#1  
قديم 13/07/2008, 04:29 AM
الكاتب الساخر
تاريخ التسجيل: 19/06/2006
المكان: Najd
مشاركات: 1,022
Lightbulb مغاط في حجز الناصرية !!

تعرفون هالفترة أجواءنا يالله من فضلك !! والواحد يتورط ما يدري وش يبدّي هل هو .. يشيل أهله ويوديهم لـ (شلالات وادي لبن ) وإلا (يطمر بهم عقب الظهر .. لبحيرات خنشليلة ) .. وإلا يضبطون العشاء وحفلة باربيكيو في هالمسطحّات الخضراء اللي على يمينك ويسارك وأنت ماسك الدائري !! و صراحة كم مرة أفكرّ أروح للقرية المائية وأطافش فيها أنا ودقني .. وإذا جاء عقب المغرب وطاح اللي براسي ختمتها بالسينما !! عاد لازم أرجع أنام بدري لأن بكرة الفجر ضروري أطلع لـ خشم العان قبل الساعة ست .. فيه رحلة منطاد !! ذي يبي لها تقريبا من ساعة ونص إلى ساعتين !! .. يوووه عسى ما تكون الأجواء ضباب أكثر من اللازم ويلغون الرحلة !! بالطقاق خلهم يلغونها .. كذا وإلا كذا الساعة عشر مواعد الشباب وبنطلع (تجديف ) و ( غطس ) !!

-----------------------------

السلام عليكم ورحمة الله وبركاته .. هلا والله بالطش والرش .. أحس إني مبطي عنكم وأحس أن فيني الصيحة .. وكل الشكر للي سألوا وتواصلوا معي في غيبتي اللي خارجة عن إرادتي ..

-----------------------------

موضوعي باختصار هي سالفة صارت لي بأحد أقسام المرور الله يستر علينا وعليه .. <<-- تعرفون مبطي ما كتب فلا تشرهون !!

وعرفت عقبها إن (الكورة) دخلت في كل المجالات وصارت هي والأسهم و تمثلية لميس .. شغل الناس الشاغل !! كنت طالع من الدوام (منحاش طبعا ) .. لا ومن زين التوقيت طالعن الساعة وحدة ونص !! و من قوّ الحر ماسك الدركسون بـ (بيز) .. كني شايل (قدر كاتم ) !! وأخلاقي (قافله) كني عربجي صايم !! ولا لي خلق .. وفاصخ ثوبي ومعلقه وراء !! وأسوق بفنيلة وسروال .. !! ودرجة الحرارة الظاهر إنها يا سبعين يا سبعو و ثمانين وفيها .. ولا يهّمكم " حسن كراني " إذا قال العظمى في الرياض " طلاطى وطلاطين " قسم بالله إنها ميب " طلاطى وطلاطين " !!

المهم وأنا على هالحالة .. وقروشة و حرّ .. وراي راعي جمس .. ملزّق صدامه في صدّامي .. اللي يشوفه (يحسبني جارّه ومطلعه من تغريزه ) .. وأناظره في المراية القدامية ..وأحسّ إني لو أرفع رجلي عن البنزين لو شوي .. ما نيب داري إلا هو قالط في الغمارة اللي وراء .. المهم أني أناظره بالمرايه شوي .. ومنتبه للطريق شوي .. وأثر قدامي سوداني .. مرّسم ومعه ( ميتين إل خضراء) .. وطالعه نص عمامته مع الفتحة !! وقدامنا كابريس بعده 1000 فرسخ .. يالله نشوفه و رّص الفرامل !! الزول ما صدّق خبر !! وهو يضغط الفرامل بحيل مايقوى !! يحلفون إن أصابع رجله واصلات الأديتر !! أنا شايل هم ذا الجمس اللي وراي والله لو يصدمني على سرعته إن يحسبوني راكب في الميتين إل مع السوادني !! لفيت بقوة !! ويجيني ذاك الباكستاني اللي ما أدري من وين طلع لي .. ويلعب في موتري من وراء .. <<-- أما مدري من وين طلع !

أصيح ؟! أنزل أطق الباكستاني !! لا أخفيكم إنيّ نويت .. لكن يوم شفت شكل يده وهو يفتح الباب يبي ينزل .. إنها طقتني النفاضة .. و خفت صدق !! بغيت أرجع للسيارة وأقفل علي البيبان ألين يجي المرور !! المهم قلت يا مغاط .. قس قلبك !!
نزلنا سوا .. قلت (صديق ما فيه شوف أنتا ؟! ) <<- خشيت بعينه !!
قام يتبسّم .. وشكله مرتاع !! يوم شفته كذا قلت حلو.. لازم استغل الوضع .. قلت له معك تأمين !! قال أيووه .. قلت حلو الخطأ طبعا عليك 100 % وتبي تصلّح سيارتي عشان مرة ثانية تتأدب ولا عاد تصدمني !!
طبعا مرورنا أسرع مرور في الدول النامية .. ما جانا إلا بعد (ساعة إلا ربع) ..لبّق ورانا .. ومتروع اللي يشوفه يقول صادمينه !! قال سلامات !! قلت .. أبد ما يجيك الشر هذا صدمني والخطأ راكبه من راسه إلى ساسه .. حتى أسأله
سأل العسكري : كيف يسّوي حادث يا رفيق !!
يوم قلب علي الباكستاني !! وقال هّوا فيه سرعة زيادة !!
قلت .. أص يالكذاب !! <<-- واضح إني متورط !!
وبعدين أنت صادمني من وراء !! وش اللي سرعة ما سرعه !! قال لي العسكري وين رخصتك !! عاد رخصتي منتهية يوم يحقق الهلال بطولة السوبر !! ومدير المرور اللي موقـّع على رخصتي جاء عقبه 3 ضباط !!
قال وين الاستمارة .. وأثر الاستمارة منتهية يوم يحقق النصر آخر بطولة !! يعني (قسم المرور اللي أنا مطلع منه استمارتي .. والجنود اللي فيه علقّوا ملازم ) !!
قال لّي العسكري .. بس هو ما صدمك مع وراء مرة !! صادمك مع الركن الأيسر .. والخطأ فيه نسبة !! وأنت استمارتك ورخصتك مطوفه قبل أتوظف !! وش رايكم ؟! تبي تتسامحون ؟! قلت أنا من ناحيتي ما أبي شي .. اسأل هالمطفوق اللي مغير يصدّم في هالعالم .. هذا اللي استفدناه من الأجانب !!
قال لي العسكري !! أقل شيء الأجانب (منضبطين في كلّش ) وتأمين وتجديد رخص أول بأول !!
قلت أمـّا منظبطين !! والله ما فيهم إلا ( تفاريس ) و (التايب) والباقين يخلف الله !!
ناظرني العسكري بعين .. قال لي ؟! وهلالي بعد ؟!
قلت أيه هلالي !! والهلالي ما تنتهي رخصته !!

ابتسم وعطاني الرخصة والاستمارة .. فتحت بابي الورّاني ولبست ثوبي .. ودزيّت لقسم المرور .. لقيت الباكستاني مجمّع نص باكستانية الصناعية القديمة !! اللي يشوفه يقول ذابح واحد موب صادم !! وأدخل وأنا ساكت ولا أناظرهم ولا شي كأني ما اعرفهم !! دخلت وأخذت رقم عشان آخذ ورقة إصلاح .. جلست على الكرسي لقيت اثنين يسولفون عن :
(عقد موبايلي) و ( عقود الاتصالات) ..

أبو غترة حمراء : يا أخي لو إني من (موبايلي) تقديرا ً للزعيم .. اللي سهّل لها واختصر عليها (سنوات طويلة ) من إثبات الذات .. إنها تدعمه بدون (لا جلسات نقاش) وبدون (تشنج) ولا غيره !! وراح تشوف وشلون بيكون صدى هالوقفة !!

أبو غترة بيضاء : بس يا أخي كل ٍ يبي يضمن حقوقه !!

أبو غترة حمراء : أي حقوق وأي خرابيط !! كانك تتكلم من هالمنظور !! فأقلـها .. لو ما تم الاتفاق على شيء راح تخسر (موبايلي) شريحة ميب سهلة من (تعاطف الجمهور الأزرق) والأمور المعنوية أهم من الأمور المادية !! وقبل هذا كله .. وبناءا على الأرقام والإحصائيات .. موبايلي ما راح تتضرر أبدا ً من زيادة ورفع عقد الهلال !! وبما إن هالزيادة ما فيها إجحاف في حق (موبايلي) !! ليه (وجع الرأس) !!

أبو غترة بيضاء : بس على هالحالة .. أي واحد يوقع مع شركة .. يجي بعد كم سنة ويقول : لا .. أرفعوا عقدي .. أنا أستاهل أكثر !!

أبو غترة حمراء : وخير يا طير !! حنا أوادم .. ما حناب مكاين (نضبط وزنيتها مرة وحدة وقضينا ) !! وش فيها إذا ( نوقشت البنود) !! وش فيها إذا (روجعت الأوراق) .. وبما إن الهلال أثبت بما لا يقطع للشك يقين !! إن هالصفقة فيها إجحاف في حقه !! فكيف يساوى بأندية أقل منه .. من الناحية القوة (الاستثمارية) و العدة الجماهيرية !!

أبو غترة بيضاء : بس موبايلي ( واعية ) .. ومنتبهه لهالشيء !!

أبو غترة حمراء : نصبر ونشوف !!


------------------------------------------

ما يستفاد من الموضوع :


- تكفون وش الدبره مع هالحر ؟! ..

- ورا مفهوم الاستثمار عندنا مازال ضيق !! ووين المسؤولية الاجتماعية (لرجال الأعمال وللشركات الكبرى ) !!

- موبايلي "الشريك" !! انتبهوا ترا كلام (أبو غترة حمراء في مكانه) !!

- لا أحد يمشي وراء 200 L خضراء .. <<-- للحين ما بعد راحت الروعة !!
اضافة رد مع اقتباس
  #2  
قديم 13/07/2008, 04:30 AM
زعيــم مميــز
تاريخ التسجيل: 21/11/2007
المكان: riyadh
مشاركات: 1,629
.. ..


هههههههههههههههههههههههههههههه


آلله يعطيك آلعآفيه على آلموضوع آلرآئع يآ آخ مغآط

..

آلصرآحه آنك مبدع مآ شآء آلله عليك

..

شكرآ لك


ورده

اخر تعديل كان بواسطة » bda7e_for-ever في يوم » 13/07/2008 عند الساعة » 06:28 AM
اضافة رد مع اقتباس
  #3  
قديم 13/07/2008, 04:38 AM
الصورة الرمزية الخاصة بـ الهايم 10
زعيــم متألــق
تاريخ التسجيل: 20/04/2008
المكان: عـابـر سـبـيـل ...!!
مشاركات: 1,437
والله انك مبدع جداا(ن) .. تشقق بطني من الضحِك .. [ اجل ماسك الدركسون بالبيز ] الله يعطيك العافيه ..
اضافة رد مع اقتباس
  #4  
قديم 13/07/2008, 04:45 AM
زعيــم نشيــط
تاريخ التسجيل: 20/09/2006
مشاركات: 660
إقتباس
الرسالة الأصلية كتبت بواسطة مغـاط
قلت أمـّا منظبطين !! والله ما فيهم إلا ( تفاريس ) و (التايب) والباقين يخلف الله !!
ناظرني العسكري بعين .. قال لي ؟! وهلالي بعد ؟!







ههههههههههه


مشكوور اخوي مغاط بجد اشتقنا لمواضيعك
اضافة رد مع اقتباس
  #5  
قديم 13/07/2008, 04:45 AM
الصورة الرمزية الخاصة بـ Ricky 8
زعيــم مميــز
تاريخ التسجيل: 19/08/2005
مشاركات: 5,816
هههههههههههههههههههههههههههههههههههههههههههههههههه

الله يقطع ابليسك هههههههههه

والله حسيت اني المصور الي يصور الفلم هذا هههههههههههههه

الحمد لله على السلامه وما تشوف شر ان شاء الله

ولا تنسى تجدد الاستمارة والرخصه عشان ما تتلعوز ههههههه

بالتوفيق يالغلا

ورده
اضافة رد مع اقتباس
  #6  
قديم 13/07/2008, 04:46 AM
زعيــم فعــال
تاريخ التسجيل: 09/07/2005
المكان: فيذا جمب بيتنا
مشاركات: 364
[


اولا: الحمد لله على سلامتك اخوي مغاط وفكك الله شر هالباكستاني والا والله ياعليه يد هالباكستاني تقول صبه


ثانيا :الحين انا من عام الرمادة رخصتي مسويها بالله وين اجددها لاني اول مرة اسمع فيه تجدبد


ثالثا : موضوعك جميل والاجمل خفة دمك ياخلفهم



اخر تعديل كان بواسطة » سعودي 99 في يوم » 14/07/2008 عند الساعة » 02:01 AM
اضافة رد مع اقتباس
  #7  
قديم 13/07/2008, 04:49 AM
زعيــم مميــز
تاريخ التسجيل: 29/11/2006
مشاركات: 1,766
مشكور اخوي مـــغــاط ويعطيك العافيه .....
اضافة رد مع اقتباس
  #8  
قديم 13/07/2008, 04:49 AM
زعيــم فعــال
تاريخ التسجيل: 03/06/2008
المكان: بجانب الهلال وطلال ..
مشاركات: 361
مغاط ....كل الشكر لكتاباتك المميزه ,,,,بالتوفيق لك ولزعيمنا بإذن الله
اضافة رد مع اقتباس
  #9  
قديم 13/07/2008, 04:55 AM
زعيــم متواصــل
تاريخ التسجيل: 04/09/2006
المكان: الريــــاض
مشاركات: 103
مبدع دووما أخوي :. مــ غ ــاط :.

يعطيك الف عافيه على الموضوع
اضافة رد مع اقتباس
  #10  
قديم 13/07/2008, 05:00 AM
الصورة الرمزية الخاصة بـ مغترب بالكون
زعيــم فعــال
تاريخ التسجيل: 23/02/2008
المكان: الرياض
مشاركات: 283
مشكوووووووووووووووووووووووووووور مغاط على الموضوع الرائع ودائما الى االامام وانتبه من الباكستانيه المره الجايه
اضافة رد مع اقتباس
  #11  
قديم 13/07/2008, 05:01 AM
زعيــم نشيــط
تاريخ التسجيل: 01/12/2007
المكان: رياض الزعامه
مشاركات: 759
مغـــــــــاط ..

انت انسان غيـر عادي .. ياخي تجذب اي شخص يقرا موضوعك ..

يعني مستحيــــــل يرجع ويترك الموضوع ..

صدقني .. اللي زاد مواضيعك روعه اسلوبك اللي يحاكي العقــول بجميع مستوياتها ..

اما الدبره مع هـ الحر المكيـف .. بس شكله خربان عندك .. ( وجه يضحك )

والله يعينا على هـ الحر ..

كثر لنا من هـ المواضيع ..

سبحان الله وبحمده .. سبحان الله العظيم ..
اضافة رد مع اقتباس
  #12  
قديم 13/07/2008, 05:07 AM
زعيــم مميــز
تاريخ التسجيل: 20/04/2007
مشاركات: 1,641
لووووووووووووووووول

ابدعت والله يااامغـــاط ,, اهم شي الأحانب تفاريس والتايب منضبطين موتني ضحك الله يرجك

تحياتي لك
اضافة رد مع اقتباس
  #13  
قديم 13/07/2008, 05:07 AM
زعيــم متواصــل
تاريخ التسجيل: 28/03/2008
المكان: دار أبو متعب
مشاركات: 98
موضوع في وقته وفيه رسائل كثيرة وهامة تحياتي لك ولسخريتك التي لا يجيدها إلا مغاط
+++++
اقتباس

تعرفون هالفترة أجواءنا يالله من فضلك !! والواحد يتورط ما يدري وش يبدّي هل هو .. يشيل أهله ويوديهم لـ (شلالات وادي لبن ) وإلا (يطمر بهم عقب الظهر .. لبحيرات خنشليلة ) .. وإلا يضبطون العشاء وحفلة باربيكيو في هالمسطحّات الخضراء اللي على يمينك ويسارك وأنت ماسك الدائري !! و صراحة كم مرة أفكرّ أروح للقرية المائية وأطافش فيها أنا ودقني .. وإذا جاء عقب المغرب وطاح اللي براسي ختمتها بالسينما !! عاد لازم أرجع أنام بدري لأن بكرة الفجر ضروري أطلع لـ خشم العان قبل الساعة ست .. فيه رحلة منطاد !! ذي يبي لها تقريبا من ساعة ونص إلى ساعتين !! .. يوووه عسى ما تكون الأجواء ضباب أكثر من اللازم ويلغون الرحلة !! بالطقاق خلهم يلغونها .. كذا وإلا كذا الساعة عشر مواعد الشباب وبنطلع (تجديف ) و ( غطس ) !!
++++++++++++++++++++++

بقدر ما ضحكت حتى الإعياء لسخريتك ولمفارقاتك العجيبة إلا أنه إذا اجتمع موقع مناخي غير جيد و إهمال من المؤسسات الأهلية والشركات الكبرى فهذه هي النتيجة !!!!!!!!!



++++++++++++++++++++++++
اقتباس

- موبايلي "الشريك" !! انتبهوا ترا كلام (أبو غترة حمراء في مكانه) !!
+++++++++++++++++


صدق من قال خير الكلام ما قل ودل


اشتقنا لقلمك ولنبضك ولك أيها المغاط !!!!!!!! عودا حميدا وتميزا غير مستغرب
اضافة رد مع اقتباس
  #14  
قديم 13/07/2008, 05:12 AM
زعيــم فعــال
تاريخ التسجيل: 06/01/2007
المكان: الــظــهـــران
مشاركات: 448
ههههههههههههههههههههههههههههههههههههههههههههههههههههههههههههههههههههههههههههههههه

الله يوسع صدرك ياشيييييييييييييييييخ

اجل أبو غتره حمراء وأبو غتره بيضاء خخخخخخخخخخخ عليك تشبيه ..!!

شكرا يامغاط
اضافة رد مع اقتباس
  #15  
قديم 13/07/2008, 05:13 AM
زعيــم فعــال
تاريخ التسجيل: 11/04/2008
مشاركات: 297
مغاط ماشاء الله عليك خيالك واسع ، أحس وأنا أقرا موضوعك أني معك في الجو هذا ، الصراحة مبدع في جذب الجمهور لقرائة إبداعاتك ، أتمنى استمرارك في الكتابة وعدم الأنقطاع وإلا تبي تشوف شي ما في كويس صديق ــ حسبي الله عليك شكلي تأثرت بالباكستاني ــ ههههههههههههههههههاي
اضافة رد مع اقتباس
   


إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 02:42 PM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2017, Jelsoft Enterprises Ltd

Google Plus   Facebook  twitter  youtube