#1  
قديم 28/06/2008, 07:02 PM
الصورة الرمزية الخاصة بـ عسيريه
مُصممه محترفه
عضو استشاري سابق للمجلس العام
تاريخ التسجيل: 21/11/2005
المكان: في رجا اللي عيونه ماتنام
مشاركات: 2,402
▪▪▪ تُرآث من نوعٍ " آخر " ينبغى المحآفظة علية !!

:


:



:
:



في ليلة من الليالي السامجة كآن منزلنا مع موعد لإستقبآل" جيش عرمرم "
من النسآء أستعدينآ إستعدآد تآم لهذآ الإستقبآل واللذي كآن بمنآسبة سلآمة أمي
بعد خروجهآ من المستشفى


بينمآ كنت في الغرفة أستعد لـهذا " الإعصآر " القآدم , إذا بي إسمع الأتصآل الدآخلي
كآنت المتصله هي أمي



عسآك خلصتي من اللبس

إيه يمه بغيتي شي

الله يعآفيك روحي إفتحي لـخآلتك شوفيهآ عند " البآب " هي وبناتها واذا مآتقدرين تستقبلينهم لوحدك خلّي الشغالة تفتح لهم الباب

أكيد أعرف أستقبلهم مالها دآعي الشغآلة بس يمة أي بآب أفتح

وتقول تعرف تستقبلهم روحي أفتحي مدخل الحريم

حآضر



نزلت بسرعة عآلية من الدرج كآن هدفي أن اثبت لأمي أني أعرف " أستقبل النآس " وإني بنت سنعة مو حيّ الله وأنآ بـنص الدرج " أبد " مآ كنت بطيح وأبد مآ كآنت
رجلي بتنكسر لكن الحمد لله ربي ستر


فتحت الباب وأستقبلتهم نآديت الشغالة تآخذ العبآيآت <~ مآلي غنى عنهآ


خآلتي نورة ( ليست خآلتي هي صديقة أمي لكنّي أسميهآ خآله ) : شخبآركم عسآكم بخير

الحمد لله الله يسلمك شلونكم انتوا

الله يعآفيك والله بخير الحمد لله .. وآنستكم الوآلده


هنآ تمنيت الأرض تنشق وتبلعني ولا إني أكون بموقف سخيف زي كذآ
مشكلتي مآ أعرف أرد على مثل هـ الكلمآت


وش أقول ياربي أقول " الله يسلمك " بس أحسهآ مآتنفع
يآربي


كآنت بنتهآ " نوف " وآقفة بجنبي يوم شفتهآ كآني شفت الجنة قلت مالي إلا نويف تنقذني
شآورتهآ بصوت " غير مرتفع" حتى مآتسمع خالتي


نوف وش أقول

هههههههههههه يمه أسمعي وش تقول

نويف أنطمي

نوف مآزآلت مستمرة في الضحك والتعليق


عدّى هذا اليوم على خير بس مآ ضنتي إن قآدم الإيآم بتعدِّي على خير ولا " أضمن " أن تكون من تقف أمامي انسانة " طيبة " مثل خآلتي نورة اللي سلكت الموقف

بس للأسف إن بناتها ما نسوآ والى يومكم هذآ مآزآلوآ يعآيروني









بعد موآقف عديدة مريت بهآ ومر بهآ الكثير من حولي أيقنت أننآ جيل " مآ عنده سآلفة "


أرى جدتي . أمي . خالتي . عمتي والكثير ممن عآشوآ بالجيل السآبق يعرفون تمآم المعرفة مثل هذه الردود والكلمات الغير مفهومة لدينآ حآلياً


جيلنا نحن يرى بأنهآ كلمات ليست لهآ قيمة ومثل ماتقول إختي " سخآفآت مآلهآ دآعي "
بينمآ الجيل السآبق يجزم أن الرجل أو المرأة بدون هذه الكلمآت" إنسآن غريب"



قد تقتصر معرفتنا على " تقنية " حديثة أو على عدة تقنيآت حيث أصبحنا نعرف بالجيل
" الألكتروني " وهذآ شئ جميل جدا عندما نسعى للتطور , لكن أعتقد أننا بحآجة إلى معرفة ثقآفة القدمآء حتى نُحآفظ على هذآ الموروث القديم


حتى باتت مثل هذه الكلمات تمثل حآلة خوف عند البعض خآصة عند موآجهة كبآر السن لعدم معرفتهم بالرد المفترض رده !


كـانت تُحدثني إحدى صديقاتي عن جدتهآ فأٌعجبت بجدتهآ وتمنيت أن أقآبلهآ
قالت لي والله لو قآبلتهآ مآبتفهمين ولا كلمة منهآ

مع إن جدتهآ من نفس منطقتي مآ أقول إنهآ شرقآوية أو أنجدية أو حجآزية أو شمآلية حتى مآ أفهم كلآمهآ ؟؟

فلمآذآ كلآمهم لايُفهم !









في عهد الصحآبة والتآبعين دخل في الأسلام أقوآم جديده وعند قرآئتهم " للقرآن " إحتآجوآ لـفهمة وذلك بأن يُفسر لهم لـ صعوبة كلمآته ولأن الصحآبة والتآبعين لم يُفسروا القران كآملاً بل فسرّوا بعض الكلمات التي صَعُبت عليهم , أما البآقي لم يقوموآ بتفسيره لفهمهم أغلب آيآته .!

نحن كذالك ، مايردده " أجدآدنآ " الآن من كلمآت , هي عندهم وآضحه جليّة لكنها لدينآ غير ذلك تمآمآ

مآبين عصر وعصر نحتآج للتّوضيح ,

نحتآج لـ " توضيح " من قِبَل أبآئنآ وأجدآدنآ حتى لا نقع في الحرج , نحتآج أيضاً لتعليم أبنآئنا

وإلا فهذآ التراث سَيُدفن ويصبح في عدآد الموتى .!!


من يرفع لِوآء هذآ " الموروث القديم " هل يكون " الجيل الثآلث " هو الفآرس المُنتظر .!!

رُبمآ يكون كذلك , إذا مآ عملنآ بـدراسة هذه الثقآفة من الآن








عندما أقول باننا جيل لايعرف أن يتحدث بمثل هذه الأشيآء لا أقصد " التعميم " أبداً بل على العكس يوجد من أبناء جيلنا من يتقن هذا الفن القديم

مثلا أجد أخي خبير بهذه الأشياء ويعشق مايسمى بـ " الرُدُودَه "
كذلك إبنة خالي إنسآنة أخرى عندمآ تستقبل الضيوف وتودعهم ، وقد يكون بيننا أيضاً من هو أهلٌ
لـ آدآء هذا الفن



هِِيَ مجموعة لكنهآ " قليلة " بالنسبة لعدد البقية








في الصيف اللي رآح أستقبلنآ خآلي بـ " المطآر " وأخذنآ مبآشرة إلى بيت خوآلي إلا أمي
كآنت تعبآنة بعد السفر فأقترح الوآلد إنه يجلس مع امي ونروح حنّا مع أخوي وخآلي
المهم دخلنا " البيت "
وإستقبلتنا جدتي وصآحت وضحكت وأنوآع الفرحة بمنآسبة " وصولنآ "


جدتي تكلم أخوي : الحمد لله على سلامتكم يآولدي
الله يسلمك يآجده


جدتي موجهه كلامهآ لـ أختي : ولا تعبتوآ
أختي بحسن نية : لا والله يآجدة ليش التعب الحمد لله مآفية " تعب " ولا شي


جدتي إبتسمت تلتهآ " إبتسآمة " أوسع ثم انفجرت بـ الضحك ونفس الحآلة صآرت مع أخوي وخآلي



][ بعد هذي الموقف قررت اختبر ثقآفة بعض الأعضآء فكآنت ردودهم كـالتالي ][


لو كنت رآجع من سفر وقيل لك [ ولا تعبتوآ ]
بـمآذآ ترد !


أبو طلال : بالعاده ردي على هالكلمة " لاندمت "


بلد الوليد : امم راجع من سفر وقالي احد لاتعبت ! بأنلخم بقول من جد
او يمكن اقول تعبك راحه مع ان مالها دخل بس احس اني بقول كذا
او --> كم خيار لك انت ووجهك
بقول لا والله ما تعبنا انتم عسا ما تعبتو ؟!


abo_nasser : لا ندمتوا


المشآغب : إذا انقال لنا ولا تعبتوا .. نرد عليه ونقول : ولا ندمتوا
عاد أنا كل علوم الرجال وسلومهم عندي


f*y*d : أقول هاً الله لا يتعبك قل آمين ووياك
الصراحة عندي خلل فـ " هالموضوع " وأحتار أرد فـ أقول اول شي يجي على بالي


الكلاسيكي : بقول " لاندمت "



والرد الصحيح إذا قيل لك ولا تعبتوآ هو " ولا ندمتوآ "


فآز بهذه الجولة كُلاً من [ أبو طلال , أبو نآصر , المشآغب , الكلاسيكي ]

أمآ [ بلد الوليد وفيّآض ] فمآ أقول الا الله " يعوّض " على أهآليكم


:

:


في الجآنب الآخر نشوف ثقآفة " العضوآت " مع هذآ الموقف اللي حصل لي

:

:


في اخر يوم بـ " الإختبآرات النهآئية " وقت المغرب قال لنا أبوي خلونآ نطلع بمآ إنكم معطلين كلكم
تجهزنآ وطلعنآ .. بينمآ كنّآ بالسيآرة


قال لي أبوي : تو مانورت السياره ، خآرجة من الشر
ممم وش أقول
الحين أنا أقولك خآرجة من الشر تقولين وش أقول
خلآص طيب بقول شي بس لا تضحك
يالله مابضحك
يصلح أقول الله يسلمك
ههههههههه الحين انتي ما عندك إلا هـ الكمة



][ ردود بـعض " أمهآت المستقبل " عضوآت المجلس العآم كآنت كـالتآلي ][


لو قيل لكِ " خآرجة من الشر "
بمآذآ تردين !



عآشقة الزعيم15 : لقد انني بقمة الدلاخه ومافهمت شي
ايش المقصود بخارجه من الشر

<~ وبعد التوضيح لعاشقة تم الرد بـ : اقوله يا بابا وات ذا ميننق از كارجه من الشر
مدري بس حسيته يقصد قربتي تتخارجي من الهم والقلق
هذا اللي توصلت له وبرد عليه على " خير ان شاء الله "


الهنوووف : تسلم الله يجزاك خير والشر مايجيك ان شاء الله
واتوقع بهالموقف " بابتسم " فقط بدون ماتكلم


بآسكن روبنز : الشر مايجيك ,, وجزاك الله خيـر ..


"هلاليه أنا " : بيكون ردي مقتبس من لفظ الجمله يعني ينقال لي
خارجه من الشر بقول " الشر مايجيك "
أدري إن ردي من جنبها لكن شي أحسن من لا شي


هلالية من الريآض : إذا قالي أحـد خارجة من الشر بتوهق وش أقـول وفي النهاية
مافيه غير" الله يسلمك "


اليزابيث هيرلي : أنا اسمعها وتنقالي دايم " طلعتي من الشر "
وردي يكون ..الحمدلله على كل حال , الشر ما يجيك أن شاء الله ..




والله إنكم فآشلات " يالبنآت " طآلعين علي بسم الله عليكم خآصة هلالية من الريآض


والرد الصحيح إذا قيل لك خآرجة من الشر هو " ومن قال خرج "
وأبوي يقول " الشر مايجيك " مايخآلف نقدر نبلعهآ



بتحكيم الوآلد النتيجة تكون لـ صآلح [ الهنوووف , باسكن روبنز , "هلاليه أنا " , اليزابيث هيرلي ]

أمآ [ عاشقة الزعيم 15 و هلالية من الريآض ] فـ الله لايفشلنا
<~ مسوية نفسها طالعه منهآ

:


إلا على الطآري دآيم اذا قابلت وحده تقولي " وحشتيني " فيكون ردي كالعآده الله يسلمك
ومن زمآن ودي أعرف وش يرد الشخص على هـ الكلمة

المهم مره كنّا مسوين عزيمة ببيتنا بمنآسبة رجوع عمتي وبنتها من الحج <~ يآكثر عزآيمهم
يوم جيت أسلم على بنت عمتي قلت خليني أتفلسف عليها قلت لها وحشتيني يآوعّه
ردت بـ رد غريب نوعاً مآ قالت : " ماتشوفيش وحش " , بالله هذا رد


كيف تردون على هـ " الكلمة " لايكون مثل رد بنت عمتي " الوحِش "









كُل مايذكر على ألسنة " كبآر السن " فهو بلا أدنى شك
شئ قيّم ,

ينبغي علينا أن نُسقي أبدآننا بهذه " القيم " حتى نستفيد
ونُحآفظ على مآ وُهِبنآه

أعتقد أنه بجرد جلوسك مع كبير في السن ستتأثر , فلمذا تبخل / ـين على نفسك بجلسه تجلب لك
الفائده وتُبعدك كثيرا عن " الموآقف المحرجه "

:

:

أجدآدنآ " أصآله وحضآره " بآقيه مدى السنين , لن تتأثر بإذن الله بـغُزعبلات " الغرب "
أو حتى بلهجآتهم , التي أصبحت اليوم أشبه ماتكون بـاللغه الرسميه لنآ !!

هل نُحَافظ على هذه " الأَصَآلة والحَضَآرَه " .!

" فقط " أنتَ وأنتِ وأنا من يحدد ذلك









لآ أنسى أن " أشكر " كُل من شآركني

من البنات [ عاشقة الزعيم 15 , الهنوووف , باسكن روبنز , "هلاليه أنا " ,
هلاليه من الرياض , اليزابيث هيرلي ]

ومن الشباب [ أبو طلال , بلد الوليد , abo_nasser , المشاغب ، f*y*d , الكلاسيكي ]

شكرا لكم كنتم إضافة رآئعه للموضوع



:

:


شطحة <~ هذي الإنسانة تُعآني الآن من حآلة " خوف " غير طبيعيه
عشآن النتيجه " غداً "

قفلة : سبحآن الله وبحمده سبحان الله العظيم



المتفوقة Aseeria
مع التحيه
اضافة رد مع اقتباس
  #2  
قديم 28/06/2008, 07:52 PM
زعيــم نشيــط
تاريخ التسجيل: 21/02/2008
المكان: باريس
مشاركات: 592
اختي عسيريه اول شي و(عليكم السلام )
واهنيك اختي على التميز لشهر مايو وعقبال الاشراف على المنتدى<<من قدك
والموضوع جميل بمعنى الكلمه وقد نجحو اعضاء الزعيم على اختيارهم لكي على ان تكوني المميزه لهذا الشهر<<يالله مابي اطول
بس والله صادقه مانفهم شي من كلام الجدات والجدان كانهم مو من السعوديه الى احنا اللي كننا مو من السعوديه مانفهم شي من كلامهم ابداً وكأنناماقدعشنا معهم

اهنيكي اختي عسيريه على تميزكي

Nada 20
اضافة رد مع اقتباس
  #3  
قديم 28/06/2008, 07:55 PM
موسوعة المجلس العام
تاريخ التسجيل: 25/12/2005
المكان: حيث اجتمع الحب والوفاء ..!
مشاركات: 2,584
إقتباس
أمآ [بلد الوليد وفيّآض] فمآ أقول الا الله "يعوّض" على أهآليكم

إقتباس


هههههههههههههههههههههههههـ يا عسيرية فضحتيني
لا وطلع اللي مثلي بلد القلق لالا خلاص صرنا نكتة المجلس



الموضوع فكرته جاآآمدة لأني بيني وبينك مثلكم
اتلخبط واتلعثم واتمنى الأرض تنشق وتبلعني وتريحني منكم
قصدي لأني أحتار فـ الرد على هالكلمات وا فشيلتاه
بس الحمدلله طلعتِ مثلي وفيصل مثلي واكيد فيه غيرنا زيادة
لما يكون انت الوحيد الخاطئ وتلقى ناس غيرك اكيد بترتاح شوي


.
.


أشوف اننا مهما عشنا وتطورنا مع التكنولوجي المفروض ما ننسى التقاليد والعادات والتراث لازم نوافق بينهم
صح ممكن تشوفون كلامي فلسفة بس الواحد يحاول انه يوفق بين الأشياء .

.
.
إقتباس
إلا على الطآري دآيم اذا قابلت وحده تقولي " وحشتيني " فيكون ردي كالعآده الله يسلمك
ومن زمآن ودي أعرف وش يرد الشخص على هـ الكلمة

أعتقد فهالكلمات بالذات انا وفيصل خبيرين فيها
نقول وانت أكثر ميتو

طيب سين سؤال لو احد قالك وحشوووووش شو بنئولو ؟



طرح مميز كعادتك يا عسيرية يا مصرقعة وحمدالله على سلامة الوالدة مرة ثانية
والله يوفقك بنتيجة ترفع الراس بعد كل هالتعب



قفلة / الله لا يسامح للي بيحاول ينتفني انا وفيصل فـ هالموضوع







اخر تعديل كان بواسطة » f*y*d في يوم » 28/06/2008 عند الساعة » 08:15 PM السبب: محجوز للشايب فياض :-D
اضافة رد مع اقتباس
  #4  
قديم 28/06/2008, 08:06 PM
زعيــم مميــز
تاريخ التسجيل: 22/11/2006
المكان: شاطئ الخليج العربي (L)
مشاركات: 2,669
عدنا


:
وعليكم السلام ورحمة الله وبركاته ..


:
:



تكلمتي عن موضوع جداً مهم لانه يحطك بمواقف محرجة وفي الغالب تكون في مجالس النساء





برايي المسؤولية تقع على عاتق الوالدين ،، ينبغي تعليم الابناء الكلمات والردود المناسبة لها كما العادات والتقاليد ،، وذلك باستخدامها بشكل مستمر معهم ..

ويُلاحظ ان المنزل الذي يقيم فيه احد الجدين نجد الاحفاد لديهم ذخيرة لغوية





بصراحة لو احد يسالني ولاتعبتوا بقوله لا والله

اما خارجة من الشر مع اني اول مرة اسمعها بس الشر مايجيك >> كلها شر

إقتباس
إلا على الطآري دآيم اذا قابلت وحده تقولي " وحشتيني " فيكون ردي كالعآده الله يسلمك
ومن زمآن ودي أعرف وش يرد الشخص على هـ الكلمة

وحشتيني أكثر

إقتباس
أجدآدنآ " أصآله وحضآره" بآقيه مدى السنين , لن تتأثر بإذن الله بـغُزعبلات " الغرب"
أو حتى بلهجآتهم , التي أصبحت اليوم أشبه ماتكون بـاللغه الرسميه لنآ !!

هل نُحَافظ على هذه " الأَصَآلة والحَضَآرَه " .!

" فقط " أنتَ وأنتِ وأنا من يحدد ذلك

كلام جداً رائع

إقتباس
شطحة <~ هذي الإنسانة تُعآني الآن من حآلة "خوف" غير طبيعيه
عشآن النتيجه " غداً "

الله يطمن قلبك بالي يسركـ يارب


عسيرية ،، اختيار موفق للموضوع غير مستغرب من مبدعة مثلكـ

الف مبروكـ لكـ التميز ورده









اخر تعديل كان بواسطة » الســفيرة في يوم » 01/07/2008 عند الساعة » 06:07 AM
اضافة رد مع اقتباس
  #5  
قديم 28/06/2008, 08:11 PM
موقوف
تاريخ التسجيل: 29/03/2008
المكان: عروس المصايف
مشاركات: 481
مشكووووووووووووورة اختي يعطيك العافية يالغلا بارك الله فيك ...........
اضافة رد مع اقتباس
  #6  
قديم 28/06/2008, 08:26 PM
موقوف
تاريخ التسجيل: 12/04/2007
المكان: المجلس العام
مشاركات: 11,440
و عليكم السلام ورحمة الله و بركاته

هههههههههههههه عسيريه ما عرفتي تردين

أول شي الحمد لله جت على خير


إن ما طحتي هذا أول شي

ثاني شي ما عرفتي تردين هههههههههههه

ومن ناحية الرد ههههههه نصنا ما يعرف يرد و أنا أولهم

و بالتوفيق للنتجية غداً

و حصلت فرصه إني أباركلك على أفضل عضو ألف مبروووك و مزيد من الإبداع ....
اضافة رد مع اقتباس
  #7  
قديم 28/06/2008, 08:33 PM
زعيــم متألــق
تاريخ التسجيل: 05/12/2006
المكان: كول سنتر - موبايلي 1100
مشاركات: 1,213
وعليكم السلام ورحَمة ُ الله وبركاته

فعلا ً هذه ِ العبارات قلــّ تداولها بين الناس

وإن جئنا للحق

فـ أهل المُدن بغالبيتهم تناسوا هذه ِ العبارات

بل إن أكثرهم لايعرفها نهائيا ً

وهي موجوده إلى الآن في القرى

والقليل من أبناء المُدن لازالوا يحتفظون بها ويرددونها في أوقاتها

بل ان البعض الآن لايعلم بإن بعض العبارات هي بالإساس دُعاء للشخص نفسه

فـ مثلا ً ماذكرتي عبارة (( خارج ٍ من الشر ))

هي دُعاء للشخص .. وردُها .. الشر مايجيك

وكما نرى الرد بالدعاء للشخص نفسه

معظم العبارات القديمة لآبائِنا وأجدادنا تحمل قيمة عالية

سواء ً بالدعاء أو غيره


<
اضافة رد مع اقتباس
  #8  
قديم 28/06/2008, 08:37 PM
زعيــم متألــق
تاريخ التسجيل: 20/04/2006
المكان: بيروت - جالس بالسوليدير
مشاركات: 1,457
ـهههههههههههههههههههههـ

فياض لك وجه ترد بعد لو منك اسووي جرية واخليهم يوقفوني

عشان الأعضاء يلتهوون وينسوون هالفضيحة بخخخخخخخخخخخخــ

لي عووودة بعد الصلاة ......

.......

عليكم السلام ورحمة الله وبركاته
هلا بك وخيتي عسيريه وردهقبل كل شي ألف مبرووك أفضليتك تستاهلين ياوخيتي
وهالموضوع خير دليل على تميزك وحسن الأختيار ,,

بصراااحه ماعندي شي أقووله إلا إني فطست ضحك على فياض وبلد الوليد
بعذرهم مايعرفون شي طووول عمرهم وهم عايشين بالأسكيمو

ووبصرااحه ماينلامون ساعات الوااحد ينلخم ومايردي وش يقوول من الربكة
خاااصة لاصار المجلس زحمة والكلام موجه له شخصياً

مووضوعك ذكرني بولد خالتي قدس الله سره كنا بعزاء لوفاة جدي رحمة
الله عليه والجو العام للعزاء يتخالطه الحزن والدموع .. فالمعزين يسلمون ويعزون
فجاء وااحد من المعزين سلم على ولد خالتي وقاله : أحسن الله عزااااك
فرد عليه هالمخفه : عز الله مقامك حزتها كان ودي الأرض تنشق وتبلعني
فيني ضحكه ماقدر اكتمها عاااد تخيلوا الموقف الوجه حزين وفيه شويه دموع
مع ضحكه بخخخخخخخخخخخـــ

فاللي ابي اقوله ساعات الواحد ينسى وينلخم مع إنه يعرف يرد بس الموقف اللي انحط
فيه يجبرك إنك تنسى وساعات الشيبان والعجز يطقطون على مخك بهالكلمات ويخلونك مسخرة لهم الله يطوول بعمرنا شيبانا وعجزنا واللي ماله اول ماله تالي


عسيريه مووضوع حلو ومتميز وخفيف ظل
استمتعنا فيه والحمدلله على سلامة والدتك .. وربي يوفقك ويرزقك النسبة
اللي ترفع راسك وراس أهلك



اخر تعديل كان بواسطة » الغدير الازرق في يوم » 28/06/2008 عند الساعة » 09:47 PM
اضافة رد مع اقتباس
  #9  
قديم 28/06/2008, 09:03 PM
كاتب ساخر بالمجلس العام
تاريخ التسجيل: 21/08/2005
المكان: حيث يعيش الشلولخ
مشاركات: 6,845
إقتباس
ومن الشباب [ أبو طلال , بلد الوليد , abo_nasser , المشاغب ، f*y*d , الكلاسيكي ]

رغم ان الموضوع كله جميل .. وشدني واعجبني .. إلا ان هالكلمة أكثر مااستوقفتني وأثرت علي واسعدتني

أولاً مبروك اخيتي عسيريه إختيار موضوعك هو الموضوع المتميز للشهر الفائت .. وطالعه من الشر

بصراحه موضوع رائع ... وهذا تأكيد على أن الإختيار عادل بخصوص المتميزين .. فهذا الموضوع أكبر دليل وخير شاهد على تميز الأسامي اللتي أختيرت ..

شكرا لك عسيريه ......

والله لايخلينا من شيباننا وعجزنا .. هم راس الماااال

وربي يسعدك ويوفقك .. وينجحك

اخوك الصغير ابو طلال
اضافة رد مع اقتباس
  #10  
قديم 28/06/2008, 09:26 PM
زعيــم متألــق
تاريخ التسجيل: 02/06/2008
المكان: الرياض ’’
مشاركات: 1,042
مشكورررره اختي ع الموضوع الحلو
وحتى احيانناً تصير مواقف معي مثل كذا
اضافة رد مع اقتباس
  #11  
قديم 28/06/2008, 09:58 PM
مشرف سابق بمنتدى المجلس العام
تاريخ التسجيل: 02/12/2001
المكان: حيث الأمل
مشاركات: 5,600
لا شك حتى لا يتم إقصائنا .

أذكر أنني نزلت ضيفاً - مفاجئاً - على أحد الأرحام من عتبية و هو رجل كثير الصلاة و الذكر كان وقتها قد جاوز المائة عام رحمه الله رحمةً واسعةً فلما أن قرّب إليّ و إلى مرافقي العشاءَ قال لنا " هذا الفال و العقال يلحق" .

نظرتُ إلى رفيقي - وهو أقرب إليه رَحِمَاً مني - أبحث عن طرف مساعدةٍ فارتد إلي بصري خاسئاً و هو حسير ، فقلت لنفسي "العوض و لا القطيعة" ، ثم رفعت صوتي لهذا الشيخ الوقور رحمه الله قائلاً " الله يسلمك يا أبو فلان" .

طبعاً هذا ردٌ لا طعم له و لا رائحة ، و يضر و لا ينفع ، خاصةً عند رجلٍ ألف الصرامة و البروتوكول البدوي طوال حياته.

نسيت أن أذكر هنا أنني لمحت بطرف عيني و الشيخ ينظر إلي و إلى رفيقي نظرةَ استغراب و شفقة.


عسيرية ، شكراً لك كثيراً.
اضافة رد مع اقتباس
  #12  
قديم 29/06/2008, 02:35 AM
الصورة الرمزية الخاصة بـ الكلاسيكي
عضو مجلس إدارة الموقع الرسمي
تاريخ التسجيل: 06/04/2003
المكان: دنـيــآي ~
مشاركات: 18,713
وعليكم السلام ورحمة الله وبركاته ..

هلا فيك اختي عسيريه , وألف مبرووك وسام التميز والأفضليه ..

اما عن موضوعك مميز ويستحق الطرح ,
وبالفعل الجيل الحالي تختلف مفردادته عن جيل اجدادنـــا ..
وبحاجه لدروس خصوصيه من اجدادنا لتعليم الجيل الحالي

عني كنت اعاني بدرجه كبيره من هالمشكله , لدرجة اني يصير ماودي
احكي مع كبير لهالسبب , ولكن قبل اكثر من 5 سنوات قررت اتعلم
كل هالكلام من الوالد , ومن اسمع كلمة اسجلها واستفسرعن الرد ..

واذكر اول كلمه وهقتني لمن جاء الوالد من سفر وقالت لي خالت
هناكم العقلان بوالدك ...قلت ممممممم مممممممم الله يسلمك < طوارئ

ياترى وش الرد ؟ اسألي والدك

الف شكر لك اختي عسيريه ,,وتقبلي احترامي وتقديري ..
دمتي بخير
اضافة رد مع اقتباس
  #13  
قديم 29/06/2008, 02:48 AM
الصورة الرمزية الخاصة بـ الـمـشـاغـب
مايسترو المجلس العام
تاريخ التسجيل: 18/02/2005
المكان: كاشت مع ويلهامسون بين المروج :$
مشاركات: 7,060
موضوع حلو كتير ..

ولي عودة ان شاء الله

فياض وبلد .. صبرك صبرك .. سولتان بيحفر قبرك


----------------
باكـ

بصراحة استمتعت بالموضوع وبالردود لما قريتها .. وأعجبي موقف القاضي المحرج

عموماً .. في الغالب هالكلمات مالها كلمات معينة إلزامية .. الأهم في الرد المعنى ..

مثلاً : هذا الفال والعقال يلحق .. ينقال غيرها من الجمل وتكون بنفس المعنى .. وموب شرط كلمة معينة تكون الجواب عليها .. فلو قلت:

كثر الله خيركم وأكرمكم الله , أو مثل هالدعوة عادي الأهم الرد في نفس المعنى ..

بعد كلمة : وحشتيني .. ينقال لها ما تشوفيش وحش .. وينقال الله يسلمك أو الله لا يفرقنا أو أنتي أكثر .. كلها نفس المعنى ..

وبعد كلمة ماجور .. حنا نرد بـ الله يعافيك .. وغيرنا يقول الله يسلمك .. وفيه من يقول .. الله يجيرك .. وكلها تؤدي نفس الغرض ..

لكن فيه بعض الكلمات مالها حل ثاني

مثلاً .. حلقت وقلت نعيماً ... مالها الا تقول : الله ينعم عليك ..

ومثل .. لا تعبتوا ... والرد عليها لا ندمتوا ..

واذا كنت في مجلس ودخل عليكم أحد وقال : سلام نظر <<< يقولها اللي ما بيسلم على الموجودين عشان ما يقومون .. فيروح يجلس ويسألونه عن أحواله .. وغالباً اللي يقولها اما يكون غريب أو يكون المجلس مهم ما يحتمل السلام والانقطاع أو أي سبب آخر ..

والرد عليه حسب سلمنا : ابلغت ..!

وفيه اذا كنت طالع من سجن أو حبس أو ايقاف الله لا يبلانا .. يقال لك يفداك القوم .. الرد عليه .. فدانا وفداك .. أو فداك اللاش ..

واللاش << هو الرخمة اللي موب رجال

بعد فيه كلمات كثيرة في بالي .. وودي أسوي دورة فيها للجيل الثالث أبطال الديجيتال

خاصة بلد وفياض هاللي فاضحيننا بكل مكان .. موب ناقص غير بنطلون الطيحني عشان يصيرون عيال كووول

صح ما نلوم بلد القلق وفياض لأن توهم صغار وما لحقوا على جيلنا <<<
لكن لازم يتعلمون ..

لازم يا بلد أنت وفياض تسألون أهلكم عن هالكلمات عشان تصيرون رجال يعتمد عليكم ..

افرضوا سوينا زيارة لمنتدى الجمهور .. وقالوا لكم مثل هالكلمات .. تبون تفضحوننا قدامهم؟


فضفض وبلد .. أحبكم والله العظيم ولو أنكم دايم تفضحوننا بكل حتة

سي يو عسيرية يا مبدعة ..!

اخر تعديل كان بواسطة » الـمـشـاغـب في يوم » 29/06/2008 عند الساعة » 05:10 PM السبب: عدنا ........!
اضافة رد مع اقتباس
  #14  
قديم 29/06/2008, 03:03 AM
زعيــم مميــز
تاريخ التسجيل: 05/05/2005
المكان: R ! y a d h
مشاركات: 2,831
عسيريه

لكل جيل خصوصيه .. من حيث اللهجه او الكلمات .. وحتى الملبس يختلف من جيل لـ جيل ..
اتذكر عمي الله يسكنه الجنه .. كان كبير في السن .. وكنت استمتع وانا جالس معاهـ خصوصاً اذا كان يقول لي عن قصصه القديمه .. لكن بعض الاحيان يجي عندنا رجال كبار في السن .. ويقعدون يسولفون .. ومحمد المسكين ما يدري هم يسوفون والا يسبونه .. قصماً ان ام مخي متقلبه


## في رأس كل شهر نجتمع انا واخوياي في العمل ..في استراحه او مزرعه او حتى كشته .. المهم كان ذاك اليوم اجتماعنا عن ..( غامدي .. انا قعدت اسولف معه بـ مصطلحات بدويه قحه وقال لي كلمه من كلمات اهل الجنوب .. الى هـ اليوم وانا ما اعرف معناها فـ يا ليت اللي يعرف معناها يقول لي .. اخاف تكون حاجه مش كويسه الكلمه اهي ][ ودعوا والتقفوا ][ ، ويا المشرفين ترا والله ما اعرف وش معنى الكلمه لا تكون موب زينه والا شي <<=======# بيتوهق

[ بلد الوليد ، f*y*d ]

هههههههههههههههههههههههههههههههههههههههههههههههههههههههههههه

كانوا بيشاركون في الموضوع .. ما دروا ان ما عندهم الا الدجه


إقتباس
الرسالة الأصلية كتبت بواسطة القاضي
" هذا الفال و العقال يلحق" .

ابو عبدالله معنى الجمله : ان الرجال جاب لكم الاكل .. وقال هذا موب قدركم .. قدركم اكبر .. وان الرجال بـ يعشيكم ..
اتمنى اني وضحت لك الكلمه .. حسب فهمي لها في مجالسنا ..


وفيه جمله قريبه من هذي

تقول هذا الفال ويقفاهـ العقال اي تعش او تغد .. والضرب بعد العشاء
---||-------------||---

موضوع شيق ومفيد واتمنى ان نخرج من الموضوع بعدد كاف من الكلمات يكفينا الاحراج امام شيابنا

عسيريه .. ماجورهـ ورده
اضافة رد مع اقتباس
  #15  
قديم 29/06/2008, 03:33 AM
زعيــم مميــز
تاريخ التسجيل: 19/10/2006
المكان: شبكة الزعيم
مشاركات: 2,167
يا مرحبا ًأختي عسيريه ..
الله يعطيك العافية على الموضوع ..
أنا أقدر الجلسة مع الشيبان وأسمع سواليفهم ..
تمر علينا في أحيان كثيرة كلمات قديمه جداً ولا نعرف معناها .. حتى ولانفكر. .

أعتقد أنها علم ثمين .. وأستغرب عدم وجود كتب عنها ..

الله يعطيكـ العافية عسيريه .. وأتمنا لكـ التوفيق في دنياكـ وآخرتكـ ..

فياض : وسع صدركـ ..

إقتباس
ودعوا والتقفوا :


أظن أن معناها استروا ماواجهتوا
اضافة رد مع اقتباس
   


إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 07:28 AM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2019, Jelsoft Enterprises Ltd

Google Plus   Facebook  twitter  youtube