .. وإن لم يحز على رضاكم فأعذرونا .. برايفت بالله لا تشوفه يالقاضي اول مره يجيني انذار ترا يبقى موقفك وردك ! فخرابيطي لاشيء بدونه . هناك كلام بين السطور . اكتشفه وعلمني يا لمّاح
//
سبحانك اللهم وبحمدك استغفرك واتوب اليك .
اخر تعديل كان بواسطة » بلد الوليد في يوم » 11/08/2008 عند الساعة » 04:02 AM |
الوضع الشجري
