للجادين فقط ... فرصة عمل موظف استقبال - نادي الهلال السعودي - شبكة الزعيم

الهلالي 11 · #1 09/08/2008, 02:59 PM

السلام عليكم

هلا وغلا

تطمنو ماني جايبلكم مصيبه اليوم الامور هاديه

باختصار ...

عندنا بالشركه لهم فترة يدورون موظف استقبال وما لقو واحد مناسب للوظيفه ...

قلت لهم عطوني مواصفاتكم وانا بنزلها على النت واشوف ان لقيت لكم احد

شركتنا نشاطها تعمل في مجال التأمين ...

موقعها بشارع العليا بعد برج المملكه بجدعة حصى

بس يبغالك ترميها رميه قويه

كل ما كان سكنك قريب اريحلك واحسن لنا

بصراحه انا شخصيا مرتاح فيها الحمد لله والجو اخوي مررررة والادارة راقيه بتعاملها مع الموظفين ...

الدوام من السبت الى الاربعاء ... من 8 صباحا - الى 5 مساء

فيه بريك من 1 - 2

خميس وجمعه عطله وهذي لحالها وناسه

نت 24 ساعه فلها براحتك ... بس اهم شي عندهم انك تخلص شغلك وما تقصر فيه

زي ما قلت لكم الجو اخوي لان الشركة مو كبيرة كثير ... يعني لو اضطريت تطلع ليوم او صار لك ظرف لا سمح الله بيقدرون وضعك ...

الموظفين اعمارهم مو كبيرة وشياب يعني وناسه الحمد لله ...

مسمى الوظيفه : مدير عام الاستقبال كله

<== لا تتحمس وتسوي زحمه اربط الحزام

ما اطول عليكم .. شروط الوظيفة هي كالتالي :

1- سعودي الجنسيه ...
2- العمر من 18 - 25 ... او حولها يعني لو زياده كم سنه نمشيها

3- ان يكون حاصل على الثانويه ...
4- حسن المظهر ولو حالق الشنب احسن بعد

5- ناوي شغل ويتحمل ضغط العمل ...

لان بصراحه جربنا 2 ماش لعابين ما يطولون وتركو على طول

نبغى واحد جاد + راعي شغل

الراتب والمميزات والبدلات والتامين وكل هالامور يتم الاتفاق عليها بعد المقابله

اللي حاب يشتغل ... يعرف احد اخوه مثلا او قريبه ... اي احد فعلا ناوي يشتغل ويستمر بشغله مو اسبوع ويقطعنا

يرسلي خاص ... ورجاء من الحين ...

لا احد يرسلي يقول هذا ايميلي ضيفني ...
او هذا رقمي بالله كلمني ...
او عطني رقمك ... او او او ...

اللي ناوي ...

يرسلي معلومات عنه على الخاص وانا بوصلها لمدير الموارد البشريه وكل واحد مكتوب له خير بياخذه

اسمك .. عمرك ... خبراتك اذا فيه ... وين ساكن ... وش اسم امك بالليل

... وش تشجع

اي معلومات تحس انها ممكن تفيدك ارسلي اياها

ولو احد عنده CV مضبطه ومتكته

احسن واحسن ... يرفع ملف الوورد على موقع رفع ويعطيني الرابط ...

يبون بعد مندوبات مبيعات بس ما فيه امل يخلوني انا اجيبها

قالولي حدك تجيب ريسيبشن ولا يكثر

شكرا لكم ... اسف على الاطاله

مجودي عاشق الهلالي · #2 09/08/2008, 03:05 PM

السلام عليكم

بارك الله فيك فعل طيب من رجل طيب اراد الخير للناس وخاصه من ابناء طنه

عندي احد الاصدقاء راح ارسل لك الCV تبعه امل من الله ان يوفقه في اياً كان مكان عمله

والف شكر مره اخرى على هذه البادره الطيبه

واتمنا من الاداره ان تضع قسم للوظائف بالسعوديه

شكرا لك مره اخرى

كان هنا · #3 09/08/2008, 03:20 PM

وعليكم السلام رحمة الله وبركاته

إقتباس


	هلا وغلا تطمنو ماني جايبلكم مصيبه اليوم الامور هاديه

هههههه

،،!
//
طيـب ينفع الواحد يتوظف فترة الصيــف بــس ؟
( الشهرين الباقية يعــني ) .
لأن كثـير أعرفهم الصـيف عندهم صيـاعة .. واذا جت الدوامات ركـدوا ..

الهلالي 11 · #4 09/08/2008, 03:28 PM

^
^^
^^^^

مستانس انت ووجهك

مو عاجبك موضوعي الا لازم اجيب شي ارهابي

امزح والله لا تدف

هذي والله ما اقدر افتيلك فيها ... بس اللي عندك ارسل ووقت ما يقابلهم الرجال يتفقو بين بعض انا ما لي دخل

انا الرجال بيحتاجني وقت استلام الراتب وامور الحسابات والخصومات والسلف يعني من هالامور

عموما اعتقد ممكن لو لقو واحد كويس كذا وقت صيف يجيبوه غير ريسيبشن انه يفك ازمة شغل لحساب زباين معينه

زي ما هو صاير مع واحد من الشباب اللي جو

يعني اي احد من الشباب عنده ضغط عمل يروح يساعده

عموما اللي عنده شي يرسل ما رح ينقص وزني ولا انتو خسرانين شي

انا بوصلها له وكل واحد وش قصته بالحياه وهو يختار ... وربك يكتب الخير للجميع

يخوك انا كثير كلام جيت بعلق على ردك كتبت رد اطول من الموضوع

الهلالي دائماً · #5 09/08/2008, 03:30 PM

هلا اخوي الهلالي 11

والله يعطيك العافية على العرض المغري

بس اهم شي ما حولكم في الشركة بنغاليه

بصراحة موضوعك رغم انه فرصة عمل الا اني استانست عليه

بس قلي كيف النت عساه سريع

دمت بخير ,,,

الهلالي 11 · #6 09/08/2008, 03:37 PM

^
^^
^^^^

يا كثر اسئلتكم يا العام انتو والله العالميه اعقل منكم

<== بينجلد الدب

اخوك عبدالرحمن 6/ب ... اعشق جمع الطوابع وتنسيق الزهور

وقت خراب الاخلاق احول جمع حطب

<== يا كثر ما يقولها

النت والله العالم انه يا 2 يا 4 ميجا مدري اهم شي انه سريع وكويس بالنسبة لي مستانس عليه

الشي الثاني انا اعرف انك واسطه هنا يعني لو ماجد مقبل يقول لواحد انت كويس المفروض يقعد شهر ما يشارك لين يصغر راسه

شكرا لكلامك ومجاملتك اللطيفة

وشرف لي انك مريت على موضوعي

صحيح التي بوي عندنا بنغالي ... بس يعجبك تحس انه راضع من فلبينيه فيه نعومة واحساس الفلبينيين

انواع الخقاق مع صوته اذا دقيت عليه بطلب شي

احس سؤال ثاني بيقلب الموضوع شات مو وظيفه

<== من جد بينجلد

لا والله امزح خذو راحتكم اهم شي اللي بيقدم لا يفشلني

هلالي ارسنالي وافتخر · #7 09/08/2008, 06:31 PM

انا نفس المواصفات الي قلتها وعمري 20 سنه

والوظيفه حلوه

براسلك خاص

بس اذا عدلت نومي ان شاء الله هع

لاجد مشكور اخوي والله يجزاك خير

انت شاب متعاون تبي الخير للشباب الضائع الي ماعنده غير الهجوله والهياط والمشاكل وايذاء الناس

كل الشكر لك عزيزي على ماتقدمه

والله يجعله في ميزان حسناتك

S K Y · #8 09/08/2008, 07:09 PM

الله يجزاك خير اخوي الهلالي 11 والله يوفق العاطلين ويرزقهم الوظيفه المناسبه ورده

حب التايب · #9 10/08/2008, 06:09 AM

ممممممممممممممممممممممممممممممممممممم
شششششششششششششششششششش
ككككككككككككككككككككككككككككككككككككك
وووووووووووووووووووووووووووووووووووووووو
رررررررررررررررررررررررررررررررررررررررررررررررر

LBa your heart · #10 10/08/2008, 08:55 AM

إقتباس


	4- حسن المظهر ولو حالق الشنب احسن بعد

مالكم فرصه يالشبهات

بالتوفيق للي بيقدمون

الله يعطيك العافيه يالهلالي ورده

راكان _20_ · #11 10/08/2008, 09:08 AM

الله يوفق اللي بيأخذها إن شاء الله و الله يجزاك خير على النشر ...

فجر الرياض · #12 10/08/2008, 09:30 AM

الله يوفق اللي مالهم وظايف ويرزقهم الوظيفه اللي تعجبهم ورده

جزاك الله خير اخوي على مبادرتك الطيبه ورده