|؟|... خربشات من دفتر ذكرياتي العتيق ... |؟|
 

السلام عليكم ورحمة الله وبركاته

والله واحشيني يا منسوبي المنتدى العام <== قاط معكم :d

المهم اشوف فيه هنا فلان كاتب ساخر وفلان ناقد ومدري ايش , الوكاد ان فيه هالموضوع بخاطري من زمااان ولابد اني انزله علشان اتناقش فيه وأشوف اراء الحبايب هنا

وزي ما قلت لكم ماني راعي تنكيت ولا راعي تصنع بالكلام ( مثل اللي يقول في ليلة ظلماء سمعت صوت العصافير تتعالي في ارجاء الكون )اللهم اني ابتكلم بسليقتي ( صح يا سليقتي :D )




طيب انا مادري كيف اقدم موضوع هنا بالمنتدى العام لاني متعود على التقاديم في الكورة لكن المواضيع العامة ما عندي خبرة
فلذلك ابخش في الموضوع دغري حتى بلهجة عامية

الموضوع يا سادة يا كرام يتكلم عن الشعب السعودي او الشعوب بشكل عام لكن راح اخصص الكلام على شعبنا الفاضل

الموضوع هو انتشار الخبر او السالفة او الحادثة .... الخ بشكل سريع بين كل طبقات المجتمع وبين يوم وليله تكون المجالس كلها تتكلم عن نفس الشيء
وكل اطياف المجتمع تتكلم عن هاللي يصير
الامير والغني والفقير والراعي والدكتور والعاطل والطالب ... الخ

فيكون الشيء اللي صاير حديث المجالس والصحافة والانترنت والجوالات وأي وسيلة تخاطب بين الشعب !!

انا متأكد ان هالشيء موجود عند كل الشعوب بس ما ادري ليه أحس عندنا بالسعودية مبالغ فيه بشكل كثير

طيب هالكلام اللي فوق كله تمهيد لهالسوالف او الاشياء اللي تصير او تحدث , وبين يوم وليله كل الناس تتكلم عنها وتعرفها :

يعني الخلاصة من الموضوع ( شي يصير ونلاقي كل الناس يتكلون فيه ويفتون ويصرفون على كيفهم الا من رحم الله )


نبدأ بأسم الله :


1

الملكي



http://z.about.com/d/hotels/1/0/9/1/2/crown.jpg


اكيد تذكرون الشماغ الملكي اللي صجونا فيه قبل 14 سنة تقريبا ؟
صارو كل الناس مالهم سالفة الا الشماغ الملكي , شريت شماغ ملكي لقيت شماغ ملكي
لدرجة ان كلمة ( الملكي ) صارت تنقال على أي شي في الحياة (, على سبيل المثال :

شماغ ملكي , ثوب ملكي , دفتر ملكي
حتى الجمس صار فيه جمس ملكي وجمس عادي !!
حتى الجمس يا ظالمين :D

مرة طلعت من المسجد وانا صغير واثاري فيه هندي برا يبيع بيز ويحرج ويقول ( بيز ملكي بيز ملكي )
حتى البيز صار ملكي بعد :D

البيز = ما يستخدمه الشخص لكي يقي يده من الحراره في حالة صبه للقهوه او الشاهي دايركت من البريق

وعلى ما اظن انه صدر امر من الديوان الملكي بمنع تداول هالكلمة على أي سلعه <== هذا كلام ناس كثار بذاك الوقت وبرضة الحين

وبيني وبينكم هالقرار ممتاز : اجل تسمع بالاخبار صاحب السمو الملكي وبعد ما تطلع من الصلاة تسمع بيز ملكي :D والله المطرسة من جد

الخلاصة ان الملكي صار سالفة كل لسان وبعد سنة او اكثر شوي اندثرت هالكلمة بشكل عجيب واختفت عن الوجود !!



2

ارتفاع سعر البترول



http://www.formula1.com/photos/597x478/manual/oil02.jpg

هالكلام بالضبط كان في موسم 1425 <=== متأثر بالكورة :D
المهم ان في ذيك السنة بدا الارتفاع الجنوني في أسعار البترول ( اذكر وصل 52 دولار ودعس ولا وقف الى الحين )
الشاهد في ذيك السنة , ما فيه حي بشر الا ويسولف عن الارتفاع في سعر البرميل شايب والا شباب جاهل او أمّي ... الخ , ويحسب كم ينباع يوميا من البراميل ويضرب ويقسم ويقول ايام الملك خالد كان السعر كذا وكذا وكانت الطفرة بسبب الارتفاع ووو , وهو اصلا ما لحق على الملك خالد اصلا بس لابد يتفلسف زي كل الناس
وكل واحد يبدأ يوزع الميزانية على كيفه :D
المهم صارت هالسالفة سالفة كل المجالس لين الواحد تحوم تسبده يوم يفتحون هالموضوع
والان نادر تسمع هالسوالف تنقال في المجالس لان فيه اشياء ثانية طلعت وغطت عليها وبنجيها بعد شوي




3

الدينار العراقي


http://www.banknotes.com/IQ81.JPG

هالسالفة صارت اول مامسكو صدام حسين , كل الناس تجيك وتقول اشتر دينار عراقي وبع بعد فترة وبتكسب ذهب ومدري ويش
والعالم يدقون على بعض ويشاورون بعض ( هاه اشتري والا الوضع يخوف .... الخ ) فمن تخش أي مجلس يسألونك عندك دينار عراقي والا لا
اذا قلت ايه عندي اسمع الفلسفه :D
واذا قلت لا ما عندي برضة الله يعينك على الفلسفه :D
وكل واحد منهم مسوي لي فيها راجحي زمانه بسعر الصرف والعملات !!

وسبحان الله وبدون سابق انذار اختفت هالسالفة وابصم بالعشرة ان فيه ناس كثار يقرون هالموضوع وتوهم يتذكرون هالسالفة




4

الاسهم


http://www.alriyadh.com/2006/08/04/img/048109.jpg


طبعا اعتقد هالنقطة يبغالها موضوع الحالها !!!!
اكيد تذكرون قبل 4-3 سنوات تقريبا يوم بدت فورة الاسهم
كل الناس تسولف فيها : بالدوام و بالبيت و بالاستراحه و بالمرزعه وبأي مكان , وصارت سالفة كل الناس ولا فيه أحد الا يتكلم عنها
وكل العالم تصرف وصارت تطلع امثال على الاسهم واغلبهم ما يدري كيف طريقة الاسهم ووش محلها من الاعراب تجاريا , بس مع الخيل يا شقراء

لدرجة اني كرهت عمري وسوينا ميثاق انا و4 من الشباب ( اللي نتكي يوميا ) وميثاقنا اننا ما نجيب طاري الاسهم نهائيا اذا اجتمعنا :D ولا احد يلومنا طبعا من كثر ما صجونا العالم فيها
وترا محدثكم اشترا بالاسهم واكل خابور فيها :D بس من قبل لا يطيح السوق وانا كاره سوالفها
ويوم طاح السوق سالفة ثانية :D خش مجلس ويجيك واحد ويصرف لك سبب الطيحه , خش مجلس ثاني تجيك صرفة ثانية , وكل محل فيه فتوى عن سبب الطيحه :D
يا حبيلنا والله اننا تحف




5

شاعر المليون



http://malam7.files.wordpress.com/2008/04/sha3r602.jpg



خلصنا من سالفة الاسهم وريحنا شوي
طلعت لنا سالفة شاعر المليون
بدون ما أكثر كلام : اخوكم في الله ما قد تابع ولا حلقه من شاعر المليون ( طبعا السبب بسيط جدا لان السالفة مصخت من كثر ما يسولفون الناس عنها ) ومع ذلك مستعد اقولكم منهم المتسابقين :D وعيب كل واحد ووش صار بكل حلقة وأي شي تبونه :D ليه ؟ لان ما فيه احد الا ويسولف فيها لدرجة اني عرفت السيناريو سماعيا من سواليف الناس :D
ناصر الفراعنة
ناقتي يا ناقتي <=== الظاهر حتى اللي يغسل سيارتي غناها :d




6

الاماكن


http://www.abuaseel.net/nawaishah/serhoby2/abdo.gif


الله يتوب علينا وعلى جميع المسلمين , الاماكن اغنية مشهور لمحمد عبده
اول ما طلعت يووووووووووووووه : وقف جنب أي واحد بالاشارة وتسمعه مشغل الاماكن
شغل الاف ام تسمع الاماكن
اقلب على قناة ثانية بالرادو وتسمع برنامج مواهب تلاقي الموهوب يغني الاماكن
نزلو عطر الاماكن
اي واحد بالمسنجر غير توبكه للاماكن والا جيت قبل العطر يبرد
بصراحة هالاغنية مللليت منها وحامت التسبد منها من كثر ما مصخوها الشعب



7

نور + لميس


http://upload.wikimedia.org/wikipedi...altinda_01.jpg

طبعا ما دريت ان كل وحده مسلسل الحالها الا من تالي :d كل الناس تسولف عن لميس وعن نور وعن مهند , راحو لدبي راحو مدري وين
يالبى لميس يا لبى نور , مهند زين
يقولون حتى ادارات الاحوال صارت تجيهم طلبات تغيير اسامي وبرضة تسمية مواليد جدد بحدا هالاسامي الثلاثة
محدثكم بالله ما شاف الا حلقتين من مسلسل لميس وغصبن عني لان اخوي الكبير قاعد يتفرج :d


---------------------------


وبكذا انتهي من هالموضوع اللي اهوجس فيه من مدة

طبعا فيه اشياء طمرتها لان ما ودي اكثر الموضوع على غير سنع
البوكيمون ومعنى هالكلمة
مقطع برجس
النمنم
كريزي وير :D
حلقة صالح الغيدان حقت السحر :D
...... الخ

والقاسم المشترك بينها كلها هو انتشارها بين الناس بسرعه رهيبة وكل فئات المجتمع تتكلم عنهم






ختاما اعذروني في حالة وجود أي قصور لان الكامل وجهه سبحانه وتعالى
واعذروني على الاسلوب السياحي بس هذا كان زي المغص في بطني وعلمتكم عليه !!

ورده

يا خوي ما شاء الله هذا اول موضوع تكتبه هنا وكذا

الموضوع الجاي بيجيبونه في اخبار السعوديه هههههههههههههههههه

مشكوووور حبي

ابي اعلق ع الاماكن واقول الحمد ع العافية بس

والله الناس ما ادري وش فيها صاروا اهم شي الفنان يغني والا يجيب كم

بيتن في الاغنيه ويقولون اغنيه لا صارت ولا استوت

>> احس اني طلعت عن الموضوع





سيبقى اللي بالصورة هو الاسطورة

موضوع قمة في الروعة


أما معنى كلمة بوكيمون شي ثاااااااااني

أجل بوكيمون = انا يهودي<<<< كيف الحال

والله موضوعك رااااائع

هههههههههههههههههههههههههههههههه

والله انك صادق أما الجمس الملكي أعرف ناس للحين يسمي موديل اربعة وتسعين الفل كامل ملكي ههههههههههههه

لا بعد المرسيدس الشبح أول ماطلعت والنصبات اللي جت معها ، مثل الرجل الآلي لما تبنشر يطلع ويغير الكفر وهي تمشي ههههههههههههههههههههههههه

يعطيك العافية على الموضوع التحيييييييييييييف ولا تحرمنا من طلتك يالغلا

أهلا باستشاري العالمية ورده

تو ما نور مجلسنا

الصراحة موضوعكـ هذا

مدري شلون طرى على بالك

هل هو عشانك تحب الشر فقلت اطلع الغبرهـ للي فيهم ربو )- يمون سريعا:razz:

سالفة الملكي مدري وش اللي خلاني أتذكر سامي بإعلان شماغ المراسيم وأذكر يوم انشب لأبوي ابي المراسيم ابي المراسيم وأروح اشريه ومعه قلم والظاهر الشماغ موجود إلى الحين عشان سامي طلع بإعلانه :razz:

وبعدين نطمر السوالف اللي ما ملت عيني ( شايف نفسي :razz: ) ونجي للأسهم
الله يغثها والله من جد يمكن تكون أكثر شي انتشر بين الناس من اللي ذكرته

بالنسبة لأبو نورهـ :smilie47:
رغم إنه فيه أغاني كثيرهـ أحلى لأبو نورهـ لكن مدري ليش انتشرت بهالشكل
يمكن عشانها جت بوقت قل فيه هاللون من الاغاني
وبرضو هنا ذكرتني بالبرتقاله اتوقع انتشرت اكثر من الاماكن

SkROoO

موضوع جميل وفكرته رايعه جدا
وآسف لو ثقلنا عليك
ورده

كل الموضوع كوم وكريزي وير كوووم


:d:d:d:d:d:d

ناصر انا مدري من هو الحقير اللي طلع الموضة حقت كريزي وير وكيف انتشر يا خي الناس مدري وين كانت قلوبها ياخي اللبس الوانه كانت تفشل وشكله يفشل ولا تقول انه ماركة عالمية زي بيربري وطقتها عشان تقول انهم مسوين دعاية ولا عشانه غالي

اووووووووف المواضيع اللي ذكرتها رنانة وعالقة في الذاكرة

بس بذكرك بموضوع " طاقية زري" يووووه حتى الحريم الظاهر صاروا يلبسونها:d:d

ياخي اعتقد ان ثقافة المجتمع ضحلة والمسلسلات تجيبهم وتوديهم يمين وشمال
بامانة المجتمع ولنكن واقعيين وخصوصا الحريم ما عندهم شي الا الاسواق والتلفزيون

يعني تذكر يوم فتح كريسبي كريم في جده اجل الطابور يستمر 4 ساعات
ولا مسلسل باب الحارة يؤيؤيؤيؤيؤيؤ حتى شغالتنا اقولها اكوي التيشيرت تقولي " ولو خيو"

عموما نعيش في الدنيا ونشوف العجب

فيه نقطة مهمة كان المفروض اني اذكرها في ردي الأول لكن نسيت :(

بالنسبة لـ هالأمور فـ الشعب عندك يدور أي شيء يشغل نفسه فيه .. من جد فيه فراغ فظيع و بما ان اجتماعاتنا أكثر من إجتماعات الشعوب الغربية فـ أكيد تجدنا نبحث عن أي شيء نشغل أنفسنا فيه للححديث عنه و تقضية وقت فراغنا

هالنقطة كانت مهمة و نسيت أذكرها




تخيل بعد :D يقطع ام المخترعين السبايك :D

باقي كلامك مافهمته :D

الدحمي يا اخي نظرية خويك صحيحة :D فعلا ً كانت معضلة حتى يقولون ما بغوا ينزلون سيارات وقتها :D

فتكم بعافية ورده << شفت عندنا ثقافة يا فياض :D