بدايتي في الأنترنت وماهي بدايتك - نادي الهلال السعودي - شبكة الزعيم

سيد الملوك · #1 02/07/2008, 08:52 PM

السلام عليكم ورحمة الله وبركاتة

... .(مدخل) . ...

لكل بداية نهاية ولكل نهاية بداية والسلام عليكم ورحمة الله وبركاتة >> أبوك يالمدخل

بدايات الأغلبية في النت تكون حماسية ومليئة بكل ماهو مسلي ومفيد

فلكل شخص طريقته الخاصة في البداية

أذكر أول كنت أسمع بالنت وكنت أسمع بالدردشة ويقولون سعة صدر المهم تحمست وزاد حماسي واحد من عيال عمتي يدخل النت المم يسولفلي عنه لين شوقني فيه

المهم قال وش رايك نروح للمقهى وقلت يالله قدام

>> ماصدق خبر

المهم رحت معه ضيف شرف بس ودخلنا المقهى ودخل الدردشة وقعد يكتب وكان سريع
المهم يكتب كلمتيه ويعلق هلى هـ1 ويضحك بصوت عالي ونا اضحك معة على الدقة ولا ادري وش السالفة >> بس عشان يخليني اجرب

المهم خلص من النت وطلع وقال مشينا ويقص سالفتة ويضحك وضحك معه اريشبة عشان يخليني اطقطق معه على النت

المهم ونجحت الخطة والترييش جاب نتيجة وقال بكرة بنروح انا وياك ونت على جهاز ونا على جهاز ونقعد عند بعض عشان اعلمك ونا تغمرني الفرحة العارمة ودق اصبع وانتظر ذاك اليوم بفارغ من الصبر

المهم يوم جا بكرة رحنا للمقهى وفتحلي الدردشة وقال اكتب قلت وش اكتب قال سلم عليهم اثر الولد معهم ونا مدري

واكتب بسم الله الرحمن الرحيم ومادريت الا وهو يذب علي ويضحك هو ويا اخوياه يقول وش دعه أفتتاح عاد انا اقول في نفسي أي بالله افتتاح

عاد الاختصارات عندي معدومة ما اعرفها ابدا المشكلة اذا شفتهم في موضوع ابدخل اعلق عليه اكتب ومن البطء عندي وانا اكتب اثرهم خلصوا الموضوع ودخلو في عشره بعده ونا توني

المهم كرهت الدردشة ومليت منها وطحت في مقاطع الفديو وصار مافيه مقطع فديو نزل جديد الا ومر علي تقول كني جمارك

ومن الفديو وطحت في المنتديات ويازين المنتديات المهم وتعلم منا ومنا شوي وسجلت في منتدى والله اني ما اذكر اسمه بس كنت انا عله لهم اذا دخلت تلقى المشرفين يتتبعوني لانهم عارفين اني أي مشاركة اشاركها مخالفة حتى قبل انزلها

كنت أدربي راسي في كل الاقسام , أقرا موضوع في القسم العام وروح ارد في قسم الترفية مع ذا اللي يعدون تلقاهم واصلين لين رقم خمسة وجيك انا مدرعم ونزل ردي عندهم

وكني طالب ابتدائي تلقى كل الحركات حاطها في ردي نجمة تطير وشي يشر وكلمة تروح وتجي واخرتها الرد كاتب (شكرا)

وفوق ذالك تلقاني اراسل الادارة ومسوي فيها معصب واكتب رسالة وأقول انا رديت في الموضوع ورجعت ومالقيت ردي المشكلة رد مخالف ويدورة

وكل منتدى اطيح فيه اخذ من عنده انذارات وطلع ثلاث شهور ولا ستة وطلع كنها شهادة خبرة

المهم وبعد فترة والحمدلله صرت اعرف واجتهدت في احد المنتديات وعطوني مشرف

وانبسطت وكنهم معطيني بنك

واسهر عليه وانزل مواضيع بالهبل المشكلة يجيني مراقب ويقول لي في اليوم لاتنزل اكثر من موضوعين او 3 بالكثير وقلت له لازم انشط قسمي

وكنت انا المشرف الحبيب اللي ما احذف ولو كان مكرر مرة اصلا ما اعرف احذف ولا اعرف شي غير الردود وانشاء مواضيع وان كثرت قيمة الموضوع وتلاقاني مقيم الردود بعد

بس بصراحة ماكملت اسبوعين الا ولقيتني بدال ماكنت مشرف لقيتني عضو فعال أثرهم سحبوا الاشراف مني وانا احسبها ترقيه ثانية وانبسط وارسل للإدارة شكر على منحكم لي الثقة وانشاء الله اني اكون اهلآ لها وانا من جدي وهم يحسبوني زعلان وفوق ذالك اجتهدت اكثر

لاكن الحمدلله الواحد يطور نفسة يوم بعد يوم ويتذكر سوالفة ويضحك عليها وهي اول على باله انجاز

... .. .(قفلة). .. ...

لكل منا وقفات ومواقف مع بدايتة في الشبكة العنكبوتية فقد استعرضت سريعا بعض ما حصل لي وقد مر علية الكثير منكم

أتمنى التفاعل في هذا الموضوع وعرض مواقف الأعظاء وبداياتهم الطريفة في الأنترنت

**

وتقبلوا محبتي لكم ومودتي
سيد الملوك

**