في تاريخ 03/14/08 كنا في فلوريدا [تقرير مصور ] part 1 - نادي الهلال السعودي - شبكة الزعيم

almobde3 · #1 12/07/2008, 02:12 PM

بسم الله الرحمن الرحيم

والصلاة والسلام على اشرف خلق الله محمد ابن عبدالله عليه افضل الصلاة واتم التسليم

في الحقيقه << ياشين اللغه العربيه الفصحى "ياصعبها صعباااااااااااااه

"

طبعاً السعوديين وكالعاده مايقررون يروحون في رحله ولا شيء الا قبل الروحه بيومين إذا كانوا منظمين بعد اما إذا كانوا مثلي نص يوم .. عموماً مالكم بالطويله

كان اخر يوم عندي إختبار وعند اثنين من الشباب إختبار فيزياء << ركزوا على الفيزياء مسويه هوايل

بعد الإختبار وكالعاده جبنا العيد للأسف وخصوصاً شباب الفيزياء .. كل واحد يشكي همه للثاني .. وكل واحد يقوول انا جبت العيد اكثر منك "يخافون من العين

"

الفكره طلعه من واحد من الشباب وشرايكم نسافر ونغيير جو شوي بدال ضيقة الصدر اللي حنا فيها

الهدف كان فلوريدا في إجازه السبرنق بريك وكانت الإجازه تقريباً اسبوع كامل مع ويك انديين << يعني ثنتين

البدايه كانت من ولايه كانسس إلى اورلاندوا فلوريدا وتقريباً الطريق 23 ساعه بدون ولا وقفه

طبعاً الرحله كانت يوم السبت في تمام الساعه الثامنه صباحاً من ولايه كانسس وطبعاً ملح الرحله وميزته ستار بكس

العزيز الغالي .. السفره ماتزين الا فيه يسلم قلبه

اخذنا لنا العزيز الغالي ريفرش تي " بالانجليزي المنتدى يمنع ذالك " للأسف لاعرف السبب"
انصحكم فيه يالربع هذا شاهي اخضر مع نعناع على الصبحيه تحس انك ماكل فقس

ثم بعد ما ماسكنا الخط دعاء السفر كان اول شيء نقوله .. طبعاً مايحتاج اعلمك فوائد مثل هذه الادعيه

الطريق كان شوي فيه رذاذ وتجيك الوسوسه بعض المرات مثل اتوقع بتمطر مطر شديد في الطريق او اتوقع بتثلج وخذ لك من ذي الهلوسه

خصوصاً إذا كنت السواق

توكلنا على الله وكانت السواليف لمده ساعتين تقريباً ثم بيدنا ننقص شوي شوي

طبعاً حنا ثلاثه واحد من الشباب لزم على الثاني انه هو يركب في المرتبه الخلفيه .. علشانه اكبر مادرينا ماكملنا ساعه بالطريق الا الرجال بدا ينسدح

استمرينا بالطريق .. وينصب علينا وانصب عليه .. والبطل اللي بالاخير ينصب صح ومايكفشه الثاني

اللي معي كان اهلاوي والنايم اتحادي

وانا نصراوي

يعني تشكيله جداً خايسه .. بس تخبرون نأخذ من وجهات النظر ونعرف ليش النصر دائماً السباق لأخذ البطولات

طبعاً بالطريق تمر على ولايات ومدن اول مره تشوفها بالقرب من كانسس ولايه ميزوري تقريباً مثل ولاية كانسس مافيها شيء الا كانسس ستي اللي فيها المطار ويعتبرون اكشخ من حقين كانسس

بعد خمس ساعات تقريباً من الطريق ومن الحماس اللي كان فينا وكنا نصور اي شيء نشوفه
مرينا على مدينه اسمها سانت لويس .ميزوري
Saint Louis ,MO
المدينه رائعه وفيها من اقوى جامعات امريكا اللي هي
Washington University in St. Louis
ومشكلتها اخطر مدينه في امريكا لأكثر من سنه
بعض الصور للمدينه

القوس ذا مزعجينا فيه .. الله لايبلانا برج المياه حق الخرج اصرف قسم بالله

حاطين لك قوس فاضي << لاتعليق

صوره ثانيه للقوس الخايس

صورة مادري وش تبي بس مع البيعه

يازين مواقفهم

الملعب حقهم " baseball" كرة المضرب

المدينه اعجبتني خصوصاً واني جلست فيها خمس دقايق مروراً بالسياره

صوره من الخلف للقوس الفاضي

صوره اخرى للمدينه من الخلف

هذه الصوره توضح العمائر في المدينه

كملنا المشي ولله الحمد بإتجاه فلوريدا

الملل بدأ يسيطر على جو السياره .. صوت المسجل بدأ يزيد << نتائج الملل :"

نسيت شغله مهمه نوم بعض اللي معك احد اهم الاسباب للأسف

بالطريق تحتاج تريح شوي وتأخذ لك قسط من الراحه تصلي فيه وتعين من الله خير ثم تكمل

^^^^
مناطق الإستراحه بالطريق منتشره على طول الطريق وتقريباً كل عشره كيلوا تشوف لك وحده واول ما تمر على وحده يعطيك لوحه ويذكرك ان الإستراحه القادمه سوف تكون بعد ... كلم ويعطيك الوقت والكيلو هذه نقطه ممتازه

طبعاً الإستراحات انظف من بيتكم انت وياه

بكل صراحه جداً نظيفه وتحس انك عايش مهوب اللي يكرمك تموت اهون لك من ان تدخل دورة مياه مسجد للأسف وهو يعتبر بيت من بيوت الله

الصور والإستراحات كانت بالليل يعني تقريباً كملنا فتره من الزمن بدون صوور ماتصلح الصور بالليل

من بكره قام خوينا ابشركم .. والعقوبه كانت كلنا الاثنين سحبنا عليه وخليناه يكمل لحاله الضعيف

من قاله ينام

الصوره هذي فاضيه مافيه شيء طريق وسيارات وين المميز فيها ركزوا وتعرفون وين الميزه

ركزوا اكثر ياشباب

الجووووووووووووووووووواب

كحيلان

يلاحق واحد مسرررع

كملنا طريقنا وحنا ندعي الله يكفينا شرهم إن شاء الله

اللهم لك الحمد اول عمارة في اورلاندو طبعاً هذا يوم الاحد او صباح يوم الاحد

وكالعاده السعوديين مخالفين لكثير من القوانيين الدوليه

طالع من الدريشه علشان يصوور = الشباك = الطاقه

طبعاً توجهنا مباشره للفندق لأخذ قسطاً من الراحه

تخيلوا ساكنيين في الهلتون والله مارجع مره ثانيه

بس هذا تمويه

عموماً انصح الجميع اللي بيروحون لورلاندو يسكنون في هذه المنطقه International Drive

المنطقه هذي جداً ممتازه ومكانها اكثر من رائع خصوصاً قربها الشديد لدزني لاند

هذا ونكون قد ختمنا الجزء الاول من رحلتنا السعيده

في الجزء الثاني سوف يكون لنا رحله في

اتمنى من الله العلي القدير ان اكون قد وفقت في هذا التقرير وان يليق بمستوى شبكه الزعيم واعضاء الشبكه الكرام

اعتذر منكم على الاسلوب الركيك الصراحه ومن الاخطاء الوارده بالموضوع

" طلب من الاخوان اللي كانوا معي واحد اهم اسباب موافقتهم على تنزيل الموضوع في المنتدى " ان يتم ذكر الله عز وجل عن اي شيء اعجبك في الرحله وقول ماشاء الله تبارك الرحمن لكي نستطيع ان نكمل الاجزاء المتبقيه

تحياتي لكم المبدع واعذرونا على القصور

فـارس الـزعـيـم !! · #2 12/07/2008, 02:43 PM

هلا والله بالسمي

يعطيك العافيه ع التقرير وماقصرت يابعدي

لالا شكلك تبيني اكون جنبك بالسياره

يازين الجسر المعلق

عوافي يالمبدع

Mr.GoaL · #3 12/07/2008, 06:50 PM

^^

الجسر المعلق ياراعي البديعه

عوافي يابوخلود تقرير مميز ان احيانا الله وجيت فلوريدا بسكن في فندقكم ذا

H U N T E L A A R · #4 12/07/2008, 08:52 PM

الـسـلام عـلـيـكـم

23 سـاعـة أحـحـحـح

. . . عـنـدي واحـد مـن الـشـبـاب يـسـولـف عـلـى كـان رايـح لـ مـيـامـي فـلـوريـدا و خـذا الـخـط بـ 24 سـاعـة

مـهـوب صـاحـي

. . لـو مـاخـذيـن طـيـارة مـهـوب أصـرف مـن الـبـانـزيـن الـى يـقـص الـظـهـر

. . الـحـمـدلله عـلـى سـلامـتـكـم

و أهـم شـي ونـاسـتـكـم

. . الـى أعـرفـه أن اورلاندوا تـجـذب الـسـيـاح بـسـبـب مـلاهـي والـت ديـزنـي مـا أدري هـل هـذا الـسـبـب

الـوحـيـد ؟ . . أخـخـخ لـو كـمـلـت خـيـرك و شـفـنـا صـور لـ مـيـامـي

.

احمد الهلالي · #5 12/07/2008, 11:21 PM

[]رحلة رائعه ما شاء الله رائعه وصور جميله ان شاء الله تكونون استمتعتوا بالرحله

بس تعرفني يا ابو وليد حقنه ودايم احب استقعد
عموما هذي بعض التعليقات اللي بقولها ووسع صدرك علي ههههههههههههههه

إقتباس

الرسالة الأصلية كتبت بواسطة almobde3


	طبعاً بالطريق تمر على ولايات ومدن اول مره تشوفها بالقرب من كانسس ولايه ميزوري تقريباً مثل ولاية كانسس مافيها شيء الا كانسس ستي اللي فيها المطار ويعتبرون اكشخ من حقين كانسس

وبعدها تقول

إقتباس

الرسالة الأصلية كتبت بواسطة almobde3


	بعد خمس ساعات تقريباً من الطريق ومن الحماس اللي كان فينا وكنا نصور اي شيء نشوفه مرينا على مدينه اسمها سانت لويس .ميزوري Saint Louis ,MO المدينه رائعه وفيها من اقوى جامعات امريكا اللي هي Washington University in St. Louis

الحين وشلون ميزوري مافيها الا كانساس سيتي وكاشخين فيها وتقول سانت لويس ميزوري؟؟؟

سانت لويس انت يالقراوى حقين منهاتن مثل كانساس سيتي جزء في ميزوري وجزء في الينوي والجزء المهم فيها والجميل في ميزوري والجزء الخطر في الينوي

وتجيني بعدها ياحق منهاتن تقولي

إقتباس

الرسالة الأصلية كتبت بواسطة almobde3


	بعض الصور للمدينه القوس ذا مزعجينا فيه .. الله لايبلانا برج المياه حق الخرج اصرف قسم بالله حاطين لك قوس فاضي << لاتعليق صوره ثانيه للقوس الخايس صوره من الخلف للقوس الفاضي

القوس هذا مهوب قوس فاضي على قولتك
كان شمرت عن سقانك ودخلت فيه ورقيت لاعلى القوس بتطلع فوق بتشوف فيه جلسات وتشوف المدينه كلها من اعلى القوس اللي قوس الخرج اصرف منه

[/B][/COLOR][/CENTER][/QUOTE]

عموما ميزوري فيها جداول رائعه من اجمل الجداول للكانوا في امريكا لو نزلت على بعد ساعه او شئ جنوب سانت لويس بتضيع مابين الخضره والتلال
وفيها بحيرة الاوزارك فيها تاجير دبابات بحريه وشاليهات على البحيره وتاجير مراكب
هذي بعض الصور للجداول وبعضها للحيره والباقي لسانت لويس

احمد الهلالي · #6 12/07/2008, 11:35 PM

الصور البقيه معليش ما اعرف احمل الصور زيكم ياشباب شايب والخبره عندي دمار العذر والسموحه

almobde3 · #7 13/07/2008, 12:29 AM

هلا بالجميع .. هلا وسهلا والله شرفتونا

بالنسبه لسؤال الغالي بخصوص اورلاندو.. المدينه جداً رائعه وخصوصاً بالمناطق الترفيهيه مثل دزني لاند و ينفيرسل ستوديو ... من اجمل المناطق اللي انصح فيها الصراحه

نرجع لشايبنا ابوحميد ...

انت اللحين اللي ماتستحي ماعندك ولاء لكانسس .. انا اللحين احاول ادور لي ولايه مثل كانسس .. ميزوري قلت جمبنا ونمون عليهم مهوب زعلانيين علينا ..

وبيني وبينك الرد الاول يوم اقول ميزوري مافيها الاكانسس ستي كانت قبل الغداء .. يوم روقت شوي واخذت لي الشاهي الاخضر كملت الباقي وطلعت المدن الزينه ...

ماتلاحظ يابوحميد شغله مهمه ان ميزوري مدنها الرئيسيه منقسمه نصيين كانسس ستي فيها جزء في كانسس وسانت لويس فيها في الينوي

شــكراً للجميع على المداخلات الرائعه

أبـوكـــادي · #8 13/07/2008, 03:16 AM

أجل 23 ساعة وستاربكس (عطه خير)
أهم شيء كان جراندي موكا والا لاتييه

القوس اللي مب عاجبك تدري أني أدعي ربي الحين أني أنام بس جنبه

خطوط وطبيعة ولا ولفلوريدا (الله يعين على ضيقة الصدر)

خطكم جنوب والا شمال يا خالد !

الحمد لله على سلامتكم ولا تنسى تغرف لي كم رصيف من عندكم

أنتظر بارت 2 (آه يالقهر)

برايفت لأحمد نيوز اديتور
(كيفك يا حلو ؟)

الفيلــ15ـــسوف · #9 13/07/2008, 06:36 AM

افا طلعت نصراوي !!

والحمدلله عساكم انبسطوا بالرحلة

لكن نصيحة الغالي لا تأخذ شي من ستار بوكس لإنه زي ماسمعت انه يدعم اسرائيل حسبي الله عليهم

غريبة .. كأني اشوف الطارة يسار ؟؟

alzaeem for ever · #10 13/07/2008, 10:16 AM

ما شاء الله تبارك الله ..... وضعكم لا يختلف ...

وبنتظار الجزء الثاني ..... وترجعون بالسلامه

رفسني الشوووق · #11 14/07/2008, 04:04 PM

إقتباس

الرسالة الأصلية كتبت بواسطة الفيلــ15ـــسوف


	!! غريبة .. كأني اشوف الطارة يسار ؟؟

تراه قال بأمريكا مو ببريطانيا ..

<<-- مسوي فااهم ههههههههههههههههههههه

هلالي فدرالي · #12 15/07/2008, 03:43 AM

مشاء الله عليكم شكلكم فله

تقرير رائع وبأنتظار الجزء الثاني(part2)

الله يحفظكم

hilali_77 · #13 15/07/2008, 08:09 AM

هههههههههههههههههههههههههههههههه

ياَ حليلكم انا رحت اورلاندو بس من سبع شهور في الكرسمس

اهم شي دامكم رحتو دزني لا تنسون تشقرون على يونفي فيرسال

وشارع النتر ناشونال درايف طبعاً

عاد ذاك فله فيه البيت المقلوب والبيت المايل والدجه كلها

بس المشكله وقتكم احس ضيق اسبوع واحد

يالله اهم شي استانستو ^_*

وتغير الجو مهم الصراَحه

...

وشكراً