السلام عليكم ورحمة الله وبركاته

والله واحشيني يا منسوبي المنتدى العام <== قاط معكم

المهم اشوف فيه هنا فلان كاتب ساخر وفلان ناقد ومدري ايش , الوكاد ان فيه هالموضوع بخاطري من زمااان ولابد اني انزله علشان اتناقش فيه وأشوف اراء الحبايب هنا

وزي ما قلت لكم ماني راعي تنكيت ولا راعي تصنع بالكلام ( مثل اللي يقول في ليلة ظلماء سمعت صوت العصافير تتعالي في ارجاء الكون )اللهم اني ابتكلم بسليقتي ( صح يا سليقتي )




طيب انا مادري كيف اقدم موضوع هنا بالمنتدى العام لاني متعود على التقاديم في الكورة لكن المواضيع العامة ما عندي خبرة
فلذلك ابخش في الموضوع دغري حتى بلهجة عامية

الموضوع يا سادة يا كرام يتكلم عن الشعب السعودي او الشعوب بشكل عام لكن راح اخصص الكلام على شعبنا الفاضل

الموضوع هو انتشار الخبر او السالفة او الحادثة .... الخ بشكل سريع بين كل طبقات المجتمع وبين يوم وليله تكون المجالس كلها تتكلم عن نفس الشيء
وكل اطياف المجتمع تتكلم عن هاللي يصير
الامير والغني والفقير والراعي والدكتور والعاطل والطالب ... الخ

فيكون الشيء اللي صاير حديث المجالس والصحافة والانترنت والجوالات وأي وسيلة تخاطب بين الشعب !!

انا متأكد ان هالشيء موجود عند كل الشعوب بس ما ادري ليه أحس عندنا بالسعودية مبالغ فيه بشكل كثير

طيب هالكلام اللي فوق كله تمهيد لهالسوالف او الاشياء اللي تصير او تحدث , وبين يوم وليله كل الناس تتكلم عنها وتعرفها :

يعني الخلاصة من الموضوع ( شي يصير ونلاقي كل الناس يتكلون فيه ويفتون ويصرفون على كيفهم الا من رحم الله )


نبدأ بأسم الله :


1

الملكي






اكيد تذكرون الشماغ الملكي اللي صجونا فيه قبل 14 سنة تقريبا ؟
صارو كل الناس مالهم سالفة الا الشماغ الملكي , شريت شماغ ملكي لقيت شماغ ملكي
لدرجة ان كلمة ( الملكي ) صارت تنقال على أي شي في الحياة (, على سبيل المثال :

شماغ ملكي , ثوب ملكي , دفتر ملكي
حتى الجمس صار فيه جمس ملكي وجمس عادي !!
حتى الجمس يا ظالمين

مرة طلعت من المسجد وانا صغير واثاري فيه هندي برا يبيع بيز ويحرج ويقول ( بيز ملكي بيز ملكي )
حتى البيز صار ملكي بعد

البيز = ما يستخدمه الشخص لكي يقي يده من الحراره في حالة صبه للقهوه او الشاهي دايركت من البريق

وعلى ما اظن انه صدر امر من الديوان الملكي بمنع تداول هالكلمة على أي سلعه <== هذا كلام ناس كثار بذاك الوقت وبرضة الحين

وبيني وبينكم هالقرار ممتاز : اجل تسمع بالاخبار صاحب السمو الملكي وبعد ما تطلع من الصلاة تسمع بيز ملكي والله المطرسة من جد

الخلاصة ان الملكي صار سالفة كل لسان وبعد سنة او اكثر شوي اندثرت هالكلمة بشكل عجيب واختفت عن الوجود !!



2

ارتفاع سعر البترول





هالكلام بالضبط كان في موسم 1425 <=== متأثر بالكورة
المهم ان في ذيك السنة بدا الارتفاع الجنوني في أسعار البترول ( اذكر وصل 52 دولار ودعس ولا وقف الى الحين )
الشاهد في ذيك السنة , ما فيه حي بشر الا ويسولف عن الارتفاع في سعر البرميل شايب والا شباب جاهل او أمّي ... الخ , ويحسب كم ينباع يوميا من البراميل ويضرب ويقسم ويقول ايام الملك خالد كان السعر كذا وكذا وكانت الطفرة بسبب الارتفاع ووو , وهو اصلا ما لحق على الملك خالد اصلا بس لابد يتفلسف زي كل الناس
وكل واحد يبدأ يوزع الميزانية على كيفه
المهم صارت هالسالفة سالفة كل المجالس لين الواحد تحوم تسبده يوم يفتحون هالموضوع
والان نادر تسمع هالسوالف تنقال في المجالس لان فيه اشياء ثانية طلعت وغطت عليها وبنجيها بعد شوي




3

الدينار العراقي




هالسالفة صارت اول مامسكو صدام حسين , كل الناس تجيك وتقول اشتر دينار عراقي وبع بعد فترة وبتكسب ذهب ومدري ويش
والعالم يدقون على بعض ويشاورون بعض ( هاه اشتري والا الوضع يخوف .... الخ ) فمن تخش أي مجلس يسألونك عندك دينار عراقي والا لا
اذا قلت ايه عندي اسمع الفلسفه
واذا قلت لا ما عندي برضة الله يعينك على الفلسفه
وكل واحد منهم مسوي لي فيها راجحي زمانه بسعر الصرف والعملات !!

وسبحان الله وبدون سابق انذار اختفت هالسالفة وابصم بالعشرة ان فيه ناس كثار يقرون هالموضوع وتوهم يتذكرون هالسالفة




4

الاسهم





طبعا اعتقد هالنقطة يبغالها موضوع الحالها !!!!
اكيد تذكرون قبل 4-3 سنوات تقريبا يوم بدت فورة الاسهم
كل الناس تسولف فيها : بالدوام و بالبيت و بالاستراحه و بالمرزعه وبأي مكان , وصارت سالفة كل الناس ولا فيه أحد الا يتكلم عنها
وكل العالم تصرف وصارت تطلع امثال على الاسهم واغلبهم ما يدري كيف طريقة الاسهم ووش محلها من الاعراب تجاريا , بس مع الخيل يا شقراء

لدرجة اني كرهت عمري وسوينا ميثاق انا و4 من الشباب ( اللي نتكي يوميا ) وميثاقنا اننا ما نجيب طاري الاسهم نهائيا اذا اجتمعنا ولا احد يلومنا طبعا من كثر ما صجونا العالم فيها
وترا محدثكم اشترا بالاسهم واكل خابور فيها بس من قبل لا يطيح السوق وانا كاره سوالفها
ويوم طاح السوق سالفة ثانية خش مجلس ويجيك واحد ويصرف لك سبب الطيحه , خش مجلس ثاني تجيك صرفة ثانية , وكل محل فيه فتوى عن سبب الطيحه
يا حبيلنا والله اننا تحف




5

شاعر المليون







خلصنا من سالفة الاسهم وريحنا شوي
طلعت لنا سالفة شاعر المليون
بدون ما أكثر كلام : اخوكم في الله ما قد تابع ولا حلقه من شاعر المليون ( طبعا السبب بسيط جدا لان السالفة مصخت من كثر ما يسولفون الناس عنها ) ومع ذلك مستعد اقولكم منهم المتسابقين وعيب كل واحد ووش صار بكل حلقة وأي شي تبونه ليه ؟ لان ما فيه احد الا ويسولف فيها لدرجة اني عرفت السيناريو سماعيا من سواليف الناس
ناصر الفراعنة
ناقتي يا ناقتي <=== الظاهر حتى اللي يغسل سيارتي غناها




6

الاماكن





الله يتوب علينا وعلى جميع المسلمين , الاماكن اغنية مشهور لمحمد عبده
اول ما طلعت يووووووووووووووه : وقف جنب أي واحد بالاشارة وتسمعه مشغل الاماكن
شغل الاف ام تسمع الاماكن
اقلب على قناة ثانية بالرادو وتسمع برنامج مواهب تلاقي الموهوب يغني الاماكن
نزلو عطر الاماكن
اي واحد بالمسنجر غير توبكه للاماكن والا جيت قبل العطر يبرد
بصراحة هالاغنية مللليت منها وحامت التسبد منها من كثر ما مصخوها الشعب



7

نور + لميس




طبعا ما دريت ان كل وحده مسلسل الحالها الا من تالي كل الناس تسولف عن لميس وعن نور وعن مهند , راحو لدبي راحو مدري وين
يالبى لميس يا لبى نور , مهند زين
يقولون حتى ادارات الاحوال صارت تجيهم طلبات تغيير اسامي وبرضة تسمية مواليد جدد بحدا هالاسامي الثلاثة
محدثكم بالله ما شاف الا حلقتين من مسلسل لميس وغصبن عني لان اخوي الكبير قاعد يتفرج


---------------------------


وبكذا انتهي من هالموضوع اللي اهوجس فيه من مدة

طبعا فيه اشياء طمرتها لان ما ودي اكثر الموضوع على غير سنع
البوكيمون ومعنى هالكلمة
مقطع برجس
النمنم
كريزي وير
حلقة صالح الغيدان حقت السحر
...... الخ

والقاسم المشترك بينها كلها هو انتشارها بين الناس بسرعه رهيبة وكل فئات المجتمع تتكلم عنهم






ختاما اعذروني في حالة وجود أي قصور لان الكامل وجهه سبحانه وتعالى
واعذروني على الاسلوب السياحي بس هذا كان زي المغص في بطني وعلمتكم عليه !!

ورده