قـد صار لـك حآدث ,/ تعآل قل شلون صآر لك ! - نادي الهلال السعودي - شبكة الزعيم

زعيـم أسيـآ · #1 03/08/2008, 11:08 PM

السلآم عليكـم و رحمة الله

تسيـف حالكـم ,/ خباركم مع الطفـش بالعطلـة

الا ع الماريـة من يتآبع قناة فنـون هالايام

و الله ماتحـس بالوقـت .. وش تخلي كل مسلسل اطلـق من الثاني

المهـم نرجع لمحورنا الاساسي اللي هو عن الحوادث المرورية !

فكثيـر من السبايـك يعيشـون بيننا و في شوارعنـا ويسببون الكثير من الكوآرث

<= هو اولهـم

المهـم انا سويت الكثير من الكوارث المرورية بالريآض

و البالـغ عددها 3 حوادث و لله الحمـد

و سوف اسـرد لكم كيف حدثت هذه الكوارث

- 1 -

كان في 27 من رمضـان اللي رآح و كانـت السآعة 5 العصـر و في وقت الذروة

و كانت معي امي اللي مقومتني من النوم عشان اوديها بندة تشتري " بف بآستـري " هذاك اللي ينتفـش بالفرن

المهم كنت رايح بسيارة الوالد حفظة الله و اللي تحتوي على جميع انواع العطور و الطواقي

و بينما انا كنت اديور في شارع الابراج اللي بالبديعة طاح واحد من العطور " ام عشرة "

على رجلي و انا نازل بأخذة الا موقـع في اللي قدآآمي من ورا

و كان مصري ابن ستين ..... <= مشفر

المهـم اللي معة كانت دينا و ادق على الوالد و هو قاعد يناظر الجواب الكافي و يحتري الفطور

و ادق علية و يقعـد يسفل فيني الين ماجاء

و يوم جاء عطى ابو مصيـر 500 ريآل و قالة صرف نفسـك انت و كفيلـك

و موترنا كلف 1200 ريال

و الى يوم العيـد و هو يسفل فيني و امي اللي حطتني بهالموقف <= وش دخلها الحين هي

قاعدة تهدي الوضـع بيني و بينـة سماحة الوالد

- 2 -

الحادث الثاني و قع ليلـة عيد الاضحـى المبـارك

و الساعة الـ 11 مساءاً .. كنت مودي امي لـ سلآم مول

و كنت مواعد اخوياي لاننا بنطلع للدمام بعد سويعات

لكن حدث مالم يكن بالحسبان

نطلـت الموتـر بكبرة " جمس " على شآيب راعي كورولا مسيكين بوسط الدائري

و الحمد لله لم ينتج عن الحادث الا انة الصدام حق الكورولا دخل في وسط السـوق

و كان الشآيب ذاك متسآمح

قالي رح الله يخليك لعين ترجيك حط امك بالسوق و ارجع لبيتكم <= شكلة مطنطخ هالشايب

و الحمد كن ماصار شي لان موتري ماجاة اي شيء

و سريت للدمام و الظاهر ان ابوي مادرآ الى الحيـن

<= لا يصيـر مسجل هنا و قاعـد يقرآ الموضوع

- 3 -

و هو الحادث الاشنـع لا بارك الله في هاك اليوم

كنـت طالع من الاختبـار حق الجيلوجيا يوم الاحـد في الاختبارات النهائية

و عند اول اشارة بعد المدرسة طلعت من شارع فرعي لرئيسي <= فهمتـو شلون ؟

و طلعت بوجة راعي التاكسي الله يهدية اللي كان مصفي الطبلـون

و يقشعني من الجنب الله ياخذة

و يوم نزلت لقيت الموترين كلها منعدمة

و راعي التاكسي جاايتة رووعة المسيكين

المهـم المرور ماطول على طول جاء <= 40 دقيقة بس انجآآز

المهم حطو الخطأ علي 100 %

و رحت لقسم مرور الغرب

و قالو ان التأمين اللي معي مايخدم الا اللي اعمارهم فوق الـ 21

و قعدت بالحجـز 3 ساعات في وسط الاختبارات النهائية

<= خويي ماقصر جاء و معة ملخص الكيمياء

و كلفت السيارتين 10 الاف

-----------------------------------//---------------------------------------------------------//-------------------------

و الان وبعد ماعشتـو معاناتي لمدة 5 دقايق ملاتحظون ان الحوادث جت في اوقات زفت !

الاول قبل عيد الفطر بيومين

و الثاني ليلة عيد الاضحى و قبل ماسافر بكم ساعة ؟!

و الثالث في وسط الاختبارات النهائية

و الات اترككم مع سؤالين !

س1/ هل سبق ان سويت حادث ؟ و وش قصتة بالتفصيل ؟

س2/ بعد كل هذا هل انا سائق ماهر .. ام .. من جنبها

* لو اعرض انك تركب معي وش بتسوي ؟ <= اكيد بتكتب وصيتـك